1. E i na, kua akarongo to te enua katoatoa i teia nei au tuatua, e kua akakite atu i te reira. I muri ake i taua tuatuaanga ra, kua akamutu te maniania i roto i te enua katoatoa, no tetai au ora e manganui.

2. Kua umere maata rava te au tangata, e kua akamutu akera i ta ratou aue e to ratou eva kaku no to ratou i mate ra, e kua noo muteki ua te enua no tetai au ora e manganui.

3. E kua tae akaou maira tetai reo ki te au tangata e kua rongo pouroa te tangata e kua riro ei kite no te reira. I te na ko anga e,

4. Aue kotou te au tangata o teia au oire mamaata i pou e, te uanga o Iakoba, te ngutuare o Iseraela, maata taku nei akaputuputu anga ia kotou, mei te moa e akaputuputu i tana punupunua ki raro i tona peau, kare ra kotou i inangaro.

5. E kua roa toku akaputuputu anga ia kotou mei te moa e akakoukou i tana punua ki raro i tona ra peau. E kotou e te ngutuare o Iseraela tei inga, e kotou e te au tangata o te ngutuare o Iseraela tei noo ki Ierusalema, e tei inga oki e, kua roa toku akaputuputu anga ia kotou mei te moa e akakouoku i tana punua ki raro i tona peau, e kare kotou i akarongo.

6. E kotou e te ngutuare o Iseraela taku i akaora, ka akaputuputuia kotou, mei te moa e akakoukou i tana punua ki raro i tona peau, me ka tataraara kotou e ma te ariu mai kiaku ma te ngakau tae tikai.

7. Me kore ra, e te ngutuare o Iseraela, ko te ngai ta kotou i noo ra ka takoreia te reira, e tae ua atu ki te tuatau e tupu ei te koreromotu a to kotou au metua.

8. E kia oti akera te tangata i te akarongo i taua au tuatua ra, kua akamata akaou akera ratou i te aue e te mii no to ratou au taeake e to ratou au kopu tangata i ngaro.

9. E ope akera nga rā e toru, e tae akera ki te popongi, kua peke ke atura te poiri mei rungao i te enua, e kua akamutu iora te enua i te ngaueue e kua ngaangaa te au toka, e kua akamutu te ngunguru anga, e kua ngaro ke atu te au maniania ravarai.

10. E kua kapiti akaou te enua e kua tu. E kua akamutu te mii e te aue a te aronga i akaoraia maira, e kua riro akera to ratou irieanga ei mea mataora, e to ratou eva kaku kua tauiia ki te akangateitei, ma te akameitaki atu i te Atu ia Iesu Mesia to ratou Akaora.

11. Kua tupu oki te tuatua i tataia mei tei tuatuaia mai e te au peroveta.

12. Ko te tuanga tuatua tika anake teia o te tangata tei akaoraia. Ko ratou oki teia tei ariki i te au peroveta, e kare oki i pei ia ratou ki te toka, e ko ratou oki tei kore i akamaringi i te toto o te aronga tapu. Ko ratou tei akaoraia.

13. Kua akaoraia ratou, e kare atura i apukuia e te one, e kare oki i ngaromia ki roto i te tai, e kare oki i ka i te ai, e kare oki ratou i pou, kare oki i paii ki te mate, e kare oki i riro ke i te puaioio, e kare oki te mana o te kou poiri i tapoki ia ratou.

14. E teianei, ko tei tatau ra, kia marama aia, e tei iaia te puka ra, e kimi pu tikai, kia kite i teia au mate e teia au akapouanga, e te ai, te auai, e te matangi, te puaioio, e te ngaa anga o te enua kia ariki ia ratou, kia kite me kare ainei teia au mea i akatupu i te au totou a te au peroveta tapu.

15. I na, te karanga atu nei au kia kotou, e mangnaui tei akakite i teia au mea i te aereanga mai o te Mesia, e kua tamateia ratou no tei akakite i teia nei au mea.

16. Ae, kua tuatua te peroveta a Zenosa i teia nei au mea, e ko Zenoka katoa tetai tei tuatua no teia au mea, no te mea kua tuatua raua ia tatou, e toenga oki tatou no ta ratou uanga.

17. E i na, kua akakite katoa mai to tatou metua a Iakoba, no runga i te toenga o te uanga a Iosepha. E i na, kare ainei tatou i te toenga no te uanga a Iosepha? E teianei au mea tei tuatuaia no tatou, kare ainei e kua tataia te reira ki runga i te au papa veo, ta to tatou metua, ta Lihai i apai mai mei Ierusalema?

18. E kia tae ki te openga o te toru ngauru ma a o te mataiti, ka akakite atu au kia kotou e, kua akaoraia te au tangata o Niphai, e te ngati Lamana katoa oki kua akaoraia e kua orongaia kia ratou te tikaanga maata kia kite i te au mea ravarai, ma te au akameitakianga maata tei riringiia mai ki runga i to ratou upoko, no reira i muri ake to te Mesia kake anga atu ki te rangi, kua akakite atu aia iaia uaorai kia ratou.

19. I te akaarianga i tona kopapa, ma te matuapuru anga ia ratou, e te tuatua o tana ra angaanga, ka orongaia mai te reira a muri atu, no reira i teia taime nei, te akaoti nei au i taku tuatua anga.