1. E teianei, kia tae akera ki te iva ngauru ma tai o te mataiti, ka ono anere mataiti i reira mei te ra i akaruke ei a Lihai ia Ierusalema, e i taua mataiti rai ko Lakonea te akavanui, e te kavana o te enua katoatoa.

2. Kua aere atu a Niphai, te tamaiti a Hilamana, ki vao i te enua ko Zarahemela, e kua oronga mai i te ikuikuanga ki tana tamaiti kia Niphai, ko tana mataiapo oki ia, kia akono i te au papa veo, e te au akapapaanga katoatoa tei akonoia, e tetai au mea tapu tei akonoia, mei te akarukeanga a Lihai ia Ierusalema.

3. E kua taka ke atu aia ki vao mai i te enua, me kua aere aia kiea, kare e tangata i kite, e kua akono tana tamaiti i te au akapapaanga, ei mono i tona ngai, ko te akapapaanga o teia au tangata.

4. E tae akera ki te akamata anga o te iva ngauru ma rua o te mataiti, e i na, kua akamata akera te totouanga a te au peroveta i te tupu, kua akamata akera te au akairo mamaata, e te au semeio mamaata i te tupu i rotopu i te au tangata.

5. Ina ra, te karanga nei tetai pae, e kua topa te taime no te tupuanga o te au tuatua mei tei tuatuaia e Samuela te ngati Lamana.

6. Kua akamata akera ratou i te rekareka ki to ratou au taeake i te na ko anga atu e, e teianei kua topa te tuatau, e kare ua te tuatua a Samuela i tupu, no reira, ko to kotou rekareka, e to kotou akarongo no runga i teia au mea nei, e mea puapinga kore ïa.

7. E kua akatupu akera ratou i tetai manamanata i roto i te orau o te enua, e ko te aronga tei irinaki, kua akamata akera i te tumatetenga, ko te kore aea te au mea tei tuatuaia e tupu.

8. Ina ra, kua tapapa marie atu rai ratou, no te ra, e te po e te ra oki, e mei te mea oki, e ko tai ra, e kare e po, kia kite ei ratou e, kare to ratou akarongo i puapinga kore ana.

9. E teianei, kua akataka te au tangata akarongo kore i tetai ra, no te aronga tei irinaki i teia au tuatua nei, ka tamateia, me kare te akairo e tupu, mei tei tuatuaia mai e Samuela te peroveta.

10. E teianei, kia kite a Niphai te tamaiti a Niphai i teia kino maata e tona au tangata, kua tumatetenga tikai tona ngakau.

11. Kua aere atura aia ki vao, e kua tipapa atura ki runga i te one, e kua kapiki atura ki tona Atua, no tona au tangata, ae, no te aronga te ka taiaia, no to ratou akarongo i te au tuatua a to ratou ai metua.

12. E kua kapiki atu aia ki tona Atua ma te ririnui taua ra katoa ra, e kua tae maira te reo o te Atu kiaia na ko maira:

13. Ka akateitei ana i toou upoko ki runga e kia rekareka oki, e i na, kua tae oki te tuatau i teianei, i teia po nei, ka orongaia mai ei te akairo, e apopo au e tae mai ei ki te ao nei, ei akakite ki to te ao nei e, ka akatupu au i te au mea katoatoa taku i akakite ki te vaa o taku au peroveta tapu.

14. I na, te aere mai nei au ki oku tikai, ei akatupu i te au mea katoatoa taku i akakite atu ki te au tamariki a te tangata nei, mei te akatumuangaia o te ao nei, e kia rave oki i te anoano o te Metua, e to te tamaiti, i to te Metua, noku nei oki, e i to te tamaiti no toku nei kopapa. E i na, kua tae oki te tuatau, e i teianei po e orongaia mai ei te akairo.

15. E tupu akera te tuatua tei tuatuaia mai kia Niphai, mei tei tuatuaia maira, i na oki, tei te topaanga o te ra ra, kare ïa e poiri, kua akamata iora te tangata i te poitirere, no to mea, kare oki e poiri i tae mai i te aereanga mai o te po.

16. E manganui te aronga, kare i akarongo ana i te tuatua a te au peroveta, tei inga ki te one, e mei te mea ra e, kua mate, no te mea, kua kite oki ratou e, ko te ravenga maata ta ratou i akono e mate ei te aronga tei akarongo atu i te tuatua a te au peroveta, kua puapinga kore te reira, e kua tupu oki te akairo tei orongaia mai.

17. E kua akamata iora ratou i te kite e, te vaitata maira te taime e tae mai ei te Tamaiti a te Atua, i na, ko te au tangata katoatoa i runga i te enua, mei te opunga ki te itinga, mei te enua ki tokerau, e te enua oki ki tonga, kua poitirere tikai ratou, e kua inga iora ki te one.

18. Kua kite oki ratou e, kua akakite takere ana te au peroveta i teia au mea nei, i te au mataiti e manganui, e ko te akairo te ka tae mai, kua tae mai ïa i teianei, kua akamata iora ratou i te mataku no ta ratou au ara, e to ratou akarongo kore.

19. E kare akera e poiri i taua po katoa ra, kua marama ra mei te mea ra, e avatea. E kua kake mai oki te ra, i tera mai popongi mei tana rai i matau i te aere, e kua kite iora ratou e, ko te ra ïa e anau ei te Atu, no te au akairo oki tei kiteaia.

20. E tupu akera te au mea katoatoa, mei tei tuatuaia e te au peroveta.

21. E kua mama maira tetai etu ou, mei tei tuatuaia ana.

22. E mei te reira tuatau maira, kua akatupu iora a Satani i te pikikaa ki roto i te ngakau o te au tangata, kia akamarokiakia ia ratou, kia kore ratou e irinaki atu ki te au akairo e te au mea umere ta ratou i kite ana, i na, kare e tangata i akarongo atu i tana au pikikaa e te akavare, kua ariu mai ra te maataanga o te tangata e kua akarongo atu i to ratou Atua.

23. E kua aere atura a Niphai e tetai au tangata e manganui, ki rotopu i te au tangata i te bapetizo anga ia ratou kia tataraara, e e maata ta ratou ara i akakoreia i taua ra ra. E kua akamata akaou te au tangata i te noo ma te au i runga i te enua.

24. Kare atura e pekapeka akaou, mari ra e toko iti ua, tei akamata i te ako, ma te akakite atu i te au tuatua tei tataia ra, e kare oki e puapinga akaou kia akonoia te ture a Mose. I teianei, kua tarevake ratou, kare oki ratou i marama i te tuatua i tataia ra.

25. Ina ra, kua akaariuia mai ratou, e kua kite iora ratou i to ratou uaorai tarevake, kua akakite pu uaia mai te reira kia ratou, e kare i tupu ake te ture, ina ra, ka ope te reira i te tupu, i na, kua tae mai oki te tuatua kia ratou e, ka ope te reira i te tupu, ae, ko tetai iota e tetai vaʼi meangiti poepoe o te ture nei, kare ïa e kore, e ope takiri ïa i te tupu, no reira, i teia mataiti rai i kiteaʼi to ratou tarevake, e kua aaki ua i to ratou tarevake.

26. E ope akera te iva ngauru ma rua o te mataiti i te apai anga mai i te tuatua mataora ki rotopu i te au tangata, no te akairo tei tae mai kia ratou, mei tei tuatuaia e te au totou a te au peroveta tapu.

27. E ope katoa akera te iva ngauru ma toru o te mataiti ma te au, mari ua ra, te pupu keikeia a Katianetona, tei noo ki te maunga, ko tei akapekapeka i te enua, e no te maroiroi maata o to ratou au punanga, e to ratou au ngai muna, kare atu nei o te tangata mana kia akavi ia ratou, e maata ta ratou au tangata i ta ana, e kua maata rai oki te au tangata tei mate.

28. E tae akera ki te iva ngauru ma a o te mataiti, kua tupu mai ratou ki te maata anga, no te mea, e manganui te aronga orureau i roto i te ngati Niphai tei piri atu kia ratou, na te reira i apai mai i te tumatetenga ki te ngakau o te ngati Niphai tei noo ki te enua.

29. E kua tumatetenga katoa te ngati Lamana, no te mea, e manganui ta ratou au tamariki tei tupu mai, e kia pakari mai ratou, kua riro ia te tika ia ratou, e kua arataki keia e tetai o te ngati Zoroma, na roto i ta ratou pikikaa anga, e te au tuatua akareka, kia piri ratou ki te pupu keikeia o Katianetona.

30. No reira, e kino katoa to te ngati Lamana, e kua akamata iora to ratou akarongo e to ratou tuatua tika i te paruparu, no te mea kua viivii rava te uki ou.