1. E koia tika taku e karanga atu kia kotou, e mamoe ke atu rai taku, e kare no teia nei enua, e kare oki no te enua i Ierusalema, kare no tetai ua atu tuanga o te reira enua, i te au ngai i aaereiaʼi e au.

2. Ko ratou taku e tuatua nei, kare ratou i akarongo ake i toku reo, e kare rava au i aravei ake ia ratou.

3. Kua rauka ra iaku tetai akaueanga mei te Metua mai, e kia aere atu au kia ratou, e kia akarongo ratou i toku reo, e kia kapitiia mai ratou ki roto i taku anana, kia okotai oki anana e okotai oki tiaki; no reira, te aere nei au, e akaari iaku uaorai kia ratou.

4. E te akaue atu nei au, e kia tata kotou i teia au tuatua i muri ake i toku taka ke anga atu, mei te mea, kare toku au taeake i Ierusalema tei akara mai ana iaku e tei piri mai kiaku i toku aaere anga i reira, e ui atu ki te Metua, na roto i toku ingoa, kia raukaʼi ia ratou te kite ia kotou, na roto i te Vaerua Tapu e pera katoa te au kopu ke, tei kore ratou i kite, kia akonoia teianei au tuatua tei tataia e ka akakiteia atu te reira ki te au Etene, e na roto i te ki anga o te au Etene, e raukaʼi te toenga o to ratou uanga, ko tei akapueurikirikiia i runga i te orau o te enua, e no to ratou akarongo kore, kia aratakiia mai, kia kite ratou iaku, to ratou Akaora.

5. Ei reira au e akaputuputu mai ei ia ratou mei nga akoko e a o te enua nei e ei reira katoa au, e akatupu ei i te koreromotu ta te Metua i papau ki te ngutuare katoa o Iseraela.

6. E ao to te au Etene, no to ratou akarongo iaku e no te Vaerua Tapu oki, tei riro ei kite kia ratou, noku, e no te Metua oki.

7. Ae, no to ratou akarongo oki iaku, te tuatua maira te Metua, e no to kotou akarongo kore, e te ngutuare o Iseraela, ei te au ra openga, ka tae ei te tuatua mou ki te au Etene, ei reira oki ratou e kite ei i te tupuanga o te au mea ravarai.

8. Ina ra, aue oki te au Etene akarongo kore e, te tuatua maira te Metua, kua aere mai ki runga i teia enua, e kua akapueurikiriki i toku iti tangata koia oki te ngutuare o Iseraela, ko toku iti tangata koia te ngutuare o Iseraela tei tuaru keia mei roto ia ratou, e kua takatakaiia ki raro i to ratou vaevae.

9. E no te aroa o te Metua ki te au Etene, e te akautungaanga a te Metua ki runga i toku iti tangata, koia te ngutuare o Iseraela, koia tika taku e karanga atu kia kotou, kia oti te reira, kua tuku au i toku iti tangata koia te ngtuare o Iseraela kia papaia, e kia takinga kinoia, e kia tamateia, e kia tuaruia mei roto ia ratou, e kia makitakitaia e ratou, e kia taitoitoia, e kia riro ei tuatua anga kino na ratou.

10. E kua akaue mai te Metua e kia tuatua au kia kotou e, kia tae ki te ra e araʼi te Etene i taku nei evangelia, e ka akateiteiia ratou i te ngakau parau ki te au basileia, e ki rungao i te au tangata o te ao nei, e ma te ki i te au pikikaa ravarai, e te au akavareanga, e te au tuatua ngaro, e te au tuatua pekapeka e te ta tangata, e te akamorimori, te akaturi, e te au angaanga viivii, e ka rave ratou i taua au mea ra, e ka patoi i te ki anga o taku nei evangelia, i na, te tuatua maira te Metua, ka rave ke mai au i te ki anga o taku evangelia mei roto mai ia ratou.

11. Ei reira au e akamaaraʼi i taku i papau ki toku iti tangata ki te ngutuare o Iseraela, e ka apai mai au i taku evangelia kia ratou.

12. Ei reira au e akaari atu ei kia kotou, te ngutuare o Iseraela, e kare te au Etene e mana ki rungao ia kotou, ka akamaara ra au i taku koreromotu kia kotou, e te ngutuare o Iseraela e, ei reira kotou e tae mai ei ki te kite o te ki anga o taku nei evangelia.

13. Kareka kia tataraara te au Etene e kia oki mai kiaku, te tuatua maira te Metua, ka kapiti katoaia mai ratou ki toku nei iti tangata, te ngutuare o Iseraela.

14. E kare oki au e akatika atu i toku au tangata, te ngutuare o Iseraela, kia na rotopu ia ratou, e kia takai atu ia ratou, te tuatua maira te Metua.

15. Me kore ra ratou e ariu mai kiaku, e akarongo mai i taku tuatua, ka akatika au i toku ra iti tangata te ngutuare o Iseraela, e kia aere na rotopu ia ratou e kia takatakai ia ratou, e ei reira ratou e riro ei, ei miti tei ngaro tona ra meitaki, e kua riro ïa ei mea puapinga kore, ka akaruke keia, e takatakaiia ïa e te vaevae o toku ra iti tangata te ngutuare o Iseraela.

16. Tika tikai taku e karanga atu kia kotou, kua akaueia mai au, e kia oronga au i teia enua ki teia iti tangata ei noo anga no ratou.

17. Ei reira te tuatua a te peroveta a Isaia e tupu ei, ko tei na ko mai e,

18. Ka akateitei to au tiaki i to ratou reo, e maeva katoatoa to ratou reo, e akara oki ratou te mata e te mata, kia akaoki mai a Iehova ia Ziona.

19. Kia puroro ua atu te rekareka kia maeva katoatoa, e te au ngai pou i Ierusalema, kua akapumaana oki te Atu i tona iti tangata, kua akaora ia Ierusalema.

20. Kua tuku a Iehova i tona rima tapu ki mua i te mata o te pa enua katoa ra, e ka kite to te au openga katoa o te enua ra, i te ora a to tatou Atua.