1. E kia ope akera te mataiti ono ngauru ma rua i te tutaraanga o te au akava, kua tupu pouroa teia au mea nei e kua riro akera te ngati Lamana, ei tuanga maata no ratou, e aronga tuatua tika oki ratou, e kua maata atu ta ratou tuatua tika i ta te ngati Niphai no te mea, ko to ratou akarongo e mea ngaueue kore ïa, e te mou meitaki.

2. E i na, e manganui te au tangata Niphai tei marokiakia, tei kore e tataraara, tei rave i te au angaanga kino, e kua akaruke oki i te tuatua a te Atua e te au apiianga, te au totou tei tae mai kia ratou.

3. Ina ra, kua maata rava te rekareka o te au tangata i roto i te akonoanga no te mea, kua ariu mai te ngati Lamana, ae, no te akonoanga a te Atua tei akamouia ki rotopu ia ratou e kua akara tetai ki tetai e ma te rekareka, e e rekarekaanga maata to ratou.

4. E e manganui te ngati Lamana tei aere mai ki te enua ra ki Zarahemela ma te akakite ki te au tangata o te ngati Niphai, i te tu o to ratou ariu anga mai, e kua akoia mai ratou kia akarongo e kia tataraara.

5. E manganui tei ako ma te mana maata e te tika anga maata i te apai anga mai ia ratou e manganui, kia taakaaka ratou ia ratou e kia riro ei arongo akaaka rava i te aru anga i te Atua e te Punua Mamoe.

6. E manganui te ngati Lamana tei aere atu ki te tuanga enua i tokerau, e kua aere katoa atu a Niphai e Lihai ki te enua ki tokerau kia ako atu ki te au tangata. E tae akera ki te openga o te ono ngauru ma toru o te mataiti.

7. I na, kua vai te au ki roto i te au enua katoatoa, e kua aere ua te ngati Niphai ki te au ngai i te enua ta ratou ka manako, me ki roto i te ngati Niphai, me ki roto i te ngati Lamana.

8. E kua pera katoa te ngati Lamana, ka aere ua ratou ki te au ngai o te enua, ki ta ratou ua i anoano, ki te ngati Lamana, me ki te ngati Niphai kua au tikai ratou tetai ki tetai kia oko mai, e kia oko atu e kua puapinga oki kia tau ki ta ratou i inangaro.

9. E i na, kua apinga nui ratou; te ngati Lamana e te ngati Niphai e maata tikai ta ratou auro e te ario, e tetai ua atu au apinga memeitaki, mei te enua ki tonga, ki te enua ki tokerau.

10. E teianei, ko te enua ki tonga ko Lihai te reira, e te enua ki tokerau ko Muleka ïa, ko te tamaiti oki te reira a Zedekia, na te Atua oki i arataki mai ia Muleka ki te enua ki tokerau, e ko Lihai ki te enua ki tonga.

11. E i na, e maata tikai te au tu auro i roto i teia nga enua nei te ario katoa, e tetai atu au auri memeitaki o te au tu ravarai, e tei reira te aronga kikite i te rave angaanga, no te rave i te au tu angaanga ravarai no te veo te kapa, e ka tama oki i te reira e no te reira i riro ei ratou ei aronga apinga nui.

12. E kua tanu ratou i te sitona kia maata, mei tokerou e ki tonga, e kua tupu te reira ki te maata anga, mei tokerau ki tonga. E kua akamaataia ratou e kua riro ei aronga maroiroi i roto i te enua nei. E kua angai ratou i te au puakatoro e te au mamoe e manganui ua atu, e e maata te au manu matu.

13. I na oki, kua maani ta ratou au vaine i te taura e kua tuitui ra, e kua maani i te au tu kakau tukeke e tetai au tu kakau manea tikai, ei tapoki i to ratou taaka ua. E ope akera te ono ngauru ma a o te mataiti te vai ua ra te au.

14. E tae akera ki te ono ngauru ma rima o te mataiti te vai rai te au e te rekareka, ae oki, e maata te akoanga, e manganui katoa te au totou no runga i te au mea te ka tae mai. E ope akera te ono ngauru ma rima o te mataiti.

15. E tae akera ki te ono ngauru ma ono o te mataiti i te tutaraanga o te au akava, e i na, kua taiaia Titoroma i tona noo anga ki runga i te nooanga akavanui, kare i kitea te tangata i ta iaia. E i taua mataiti rai, i ikiiaʼi tana tamaiti e te tangata, ei mono i tona ngai, i na, kua taia katoaia aia. E ope akera te mataiti ono ngauru ma ono.

16. E i te akamata anga o te mataiti ono ngauru ma itu, kua akamata akaou te tangata i te rave i te kino.

17. I na, kua akameitaki oki te Atua ia ratou ki te apinga nui o teianei ao, e kare oki ratou i taorioriia ana kia riri, e kia kai tamaki me kore ra, kia akamaringi toto, e no reira, tei runga ua oki to ratou ngakau i to ratou apinga nui, e tika, e kua akamata iora ratou kia kimi e kia rauka te puapinga no ratou, e kia teitei ake ratou ki runga ake i tetai, no reira kua akamata iora ratou i te ta ngaro ua i te tangata e kia aru e kia keia, kia puapinga oki.

18. E teianei ko taua au tangata ta tangata ra, e te keikeia ra, ko te au tangata ïa tei roto i te pupu o Kitikumeni, e Katianetona. Kua maata rava ake ra i rotopu i te tuanga kino o te ngati Lamana, e kua tuatuaia ratou e, ko te au keikeia e te ta tangata o Katianetona, E teianei, e maata oki te ngati Niphai i roto i te pupu o Katianetona.

19. E ko ratou oki tei ta i te akavanui ia Titoroma, e tana tamaiti i noo ei raua ki runga i te nooanga akavanui, e i na, kare rai ratou i kitea.

20. E kia kite akera te ngati Lamana e, e aronga keikeia tei roto ia ratou, kua tumatetenga tikai ratou, e kua tamata iora i te au ravenga ravarai e ta ia ratou mei runga i te aro o te enua nei.

21. Ina ra, kua taoriori akera a Satani i te ngakau o te taunga maata o te ngati Niphai kia kapiti atu ki te aronga keikeia, e kia papau i tetai koreromotu ma te taputou e, ka paruru ratou tetai ki tetai me rokoia ake ratou e te manamanata, kia kore ei ratou e akautungaia no ta ratou ta tangata e te aru e te keikeia.

22. E akairo oki ta ratou, ae, e akairo muna ta ratou, e reo muna katoa to ratou, e na te reira oki e akakite i to ratou taeake tei tomo ki roto i te koreromotu, e no atu e eaa te kino tana ka rave, kare rava aia e taia mai e tona taeake, me kore ra, e ratou tei piri ki roto i teia pupu nei, ko tei rave i teia koreromotu.

23. E no reira i tikaʼi ia ratou kia ta i te tangata, e kia aru i ta ratou apinga, e kia keia, e kia akaturi, e kia rave i te au mea kikino ravarai, tei kore e tau i te ture o to ratou enua, e te ture a to ratou Atua.

24. E ko te au tangata o roto i teia pupu nei, tei akakite i ta ratou au angaanga kikino ki to te ao nei, ka akavaia aia e ratou rai, auraka ki te ture a to ratou enua, mari ra, ki te ture a ta ratou angaanga kino, tei orongaia mai e Kitikumeni e Katianetona.

25. E teianei, ko teia nei taputou muna e te koreromotu ta Alama i akaue i tana nga tamariki e auraka e tupu ki to te ao nei, ko te riro aea te reira ei arataki mai i te tangata ki te mate.

26. E teianei, kare taua taputou muna ra e te koreromotu i tae mai kia Katianetona no roto i te papaanga tei orongaia kia Hilamana, mari ra, kua tukuia te reira ki roto i te ngakau o Katianetona e taua taae ra, ko tei pikikaa i to tatou nga metua mua, kia kai i te rakau i rauiia.

27. Koia rai oki tei tuatua kia Kaina e, me ta koe i toou teina ia Abera kare rava ïa e kitea e to te ao nei. E kua tuatua rikiriki rai aia kia Kaina e tana au pipi mei te reira tuatau maira.

28. E koia katoa tei tuku ki roto i te ngakau o te tangata, e kia patu ratou i te are kia teitei, kia tae ki te rangi. E na taua taae rai i timata mai i te tangata tei aere mai mei taua are teitei ra ki teia enua, ko tei akapararauare i te angaanga o te poiri e te rikarika ki ruga i te enua, e tae ua atu ki te kikaia anga te au tangata ravarai ki roto i te mate maata, e kia tae atu kia ade mutu kore.

29. Ae, ko taua taae rai tei tuku atu ki roto i te ngakau o Katianetona kia apai atu rai i te angaanga o te poiri, e te ta ngaro ua i te tangata, e nana rai oki i apai mai i te reira mei te kapuanga o te tangata e tae rava mai ki teianei.

30. E i na, koia te tumu o te au ara ravarai. E i na, te rave ua nei aia i tana angaanga poiri, e te ta ngaro ua i te tangata, e kua tuku ua maira i ta ratou au ravenga, e ta ratou taputou, e ta ratou koreromotu, e ta ratou au ravenga kikino, mei tera uki ki tera uki, mei tei tau i te mana tei rauka iaia kia mou i te ngakau o te tamariki a te tangata.

31. E teianei, kua rauka akera iaia te ngakau o te ngati Niphai, i na, kua riro tikai ratou ei aronga kino, e ko te maata anga o te tangata, kua ariu ke atu ratou mei te tuatua tika, e kua takatakai i te ture a te Atua ki raro i to ratou vaevae e kua ariu ke atu ki to ratou uaorai aerenga, e kua anga oki i tetai au atua ario e te auro no ratou.

32. E kare i roaia ana nga mataiti i tae mai ei teia ara kia ratou, e ko te maataanga, kua tae mai te reira i te ono ngauru ma itu o te mataiti i te tutaraanga o te au akava ki rungao i te au tangata o Niphai.

33. E tupu atura ta ratou au ara ki te maataanga i te ono ngauru ma varu o te mataiti, e kua taitaia atura te aronga tuatua tika, ma te aue maata.

34. Te kite nei tatou e, ko te ngati Niphai, ko ratou tei akamata i te akarongo kore, e kua tupu atu ratou ki te kino maata e te rikarika, kareka te ngati Lamana te tupu nei ratou ki te kite i to ratou Atua, i na, te akamata nei ratou i te akono i tana ture e tana au akaueanga e ma te aaere ma te tuatua tika e te tiratiratu ki mua i tona aroaro.

35. I na, te kite nei tatou, e kua akaruke te Vaerua o te Atua i te ngati Niphai no to ratou kino, e te marokiakia o to ratou ngakau.

36. E te kite nei tatou e, kua akamata te Atua i te riringi i tona Vaerua ki runga i te ngati Lamana, no to ratou akarongo ngoie ua, e te inangaro i te akarongo i tana au tuatua.

37. E kua kimi akera te ngati Lamana i taua pupu keia ra, e Katianetona e kua ako atura ratou i te tuatua a te Atua, ki te ngai kino pakari ia ratou, e kua takore takiriia iora taua pupu keikeia ra i roto i te ngati Lamana.

38. Kareka i tetai tua, kua akatuia ratou e te ngati Niphai ma te tauturu atu, akamata mai na te tuanga kino rava atu, e kua takako akera i te enua katoatoa o te ngati Niphai, e kua akavare atu i te tuanga o te aronga tuatua tika, kia irinaki mai ratou ki teia angaanga, e kua ariki oki i ta ratou i noni, e kia piri mai ki ta ratou ta anga ngaro i te tangata e ta ratou kapiti anga ngaro.

39. E riro akera ia ratou te akaaereanga o te basileia, e kua takatakai iora i te aronga putaua, te aronga akaaka, e tei aru i te Atua, ki raro i to ratou vaevae, e kua papa ia ratou, e kua tuaru ia ratou, e kua uri i to ratou tua ki teia aronga nei.

40. Te kite nei tatou, e tei roto ratou i te turanga kino rava e kua tau oki no te takore takiri anga.

41. E ope akera te ono ngauru ma varu o te mataiti i te tutaraanga o te au akava ki rungao i te tangata o Niphai.