1. E tae akera ki te iva ngauru ma rima o te mataiti, kua akamata iora te tangata i te akangaropoina i te au akairo e te au mea umere, ta ratou i akarongo ana, e kua akamata iora kia iti, e kia iti ua atu to ratou poitirere i te akairo e te au mea umere no te rangi mai, e i na, kua maro akaou to ratou ngakau, e kua poiri to ratou manako, e kua akamata i te irinaki kore i te au mea ravarai ta ratou i kite e ta ratou i akarongo.

2. E kua manako akera ratou i tetai au mea puapinga kore i roto i to ratou ngakau e, kua raveia taua au mea e te tangata e e te mana o te tiaporo, kia arataki ke e kia akavare i te ngakau o te tangata nei. E kua rauka oki ia Satani te ngakau o te au tangata e kua akapoiri akera i to ratou mata, e kua arataki ke ia ratou kia irinaki e, ko te apiianga o te Mesia e mea neneva ïa e te puapinga kore.

3. E kua tupu akera te maroiroi o te tangata i te rave i te au mea viivii, e te rikarika, e kare rava ratou e irinaki akaou e, e au akairo tetai e e au mea umere, te ka orongaia mai, e kua aere iora a Satani, i te arataki ke anga i te ngakau o te tamariki, i te timata anga ia ratou, e ma te maro anga atu ia ratou kia rave i te kino i te enua nei.

4. E kua ope iora te mataiti iva ngauru ma ono, e te iva ngauru ma itu e te iva ngauru ma varu, e te iva ngauru ma iva.

5. E ope katoa oki te anere anga o te mataiti mei te au ra o Mosaia, te ariki ki rungao i te au tangata o te ngati Niphai.

6. Ka ono anere ma iva mataiti i teianei mei te akaruke anga a Lihai ia Ierusalema.

7. E ka iva mataiti i teianei mei te tupu anga o te au akairo, tei tuatuaia e te au peroveta, e ka tae mai te Mesia ki te ao nei.

8. I teianei, kua akamata iora te ngati Niphai i te tatau i to ratou taime mei teia tuatau i orongaia mai ei te akairo no te aereanga mai o te Mesia, no reira, kua topa e iva mataiti.

9. E ko Niphai, koia te metua o Niphai tei mou i te akapapaanga, kare rava aia i oki mai ki te enua ko Zarahemela, e kare rava aia i kitea i runga i te enua katoa.

10. Te noo kino ua ra te tangata, kua ngaro takiri te au akoanga e te au totou anga tei tukuia mai kia ratou, e kua ope akera te ngauru o te mataiti, e te ngauru ma tai o te mataiti, i te ara.

11. Kia tae ki te ngauru ma toru o te mataiti, kua akamata iora te pekapeka e te tamaki i roto i te au enua katoa, no te mea, kua maata rava te pupu keikeia o te Katianetona, e kua ta i te au tangata e manganui e kua akatanea i te au oire e manganui e kua totoa i te mate kia maata, e te akamaringi anga toto ki to te enua katoa, e no reira, kua rave te au tangata ravarai to te ngati Niphai e to te ngati Lamana i ta ratou apinga tamaki e aru atu ia ratou.

12. No reira, ko te au ngati Lamana katoatoa tei ariu ki te Atua, kua aru atura i to ratou au taeake, koia te ngati Niphai, e kua ruru iora ki te ngai okotai, no to ratou uaorai ora, e ta ratou vaine, e ta ratou au tamariki, kia tamaki atu ki te Katianetona, ae, kia vai rai oki ta ratou tika e to ratou tika anga ki te akonoanga e ta ratou oki e akamori ra, i to ratou tiama anga e to ratou rangatira anga.

13. I mua ake ka ope atu ei te ngauru ma toru o te mataiti, kua akoia mai te ngati Niphai no te mate maata te ka tae kia ratou no teia tamaki nei, te ka riro ei mea rikarika tikai.

14. Ko te ngati Lamana tei kapiti atu ki te ngati Niphai, kua tatauia ratou ki roto i te ngati Niphai.

15. E to ratou taumaa kua apaina keia te reira ia ratou, e kua teatea to ratou pakiri mei to te ngati Niphai rai.

16. E ko ta ratou au tamaroa ou e te au tamaine e taurekareka tikai, e kua kapiti katoaia ratou ki te ngati Niphai, e kua tuatuaia ratou e, e ngati Niphai, e ope akera te ngauru ma toru o te mataiti.

17. E tae akera ki te akamataanga o te ngauru ma a o te mataiti te vai rai te tamakianga i rotopu i te ngati Niphai e te anana keikeia, e mea rikarika tikai, e kua rauka mai i te au tangata o Niphai te maroiroi, e kua arumaki atu i te au keikeia ki vao mai i to ratou enua, e kua oro atu te keikeia ki te maunga, e ki roto i to ratou au ngai muna.

18. E ope akera te ngauru ma ā o te mataiti. E kia tae akera ki te ngauru ma rima o te mataiti kua oki akaou mai ratou, e tamaki ki te au tangata o Niphai, e no te kino oki o te au tangata o Niphai, e ta ratou akatupu pekapeka, e te tauetonoanga, kua autu te keikeia ki runga ia ratou.

19. E ope akera te ngauru ma rima o te mataiti, te noo rai te tangata i roto i te au tumatetenga e manganui, e te tautau ua ra te koke o te mate ki runga ia ratou, e kua vaitata rava ratou i te akapouia e te reira, no ta ratou ara oki.