1. E teianei, kua oki te au tangata o te ngati Niphai ki to ratou uaorai au enua i te rua ngauru ma ono o te mataiti, ko te au tangata katoatoa, e tona kopu tangata, tana mamoe, tana puakatoro, tana au manu te au oroenua e te au mea ravarai nana ra.

2. Kare oki ratou i kai pouroa i ta ratou kai, no reira, kua apai ratou i tei kore i kaingaia e ratou, te au tu sitona, e ta ratou auro, te ario e te au mea memeitaki, ko ta ratou ïa i akaoki atu ki to ratou enua, to tokerau e to apatonga, ki te enua i apatokerau e te enua i apatonga.

3. E kua oronga ratou ki te au keikeia, o te au pupu tei manako e, ka noo rai ratou e ngati Lamana, tei tomo ki roto i te koreromotu, kia akono i te au, kua oronga ratou i te enua, tei tau ki to ratou maata, kia raukaʼi ia ratou kia tanu i tetai kai na ratou, e kua na reira ratou i te akamouanga i te au i runga i te enua katoa.

4. E kua akamata akaou ratou kia mou, e kai tupu ki te maata, e ope akera te rua ngauru ma ono, e te rua ngauru ma itu o te mataiti, kua noo ua te enua ma te au, e kua akanoo ratou i ta ratou ture, ma te tuatua tika e te au.

5. E teianei, kare rava e mea e arai i te tangata mei te tupu anga o to ratou puapinga, mari ua ra, me topa ratou ki roto i te ara.

6. I na, na Kititoni, e te akavanui ko Lakonea, e te aronga tei ikiia ei arataki, i akamou i te au maata ki te enua.

7. E manganui oki te au oire ou i akatuia, e manganui oki te au oire taito i akaouia.

8. E manganui oki te au mataara ou, e te au arataa tei aere atu mei tetai oire ki tetai, e mei tetai enua ki tetai, e mei tetai ngai ki tetai.

9. E ope akera te rua ngauru ma varu o te mataiti, te noo au ua ra te tangata.

10. Kareka kia tae ki te rua ngauru ma iva o te mataiti, kua akamata i reira te pekapeka i rotopu i te au tangata, ko tetai pae, kua akamata tetai i te akaparau e te akapaapaa ia ratou, no te maata rava i ta ratou apinga nui, ae, e kua takinga kino i te tangata.

11. E manganui oki te aronga okooko i roto i te enua, e manganui katoa te au apii ture, e te au tangata e taoonga to ratou.

12. Kua akamata iora te tangata kia akapupu ia ratou kia tau ki to ratou apinga nui, e to ratou tika anga kia apiiia, ae, e kite kore to tetai pae, no te putaua ia ratou, kareka tetai pae kua rauka to ratou kite maata no to ratou apinga nui.

13. Kua ngakau parau tetai pae, e kua akaaka oki tetai pae, te akakino ra tetai pae i tei akakino mai ia ratou, te akakoromaki ra tetai pae i te au tu akakino e te au tu takinga kino anga, e te au kino e manganui, e kare rava ratou e akaoki ua atu i te kino, mari ra, kia akaaka e te maru ki mua i te aroaro o te Atua.

14. Kua riro mai te tuke maata i roto i te enua, kua ngaa te akonoanga i roto i te enua katoatoa, mari ua ra, tei rotopu i tetai papaki i te ngati Lamana tei ariuia mai ki roto i te akarongo tika, e kare rava ratou e inangaro kia taka ke ratou mei te reira, e mouringa piri tikai to ratou e te ngaueue kore, ma te inangaro tikai i te akono i te au akaueanga a te Atua.

15. E teianei, ko te tumu no teia ara maata, koia oki, kua rauka ia Satani te mana maata kia taoriori i te au tangata kia rave i te au tu kino ravarai, e i na, te opara atu ra aia ia ratou kia akaparau, i te timata anga ia ratuo kia kimi i te mana, e te tikaanga, te apinga nui, e te au mea puapinga kore o te ao nei.

16. E kua arataki ke atu a Satani i te ngakau o te au tangata kia rave i te au tu kino e manganui, no reira, kua rekareka ratou i te au no tetai nga mataiti ua.

17. E tae akera ki te akamataanga i te toru ngauru o te mataiti, i noo ana te tangata no tetai tuatau roa, e kua akapeke aereia e te timata anga a te tiaporo, kia rave i te au ara ravarai tana i manako kia rave ratou, e no reira, i roto i te akamata anga o te toru ngauru o te mataiti tei roto tikai ratou i te ara kino rava.

18. Ina ra, kare oki ratou i ara kite kore ua, kua kite oki ratou i te anoano o te Atua ia ratou, kua apiiia oki te reira kia ratou, ina ra, kua akaruke takiri ratou i te Atua.

19. E teianei, te au ra o Lakonea, te tamaiti a Lakonea, ko Lakonea oki tei mono i te ngai o tona metua, e nana rai i akaaere i te au tangata i te reira mataiti.

20. I reira te tae anga mai o tetai au tangata tei akauruia mai mei te rangi, kia tu ki te au enua katoatoa, kia ako i te ara e te kino o te au tangata, e ma te akakite atu kia ratou no runga i te akaoraanga ta te Atu i omai no tona au tangata, koia oki, te tuakaou anga o te Mesia, e kua akakite papu tikai ratou i tona mate anga e tona mamae anga.

21. E manganui tikai te aronga tei riri ki te aronga tei akakite atu kia ratou i teia nei au mea, e ko te aronga tei riri maata atu, koia oki te au akava mamaata, e te aronga tei rauka ana te taoonga o te taunga teitei, te au apii ture, ae, pouroa te au apii ture, kua riri tikai ratou ki teia aronga nei tei akakite mai i teia au mea nei.

22. Ina ra, kare e apii ture, kare e akava, kare e taunga teitei, e mana tona kia akaapa i tetai kia mate, mari ua ra, me tata te kavana o te enua i tona ingoa ki te peapa akaapaanga.

23. I na, e toko rai oki ratou tei akakite i teia au mea, no runga i te Mesia, ma te mataku kore, e kua opu ngaro uaia e te au akava e tamateia atu, e kare te kite o to ratou mate anga i tae mai ki te kavana o te enua, mari ra i muri ake i to ratou mateanga.

24. E i na, e mea tuke rava teia ki te ture enua, koia oki, kare rava e tikaia kia taiaia tetai ua atu tangata, mari ra, kia rauka mai tetai mana, mei te kavana o te enua.

25. No reira, kua tae tetai akaapaanga ki te enua ko Zarahemela ki te kavana o te enua, no runga i teia au akava, ko tei ta i te au peroveta a te Atua, e kare oki i tau i te ture.

26. No reira, kua aratakiia atu ratou ki mua i te akavanui kia akavaia no te ara ta ratou i rave, kia tau oki ki te ture ta te au tangata i maani.

27. Ina ra, e maata to teia au akava taeake e te kopu tangata, e te toenga, koia oki te au apii ture, e te au taunga teitei, kua akaputuputu mai ratou ki te ngai okotai, e ma te piri atu ki te au kopu tangata o taua au akava ra tei akaapaia, kia tau ki ta te ture.

28. E kua papau akera i tetai koreromotu na ratou uaorai, mei te koreromotu tei papauia i te tuatau taito, ko te koreromotu tei maaniia e te tiaporo, kia akakore atu i te au tuatua tika ravarai.

29. No reira kua ruru ratou, no te patoi anga atu i te au tangata o te Atua, e kua koreromotu ratou kia akapou i te au tangata o te Atua, e kia akaora i te aronga tei akautungaia no te ta tangata, mei roto i te rima o te tika, ko tei vaitata rava i te raveia, kia tau ki ta te ture.

30. E kua patoi atu ra ratou i te ture, e te tikaanga o to ratou enua, e kua taputou akera ratou i te tuatua e, ka ta ratou i te kavana e ka akanoo i tetai ariki ki runga i te enua, kia kore ei te enua e noo ma te au, mari ra, kia kauraro ki raro i te ui ariki.