1. E teianei, kua kite oki matou e, e tika te reira, no te mea, e tangata tika oki aia tei akono i te akapapaanga, e maata tikai oki tana au semeio i rave na roto i te ingoa o Iesu, e kare rava atu e tangata e rauka iaia i te rave i te au semeio na roto i te ingoa o Iesu, mari ra, kia ma aia i te au ngai ravarai mei tana au ara.

2. E teianei, mei te mea e kare e tarevake a teia tangata i tona tarē anga i te taime, kua topa atu e toru ngauru ma toru mataiti i teianei.

3. E kua akamata akera te tangata i te akara matariki ki te au akairo tei orongaia mai e Samuela peroveta te ngati Lamana, no te tuatau e poiri ei nga ra e toru ra, ki runga i te enua.

4. Kua akamata akaou te ekoko, e te pekapeka i rotopu i te au tangata, e kua akangaropoina takiri i te au akairo tei orongaia mai.

5. E tae akera ki te toru ngauru ma a o te mataiti, i te marama mua e te ā o te rā, kua tupu mai tetai uriia maata, mei tei kore rava i kitea ana ki runga i te enua mei muatangana mai.

6. E kua tupu mai tetai matangi maata e te rikarika, e te mangungu rikarika rava, ngaueue te enua katoatoa e mei te mea ra e, ka ngaa i rotopu.

7. E kua korapa mai oki te uira, mei tei kore i kitea ana i te enua katoa nei.

8. E kua ka te oire ko Zarahemela i te ai.

9. E kua ngaromia te oire ko Moronai ki raro i te tai, e te aronga i noo ki reira kua maremo pouroaia.

10. E kua apainaia atu te one ki runga i te oire o Moroniha, e kua riro mai te ngai i taua oire ra ei au maunga teitei.

11. E akapouanga rikarika oki ki te euna ki apatonga.

12. Ina ra, e maata atu te rikarika o te akapou anga ki te tuanga enua i apatokerau, e i na, kua tuke rava te aro o te enua, no te matangi, e te puaioio, e te mangungu, e te uira, e te ngaueue o te enua katoatoa.

13. Kua ngaangaa te mataara maata, kua kino te au mataara tika, e te au ngai mania ua kua pukupukuia.

14. E kua ngaromia tetai au oire mamaata, e kua ka tetai pae, e manganui oki tei ruru ia e inga atura te au are ki raro, e kua matemate te au tangata e kua vai tanea ua te reira au ngai.

15. Kua vai ua ra tetai au oire, kareka ra e kino maata to te reira, e e manganui oki ratou tei mate.

16. Kua riro ke atu tetai pae na roto i te puaioio, me kua aere ratou kiea, kare e tangata i kite, mari ra kua kite ratou e kua riro ke ratou.

17. E kua tuke takiri te aro o te enua, no teia uriia nei, e te mangungu e te uira, e te ngaruerue anga o te enua.

18. E i na, kua ngaa rua te toka, kua ngaangaa te reira ki runga i te aro o te enua, kua kitea oki te au ungaunga rikiriki ki roto i te au va e i te au ngai katoatoa i runga i te aro o te enua.

19. E kia akaoti iora te mangungu, te uira, e te uriia e te matangi, e te ngaueue o te enua, e i na, e toru rai ora, e kua karanga tetai pae e, e maata atu, kua oti ra te tupuanga o te au mea mamaata e te rikarika i roto i nga ora e toru ra, e i na, ko te poiri maata akera ki runga i te enua.

20. E poiri tangotango ki runga i te aro o te enua, e ko te aronga e toe ra ki runga i te enua tei kore i mate, kua tapokiia ratou e te kou o te poiri.

21. Kare oki e marama, no te poiri oki, kare e kanara, kare e mori kare oki e ka te rakau maro, e kare takiri e marama.

22. E kare rava e marama e kitea ana, kare e ai, kare e ata, kare e ra, kare e marama, kare e etu, kua maata ra te poiri tangotango ki runga i te aro o te enua.

23. E kua vai te reira e toru ra, kare rava e marama i kitea, e maata oki te aue e te irieanga, e te mii i rotopu i te au tangata, e maata tikai te ngunguruanga o te au tangata, no te poiri e te tumatetenga maata tei tae kia ratou.

24. I tetai ngai kua akarongoia ta ratou aue, i te na ko anga e, aue, naringa ua tatou i tataraara ana i mua ake i teia ra maata e te rikarika, penei ake ka ora mai to tatou au taeake, e kare ratou e ka i roto i te ra oire maata ko Zarahemela.

25. E i tetai ngai ke, kua akarongoia ratou i te aue anga e te na ko anga e, e naringa ua tatou i tataraara na mua ake i teia ra maata e te rikarika, e naringa kare i peiia te au peroveta ki te toka e i uri atu ia ratou ki vao, kua ora to tatou mama, e ta tatou au tamaine manea, e ta tatou au tamariki, kare oki e ngaromia ki roto i tera oire maata ko Moroniha. No reira oki te aue anga a te tangata e aue anga maata tikai, e te rikarika.