1. Kia oti ia Iesu i te akakite i teia au tuatua, kua akamarama iora aia ki te urupu tangata, e kua akatakataka aia i te au mea ravarai, te mea mamaata e te mearikiriki.

2. E kua tuatua atura, ko teia tuatua tei kore ia kotou na, kua akaue mai te Metua kia oronga atu au kia kotou, kua kite ana oki aia e, e mea tau kia orongaia atu ki te au uki i te tuatau ki mua.

3. Kua akamarama meitaki aia i te au mea katoa, mei te kapuaanga mai, e tae ua atu ki te tuatau e oki mai ei aia ma tona kaka koia oki te au mea katoatoa te ka tae ki runga i te enua nei, e tae ua atu ki te tae anga o te au mea ravarai i te vera maata, ei reira te enua e pokaiiaʼi ki te ngai okotai mei te pokaikai tuatua ra, e ei reira te rangi e te enua e riro ke atu ei.

4. E kia tae ki te ra maata openga ra, e tu ei te au tangata, te au kopu, te au reo, e te au basileia ki mua i te aroaro o te Atua, kia akavaia ki ta ratou angaanga, me e meitaki, me e kino.

5. Mei te mea e meitaki, ei te tuakaouanga o te ora mutu kore, e mei te mea e kino, ei te tuakaouanga o te akaapaanga, kia tau ki te aroa ua, e te tuatua tika, e te tapunui, i roto i te Mesia ko tei vai ana mei mua ake i te akamataanga o teianei ao.

6. E teianei, kare e rauka kia tataia ki roto i teia puka te anere anga o te tuanga no te au mea ta Iesu i apii tikai ki te au tangata.

7. Kareka ra tei roto i te au papa a Niphai te maataanga o te au mea ta Iesu i apii atu ki te au tangata.

8. E ko teia au mea taku e tata nei, e tuanga iti ua te reira o te au mea tana i apii atu i te tangata, e kua tata au e ma te inangaro oki, e kia apai akaouia mai ki teia au tangata, mei te au Etene, mei ta Iesu i tuatua.

9. E me ariki ratou i teia, e mea tau tikai e, kia na mua te timata i to ratou akarongo, e mei te mea e ka akarongo ratou i teia au mea nei, ei reira te au mea mamaata e akakiteia mai ei kia ratou.

10. E me kare oki ratou e akarongo mai i teia au mea nei, ka rave keia te au mea mamaata mei ia ratou i reira, e ka akaapaia ratou.

11. I na, te manako nei au e kia tataia te au kotikotianga katoatoa tei runga i te au papa a Niphai, ina ra, kua araiia mai au e te Atu i te na ko anga mai e, ka timata au i te akarongo o toku au tangata.

12. No reira, kua tata ua au ko Momoni i te au mea tei akaueia mai kiaku, e te Atu. E teianei te akaoti nei au i te au mea tei akaueia mai kiaku kia rave.

13. No reira, te anoano nei au e kia kite tikai kotou e, kua apii tikai te Atua i te au tangata i nga ra e toru, e i muri mai, kua akaari putuputu mai aia iaia kia ratou, e kua atiati i te varaoa, e ma te akameitaki i te reira, e ma te oronga atu kia ratou.

14. E kua apii tikai aia, e kua tauturu atu i te au tamariki a te au tangata, mei tei tuatuaia atu na, e kua tatara aia to ratou arero e kua tuatua ratou ki to ratou Metua i tetai au mea umere maata, e maata atu i tana i eeu mai ki te au tangata, kua tatara oki aia i to ratou arero, kia rauka ia ratou kia tuatua.

15. E i muri ake i tona kake anga atu ki te rangi. ko te rua te reira o tona mama anga mai kia ratou, e kua aere atu aia ki te Metua, i muri ake i tona akaora anga i to ratou au maki, to ratou pirikoki, te matapo, te taringa turi, e kua akaora i te au tu maki i rotopu ia ratou, kua akatu i te tangata mate, e kua akakite i tona mana kia ratou, e kua kake atu ki runga i te rangi ki tona Metua.

16. I na, i tera mai ra, kua akaputuputu akaou maira te au tangata ki te ngai okotai, e akara akera ratou i te au tamariki e kua rongo oki, ae, kua amama te vaa o te au pepe, e kua tuatua mai i tetai au mea umere, e ko te au mea ta ratou i tuatua mai, kua araiia te reira, e auraka rava e tangata e tata i te reira.

17. I reira to te au pipi ta Iesu i iki, akamata anga i te bapetizo e te apii i te au tangata e manganui tei aere mai kia ratou, e ko te au tangata tei bapetizoia na roto i te ingoa o Iesu, kua ki akera ratou i te Vaerua Tapu.

18. E manganui oki ratou tei akara, e tei rongo i tetai au mea kare e tika i te arero kia akakite atu e tei kore e tika i te ture kia tataia.

19. E te apii ra ratou, e te tauturu ra tetai ki tetai, e kua akonoia ta ratou au apinga na ratou katoatoa, e tuatua mou anake ta tetai ki tetai.

20. E kua rave anake ratou i te au mea ravarai mei tei akaueia kia ratou e Iesu.

21. E ko tei bapetizoia na roto i te ingoa o Iesu, kua tuatuaia ko te Akonoanga a Iesu.