1. E kua akaue iora a Iesu i tana au pipi, kia apai mai i tetai varaoa, e te wina kiaia.

2. E te aere ra ratou i te kimi varaoa e te wina, kua akaue aia i te au tangata kia noo ki raro.

3. E kia oki mai te au pipi ma te varaoa e te wina, kua rave maira aia i te varaoa e kua atiati iora, e akameitaki atura, e kua oronga atura ki tana au pipi, e kua akaue atu ia ratou kia kai.

4. E kai iora ratou, e pangaia akera, kua akaue iora aia, kia tuaia ki te au tangata.

5. E kua kai iora taua urupu tangata ra, e pangia akera, kua karanga atura aia ki tana au pipi, i na, kia akataoongaia tetai tangata i rotopu ia kotou e tikaʼi, koia taku e akamana ei atiati i te varaoa e kia akameitaki e kia oronga ki te au tangata o taku nei akonoanga, ki te aronga tei akarongo e kua bapetizoia i toku nei ingoa.

6. Ko ta kotou angaanga teia ka rave, mei taku i rave, mei taku oki i atiati i te varaoa e kua akameitaki e kua oronga atu kia kotou.

7. Ko ta kotou oki teia ka rave ei akamaaraanga i toku kopapa taku i akaari atu kia kotou. Ka riro te reira ei kite ki te Metua e, ka akamaara ua rai kotou iaku. E me akamaara ua mai rai kotou iaku, ka noo ua mai rai toku Vaerua kia kotou.

8. E kia oti tana tuatua anga i teia nei au tuatua, kua akaue atura aia i tana au pipi kia rave mai i te wina i roto i te kapu e inu oki i te reira, e oronga katoa atu ki te au tangata kia inu ratou.

9. E kua pera tikai ratou, kua inu, e pangia akera, e kua oronga atu ki te au tangata, e kua inu iora, e pangia akera.

10. E kia oti i te au pipi i te rave i te reira, kua na ko maira a Iesu kia ratou, E ao tikai to kotou, ko tei rave i teia nei au mea, ko te akakikianga oki teia o taku akaueanga, e kia akakite atu ki te Metua e, te anoano nei kotou kia rave i te au mea taku i akaue atu kia kotou.

11. Ko ta kotou oki teia ka rave ki te aronga tei tataraara e kua bapetizoia i toku nei ingoa, e kia rave kotou i te reira, ei akamaaraanga i toku nei toto, tei maringi mai no kotou, e kia akakite atu kotou ki te Metua, e ka akamaara ua rai kotou iaku. E me akamaara ua mai kotou iaku, ka noo ua mai rai toku Vaerua kia kotou.

12. E te akaue atu nei au ia kotou kia rave kotou i teia nei au mea. E me rave tamou kotou i teia au angaanga, e ao tikai to kotou, kua patuia oki kotou ki runga i toku papa.

13. Kareka ko tetai i rotopu ia kotou te ka akamaata, me kore ra, ka akameangiti i teia, kare aia i patuia ki runga i toku nei papa, mari ra, kua patuia ki runga i te tango o te one, e kia topa mai te ua, e kia tae te vai puke, e te matangi i te arara anga mai, e tutuki atura ki runga i taua are ra, ka inga ïa, e te tuera ua maira te ngutupa o ade i te ariki ia ratou.

14. No reira e ao ra to kotou, ko tei akono i taku nei au akaueanga ta te Metua i akaue mai iaku kia oronga atu kia kotou.

15. Koia tika taku e karanga kia kotou na, e ara, e pure ma te tukutuku kore, ko te timataia aea kotou e te tiaporo, e ko te arataki tuikaaia aea kotou e ïa.

16. Mei taku i pure i rotopu ia kotou na, e akapera katoa kotou i roto i taku akonoanga, ki rotopu i toku au tangata tei tataraara e tei bapetizoia na roto i toku nei ingoa. I na, ko au te marama, kua vaio ana au i te akaraanga na kotou.

17. Kia oti ta Iesu tuatua anga i teia au mea ki tana au pipi, kua uri akaou atura aia ki te au tangata, e kua na ko atura, kia ratou,

18. I na, koia mou taku e karanga atu kia kotou, e ara e pure, kia kore kotou e rokoia e te timataanga, te anoano nei oki a Satani ia kotou, kia ruru ia kotou mei te sitona.

19. No reira, kia pure ki te Metua, na roto i toku ingoa ma te tukutuku kore.

20. E ko te au mea tika ta kotou ka pati ki te Metua na roto i toku ingoa, ma te irinaki e, ka rauka mai, i na, ka oronga uaia mai.

21. E pure i to kotou au kopu tangata ki te Metua na roto rai i toku ingoa e kia akameitakiia mai ta kotou vaine, e ta kotou au tamariki.

22. E i na, e uipa putuputu kotou; e auraka kotou e arai atu i tetai ua atu tangata i te aere mai kia kotou kia uipa kotou i ta kotou au uipaanga, e tuku ua ia ratou kia aere mai, e auraka e arai atu.

23. E pure katoa kotou no ratou e auraka e uri atu ia ratou ki vao, e me ka aere putuputu mai ratou kia kotou, e pure atu ki te Metua no ratou na roto i toku ingoa.

24. No reira, e akateitei i to kotou marama, kia kaka atu ïa ki to te ao nei. I na, ko au oki te marama ta kotou ka akateitei; ko ta kotou oki i kite ana iaku i te rave anga. I na, kua kite ana kotou iaku i te pure anga ki te Metua, e kua riro pouroa kotou ei kite no te reira.

25. E te kite ra kotou e, kare rava au i akaue ana i tetai o kotou kia aere ke atu, mari ra, kua akaue atu au kia aere mai kotou kiaku kia aa kotou, e kia akara, mei te reira katoa ta kotou ka rave ki to te ao nei, e ko te ka aati i teianei akaueanga, ka rokoia aia e te timata anga.

26. E kia oti akera ta Iesu tuatua anga, kua ariu akaou mai tona mata ki te au pipi tana i iki e kua na ko atura ra kia ratou,

27. Koia mou taku e karanga atu kia kotou, e oronga akaou atu au kia kotou i tetai akaueanga e oti, ka aere atu au ki te Metua ra kia akatupu i tetai akaueanga ke tana i oronga mai kiaku.

28. E teianei, ko teia te akaueanga taku e oronga atu kia kotou, auraka kotou e akatika, me kua kite kotou i tetai i rotopu ia kotou ma te tau kore, kia rave aia i toku kopapa e toku nei toto, ka rave ei kotou i te reira.

29. E ko tei kai oki e tei inu i toku nei kopapa e te toto ma te tau kore, kua kai aia e kua inu oki te akaapa anga i tona vaerua, no reira, me kite kotou i tetai tangata e kare aia e tau kia kai, e kia inu i toku kopapa e te toto, kia araiia aia.

30. Auraka kotou e akaatea iaia ki vao mei roto ia kotou, e tauturu ra kotou iaia, e ma te pure atu ki te Metua e na roto i toku ingoa, nona, e me tataraara aia, e kua bapetizoia na roto i toku nei ingoa, e ariki kotou iaia, e oronga oki kiaia toku kopapa e te toto.

31. E kia kore ra aia e tataraara, auraka rai kia tatauia ki roto i toku au tangata, kia kore aia e akapou i toku au tangata. I na, kua kite au i taku mamoe, e kua taitaia ratou.

32. Auraka e tuku atu iaia ki vao i to kotou au sunago, me kore ra, i to kotou ngai akamori anga, e akakoromaki atu rai kotou, kare oki kotou i kite, ka oki mai e ka tataraara, e ka aere mai kiaku ma te ngakau okotai, naku i reira e akaora ia ratou, kua riro kotou ei tauturu i te apai anga mai i te ora kia ratou.

33. No reira, e akono kotou i teianei tuatua taku e akaue atu kia kotou, kia kore kotou e akaapaia, aue oki aia tei akaapaia e te Metua.

34. Kua oronga atu au i teia au akaueanga, no te pekapeka i rotopu ia kotou e e ao to kotou me kare e pekapeka i rotopu ia kotou.

35. E teianei, te aere nei au ki te Metua, no te mea, e tau iaku kia aere ki te Metua ei meitaki no kotou.

36. E kia oti ta Iesu tuatua anga, kua akatika atura i tona rima e kua akatukia atura ki tana au pipi tana i iki tataki tai, e ope pouroa, e kua tuatua oki aia i tona akatukia anga kia ratou.

37. Kare ra te urupu tangata i rongo i tana tuatua, no reira, kare rai ratou i riro ei kite no te reira, kareka ra kua kite te au pipi i te reira, kua oronga oki aia i te mana kia ratou, no te oronga anga o te Vaerua Tapu. E ka akakite atu au kia kotou a muri atu e, e tika teia tuatua.

38. E kia oti ia Iesu te akatukia ia ratou tataki tai, kua tapokiia maira ratou e tetai tiao, e kare atura te au tangata i kite atu ia Iesu.

39. E te vai ua ra te tapoki ia ratou ra, kua takake atu aia mei rotopu ia ratou, e kake atu ki te rangi. E kua akara tikai te au pipi, e kua riro ei kite, no tona kakeanga atu ki te rangi.