1. E teianei, kia oti ta Niphai tuatua anga i teia nei au mea, e au akavanui tetai no roto mai i taua pupu ngaro o Katianetona, riri akera ratou, e kua patoi atura iaia, na ko atura ki te au tangata: Eaa kotou i kore ei e opu i teia nei tangata, ka apai mai ei iaia ki konei, e kia akaapaia atu aia kia tau ki tana i rave?

2. Eaa kotou i akara uaʼi i teianei tangata, ma te akarongo atu iaia i te akakino anga mai i teianei au tangata, e ta tatou au ture?

3. I na, kua tuatua ana rai oki a Niphai, no runga i ta tatou au ture. Ae, e maata te au tuatua ta Niphai i akakite atu, i tei kore i tataia, e kare rava ana mea i tuatua ei akatuke i te ture a te Atua.

4. E kua riri akera taua au akava ra kiaia, no tei akakite marama ua aia kia ratou i ta ratou angaanga ngaro e te poiri, kare ra oki e rauka ia ratou kia tuku atu i to ratou rima ki runga iaia, te mataku ra oki ratou i te tangata, ko te akaapa mai aea ia ratou.

5. No reira, kua kapiki atu ratou ki te au tangata, na ko atura, Eaa kotou i akatikaʼi teia tangata kia akakino mai ia tatou. E i na, te akaapa nei aia i te katoatoa o te tangata e tae ua atu ki te akapou takiri anga, e tera oki tetai, ka akakoreia to tatou au oire mamaata, e kare o tatou ngai i roto ra.

6. E teianei, te kite nei tatou e, kare e tika, e i na, e maroiroi tatou, e oire maata oki to tatou, no reira, kare o to tatou enemi mana ki rungao ia tatou.

7. E kua taoriori akera ratou i te ngakau o te tangata kia riri kia Niphai, e kua akatupu iora i te tauetonoanga i rotopu ia ratou. Te vai katoa ra tetai pae ko tei kapiki atu e, akaruke ua atu i tenana tangata, e tangata meitaki aia, e te au mea tana i tuatua, e tika ïa kia kore tatou e tataraara.

8. E tika, ka tae mai te akautungaanga ki runga ia tatou, mei tana i akakite mai kia tatou, kua kite matou e, e tika tana i tuatua no runga i ta matou au ara e e manganui oki te reira, e kua kite oki aia i te au mea ravarai, te ka tae kia tatou, mei tana i kite i ta tatou au ara.

9. E tika oki, naringa e kare aia i te peroveta, kare e rauka iaia kia akakite mai i teia nei au mea.

10. E ko te aronga tei kimi i te mate no Niphai kua emi akera ratou i te mataku, kare atura ratou i amiri atu iaia, i reira, kua tuatua akaou aia kia ratou, no tei arikiia mai aia e tetai pae tangata, ko te toenga i reira, te noo mataku ua ra.

11. No reira kua akaueia mai aia kia tuatua atu kia ratou, E teianei e aku au taeake, kare ainei kotou i tatau ana e, kua oronga te Atua i te mana ki te tangata okotai, koia kia Mose kia ta i te tai muramura, e kua taka ke tetai nia mei tetai, i reira oki to tatou ai metua te ngati Iseraela i te aereanga na roto i te tai, na runga i te one maro, e kua topiri mai te tai ki runga i te au vaeau Aiphiti, e kua apukuia atu ratou.

12. E teianei, me kua oronga te Atua i te mana ki teia tangata, eaa iora te tauetonoanga i rotopu ia kotou na ka tuatuaʼi e, kare e mana i orongaia mai kiaku nei, e kite ei au, no runga i te akautungaanga te ka tae mai ki runga ia kotou, mari ra kia tataraara kotou?

13. Ina ra, kare oki kotou i patoi ua mai i taku nei tuatua, mari ra, kua patoi katoa kotou i te au tuatua katoa tei tuatuaia mai e to tatou ai metua, e te tuatua oki tei tuatuaia mai e teia tangata, ko Mose oki, ko tei orongaia te mana maata kiaia, koia oki, te tuatua tana i tuatua no runga i te taeanga mai o te Mesia.

14. Ae, kare ainei aia i karanga ana e, ka tae mai te Tamaiti a te Atua? E mei iaia i akateitei i te ovi veo i te metepara, koia katoa te ka tae mai, ka akateitei katoaia ïa.

15. E ko te aronga te ka akara ki runga i taua ovi ra, ka ora ïa, ka pera katoa te aronga ka akara ki runga i te tamaiti a te Atua ma te akarongo, ma te vaerua paruparu, ka ora, i na, ki taua oraanga mutu kore.

16. E teianei, kare oki a Mose i akapapu mai i teia au mea nei, mari ra, ko te au peroveta tapu pouroa, mei taua tuatau ra, e tae ua atu ki te au ra o Aberahama.

17. E teianei, kua kite ana a Aberahama i tona aereanga mai, e kua ki akera i te rekareka, e mataora atura.

18. E teianei, te karanga atu nei au kia kotou, kare e ko Aberahama ua tei kite i teianei au mea, ina ra, e manganui te aronga i mua atu i te au ra o Aberahama, ko tei kapikiia ki te akaaereanga a te Atua, e i te akaaereanga o tana Tamaiti, e ko teia, kia akaariia ki te tangata e manganui ake te tausani anga o te mataiti i mua ake ka tae mai ei aia e, ka tae mai oki te akaoraanga kia ratou.

19. E teianei, te inangaro nei au kia kite kotou, i te au ra o Aberahama e manganui te au peroveta tei akakite mai i teianei au mea, i na, kua akakite papu te peroveta a Zenosa ma te maroiroi tikai, no reira oki aia i tamateiaʼi.

20. E i na, koia katoa a Zenoko, e Esaisa, e pera katoa a Isaia, e Iere mia oki, ko taua Ieremia oki tei totou e, ka uritumuia a Ierusalema, e teianei te kite nei tatou, e kua uritumuia a Ierusalema kia tau ki ta Ieremia i tuatua mai. Aue oki, e eaa i reira te Tamaiti a te Atua e kore ei e aere mai, mei tana oki i totou?

21. E teianei ka karanga ainei kotou e, kare a Ierusalema i akapouia? Ka karanga ainei kotou e, kare te au tamariki a Zedekia i taiaia mari ra ko Muleka ua? Ae, kare ainei kotou i kite i te uanga o Zedekia e tei rotopu ia tatou nei, e kua arumakiia ki vao i te enua ko Ierusalema? Ina ra, kare e ko te reira anake ua.

22. Kua arumakiia to tatou metua ko Lihai ki vao, no tei akakite oki aia i teia au mea nei. Kua akakite katoa a Niphai i taua au mea nei, e pera katoa e vaitata e ko to tatou au metua katoatoa, e tae rava ki teia tuatau nei, i na, kua akakite ratou i te aereanga mai o te Mesia, e kua akara atu ki mua, e kua rere ua i te rekareka i tona au ra i te aereanga mai.

23. E i na, ko te Atua aia, e tei ia ratou oki aia, e kua akakite aia iaia uaorai kia ratou, e ka akaora oki aia ia ratou, e kua akakaka oki ratou iaia, no te au mea te ka tupu a muri atu.

24. E teianei, kua kite kotou i teia au mea nei, e kare e rauka kia akakore i te reira, mari ra, kia pikikaa atu, e no reira, kua ara oki kotou, kua patoi oki kotou i teia nei au mea, ma te akangaropoina i te au tikaanga tei rauka ia kotou, i na, kua rauka ia kotou te au mea ravarai, to te rangi, e te au mea ravarai i te enua nei, ei kite no te reira e, e tika.

25. Ina ra, kua patoi kotou i te tika, e kua maro atu ki te Atua, e teianei, kare kotou e akaputu i te au mea meitaki ravarai na kotou uaorai ki te rangi, i te ngai kare e pe, i te ngai kare e taea e te au mea viivii, ina ra, te akaputu nei kotou ki runga ia kotou uaorai i te riri otooto no te ra o te akavaanga.

26. E teianei, te tupu mai nei kotou kia tau i te mate mutu kore no ta kotou au ta anga tangata e ta kotou akaturi e te au angaanga viivii; e kia kore kotou e tataraara, ka tae vave mai te reira ki runga ia kotou.

27. I na, tei te ngutupa ïa, e aere tika atu ki te nooanga akavaanga, ka kimi ei, e i na, kua taiaia to kotou akavanui e te takoto ua ra aia i roto i tona uaorai toto, e kua taiaia aia e tona teina, ko tei noinoi e kia riro iaia te nooanga akavanui.

28. E i na, no roto mai anake raua i taua pupu ngaro, ko to ratou pu oki ko Katianetona, e taua tangata kino ra, ko tei kimi i te mate no te au tangata nei.