1. Tei taua mataiti rai, i na, i tuku atu ei a Niphai i te noo anga akavanui ki tetai tangata ko Titoroma tona ingoa.

2. Kua akamouia ta ratou ture e to ratou kavamani e te vaa katoa o te tangata, e ko tei rave i te kino ra, e maata atu ia ratou i tei rave i te meitaki, no reira kua tau ratou no te mate, kua akaatikau oki ratou i te ture.

3. E tika, kare e ko te reira anake ua, e aronga kaki marokiakia oki ratou, e kare ratou e inangaro i te kauraro i te ture e te tuatua tika, mari ra, kia mate atu.

4. I na, kua roiroi rava a Niphai, no ta ratou au ara, no reira aia i tuku atu ei i te nooanga akavanui, e kua aere akera i te ako aere i te tuatua a te Atua, e tae ua atu ki te toenga o tona au ra ma tona teina katoa ko Lihai.

5. Te akamaara ua ra raua i te tuatua a to raua metua ko Hilamana kia raua. E teia oki tana i tuatua mai.

6. I na, e aku nga tamariki, te anoano nei au, e kia akamaara korua i te akono i te au akaueanga a te Atua, e te anoano katoa nei au kia akakite korua ki teianei au tangata i teia tuatua, i na, kua oronga atu oki au kia korua i te ingoa o to tatou nga metua mua, tei aere mai mei te enua ra mei Ierusalema, e ko taku oki teia i rave e kia akamaara korua i to korua ingoa, ka maara katoa ia korua ia raua, e me maara oki korua ia raua, ka maara katoa ia korua ta raua angaanga, e me maara ia korua ta raua angaanga, ka kite korua i reira i tei tuatuaia e tei tataia, e nga tangata meitaki raua.

7. No reira, e aku nga tamariki, te anoano nei au, e kia rave korua i te mea meitaki ra, e kia tuatuaia korua, e kia tataia, mei tei tuatuaia ana e tei tataia no runga ia raua.

8. E teianei e aku nga tamariki, i na, te maata nei rai tetai au mea taku i inangaro ia korua, teia oki tetai, auraka rava korua e rave i teia nei au angaanga ei akapaapaa anga na korua, mari ra, kia rave korua i te reira ei akaputu i tetai apinga meitaki na korua ki te rangi, ae, te ngai mutu kore, te ka kore rava e ngaro ke, koia ia, e kia rauka oki ia korua taua orongaanga meitaki rava ra, ko te ora mutu kore mei tei orongaia oki ki to tatou ai metua ra, ko ta tatou e manakonako nei.

9. Aue e akamaara, e akamaara, e aku nga tamariki, i te tuatua ta te ariki ta Beniamina, i akakite ki tona au tangata, i na, e akamaara, e kare rava e mataara ke e oraʼi te tangata nei, mari ra, na roto i te toto tarangaara o Iesu Mesia te ka tae mai; i na, e akamaara ka tae mai aia e ka akaora i te ao nei.

10. E akamaara katoa i te tuatua ta Amuleka i tuatua kia Zezorama, i roto i te oire ko Amoniha, kua na ko atura aia kiaia, ka tae mai tikai te Atu e akaora i tona au tangata, ina ra, kare aia e aere mai e akaora ia ratou i roto i ta ratou au ara, mari ra kia akaora ia ratou mei ta ratou au ara.

11. E mana oki tei orongaia mai kiaia mei te Metua mai, ei akaora ia ratou mei ta ratou au ara, ko tei tataraara, no reira aia i tono mai ei i tana au angela ei akakite i te tuatua mou no te tataraara, ko te ka apai mai i te mana o te Akaora e oraʼi to ratou vaerua.

12. E teianei, e aku nga tamariki, e akamaara, e akamaara e, tei runga i te papa o to tatou Akaora, koia oki te Mesia, te tamaiti a te Atua e patu ei korua i to korua tango, e me tuku mai te tiaporo i tona matangi ririnui, e tana koke ki roto i te puaioio, e kia topa mai te ua toka e te uriia ki runga ia korua, kare rava o te reira e mana kia kika ia korua ki raro i te mareva, e mamae ei i te mamae mutu kore, no te papa oki tei patuia e korua, e papa tika ïa, ko te papa ïa me ka inangaro te tangata i te patu, kare rava ratou e inga.

13. Ko teia oki te au tuatua ta Hilamana i apii atu ki tana nga tamariki, i na, kua apii tikai aia ia raua ki te au mea e manganui, tei kore i tataia, e tetai au mea e manganui, tei tataia.

14. Kua akamou rai raua i tana au tuatua, e i reira kua aere atu raua ma te akono rai i te au akaueanga a te Atua, ma te apii i te tuatua a te Atua, ki rotopu i te au tangata o Niphai, e kua akamata raua ki te oire ko Bounetifula.

15. E mei reira atu ki te oire ko Kiti, e mei Kiti atu, ki te oire ko Muleka.

16. Kua aere raua mei tetai oire ki tetai, e takapini ua ake raua i te tuanga enua tei nooia e te ngati Niphai koia te tuanga enua ki tonga e mei reira, ki te enua ko Zarahemela ki ko i te ngati Lamana ra.

17. Kua ako ua atu raua ma te mana maata, e kua taakama atu i te manganui anga o te aronga orureau, tei aere ke atu mei te ngati Niphai, i na, kua aere maira ratou, e kua aaki i ta ratou au ara, e kua bapetizoia iora ma te tataraara, e kua oki tika atura ratou ki te ngati Niphai kia tamata kia akakore i ta ratou au mea kikino i rave ana.

18. Kua ako atura Niphai e Lihai i te ngati Lamana ma te mana maata e te tika, no te mea, e tika anga oki to raua e te mana, tei orongaia mai kia raua kia tuatua, e kua oronga katoaia kia raua te mea ta raua ka tuatua.

19. No reira kua tuatua atu raua e kua umere maata te ngati Lamana, no tei akaariuia mai ratou, e kua bapetizoia ratou no te tataraara, i na, e varu tausani te katoaanga o te ngati Lamana tei noo ki te enua ko Zarahemela, e kua akaariuia mai, mei te au angaanga kikino a to ratou au metua ra.

20. E mei reira atu, kua aere atu a Niphai e Lihai ki te enua ko Niphai.

21. E kua apainaia atu raua e te vaeau o te ngati Lamana e kua tiria atu ki roto i te are tapekaanga, e tika, ko taua are tapekaanga rai, i uriiaʼi a Amona e tona au taeake e te au tavini o Limihai.

22. E i muri akera i to raua uri angaia ki roto i te tapekaanga no tetai au rā e manganui ma te kore e kai, e i na, kua aere maira ratou ki roto i te are tapeka anga kia rave ia raua e ta.

23. E kua koropiniia iora a Niphai e Lihai e te ai, kare atura ratou i tuku ua atu i to ratou rima kia raua, ko te pakapaka aea i te ai. Ina ra, kare a Niphai e Lihai i pakapaka, e te tu ua ra raua i rotopu i te ai, e kare rava raua i ka.

24. E kia kite ra ratou e, kua koropiniia raua e te ai, e kare rava raua i ka, kua maroiroi akera to raua ngakau.

25. Kua kite oki raua e kare e rauka i te ngati Lamana i te opu mai ia raua, e kare rai e rauka kia akavaitata mai kia raua, kua tu ua ra ratou mei te mea rai e, kua murareia ratou e kua umere.

26. E i na, kua akamata iora a Niphai e Lihai i te tuatua kia ratou i te na ko anga atu e, auraka e mataku, i na, ko te Atua oki teia e akaari atu nei kia kotou i teianei semeio, i akaari atu ei kia kotou kia kore oki kotou e opu mai ia maua e ta.

27. E i na, kia oti ta raua tuatua anga i teia nei au tuatua, kua ngaueue akera te enua, e kua rurutakina iora te patu o taua are tapekaanga ra, mei te mea ra e, te pururu atura ki te one, ina ra, kare rava i inga. E i na, ko ratou oki tei noo ki roto i te are tapekaanga ra, ko te aronga orureau te reira o te ngati Lamana e te ngati Niphai.

28. E kua tapokiia ratou e tetai tumurangi kerekere, e kua tae mai te mataku rikarika ki runga ia ratou.

29. Kua tae maira tetai reo, mei te mea ra e, no runga mai i taua tiao poiri ra, i te na ko anga mai e, E tataraara kotou e auraka e kimi akaou i te ravenga e mate ei toku nei au tavini taku i tono atu kia kotou na kia akakite atu i te tuatua meitaki kia kotou.

30. E i na, kia rongo ratou i teia reo, e kite akera, e kare i te reo o te mangungu, e kare oki i te reo maniania parara maata, mari ra, e reo iti ua ïa, e te maru oki, e mei te mea ra e, te koumuumu ua ra, ina ra, kua puta rava te ngakau.

31. E no atu e maru oki te reo, i na, i ngaueue ei te enua, e i rurutakinaʼi te patu o te are tapekaanga, e mei te mea e, ka pururu ki te one, e i na, te tiao poiri tei tapoki ki runga ia ratou, kare te reira e peke ke atu.

32. E i na, kua tae akaou maira te reo, i te na ko anga mai e, e tataraara kotou, e tataraara kotou, te vaitata mai ra te basileia o te ao ra, e auraka e kimi akaou i toku au tavini e ta. I reira rai, kua ngaueue akaou iora te enua, e kua rurutakina te au patu.

33. E kua tu toru akaou maira taua reo ra, e kua tuatua maira kia ratou ma te reo umere, tei kore rava e rauka i tetai tangata kia tuatua, e kua rurutakina akaou akera te au patu, e kua ngaueue akera te enua, e mei te mea ra e, ka ngaa i rotopu.

34. E i na, kare akera e tika i te ngati Lamana kia oro ke, no te tumurangi poiri tei tapoki ia ratou, e tika, kare takiri e rauka ia ratou i te aere, no te mataku tei tae ki runga ia ratou.

35. E teianei, te noo ra i rotopu ia ratou tetai tangata e ngati Lamana i tona anau anga, i noo ana aia ki roto i te akonoanga a te Atua, ina ra, kua orureau aia mei ia ratou.

36. Kua uri ke akera aia, e i na, kite atura aia na roto i te tumurangi kerekere i te mata o Niphai e Lihai, e i na, e kaka maata rava to raua mei to te angela. E kite atura aia i to raua akara anga i to raua mata ki te rangi, e mei te mea rai e, te tuatua ra ma te tataki i to raua reo ki runga i tetai mea ta raua e kite atura.

37. E kua kapiki atura teia tangata ki teia urupu tangata, kia uri mai e kia akara. E i na, kua orongaia te mana kia ratou e kua uri maira ratou e kua akara, e kite akera ratou i te mata o Niphai e Lihai.

38. E kua tuatua atura ratou ki taua tangata ra, i na, eaa te aiteanga o teia au mea nei, e koai oki ta teia nga tangata e tuatua ra?

39. I na, ko Aminatapa te ingoa o teia tangata. E kua tuatua atura a Aminatapa kia ratou: Te tuatua ra raua ki te au angela a te Atua.

40. Kua tuatua maira te ngati Lamana kiaia, Eaa ta tatou ka rave e riro ke atu ei teia tumurangi kerekere tei tapoki ia tatou?

41. Kua tuatua maira Aminatapa kia ratou, e tataraara kotou e tikai, e kapiki atu ki te reo, e kia rauka mai to kotou akarongo i te Mesia ra, tei apiiia kia kotou e Alama e Amuleka e Zezorama, e me rave kotou i te reira, ka taka ke atu te tumurangi kerekere tei tapoki ki runga ia kotou.

42. E kua akamata akera ratou i te kapiki atu ki taua reo ra, tei akangaueue i te enua, i na, kua kapiki tikai ratou e tae ua atu ki te peke ke anga o taua tumurangi kerekere ra.

43. E kia akara akera to ratou mata, kua kite atura ratou i taua tumurangi kerekere ra tei tapoki ia ratou i te peke ke angaia, e i na, kua kite atura ratou, e kua koropiniia ratou ravarai, te au tangata katoatoa, e te pou ai.

44. E tei rotopu oki a Niphai e Lihai ia ratou, e tika, kua koropiniia ratou ravarai, mei te mea rai e, tei rotopu ratou i te mura ai, ina ra, kare rava ratou e mamae ana, kare oki i mou i te patu o te are tapekaanga, e kua ki akera ratou i taua rekareka ra, te ka kore e rauka kia tuatuaia, e kua ki i te kaka.

45. E kua eke maira te Vaerua Tapu o te Atua mei te rangi mai ki roto i to ratou ngakau, e kua ki akera ra ratou, mei te mea ra, e ai, e kua tuatua akera ratou i te tuatua vavaria.

46. E kua tae maira tetai reo kia ratou, i na, e reo meitaki, mei te mea ra e te koumuumu ua maira, i te na ko anga mai e:

47. Ei au, ei au to kotou, no to kotou akarongo ki Taku Akaperepere ko tei vai ana mei te akatumuangaia mai o teia nei ao.

48. Kia akarongo ra ratou i teia reo, kua akara akera to ratou mata, kia kite e, noea mai te aereanga mai o teia reo, e i na, kua kite atura ratou i te rangi i te ngaa anga, e kua eke maira te au angela ki raro nei, e kua matuapuru maira ia ratou.

49. Mei te toru anere paa tangata tei kite, e tei akarongo i teia nei au mea, e kua akaueia atura ratou kia aere, e auraka e poitirere, auraka katoa e ekoko.

50. E kua aere atura ratou, e kua akakite ki te au tangata, i te au tuanga katoa e takapini ua ake, i te au mea katoa ta ratou i kite e ta ratou i akarongo, no reira oki, i ariu mai ei te maata anga o te ngati Lamana, no te maata rava o te au kite tei akapapu i te reira.

51. E ko ratou oki e manganui tei ariu mai, kua akaruke i ta ratou apinga tamaki, e to ratou makitakita, e te au irinakianga a to ratou ai metua.

52. E kua akaoki atura ratou i te au enua o te ngati Niphai.