1. E tae akera ki te rima ngauru ma a o te mataiti, e maata te manamanata i roto i te akonoanga, e te vai katoa ra te pekapeka i rotopu i te au tangata, e maata rava te akamaringi anga toto.

2. E ko te tuanga kino rava atu kua taia ratou e kua tuaruia ki vao i te enua, e kua aere atu ratou ki te ariki o te ngati Lamana.

3. E kua tamata akera ratou i te taoriori i te ngati Lamana e kare rava ratou e akarongo atu ki te tuatua a teia au tangata orureau.

4. Ina ra, kia tae ki te rima ngauru ma ono o te mataiti i te tutaraanga o te au akava, kua aere atu te au tangata orureau o te ngati Niphai ki te ngati Lamana, e kua manuia atura ratou e to ratou au oa katoa i te akariri atu ia ratou ki te ngati Niphai, e kua teateamamao akera ratou i ta ratou apinga tamaki i te reira mataiti katoa.

5. I na kia tae ki te rima ngauru ma itu o te mataiti, kua aere maira ratou ki raro e tamaki ki te ngati Niphai, e kua akamata iora ratou i te angaanga e mate ei te tangata, e i na, kia tae ki te rima ngauru ma varu o te mataiti i te tutaraanga o te au akava, i raukaʼi ia ratou te enua ko Zarahemela, e te au enua, e tae ua atu ki te au enua i vaitata, ki te enua ko Bounetifula.

6. E kua arumakiia atu te vaeau o te ngati Niphai e to Moroniha ki roto i te enua ko Bounetifula.

7. I reira oki to ratou maani anga i tetai punanga, ei paruru i te ngati Lamana, mei te tai i te opunga, e tae atu ki te itinga, e tai ra i te aereanga te au tangata Niphai, ki runga i te kena tei patuia e ratou ei punanga no to ratou vaeau, ei paruru no to ratou enua i tokerau.

8. E ko taua au tangata orureau o te ngati Niphai ra, ma te tauturu a te nuku vaeau o te ngati Lamana, kua peke pouroa ia ratou te au tuanga o te ngati Niphai koia oki te enua ki apatonga. Ko teia te au mea tei tupu i te rima ngauru ma varu e te rima ngauru ma iva o te mataiti i te tutaraanga o te au akava.

9. E tae akera ki te ono ngauru o te mataiti i te tutaraanga o te au akava, kua manuia akera a Moroniha e tona au vaeau, i te au enua e manganui i roto i te au tuanga enua, e kua rauka mai iaia te au oire e manganui, tei riro ana ki te rima o te ngati Lamana.

10. E kia tae akera ki te ono ngauru ma tai o te mataiti i te tutaraanga o te au akava, kua peke akaou mai tetai apa o to ratou enua.

11. I teianei, ko teia au tumatetenga o te ngati Niphai e te tamate anga maata tei vai ana ki rotopu ia ratou, kare rava te reira e tupu, naringa kare ratou i noo kino ana, e te au mea viivii tei vai ana kia ratou, i na, tei roto katoa te reira i te aronga tei karanga e, no te akonoanga ratou a te Atua.

12. E no te parau oki o to ratou ngakau, no te apinga nui oki ia ratou, e i na, e no to ratou takinga kino i te putaua, e te karapii anga i ta ratou kai ki tei pongi, te karapii anga i to ratou kakau ki tei taaka ua, e ma te papaki atu i to ratou au taeake akaaka, ma te tao atu i te au mea tapu, i te patoi anga i te vaerua o te totou e to te eeu anga, te ta tangata, te noinoi, te pikikaa, te keia, te akaturi, te akatupu pekapeka, e te oro ke anga mei te enua Niphai ki te enua o te ngati Lamana.

13. E no teia kino pakari tei tupu kia ratou, e te akapaapaa i to ratou uaorai maroiroi, kua vaio uaia ratou ki to ratou uaorai maroiroi, e no reira, kare atura ratou i puapingaia, mari ra, kua papaia ratou, e kua rokoia e te maki mate, e kua tuaruia ki mua i te ngati Lamana, e tae ua atu ki te riro anga atu o tetai pae i to ratou au enua.

14. E i na, kua ako akera a Moroniha i te au tangata e manganui no ta ratou ara, kua pera katoa a Niphai e Lihai, nga tamariki a Hilamana, e maata ta raua ako anga i te au tangata e manganui oki ta raua au mea i totou no runga i ta ratou au ara, e te ka tupu kia ratou, me kore ratou e tataraara i ta ratou au ara.

15. Kua tataraara akera ratou, e no to ratou tataraara anga, kua akamata akaou ratou i te puapinga.

16. E kia kite akera a Moroniha e kua tataraara ratou, kua arataki atura aia ia ratou mei tera ngai ki tera ngai, e mei tera oire ki tera oire, e tae ua atu ki te rauka akaou anga mai o tetai apa o to ratou au apinga, e tetai apa o to ratou enua.

17. E kua ope akera nga mataiti e ono ngauru ma tai i te tutaraanga o te au akava.

18. E tae akera ki te ono ngauru ma rua o te mataiti i te tutaraanga o te au akava kare i rauka akaou mai ia Moroniha te mana ki runga ake i te ngati Lamana.

19. No reira, kua akaruke ua ratou i ta ratou i akakoro, kia rauka mai te toenga o to ratou au enua, no te maata rava o te ngati Lamana, kare e rauka te ngati Niphai kia mana ki rungao ia ratou, no reira, kua akanoo a Moroniha i tona au vaeau ki te au tuanga tei riro mai kia ratou.

20. E no te maata rava o te ngati Lamana, kua noo matakutaku te ngati Niphai, ko te mana mai aea ratou, e ko te takatakaiia ratou e ko te taiaia, e e takore takiriia.

21. I na, kua akamaara iora ratou i te au totou a Alama, e te au tuatua a Mosaia, e kua kite oki ratou e, e aronga marokiakia ratou e kare ratou i akono ana i te au akaueanga a te Atua.

22. E kua akatuke e kua takatakai oki ratou i te ture a Mosaia, me kore ra ta te Atu oki i oronga kiaia kia akakite ki te tangata, ki raro i to ratou vaevae, e kua kite akera ratou e, kua taruri keia ta ratou ture, e kua riro ratou ei aronga kino, koia oki, ko to ratou kino kua aite rai te reira mei te ngati Lamana.

23. E no te mea, kua ara oki ratou, kua akamata i reira te akonoanga i te oki ki muri, e kua akamata ratou i te irinaki kore ki te vaerua o te totou, e te vaerua o te eeuanga, e tei mua te au utunga a te Atua i to ratou mata.

24. E kua kite iora ratou i to ratou apikepike mei to ratou au taeake rai, te ngati Lamana, e kare oki te Vaerua o te Atua e paruru ana ia ratou, i na, kua akaatea ke aia mei ia ratou no te mea, kare te Vaerua o te Atua e noo ki roto i te nao viivii.

25. No reira kua akamutu te Atua i te akaora ia ratou na roto i tona mana umere e te aite kore, no tei topa oki ratou ki roto i te kino e te akarongo kore, e kite akera ratou e, kua maata ua atu rai te ngati Lamana ia ratou, e me kare ratou e takave atu ki te Atua to ratou Atua, ka mate pouroa ratou.

26. E i na, kua kite oki ratou e, e maata atu te maroiroi o tetai tangata o te ngati Lamana i to tetai o ratou. E no tei topa oki ratou ki roto i teia ara maata i paruparu ei ratou, no ta ratou ara oki, e kare oki i maata te au mataiti i tupu ei teia au mea nei.