1. E kia tae akera ki te a ngauru ma toru o te mataiti i te tutaraanga o te au akava, kare rava e tauetonoanga i rotopu i te au tangata o Niphai, mari ua ra e mea ngakau parau tei roto i te akonoanga, na te reira i akatupu i tetai manga pekapeka i rotopu i te au tangata, kua au ra te reira kia tae te openga o te a ngauru ma toru o te mataiti.

2. Kare katoa e tauetonoanga i te a ngauru ma a o te mataiti, i rotopu i te au tangata, e kare katoa i maata i te a ngauru ma rima o te mataiti.

3. E kia tae akera ki te a ngauru ma ono, kua maata rava te tauetonoanga, e manganui tikai te akatupuanga pekapeka, e tera oki tetai, e manganui tikai tei taka ke atu ki vao mai ia Zarahemela, e kua aere atu ki te enua ki tokerau noo ei.

4. E mamao tikai to ratou aereanga, e kua tae akera ratou ki te ngai mamaata to reira vai e e manganui te au kauvai.

5. I na, kua akapararauare ia ratou ki te au tuanga ravarai o taua enua ra, ki te au tuanga kare i akataneaia e ma te kore e rakau, no te au tangata e manganui tei noo ana ki reira.

6. E teianei, kare te enua i akataneaia, mari ua ra ko te rakau, ina ra, no te maata rava o te mate o te tangata, tei noo ana ki reira i mua ana, i karangaiaʼi e, kua akataneaia.

7. E meangiti ua te rakau i runga i te aro o te enua, kareka ra te au tangata tei na mua mai, e aronga kite tikai ratou i te angaanga timeni, no reira, ko to ratou are i noo ei, e mea patuia ki te timeni.

8. Kua tupu akera ratou e kua pararauare e kua aere atu mei te enua ki tonga ki te enua ki tokerau, kua pararauare rava ratou e kua akamata kia kapi te enua katoa mei te tai ki tonga, ki te tai ki tokerau, mei te tai ki te opunga, ki te tai ki te itinga.

9. E ko te au tangata tei noo ki te enua ki tokerau, e noo ana ratou ki roto i te are kie, e te au are timeni, e kua inangaro maata tikai ratou i te au rakau kia tupu mai ki runga i te enua, kia rauka tetai rakau na ratou ei maani are, i na, to ratou au oire, e to ratou au iero, e to ratou au sunago, e to ratou au ngai tapu, e tetai atu au tu are ta ratou i inangaro kia akatu.

10. E no te mea kua ngere tikai ratou i te rakau i te tuanga ki tokerau, kua tuku atu ratou i te au pai ei tari mai i te reira.

11. E no reira kua rauka i te au tangata, i te enua ki tokerau kia akatu i te au oire e manganui, ki te rakau e te timeni.

12. E i na oki, e manganui tikai te au tangata o Amona, e ngati Lamana ratou i te anau anga, tei aere katoa ki teia enua nei.

13. E teianei, e maata te au akapapaanga no runga i te au mea tei raveia e teia au tangata, tei tataia e tetai au tangata e manganui. E au papaanga mamaata e te tuke te reira no runga ia ratou.

14. Ina ra, kare e tataia te anere anga o te au mea tei raveia e teia au tangata, koia oki te tuatua o te ngati Lamana e to te ngati Niphai, e ta ratou tamaki, te karo, te akatupu pekapeka, e ta ratou ako anga, e ta ratou au totou anga, e, to ratou akateretereanga i to ratou pai, e to ratou maani anga i te au pai, e to ratou akatu anga i te au iero, e te sunago, e to ratou ngai tapu, e ta ratou tuatua tika, e to ratou kino, ta ratou ta tangata, ta ratou keia apinga, e ta ratou noni, e te au mea viivii ravarai, e te moeana.

15. Kareka i teianei, e manganui te au puka, e manganui te au papaanga o te au tu ravarai, e na te ngati Niphai rai i akono ana i te reira.

16. Kua orongaia mai te reira, mei tetai uki, ki tetai uki e te ngati Niphai, e tae ua atu ki te taime kua topa ratou ki roto i te ara e kua taiaia ratou, takinga kinoia, kimiia, arumakinaia tamateia, e kua akapueurikiriki keia ki runga i te aroaro o te enua, e kua iro ki roto i te ngati Lamana, e tae ua atu ki te ngaro ke anga e kare e tuatuaia e ngati Niphai, kua riro ratou ei aronga kino, e te taae, e te takinga kino, i na, kua riro oki ratou ei ngati Lamana.

17. E teianei, te oki akaou nei au ki taku uaorai tataanga, no reira ko taku oki i tuatua ana, kua tupu te reira i muri ake i te karo e te manamanata, te kai tamaki, e te pekapeka i rotopu i te au tangata o Niphai.

18. E oti akera te a ngauru ma ono o te mataiti o te au akava.

19. Te vai ua rai te pekapeka i roto i te enua e i na, e tae ua atu ki te mataiti a ngauru ma itu, e pera katoa te mataiti a ngauru ma varu.

20. Ina ra, kua noo rai a Hilamana ki te nooanga akavanui ma te tika e te tau, e i na, kua akono aia i te au ture, e te akavaanga, e te au akaueanga a te Atua, e kua rave tamou aia i te au mea tei tau ki mua i te aroaro o te Atua, e kua aru rai aia i te arataa o tona metua, e no reira, kua riro aia ei tangata puapinga i te enua nei.

21. E i na, e rua ana nga tamariki tamaroa. Kua topa aia i te tuakana ko Niphai, e te teina oki ko Lihai. E kua tupu kapipiti atura raua na te Atua.

22. Kua akamata akera te au tamaki, te au pekapeka i te akaoti, i tetai manga iti ua, i rotopu i te au tangata ngati Niphai i te openga o te mataiti a ngauru ma varu i te tutaraanga o te au akava, i rungao i te au tangata o Niphai.

23. E tae akera ki te ā ngauru ma iva o te mataiti i te tutaraanga o te au akava te vai rai te au i te enua, mari ra, ko te pupu keikeia ta Katianetona i akatupu i roto i te tuanga o te enua tei nooia ana e te tangata. E kare oki ratou i kitea e te au akaaere o te kavamani i te reira tuatau, no reira kare ratou i takoreia i te enua nei.

24. E i taua mataiti nei rai, e manuia maata to roto i te akonoanga, i na oki, kua tausani te tangata tei tomo ki roto i te akonoanga, e kua bapetizoia ratou ma te tataraara.

25. E maata tikai te manuia o te akonoanga, e manganui katoa te au akameitakianga tei ringiaia mai ki runga i te au tangata, e kua poitirere tikai te au taunga e te au puapii.

26. Kua puapinga tikai te angaanga a te Atua, e kua bapetizo e kua kapiti atu ki te akonoanga a te Atua, te au tangata e manganui, e tikaʼi, kua ngauru te tausani.

27. No reira, te kite nei tatou i te aroa o te Atua ki runga i te aronga tiratiratu te ngakau, tei kapiki atu ki tona ra ingoa tapu.

28. E tika oki, te kite nei tatou i te ngutupa o te rangi i te eeuangaia kia ratou pouroa, e ratou katoa tei irinaki ki te ingoa o Iesu Mesia koia te tamaiti a te Atua.

29. E i na oki, te kite nei tatou e, no atu e koai te ka mou i te tuatua a te Atua, ko tei viviki e tei vai ki rotopu i te au angaanga neneva, e te au puereere, e te au akavareanga a te tiaporo, e ka arataki i te au tangata o te Mesia ki te ara tika e te kokota, na runga ake i te mareva mutu kore tei akonoia kia ariki i te aronga kino.

30. E kua noo oki to ratou vaerua, e tika, to ratou vaerua mate kore ki te rima katau o te Atua, i roto i te basileia o te ao, kia noo katoa kia Aberahama, e Isaaka, e Iakoba, e ma to tatou au metua tapu pouroa, kia kore e aere akaou atu ki vao.

31. E i roto i teia mataiti nei, kua vai rai te rekareka ki roto i te enua ko Zarahemela, e te au oire e takapini ua ake, koia oki, ki roto i te au oire tei rauka mai i te ngati Niphai.

32. E kua vai rai te au e te rekareka maata i te toenga o te mataiti a ngauru ma iva, e tika rai, kua vai rai te au e te rekareka maata i te mataiti rima ngauru i te tutaraanga o te au akava.

33. E i te rima ngauru ma tai o te mataiti i te tutaraanga o te au akava, te vai rai te au, mari ra, kua tomo mai te ngakau parau ki roto i te akonoanga, kare ra i roto i te akonoanga a te Atua mari ra ki roto i te ngakau o te tangata, tei karanga e, no te akonoanga ratou a te Atua.

34. E kua riro ua atu ratou ki te ngakau parau, te takinga kino oki i to ratou au taeake. E teianei e kino maata teia, kua tae rava teia takinga kino ki te tuanga o te aronga maru, kia aere ratou na roto i te au tumatetenga e manganui.

35. Ina ra, kua akakore ratou i te kai, ma te pure putuputu, e kua tupu to ratou maroiroi ki te maata na roto i te akaaka, e kua tupu to ratou akarongo ki te Mesia ki te maata kia rekareka to ratou ngakau, ina, kua ki katoa to ratou ngakau i te rekareka e te pumaana no tei tuku atu i to ratou ngakau ki te Atua.

36. E kua ope akera te mataiti rima ngauru ma rua ma te au, maru ua ra, ko te ngakau parau tei o ki roto i te ngakau o te au tangata no te mea, kua apinga nui ratou, e kua manuia maata ratou i roto i te enua e kua tupu te reira kia ratou i tera ra, i tera ra.

37. E tae akera ki te rima ngauru ma toru o te mataiti i te tutaraanga o te au akava, e kua mate a Hilamana, e kua riro tana tamaiti mataiapo ko Niphai ei akaaere i tona ngai. Kua noo aia ki te nooanga akavanui ma te tuatua tika e te tau, e tika, kua akono aia i te akaueanga a te Atua, e kua aru i te au mataara a tona Metua.