1. E teianei, kia oti ta Iesu tuatua anga i teia nei au tuatua, kua akara takapini akera aia ki te urupu tangata, e kua na ko atura kia ratou, E i na, kua rongo kotou i te au mea taku i apii ana i mua ake ka aere atu ei au ki taku Metua. No reira, ko tei akamaara i taku nei au tuatua, e ka rave i te reira, koia taku e akatu mai ki runga kia tae ki te rā openga.

2. E kia akaoti akera a Iesu i teia nei au tuatua, kua kite iora aia i tetai aronga i roto ia ratou, i te umere e te vavaria e, e ka akapeea aia no runga i te ture a Mose, kare oki ratou i marama i te tuatua e, kua ope ke te au mea taito, e kua riro te au mea ravarai ei mea ou.

3. E kua tuatua maira aia kia ratou, auraka kotou e poitirere ua, no tei karanga atu au kia kotou e, kua ope ke te au mea taito, e kua riro te au mea ravarai ei mea ou.

4. I na, te karanga atu nei au kia kotou, kua tupu i teianei te ture a Mose.

5. E i na, ko au oki teia tei oronga atu i te ture, e ko au rai oki tei koreromotu ki toku iti tangata kia Iseraela, no reira, kua tupu te ture na roto iaku, i aere mai nei oki au ei akakiki i te ture, no reira, kua tae ki tono openga i teianei.

6. Kare oki au e akakore i ta te au peroveta, e te au mea e manganui kare i tupu ake noku nei, koia tika taku e karanga atu kia kotou na, ka tupu pouroa te reira.

7. E no tei karanga atu au kia kotou e, kua ope ke te au mea taito e kare oki au e akakore i tei tuatuaia no runga i te au mea te ka tae mai.

8. E i na, kare i tupu ake te au koreromotu taku i papau ki toku iti tangata, kareka ra te ture tei orongaia kia Mose kua oti te reira iaku nei.

9. Ko au te ture, e te marama, e akara mai kiaku, ma te tapu marie e tae atu ki te openga ra, e ka ora kotou, ko tei tapu marie e tae ua atu ki te openga ra, e ora mutu kore tona.

10. E teianei kua oronga atu ana au i te akaueanga kia kotou, no reira, e akono kotou i taku au akaueanga. Ko ta te ture oki ïa, e ta te au peroveta, kua akakite oki ratou i te tuatua tika noku.

11. E kia oti ta Iesu tuatua anga i teianei au tuatua, kua na ko iora aia ki te tino ngauru ma rua tana i iki.

12. E pipi kotou naku, ko kotou te marama o teia iti tangata, te toenga o te ngutuare o Iosepha.

13. I na, ko to kotou enua ipukarea teia, e na te Metua i oronga mai i te reira kia kotou.

14. E kare rava te Metua i akaue mai ana iaku, kia akakite atu au i te reira ki to kotou au taeake i Ierusalema.

15. E kare katoa aia i akaue mai iaku, e kia akakite au kia ratou no runga i tetai kopu ke o te ngutuare o Iseraela, ta te Metua i arataki ke atu ki vao mai i te enua.

16. Ko teia ua ta te Metua i akaue mai, kia akakite atu kia ratou.

17. E mamoe ke atu rai tetai, kare no teia nei anana, e arataki katoa mai au ia ratou, e akarongo oki ratou i toku nei reo, e ka okotai oki anana, e okotai tiaki.

18. E teianei, no te marokiakia, e te akarongo kore, kare atu nei ratou i marama i taku nei tuatua, no reira, kua akaueia mai au e te Metua e auraka e tuatua akaou atu i teia au mea kia ratou.

19. Ina ra, koia tika taku e karanga atu kia kotou, e kua akaue mai te Metua iaku, e te akakite atu nei au kia kotou, e kua akataka keia kotou mei roto mai ia ratou, no ta ratou ara, e no to ratou kino kare atu nei ratou i kite ia kotou.

20. E koia tika taku e karanga atu kia kotou, e au kopu ke atu rai tetai ta te Metua i akataka ke mei roto mai ia ratou, no to ratou kino oki e kare katoa ratou i kite ia ratou.

21. E tika tikai taku e karanga atu kia kotou, ko kotou oki taku i tuatua atu e, E mamoe ke atu rai taku, kare no teianei koro, e arataki mai oki au ia ratou, e ka akarongo mai oki ratou i toku nei reo, kia okotai oki anana, e okotai tiaki.

22. Kare oki ratou i marama, kua manako ratou e, ko te au Etene. Kare oki ratou i kite e, ka akaariuia mai te au etene na roto i ta ratou apiianga.

23. Kare rai oki ratou e marama, no tei karanga au e, ka akarongo mai ratou i toku nei reo, e kare rai ratou i marama, e kare roa te au etene e akarongo i toku reo, e kare oki au e akakite iaku uaorai kia ratou, mari ra na roto i te Vaerua Tapu.

24. Ina ra, kua rongo kotou i toku nei reo, e kua akara mai iaku, e mamoe oki kotou naku, e ka kapitiia kotou ki roto i te aronga ta te Metua i oronga mai kiaku.