1. E tae akera ki te pae openga o te mataiti tai ngauru ma varu, kua teateamamao te nuku o te keikeia no te tamaki, e kua aere maira mei runga mai i te au tuaivi, te au maunga, e no te metepara oki mei to ratou punanga ketaketa, e to ratou ngai ngaro, e kua akamata kia rave i te au enua, to apatonga e to apatokerau, e kua rave i te au enua tei akarukenaia e te ngati Niphai, e te oire oki i akarukenaia.

2. Ina ra, kare e manu taetaevao i taua au enua ra tei akarukenaia e te ngati Niphai, e kare oki a te keikeia manu taetaevao mari ua ra tei roto i te metepara.

3. Kare atura e rauka i te keikeia kia aere akaou no te kore oki e kai, kua akatanea oki te ngati Niphai i to ratou enua, kua akaputuputu oki i ta ratou au manu e ta ratou au apinga, e tei roto ratou i te ngai okotai.

4. No reira, kare atura a te keikeia ravenga kia noni, e kia rauka mai tetai kai na ratou, mari ra kia aere mai e tamaki atea ua ki te ngati Niphai, e no tei ruruia te ngati Niphai ki te ngai okotai, e no te maata oki ia ratou, e kua akapapa oki ratou i te au mea katoatoa, te au oroenua, te au puakatoro, e te au tu manu ravarai, kia rava no te tuatau e itu mataiti, e te manako ra oki ratou, e kia akapou takiri i te aronga keikeia mei runga i te enua nei. E ope akera te ngauru ma varu o te mataiti.

5. E tae akera ki te ngauru ma iva o te mataiti, kua akara a Kitiani e mea tau kia aere aia e tamaki ki te ngati Niphai no te mea, kare a ratou ravenga e oraʼi ratou, mari ra, kia noni, kia aru, e kia ta i te tangata.

6. Kare ratou i totoa ia ratou ki te orau o te enua kia tanu i te sitona, ko te aere mai aea te ngati Niphai ki runga ia ratou e ta ia ratou, no reira, kua akaue a Kitiani ki tona nuku e i teia mataiti ka aere ratou ka tamaki i te ngati Niphai.

7. E tei te ono o te marama i aere mai ei ratou kia tamaki, e i na, e ra rikarika rava te ra i aere mai ei ratou kia tamaki, e kua tatuaia ratou ki tei tau no te keikeia, e kiri mamoe tei to ratou taukupu, e kua parai ia ratou ki te toto, e kua varuia to ratou upoko, e paruru katu oki to ratou, e mea rikarika tikai te akaraanga o te nuku o Katiani, no to ratou rakei oki, e no to ratou paraianga ia ratou ki te toto.

8. I te kite anga te nuku o te ngati Niphai i te tu o te nuku o Katiani, kua topa iora ratou ki raro, ma te kapiki atu ki to ratou Atua e kia akaora ia ratou, mei roto mai i te rima o to ratou au enemi.

9. Kia kite ra te nuku o Katiani i teia angaanga, kua aoa ratou ma te reo maata, no to ratou rekareka, kua manako oki ratou e, kua mataku te ngati Niphai, no te rikarika i to ratou vaeau.

10. Ina ra, kua poitirere tikai ratou kia kite e, kare te ngati Niphai i mataku ia ratou, kua mataku ra ratou i to ratou Atua, e kua pati atu kiaia kia tauturu mai ia ratou, e i na, kia oro maira te nuku o Kitiani ki runga ia ratou, kua papa takere ratou kia aravei mai ia ratou, ae, na roto i te maroiroi o te Atua kua tamaki atu ratou ia ratou.

11. Kua akamata te tamaki i te ono o te marama, e mea rikarika tikai teia tamaki anga, ae, e mea rikarika rava teia ta anga tangata, kare rava i kitea ana tetai tamaki anga mei teia i roto i te au tangata o Lihai mei tona akaruke anga ia Ierusalema.

12. E no atu te au taputou a Kitiani e te au tuatua akamataku ana ra, e i na, kua autu te ngati Niphai ki runga ia ratou e kua oki ratou mei mua atu ia ratou.

13. Kua akaue iora a Kititoni i tona nuku e kia ta ia ratou e tae atu ki te au kotinga o te metepara, e auraka rava e akaora i tetai te ka rauka ia ratou i te pae, e kua arumaki rai ratou ia ratou e kua ta ia ratou, e tae ua atu ki te kotinga o te metepara, e akatupu ua atu ratou i te akaueanga a Kititoni.

14. Ko Kitiani oki ko tei tu e kua ta, ma te maroiroi tikai, kua arumakiia aia i tona oro anga, e no te maata o tana tamaki anga, kua paruparu aia e kua taiaia, e ko te openga teia i te anana keikeia o Kitiani.

15. E kua oki akaou maira te nuku o te ngati Niphai ki to ratou punanga tikai. E kua ope akera te mataiti rua ngauru.

16. E i te rua ngauru ma tai o te mataiti, kare ratou i aere mai e tamaki, kua aere mai ra ratou na te au tua ravarai kia takapini i te au tangata o te ngati Niphai, e ma te manako oki, e kia arai ratou i te au tangata o te ngati Niphai mei to ratou au enua e ma te koropini ia ratou i te au tua ravarai, e me ka rauka ia ratou kia akataka ke mai ia ratou mei te au tika anga o vao, ka rauka ngoie ua ia ratou kia autu ki rungao ia ratou kia tau ki ta ratou i akakoro.

17. I na, kua iki akaou ratou i tetai arataki ou no ratou, ko Zemanaria te ingoa, na Zemanaria oki teia angaanga i rave.

18. Ina ra, e tua meitaki teia no te ngati Niphai, kare e rauka i te keikeia kia arai e kia roa, kia rauka mai ia ratou te ngati Niphai, no te maata oki i ta te ngati Niphai apinga tei akaputuia ki te vairanga.

19. No te kore oki e kai a te anana keikeia, i na, kare takiri, mari ua ra, e puaka mata ua, tei rauka mai ia ratou mei te metepara mai.

20. E teianei, kua iti rava te manu taetaevao i te metepara, e kua vaitata rava te au keikeia i te mate no te kore e kai.

21. Te aaere ua ra te ngati Niphai ki vao i te ao e te po, e ta i to ratou nuku, e ma te ta atu ia ratou i te tauasani, e i te ngauru o te tauasani.

22. Kua akamata to Zemanaria, kia akaruke to ratou akakoroanga, no te mate maata tei tae kia ratou i te po e te ao.

23. Kua akaue akera a Zemanaria i tona au tangata kia akaatea mai ia ratou mei te tamaki, e aere tika ki te tuanga mamao i roto i te enua ki tokerau.

24. E teianei, kua kite takere ana a Kititoni i to ratou akakoroanga, e kua kite oki i to ratou tu paruparu, no te ngere i te kai, e te mate maata i rotopu ia ratou, i reira, kua tono atu aia i tona nuku i te po, e na mua ia ratou, e kua tuku ia ratou ki te mataara e aere mai ei ratou ra,

25. Ko ta ratou teia i rave i te po, e kua aere atu mua i te anana keikeia, no te mea, me tae ki tera mai ra, me akamata te keikeia i te aere, ka aravei ratou i te nuku o te ngati Niphai, ki mua e ki muri oki.

26. E ko te au keikeia tei noo ki tonga, kua arai katoaia ratou mei to ratou ngai e pipini ei. E kua rave pouroaia teia au mea nei, mei tei akaueia e Kititoni.

27. E manganui te au tausani tei tuku mai ia ratou ei mou auri na te ngati Niphai, e te toenga kua taiaia.

28. E to ratou arataki, ko Zemanaria kua tariia aia ki runga i te pu rakau, i na, tei runga, e tei reira aia i mate atu ei. E i to ratou tari anga iaia e mate ua atu, kua tipu iora ratou i te pu rakau ki raro, ma te kapiki atu i te reo maata, i te na ko anga e,

29. Kia tika i te Atua kia akono i tona au tangata ma te tuatua tika e i te tapunui o to ratou ngakau, e kia tamateia te aronga tei kimi e kia ta mai ia ratou, no te mana e te taokotaianga ngaro mei teia tangata i tamateia tei topa ki te one.

30. E kua rere iora ratou i te rekareka, e ma te kapiki akaou atu ma te reo okotai, i te na ko anga atu e, Kia tika i te Atua o Aberahama, te Atua o Isaaka, te Atua o Iakoba, kia paruru i teia au tangata i te tuatua tika, i te roa anga i kapiki ei ratou ki te ingoa o to ratou Atua no te tauturu.

31. E kua maeva atura ratou, mei te mea ra e, e okotai, i te imene anga, e te akangateitei anga i to ratou Atua, no te au mea mamaata tana i rave no ratou, i te paruru anga ia ratou kia kore e topa ki roto i te rima o to ratou au enemi.

32. I na, kua kapiki ratou e, Hosana ki te Atua Teitei. E kua kapiki atu ratou. Kia akameitakiia te ingoa o te Atua Mana Katoatoa, te Atua Teitei rava.

33. Kua ki to ratou ngakau i te rekareka, e kua maringi ua to ratou vai mata, no te maata rava i te meitaki o te Atua, i te akaora anga ia ratou mei te rima o to ratou au enemi, kua kite oki ratou e, no tei tataraara ratou, e no to ratou tu akaaka, i akaoraiaʼi ratou mei roto i te akapouanga mutu kore.