1. I na, kia oti ta Iesu tuatua anga i teia au tuatua nei, kua akara aia i teia urupu tangata nei, e kua na ko atura kia ratou, kua tae toku taime i teianei.

2. Kua kite au e, te paruparu ra kotou, e kare kotou e marama ana i taku au tuatua, tei akaueia mai e te Metua kia tuatua atu kia kotou i teianei.

3. E teianei, ka aere ki to kotou au ngutuare, ka akamanako ei i te au mea taku i tuatua, e ma te pati ki te Metua na roto i toku ingoa, kia marama kotou, e ma te teateamamao i to kotou ngakau no apopo, e ka oki akaou mai au kia kotou.

4. E teianei, te aere nei au ki te Metua, e kia akaari atu au iaku uaorai ki te au kopu ngaro o Iseraela, kare oki ratou i ngaro i te Metua, kua kite oki aia i te ngai tana i arataki ia ratou.

5. E kia oti akera ta Iesu tuatua anga, kua akara takapini akaou aia i teia urupu tangata nei, e i na, te aue ra ratou, ma te akara tamou mai ki runga iaia, mei te mea ra, ka pati ratou e noonoo mai ana aia tetai manga taime.

6. Kua karanga atura aia kia ratou. I na, kua ki oki toku ngakau i te aroa ia kotou.

7. E aronga maki aina tetai i roto ia kotou na? Ka apai mai ia ratou. Kare aina e pirikoki, e matapo, e lepera, e apepa, te turi, e tei tu i tetai ua atu tu maki? E apai mai ia ratou, e naku e akaora ia ratou, e aroa maata toku ia kotou, kua ki oki toku ngakau i te aroa ua.

8. Te kite nei au e, te anoano nei kotou e kia kite kotou i taku i rave ki to kotou au taeake ki Ierusalema, kua kite oki au e, kua rava to kotou akarongo kia akaora au ia kotou.

9. Kia oti tana tuatua anga, kua apai maira te urupu tangata i ta ratou au maki, te pirikoki, te matapo, te murare, e te au tu maki ravarai, e kua akaora aia ia ratou ravarai tei apainaia mai kiaia.

10. Ko ratou ravarai, ko te aronga tei akaoraia, e te aronga meitaki ua, kua tupou akera ki raro i ona nga vaevae e akamori atu iaia, e e manganui oki tei aere mai e ongi i tona vaevae, e kua akapāi i tona vaevae ki to ratou roimata.

11. E kua akaue atura aia kia apainaia mai te au tamariki mearikiriki.

12. E kua apai maira ratou i ta ratou au tamariki e kua akanoo ia ratou ki runga i te one e takapini ake iaia, e kua tu akera a Iesu ki runga i rotopu ia ratou, e kua nekeneke atu te tangata ki muri e kia pou mai ratou i te apainaia mai.

13. E kia pou mai ratou, kua tu akera Iesu, e kua akaue atura i te tangata kia tuturi ki runga i te one.

14. E kia tuturi ra ratou ki runga i te one, kua ngunguru iora a Iesu i roto iaia uaorai, na ko maira, E taku Metua te manamanata nei au no te tu kino o te au tangata o te ngutuare o Iseraela.

15. E kia oti tana tuatua anga i teianei au tuatua, kua tuturi iora aia ki runga i te one, e i na, kua pure atu aia ki te Metua, e ko te au mea tana i pure, kare e rauka i te tata, e kua riro teia au tangata ei kite, ko tei akarongo iaia.

16. E teia ta ratou i akakite mai, kare te mata i kite ana e kare katoa te taringa i rongo ana, i tetai mea umere e te maata, mei ta matou i kite e ta matou i akarongo, i ta Iesu i tuatua ki te Metua.

17. E kare rava e tika i te arero kia tuatua, e kare e tika kia tataia e tetai ua atu tangata, kare oki e rauka i te ngakau o te tangata kia marama i te au mea mamaata, e te umere ta matou i akara, e i akarongo ia Iesu i te tuatua anga, e kare rava e tangata i kite i te rekareka tei tae ki to matou vaerua, i te taime i rongo ei matou iaia i te pure anga no matou ki tona Metua.

18. E kia akaoti a Iesu i tana pure anga ki te Metua, kua tu mai aia ki runga, kua maata rava te rekareka o te tangata, e kua ki i te rekareka.

19. Kua tuatua maira a Iesu kia ratou e kua akaue atura ia ratou kia tu.

20. Kua tu akera ratou ki runga, e kua na ko iora aia kia ratou, e ao tikai to kotou, no to kotou akarongo. E teianei kua ki rava toku rekareka.

21. E kia oti tana tuatua anga, kua aue iora aia, e kua riro oki te tangata ei kite no te reira, e kua rave akera aia i te tamariki, tatakitai, e akameitaki atura ia ratou, e ma te pure atu ki te Metua no ratou.

22. E kia oti iaia i te rave i teia, kua aue akaou aia.

23. Kua tuatua akera aia ki te au tangata, na ko atura kia ratou, ka akara na i ta kotou au tamariki.

24. E kia akara ra ratou kia kite oki, i na, te akara ra to ratou mata ki te rangi, e kite atura ratou i te rangi i te ngaa anga e kite iora ratou i te au angela i te eke anga mai, mei te mea ra e, tei rotopu i te ai, e kua aere maira ratou e kua koropini maira i taua au tamariki rikiriki ra, e kua takapiniia ratou ki te ai, e kua matuapuru mai te au angela ia ratou.

25. Kua akara tikai to ratou mata, e kua rongo te taringa, e kua riro ratou ei kite, e kua ktie ratou e, kua tika ta ratou akapapaanga, no te mea kua akara oki ratou, e kua akarongo te au tangata tataki tai, e ko te katoatoa anga ia ratou, mei te rua tausani e rima anere te tane, te vaine e te tamariki.