1. E i na, i te ono ngauru ma iva o te mataiti i te tutaraanga o te au akava ki rungao i te au tangata o te ngati Niphai, kua oki atura a Niphai te tamaiti a Hilamana ki te enua ra ki Zarahemela mei te enua i tokerau.

2. No taua enua mai ana oki aia mei rotopu i te au tangata o tokerau, e kua ako atu i te tuatua a te Atua kia ratou, e kua totou oki kia ratou i tetai au mea e manganui.

3. E kua patoi pouroa ratou i tana au tuatua, no reira, kare atura aia i noo kia ratou, ina ra, kua oki ki te enua ipukarea.

4. E i tona kiteanga e, te noo nei te au tangata ki roto i te kino maata, e te noo ra te au keikeia o Katianetona ki runga i te nooanga o te akavanui, e kua rave oki i te mana e te au tikaanga o te enua, e kua tuku ke atu i te au akaueanga a te Atua, e kare oki e noo tika ana ki mua iaia e kare oki i rave i te mea tika, ki te tamariki a te tangata nei;

5. E te akaapa nei ratou i te aronga tuatua tika no ta ratou tuatua tika, e te tuku ua nei i te aronga kino e te aronga ara, ma te akautunga koreia no ta ratou moni, e te akatika ra ratou ia ratou kia noo ki rungao i te taoonga kia akaaere i te basileia, e kia rave i tei tau i to ratou uaorai manako, e kia rauka ia ratou te kaka o teianei ao, e tera oki tetai, kia rauka ngoie ua ia ratou kia akaturi, te keia, e te ta tangata, e kia rave i ta ratou i anoano.

6. E teianei, kare e maata te mataiti, e tae mai ei teia ara maata ki te ngati Niphai, e kia akara a Niphai i te reira, kua mamae akera tona ngakau i roto iaia, e kua aue iora i te mamae o tona vaerua:

7. Naringa ua ake toku nei puke ra, i te au ra, ka aere mai ei toku metua a Niphai, mei te enua maira mei Ierusalema e kia rekareka au e ïa katoa, i te enua taputou, e ngoie ua ake ia ratou kia akarongo, e te ngaueue kore i te akono anga i te au akaueanga a te Atua, e te marie kia rave i te kino, e te viviki oki kia akarongo i te tuatua a te Atua.

8. E tika, naringa ua ake toku nei au ra, e tei taua au ra ra, ka rere ua toku vaerua i te rekareka i te tuatua tika a toku au taeake.

9. Kareka i teianei, ko toku au ra teia e kua ki tikai toku vaerua i te tumatetenga maata no te kino o toku au taeake.

10. E i na, tei runga oki aia i tetai are teitei, i roto i te aua o Niphai, i vaitata ki te mataara maata, e tika atu ei ki te ngai okookoanga, koia oki i te oire ko Zarahemela, no reira, kua tupou akera a Niphai iaia uaorai ki raro i runga i taua are teitei ra, tei te pae katoa ïa i te ngutupa o te aua e aere atu ki te mataara.

11. E manganui te au tangata tei na reira te aere, e kua kite akera ia Niphai, i tona riringi anga i tona vaerua ki te Atua i runga i taua patu ra, e kua oro atura te au tangata e akakite ki te au tangata i ta ratou i kite, e kua akaputu maira te urupu tangata kia kite ratou e, eaa tikai te tumu o teia eva maata no te au tangata kino.

12. E kia tu akera, a Niphai, kua kite iora aia i teia urupu tangata maata i akaputuputuia mai.

13. Kua amama iora tona vaa, na ko atura kia ratou. Eaa kotou i akaputuputu mai ei ki ko nei? Ka inangaro ainei kotou e kia akakite atu au i ta kotou au ara?

14. Ae oki, no tei aere atu au ki runga i toku patu, e kia riringi atu i toku vaerua ki toku Atua, no te mamae oki o toku vaerua no te maata o ta kotou au ara.

15. E no toku nei tumatetenga e te iriea anga, i akaputuputu ei kotou ki ko nei, e ma te umere, e tika, ka tau rai ia kotou kia umere, i na, e umere rai kotou no te mea, kua riro ke kotou, e kua mou te tiaporo i to kotou ngakau.

16. Ae, i naea ra kotou i riro ke ei ki tana puereere, ko tei kimi kia uriia to kotou vaerua ki roto i te mate openga kore?

17. Aue e tataraara kotou, e tataraara kotou, no te aa oki kotou ka mate ei? Ariu mai, e ariu mai, ki to kotou Atua kia Iehova. Eaa ra aia i akaruke ei ia kotou?

18. No te mea, kua akamarokiakia kotou i to kotou ngakau, i na, kare kotou i akarongo i te reo o te tiaki meitaki, kua akariri ra kotou iaia kia kotou.

19. E i na, me kare kotou e tataraara, kare te Atua e akaputuputu mai ia kotou, ka akapueurikiriki ra aia ia kotou, e ka riro kotou ei kai na te au puakaoa e te au manu taae.

20. Aue, i akapeea ra kotou i akangaropoinaʼi i te Atua i te ra tikai i akaoraʼi aia ia kotou.

21. I na, kia rauka te puapinga, kia akangateiteiia e te tangata, i na, kia rauka mai oki te auro e te ario. E kua tuku oki kotou i to kotou ngakau ki runga i te apinga nui, e te au mea puapinga kore o teianei ao, kia ta kotou i te tangata, e kia aru, e kia keia, e kia tapepe pikikaa atu i toou tangata tupu, e ma te rave i te au tu ara ravarai.

22. E no teia tumu nei, ka tae mai ei te mate kia kotou, mari ua ra, kia tataraara kotou. Me kore kotou e tataraara, i na, ko teia oire maata, e tetai atu au oire mamaata e takapini ake i te au tuanga i roto i to tatou rima, ka apai keia te reira, e kare atura o tatou ngai e noo ei, no te mea, kare oki te Atua e omai i te maroiroi kia kotou, mei tana oki i rave ana, ei paruru i to kotou au enemi.

23. E i na, te tuatua maira te Atu. Kare rava au e oronga i toku maroiroi ki te aronga kino, kia maata ake tetai i ta tetai, mari ra, ki tei tataraara, e tei akarongo i taku nei tuatua. No reira, te anoano nei au e, kia kite kotou e aku au taeake, e meitaki ake te ngati Lamana ia kotou, mari ua kia tataraara kotou.

24. I na oki, e maata atu to ratou tuatua tika i to kotou, kare oki ratou i ara i te kite tei rauka ia kotou, no reira kua aroa maata te Atu ia ratou, ae, ka akaroa oki te Atua i to ratou au ra, e ka akamaataia to ratou uanga, e ka takore takiriia kotou, mari ua, kia tataraara kotou.

25. I na, ka tae mai te aue kia kotou no taua mea viivii tei tae mai kia kotou, e kua taokotai oki kotou ia kotou uaorai, ae, ki tera pupu ngaro ra tei akamouia e Katianetona.

26. Ae, ka tae mai te aue kia kotou, no te parau, ta kotou i akatika kia tomo mai ki to kotou au ngakau, ko tei akateitei ia kotou ki runga ake i te au mea meitaki, no te mea, kua apinga nui oki kotou.

27. Ae, ka tae mai oki te aue kia kotou, no ta kotou angaanga kino, e te viivii.

28. Kia kore kotou e tataraara, ka mate tikai kotou, e ka rave katoaia to kotou au enua ia kotou na, e ka akapouia kotou i te enua nei.

29. E teianei, kare au e tuatua atu i teia nei au mea naku uaorai, no te mea, kare oki au i kite iaku uaorai i teia nei au mea, ina ra, kua papu iaku e tika tikai teia nei au mea, no te mea, kua akakite mai te Atua i te reira kiaku, no reira, te akapapu nei au e, ka tupu tikai te reira au mea.