1. Ei reira oki e tupu ei tei tataia ra, e ka maeva, e tei ua, tei kare i anau, kia imene ua te reo maeva, e kapiki nui, e tei kore i mamae i te tamariki e, kua maata oki ta te takaua ra tamariki i ta te vaine noo tane ra tamariki, te tuatua maira Iehova.

2. E akamaata ana i to turanga puakapa, kia totoia te arai o to noo anga ki te atea ke, auraka e taporoporo, e akaroa i to au taura e akamou piri tikai i to au titi.

3. E tupu oki koe ki te maata, i te pae katau e te pae kaui, e nooia te pa enua e toou ra uanga, e tangataia oki te au oire tanea ra ia ratou.

4. Auraka e mataku, kare oki koe e akama, auraka oki e tumatetenga, kare oki koe e taakamaia, e akangaropoina oki koe i te akama i to ou anga ra, e te akakino i to takaua anga ra, kare koe e manako akaou i te reira.

5. Ko tei anga oki ia koe ra, ko to tane ïa, ko Iehova Sabaota tona ingoa, e to akaora ra, ko tei tapuia i Iseraela nei, e tapaia aia, te Atua o te au enua katoa ra.

6. Mei te vaine i akarukeia, e kua aue tona ngakau, kua kapiki a Iehova ia koe ra, te vaine oki i akaipoipo i te ou anga ra, e akarukeia iora, te tuatua maira to Atua ra.

7. I te tuatau iti nei i akaruke ei au ia koe, e akaputu maira au ia koe ma te aroa maata.

8. I te otooto anga riri i uunaʼi au i toku mata ia koe, i te kamoanga mata okotai, i te aroa mutu kore ra, e aroa atu ei au ia koe, te tuatua maira to akaora ra ko Iehova.

9. Mei te vai ia Noa ra teia iaku nei, mei taku oki i taputou i te vai ia Noa ra, e kare e tapoki akaouia te enua ra, koia katoa taku i taputou ia koe ra, e kare au e riri, kare oki e kauvae ia koe na.

10. E taka ke oki te au maunga, e ngaueue oki te au tuaivi, kare ra toku takinga meitaki ia koe e taka ke, e kare te koreromotu o toku ra iti tangata e ngaueue, te tuatua maira tei aroa mai ia koe ra, ko Iehova.

11. E tei tumatetenga, e tei papaia e te uriia, e kare i akapumaanaia i na, e akamou au i taau au toka ki te ngaika manea, e taau ra au pange ki te saphiro.

12. E maani oki au i to au maramarama ki te au toka Sema oko maata, e to au pa ra, ki te toka muramura, e toou ra kotinga ravarai, ei toka memeitaki ïa.

13. E te au tamariki katoa naau ra, e apiiia e Iehova, e ei au maata to te au tamariki naau ra.

14. E akatinamou ia koe ki te tuatua tika, ei te atea ke te tei takinga kino ia koe, kare oki koe e mataku, e i te rikarika, kare oki te reira e akavaitata mai ia koe ra.

15. I na, ka akaputuputu tikai ratou ki te ngai okotai, e patoi ia koe kare ra iaku nei, ko te ka akaputuputu ra e rave ia koe ra, ka inga ïa ia koe.

16. I na, naku oki i anga i te tupaki auri ra, ko tei pupui i te ngarau ai kia ka ra, e kua anga iora i te au taoanga rima, no tana angaanga, e naku oki i anga i te akapou ra kia pou.

17. Te taoanga ra noou i angaia ra, kare ïa e manuia, e te au vaa katoa e patoi ia koe ra, i te akava anga ra, naau ïa e akaapa atu ko te tuanga teia o te au tavini o Iehova, e tei iaku ta ratou tuatua tika, te tuatua maira Iehova.