1. E teianei, e aku au taeake akaperepere e, i na, te akakite ua atu nei au kia kotou e, kia kore kotou e tataraara, ka vai tanea ua to kotou au are.

2. I na, kia kore kotou e tataraara, ka tumatetenga tikai ta kotou au vaine, me tae ki te ra e ngote ei te tamariki i te u o te mama, ka tamata oki kotou i te oro ke, e kare rava e ngai paruruanga e oraʼi. I na, aue oki te vaine nui, ka teiaa oki ratou, e no reira, kare oki e rauka kia oro, ka takatakaiia ratou ki raro, e mate atura.

3. Aue oki teianei au tangata tei tuatuaia ko te au tangata o Niphai, kia kore ra ratou e tataraara, me kite oki ratou i teianei au akairo e te au mea umere, te ka akaariia kia ratou, e i na, e au tangata ikiia oki tatou e te Atua, e tika, ko te au tangata o Niphai ko tana ïa i inangaro, e ko tana rai ia i ako pakari, ae, i te au ra e araʼi ratou i ako ei aia, no te mea, e inangaro maata tona ia ratou.

4. I na, e aku au taeake, e makitakita maata to kotou i te ngati Lamana no ta ratou rave tamou i te au angaanga kikino no te mea, kua tarevake oki te papaanga a to ratou au metua. Ina ra, kua tae mai te ora kia ratou, na roto i te apii anga a te ngati Niphai, no te reira i akaroa mai ei te Atu to ratou au puke ra.

5. Te anoano nei au e kia kite oki kotou e, ko te maata anga ia ratou tei te rave ra ratou i ta ratou au angaanga, e te aaere nei ratou ma te matakite i mua i te aroaro o te Atua, e ma te akono oki i tana au akaueanga, e tana ture, e tana akavaanga, kia tau oki ki te ture a Mose.

6. I na, te karanga atu nei au kia kotou, e ko te tuanga maata ia ratou te rave nei i teia, e te tauta nei ratou ma te maroiroi i te arataki mai i te toenga o to ratou au taeake, ki te kite o te tuatua mou, no reira e manganui ratou tei kapitiia mai i te au ra katoatoa.

7. E i na, te kite nei oki kotou uaorai, e kua kite kotou i te reira, e ko ratou, tei riro mai ki te kite o te tuatua mou, e kua kite oki i te au mea viivii, e te rikarika, a to ratou au metua, e kua riro ratou i te akarongo i te tuatua tapu, ae, ko te totou a te au peroveta tapu, mei tei tataia, kua arataki te reira ia ratou ki te akarongo i te Atu, e te tataraara, kua riro te akarongo e te tataraara, ei akatuke i to ratou ngakau.

8. No reira e manganui oki ratou tei rave i teia, kua kite oki kotou i te reira, e kua mou meitaki, e kare e oriori i roto i te akarongo e i te au mea tei riro ei akaranga atu ia ratou.

9. E kua kite katoa oki kotou, e kua tanu ratou i ta ratou au apinga tamaki, e kua mataku tikai ratou, kia rave akaou mai i te reira, ko te ara aea ratou, e te kite nei kotou, e kua mataku ratou i te ara, e i na, ka takatakaiia ratou ki raro, e ka taiaia oki e to ratou au enemi, e kare ratou e rave akaou i ta ratou koke e ta ia ratou no te mea, e akarongo mou to ratou i roto i te Mesia.

10. E teianei, no to ratou tu ngaueue kore, i to ratou irinaki anga i roto i te au mea ta ratou e akarongo nei, e no to ratou tu ngaueue kore i te tuatau ka akamaramaiaʼi ratou, i na, ka akameitaki mai te Atua ia ratou, e ka akaroaia to ratou au ra, e kare oki e akamaara akaouia te au ra i araʼi ratou.

11. I na, me ka noo rai ratou ma te irinaki kore, ka akaroa rai te Atua i to ratou au ra, e tae mai te tuatau mei tei tuatuaia mai e to tatou ai metua, e pera katoa te peroveta a Zenosa, e te au peroveta e manganui, no runga i te akaoki akaou anga mai o to tatou au taeake, koia te ngati Lamana, ki te kite o te tuatua tika.

12. I na, te karanga atu nei au kia kotou, i te tuatau openga, ei reira te taputou a te Atua e tae mai ei ki to tatou taeake, ki te ngati Lamana no atu te au kino e manganui te ka tae kia ratou e no atu e ka arumakiia ratou ki te orau o te enua, e ka kimiia ratou, e ka papaia, e akapueurikirikiia, e kare e ngai e oraʼi, ka aroa rai te Atua ia ratou.

13. Ko ta te totou oki teia i akakite mai, e ka aratakiia mai ratou ki te kite o te tuatua mou, koia oki te kite o to ratou Akaora, e to ratou tiaki maata e te tika, e ka tatauia ratou ki roto i tana ra anana.

14. No reira te karanga atu nei au kia kotou, e ngari ake ratou ia kotou me kore kotou e tataraara.

15. Naringa kua akaariia mai te angaanga umere kia ratou tei akaariia kia kotou na, kia ratou ko tei noo i te irinaki kore, no te peu oki a to ratou ai metua, te kite nei kotou i teianei, e kare rava ratou e noo akaou ana ma te irinaki kore.

16. No reira te tuatua maira te Atu, kare au e akapou takiri ia ratou, kareka ra, kia tae ki te ra o toku nei pakari, e oki akaou mai ei ratou kiaku, te tuatua maira te Atua.

17. E teianei, te tuatua maira te Atu no runga i te au tangata ngati Niphai. Kia kore ra ratou e tataraara, e akono i toku nei anoano, ka takore takiri au ia ratou, te tuatua maira te Atua, no to ratou akarongo kore, no atu e eaa te au angaanga mamaata tei raveia e au ki rotopu ia ratou, e tika oki, te ora nei te Atua, e ka tupu teianei au mea, te tuatua maira te Atu.