1. E teianei, e manganui tei akarongo i te tuatua a Samuela te ngai Lamana, tei tuatua mai mei runga i te patu o te oire. E ko tei akarongo ra, kua kimi akera ia Niphai, e kia kitea aia e ratou ra, kua aaki iora i ta ratou au ara ki mua iaia, e kare oki i patoi akaou, e kua inangaro oki e kia bapetizoia ratou ki te Atu.

2. Kareka ra, tei kore i inangaro kia akarongo i te tuatua a Samuela, kua riri ratou kiaia, e kua pei akera iaia ki te toka i runga i te patu, e manganui oki tei ana atu iaia i tona tu ua anga i runga i te patu, ina ra, tei iaia te Vaerua o te Atua, no reira, kare atura aia i pakia e te toka e te kakao ana katoa.

3. I teianei, kia kite ratou i te reira, e kare e rauka ia ratou kia ta atu iaia, kua akarongo maira tetai pae ki tana tutua, e kua aere atura kia Niphai kia bapetizoia ratou.

4. E i na, te bapetizo ua ra a Niphai, e ma te totou, e te ako ra, i te kapiki anga ki te au tangata e, e tataraara, kia kite oki ratou e, te vaitata maira te aereanga mai o te Mesia.

5. I te akakite anga kia ratou i te au mea e vaitata rava i te tae mai e kia kite oki ratou, kia akamaara i te tuatau e tae ei mei tei akakite takereia kia ratou, no reira ko te aronga i akarongo i te tuatua a Samuela, kua aere atura kiaia kia bapetizoia, kua aere mai oki ratou ma te tataraara, e te aaki anga i ta ratou au ara.

6. Kareka te tuanga maata ia ratou, kare ratou i akarongo i te au tuatua a Samuela, no reira kia kite ra ratou, e kare e rauka ia ratou kia ta iaia, kua kapiki atura ratou ki to ratou rangatira, na ko atura, E rave mai iaia e tapeka, e i na, e tiaporo oki tona, e no te mana oki o te tiaporo i roto iaia, no reira kare e mate ia tatou i te toka, e te ana, no reira, e rave atu iaia, e tapeka atu, e apai ke atu iaia.

7. E te aere atura ratou e opu iaia, kua rere maira aia mei runga mai i taua patu ra, e kua oro ke atura ki vao mai i to ratou enua, ae, ki tona enua tikai, e kua akamata akera i te ako e te totou ki roto i tona ra iti tangata tikai.

8. E i na, kare rava aia i rongo akaouia ki roto i te ngati Niphai, ko teia oki te tuatua no te au tangata nei.

9. E ope akera te varu ngauru ma ono o te mataiti i te tutaraanga o te au akava i rungao i te au tangata o Niphai.

10. E ope katoa iora te varu ngauru ma itu o te mataiti, i te tutaraanga o te au akava, ko te tuanga maata o te au tangata, te noo ra ratou i to ratou parau, e te viivii, kareka te tuanga meangiti te aere ra ratou ma te tiratiratu i mua i te aroaro o te Atua.

11. Ko to ratou akanoo anga teia i roto i te mataiti varu ngauru ma varu i te tutaraanga o te au akava.

12. E i roto i te varu ngauru ma varu o te mataiti i te tutaraanga o te au akava, kare e tuke maata, mari ra, kua akamata te tangata kia marokiakia i te rave anga i te ara, e te au mea tei kore i tau i te akaueanga a te Atua.

13. Kareka kia tae ki te iva ngauru o te mataiti i te tutaraanga o te au akava kua orongaia mai tetai au akairo mamaata ki te au tangata, ma te au mea umere, e i na, kua akamata iora te tuatua a te peroveta i te tupu.

14. Kua mama maira te au angela ki te au tangata kite pakari, e kua akakite maira kia ratou i te tuatua meitaki o te rekareka maata; ei roto in teianei mataiti i akamataʼi te tupu i te au tuatua i tataia ra.

15. Ina ra, te tupu maira te marokiakia o to ratou ngakau, mari ua ko te tuanga tei mou i te akarongo o te ngati Niphai e te ngati Lamana, e kua akamata ratou kia irinaki ki to ratou uaorai maroiroi e to ratou uaorai pakari i te na ko anga e,

16. Te vai ra tetai au mea ka tika i to ratou manako anga i rotopu i teia au mea e manganui, kareka i teianei, te kite nei tatou e kare teia au angaanga umere e tupu mei tei tuatuaia.

17. E kua tupu akera to ratou tauetono anga tetai ki tetai, i te na ko anga e,

18. Kare rava e tau e kia aere mai tetai tangata mei te Mesia, e mei te mea e tika, e tamaiti aia na te Atua, te Metua o te rangi e te enua nei, mei tei tuatuaia, eaa i reira aia i kore ei e akaari mai iaia kia tatou nei, mei ia ratou oki tei noo ki Ierusalema ra?

19. Ae, eaa oki aia i kore ei e akaari mai iaia kia tatou i teianei enua, mei tana oki e akakite iaia uaorai ki te enua i Ierusalema?

20. Ina ra, te kite nei tatou e tuatua kino rava teia, tei apiia mai kia tatou e to tatou ai metua, ei tumu no tatou e irinaki atu ei ki tetai au mea umere te ka tupu a muri atu, eiaa ra i rotopu ia tatou nei mari ra, ei te enua mamao, ki tetai enua kare tatou i kite ana, ei reira ratou ka akapoiri ua mai ei ia tatou, no te mea, kare oki e rauka ia tatou i te akara mata kia kite tatou e, e tika.

21. E na roto i te ravenga pakari, e te tamoemoe a te vaerua kino, ka rave ua i te au angaanga ngaro kia kore tatou e marama i te akakauraro ua ia tatou ki raro i ta ratou au tuatua, e kia tavini atu tatou kia ratou, no te mea, ka irinaki atu kia ratou ei apii ia tatou i te tuatua, e me akatika tatou, ka na reira ratou i te akapoiri ia tatou i te au ra o to tatou oraanga nei.

22. E manganui ua atu rai te au mea ta te tangata i akamanako i roto i to ratou ngakau, tei riro ei mea neneva e te puapinga kore, e kua kino tikai ratou, no te mea, te taoriori ra a Satani ia ratou, kia rave maro ratou i te kino, ae, kua aere atu aia na mua ia ratou kia totoa i te rongo o te pekapeka ki runga i te enua katoatoa, kia raukaʼi iaia te akamarokiakia i te ngakau o te au tangata, kia patoi atu i te mea meitaki te ka tae mai.

23. E kua akangaropoina i te au akairo e te au mea umere tei raveia i rotopu i te au tangata o te Atua, e te au semeio e manganui ta ratou i rave, kua rauka ra ia Satani te ngai maata rava i roto i te ngakau o te au tangata i runga i te enua katoa.

24. E ope iora nga mataiti e iva ngauru i te tutaraanga o te au akava i rungao i te au tangata o Niphai.

25. Ko te openga oki teia i te puka a Hilamana, mei tei tataia i te akapapaanga o Hilamana e tana au tamariki.