1. Te kite nei tatou i te tu paruparu e te tarevake o te ngakau o te au tamariki a te tangata nei, i na, te kite katoa nei tatou e, no te meitaki maata o te Atua, ka akameitakiiaʼi, e ka akapuapingaiaʼi ratou tei tuku i to ratou irinakianga kiaia.

2. Ae, ka kite oki tatou i te reira i te tuatau tikai e akapuapingaʼi aia i tona au tangata, i te akameitaki anga i ta ratou one kai, e i te akamaata anga i ta ratou au anana e pera katoa te auro e te ario, e te au mea memeitaki ravarai o te au tu ravarai, e i te akaora anga atu ia ratou i te rima o to ratou au enemi, i te akaparuparu anga i te ngakau o to ratou enemi, kia kore ratou e kai tamaki mai kia ratou, ae, i te rave anga i te au mea katoa e rekarekaʼi tona au tangata, i na, ei reira rai oki ratou e akamarokiakiaʼi i to ratou ngakau, e akangaropoinaʼi i to ratou Atua, e kua takatakai ki raro i to ratou vaevae i Tei Tapu, no te mea, te akaea meitaki ua ra oki ratou, e no to ratou apinga nui oki.

3. E te kite katoa nei tatou e, me kare te Atua e papa i tona au tangata ki te au maki e manganui, me kare aia e tamate ia ratou, ki te mea e rikarikaʼi, e te onge e te au tu maki mate, kare rava aia e maaraia mai.

4. E neneva tikai, e te puapinga kore, te kino, te tiaporo, te viviki i te rave i te kino, e te marie i te rave i te meitaki, te au tamariki a te tangata, i na, e viviki oki ratou kia akarongo i te tuatua a te tiaporo, e te tuku atu i to ratou ngakau ki te au mea puapinga kore o teianei ao.

5. E te viviki i te akateitei i te ngakau parau, i na, e viviki oki i te akapaapaa, e ma te rave i te au mea e araʼi, e te marie oki kia akamaara i to ratou Atua, e kia akarongo atu ki tana e apii mai, i na, e marie oki ratou kia aaere i te arataa o te pakari ra.

6. I na, kare oki ratou i inangaro ana e, na to ratou Atua, tei anga ia ratou, e akaaere, e e tutara ki rungao ia ratou, e no atu rai tona meitaki maata, e tona aroa ua kia ratou, kua akaruke i tana i apii, e kare oki ratou e inangaro e koia to ratou tiaki.

7. Aue te puapinga kore o te tamariki a te tangata nei, ae, e iti ake ratou i te one pueu o te enua nei.

8. E i na, ka aere te one pueu o te enua, ki tera ngai, ki tera ngai, e ka taka ke i te akaueanga a to tatou Atua mutu kore.

9. I na, i tona ra reo, ka ruketekete e ka ngaruerue te au tuaivi e te au maunga.

10. E na roto i te mana o tona ra reo, e ngaangaaʼi ratou e ka mania oki, ae, mei te au ō rai.

11. Ae, na roto i te mana o tona ra reo, e ngaueue ei te enua katoatoa.

12. Ae, na roto i te mana o tona ra reo, e tauriuri ei tona tumu i rotopu tikai.

13. Ae, e me karanga aia ki te enua, aere ke atu, ka aere rai.

14. Me karanga aia ki te enua, e oki ki muri kia akaroaia te ra i te au ora e manganui, kua pera rai.

15. E mei tana oki i tuatua, ka oki te enua, e ka manako te tangata, te noo ua ra te ra, ae, i na, e tika teia, ko te enua te aere nei e kare e ko te rā.

16. E i na, me karanga aia ki te vai o te ngai oonu, kia maro koe ka tupu.

17. I na, me karanga aia ki teia maunga, kia akateiteiia, e aere mai oki, e topa mai ki runga i teia oire nei, kia ngaromia ïa, ka tupu rai te reira.

18. E i na, me uuna tetai tangata i tetai apinga ki raro i te one, ka karanga mai te Atu e, kia taumaaia te reira, no te ara oki a tei uuna i te reira, e i na, ka taumaaia ïa.

19. E me karanga oki te Atua e, kia taumaaia, kia kore rava e kiteaia e te tangata i teianei e tuatau ua atu, i na, kare oki e tangata e rauka mai i te reira i teianei e tuatau ua atu.

20. E i na, me karanga te Atu ki tetai tangata no taau au ara, te taumaaia nei koe e tuatau ua atu, ka tupu ïa.

21. E me karanga te Atua e, no taau nei au ara, ka tipuiaʼi koe mei mua i toku nei aroaro, ka akatupu aia i te reira.

22. Aue oki aia tei tuatuaia teianei au mea kiaia, nana tikai oki teianei tuatua, na tei rave i te ara, kare rava aia e ora, no reira, te tataraara i akoiaʼi, kia ora te tangata.

23. No reira, e ao tikai to ratou tei tataraara, e kua akarongo i te reo o to ratou Atua, ko ratou tikai te ka ora.

24. E kia akatika mai oki te Atua, i tona kī maata, kia aratakiia te tangata ki te tataraara e kia rave i te angaanga meitaki e kia akaokiia mai ratou ki te aroa ua, e te aroa ua, kia tau oki ki ta ratou angaanga meitaki.

25. E tau iaku kia ora te tangata katoatoa. Ina ra, kua tatau oki tatou e, kia tae ki te au ra openga ra, ka uriia tetai pae o te tangata ki vao, i na, ka uriia ki vao mei mua atu i te aroaro o te Atua.

26. I na, ka tukuia ratou ki te ngai o te mamae mutu kore, i te akatupuanga i te tuatua tei na ko mai: ko tei rave i te meitaki, ka rauka te ora mutu kore, e ko tei rave i te kino ra, ka rauka ia ratou te akaapaanga mutu kore. Koia ïa. Amene.