1. Te aaere ua ra te au pipi a Iesu ma te ako atu i te au mea ta ratou i akarongo e tei kitea e ratou, e ma te bapetizo na roto i te ingoa o Iesu, e i muri akera, kua akaputuputu maira te au pipi e kua taokotai mai ratou i te pure ma te akakoreanga kai.

2. Kua akaari akaou mai a Iesu iaia kia ratou, te pure ra oki ratou ki te Metua na roto i tona ingoa, e kua tu akera a Iesu ki rotopu ia ratou e kua na ko maira kia ratou, Eaa ta kotou e anoano iaku kia oronga atu na kotou?

3. Kua karanga atura ratou kiaia, E te Atu te anoano nei matou e kia akakite mai koe kia matou i te ingoa ta matou ka topa ki te akonoanga, no te mea, te maata nei te tauetonoanga i roto i te au tangata no te reira.

4. Kua tuatua maira te Atua kia ratou, Koia tika taku e karanga atu kia kotou, ne te aa ra te au tangata i mutamutaʼi e i pekapekaʼi no runga i tena mea?

5. Kare ainei ratou i tatau ana i tei tataia ra e, e apai kotou ki rungao ia kotou te ingoa o te Mesia ko toku nei ingoa rai ïa? Ko te ingoa oki teia ka tuatuaiaʼi kotou i te au ra openga.

6. Ko tei rave i toku nei ingoa ki rungao iaia, ma te tāpū marie e tae ua atu ki te openga ra, ka ora ïa.

7. No reira, ko ta kotou e rave ra, na roto ïa i toku nei ingoa, no reira, e topa kotou i te ingoa o te akonoanga ki toku nei ingoa, e e pati kotou ki te Metua na roto i toku ingoa, kia akameitakiia te akonoanga noku ra.

8. E ka naea oki e riro ei, e naku teia akonoanga, mari ra, kia topaia ki toku nei ingoa. Me ka kapikiia te akonoanga ki to Mose ingoa, na Mose rai te reira akonoanga, me kare, kia kapikiia ki te ingoa o tetai tangata, na te reira tangata rai te reira akonoanga, ina ra, me kapikiia ki toku nei ingoa, naku rai i reira te Akonoanga me kua patuia ki runga i taku evangelia.

9. Tika tikai taku e karanga atu nei kia kotou, kua patuia kotou ki runga taku nei evangelia, no reira, e ko te au mea ta kotou ka tuatua, kia tuatuaia ïa i toku ingoa, no reira, me pati kotou ki te Metua no te akonoanga, me na roto i toku ingoa, ka akarongo mai te Metua.

10. E mei te mea e kua akamouia te akonoanga ki runga i taku evangelia, ka akakite ua mai te Metua i tana uaorai angaanga ki roto.

11. Mei te mea ra, e kare i patuia ki runga i taku evangelia, i na, kua patuia ki runga i te angaanga a te tangata, me kore ra ki runga i te angaanga a te tiaporo, e tika tikai taku i karanga atu kia kotou ka rekareka ratou no ta ratou angaanga no tetai tuatau ua, e i muri akera, kia tae mai te openga, ka uriia ki raro, e ka titiria ki roto i te ai, ki te ngai kare e oki akaou mai.

12. Ka aru oki ta ratou angaanga ia ratou, no ta ratou angaanga oki e uriiaʼi ratou ki vao, no reira, e akamaara i te au mea taku i apii atu kia kotou.

13. I na, kua oronga atu au i taku evangelia kia kotou, e ko teia te evangelia taku i oronga atu kia kotou koia oki, kua aere mai au ki te ao nei, kia rave i te anoano o taku Metua, no te mea, na te Metua i tono mai iaku.

14. E kua tono mai te Metua iaku, kia akateiteiia, e kia oti toku akateiteiangaia ki runga i te satauro, ka akakoukou mai au i te tangata kiaku, e mei iaku i akateiteiia ra, ka pera katoaia te tangata, ka akateiteiia e te Metua ra, kia tu ki mua iaku, kia akavaia no ta ratou angaanga, me e meitaki ratou, me e kino.

15. Ko te tumu teia i akateiteiiaʼi au, no reira, na roto i te mana o te Metua, ka akakoukou pouroa au i te tangata kiaku, kia akavaiaʼi ratou kia tau ki ta ratou angaanga.

16. E ko te ka tataraara e ka bapetizoia i roto i toku ingoa, ka ki aia, e me tāpū marie aia e tae ua atu ki te openga, koia te ka kore e akaapaia e au ki mua i taku Metua a taua ra ra, me akava au i to teia nei ao ra.

17. Ko te kore e tāpū marie e tae ua atu ki te openga, ka uriia atu aia ki raro e ki roto i te ai te ngai kare e oki akaou mai, no te akava anga tuatua tika a te Metua.

18. E ko te ao teia tana i oronga no te tamariki a te tangata. E no reira, ka akatupu aia i te au tuatua tana i oronga atu kia ratou e kare oki aia e pikikaa, mari ra, ka akatupu i tana au tuatua.

19. Kare oki e mea viivii, e tomo ki roto i tona ra basileia no reira, kare rai oki e tangata e tomo ki tona akangaroianga, mari ua, ko tei tama i to ratou kakau ki toku nei toto, no to ratou akarongo, e no to ratou tataraara i ta ratou au ara, e to ratou akarongo mou e tae ua atu ki te openga.

20. E teianei, ko te akaueanga teia, E tataraara, e te au openga mai o te enua, e ariu mai kiaku, e kia bapetizoia kotou na roto i toku nei ingoa kia akatupuia kotou na roto i te arikianga i te Vaerua Tapu, kia tu ei kotou ma te apa kore i mua iaku i te ra openga ra.

21. Koia mou taku e karanga atu kia kotou, ko taku evangelia tikai teia, kua kite oki kotou i te au mea ta kotou ka rave i roto i taku nei akonoanga, ko te angaanga oki ta kotou i kite ana iaku i te rave anga, ko ta kotou katoa ia ka rave, e ta kotou i kite ana iaku i te rave anga, ko ta kotou rai ïa ka rave.

22. No reira, me rave kotou i teia au mea nei, e ao tikai to kotou, ka akateiteiia kotou kia tae ki te ra openga ra.

23. Ka tata na i te au mea ta kotou e akarongo mai nei e ta kotou e akara mai na, mari ua, ko te mea tei araiia.

24. Ka tata na i te angaanga a teia au tangata, ko te ka tupu, mei tei tataia oki i tei tupu ana.

25. E i na oki, no roto i te puka tei tataia ra, e te ka tataia, e akavaiaʼi teia au tangata, e na te reira kiteaiaʼi ta ratou angaanga ki te au tangata.

26. I na, kua tata pouroaia te au mea e te Metua, no reira, no roto i te puka tei tataia e akavaiaʼi to te ao nei.

27. E e kite ainei kotou, e na kotou e akava i teia au tangata kia tau ki te tuatua tika taku e oronga atu kia kotou, ka tau i reira kia riro kotou mei te aa? Tika tikai taku e karanga atu kia kotou, mei iaku rai.

28. E teianei, te aere nei au ki te Metua ra. E tika taku e karanga atu kia kotou, ko te au mea ta kotou e pati ki te Metua na roto i toku ingoa ka rauka mai ïa ia kotou.

29. No reira, e pati, e e orongaia mai ia kotou, e topapa, e e eeuia mai te pa ia kotou, e ko tei pati ra, ka rauka tana, e tei topapa ra, ka eeuia mai te pa iaia.

30. E teianei kua tupu tikai toku rekareka ki te ki anga, no kotou oki, e teia nei uki, ae, kua rekareka rai te Metua, e te au angela katoa, no kotou oki e teia nei uki, kare rava tetai e ngaro ke atu.

31. I na, te anoano nei au, kia marama kotou, ko kotou oki te aronga e ora nei i teia uki, kare rava tetai e ngaro ke, e no ratou oki i ki ei au i te rekareka.

32. Ina ra, ka tumatetenga tikai au ki te ā o te uki mei teianei uki, ka arataki tuikaaia ratou e ïa, koia oki te tamaiti a te mate mutu kore, e ka oko oki ratou iaku ki te ario e te auro, no te mea ka pou i te uu e te pe, te ngai e tomo ei te keia e keia. E i taua ra ra, e aravei ei au ia ratou, i te akaoki anga i ta ratou uaorai angaanga ki runga i to ratou upoko.

33. Kia akaoti a Iesu i teia au tuatua nei, kua na ko atura aia ki tana au pipi. E tomo kotou na te ngutupa oiti, e tika oki te ngutupa, e te kokota o te ara, e tae atu ei ki te ora, e toko iti ua te ka kite atu i te reira, te atea ua nei te ngutupa, e te pararauare o te ara e tae atu ei ki te mate, e manganui oki te ka aere atu na reira, e kia po ra, kare atura e tika i te tangata kia rave i te angaanga.