1. Tika, tikai taku e karanga atu e ka inangaro au ia kotou kia oronga atu i ta kotou apinga na te au tangata putaua e tikai, kia matakite ra, kia kore kotou e oronga i ta kotou apinga aroa ki mua i te aroaro o te tangata, kia akaraia e ratou ko te kore aea e rauka ta kotou tutaki ki to kotou Metua i te ao ra.

2. Kia oronga ra koe i taau apinga aroa, auraka e na mua i te akatangi i te pu, mei ta te aronga pikikaa, i roto i te au sunago e i te au mataara ra, kia akameitakiia ratou e te tangata. Koia tika taku e karanga atu kia kotou na, kua rauka ta ratou tutaki.

3. Kareka kia oronga koe i taau apinga aroa, auraka toou rima kaui e kite i ta toou rima katau e rave ra.

4. Kia muna taau orongaanga i te apinga aroa, e na te Metua tei kite ua mai i te au mea ngaro o omai atea ua i taau tutaki.

5. E kia pure koe ra, auraka mei ta te aronga pikikaa ra, ko tei inangaro i te pure tu ua i roto i te au sunago, e te pae mataara, kia akaraia ratou e te tangata. Koia tika taku e karanga atu kia kotou na, kua rauka ta ratou tutaki.

6. Kareka kia pure koe, e aere ki roto i toou pia, e topiri marie i te pa, ka pure ei ki toou Metua, e na toou Metua, tei kore e kitea, e tei kite ua mai i te au mea ngaro, e omai atea ua i taau tutaki.

7. E kia pure kotou ra, auraka e maata te tuatua rikiriki puapinga kore mei ta te au etene ra, ko tei manako e, no te maata o te tuatua e akarongoia mai ei ratou.

8. Auraka kotou kia aite kia ratou, kua kite oki to kotou Metua i te au mea e tau no kotou i mua ake kotou ka pati atu ei.

9. Na ko kotou kia pure, E to matou Metua i te ao ra, kia tapu toou ingoa.

10. Kia akonoia toou anoano i te enua nei, mei tei te ao katoa ra.

11. E akakore mai i ta matou ara, mei ia matou i akakore i ta tei ara ia matou nei.

12. Auraka e arataki ia matou ki roto i te timataanga, e akaora ra ia matou i te kino.

13. Noou oki te basileia, e te mana e te kaka, e tuatau ua atu. Amene.

14. Kia akakore oki kotou i te ara a tetai ke, ka akakore katoa to kotou Metua i te ao ra i ta kotou.

15. Kia kore ra kotou e akakore i te ara a tetai ke, kare katoa to kotou Metua i te ao ra e akakore mai i ta kotou.

16. E kia akakore kotou te kai, e aite mei ta te aronga pikikaa ra, ko tei akatuke i to ratou mata, kia kitea e te tangata e, te akakore ra ratou i te kai. Koia tika taku e karanga atu kia kotou, kua rauka ta ratou tutaki.

17. Kareka kia akakore koe i te kai, e tainu i toou upoko, e e orei i toou mata.

18. Kia kore taau akakoreanga kai e kitea e te tangata, i toou Metua ra, e na toou Metua, tei kite ua i te au mea ngaro, e omai atea ua i taau tutaki.

19. Auraka e akaputu i te apinga na kotou i teianei ao, i te ngai ka pou i te uu e te pe e e i te ngai e tomoia, e e keiaiaʼi e te keia.

20. Ka akaputu ra i te apinga na kotou ki runga i te rangi, i te ngai e kore ei e pou i te uu e te pe, kare oki te keia e tomo ki reira ka keiaʼi.

21. Te ngai oki i vaioiaʼi ta kotou apinga, tei reira katoa to kotou ngakau.

22. Ko te mata te marama o te kopapa. No reira, me e meitaki toou mata, kua maramaia toou kopapa katoa.

23. Kia kino ra toou mata, ka poiri toou kopapa katoa. E kia riro te marama i roto ia koe ra ei poiri, e poiri maata te reira.

24. Kare e tika i te tangata kia akono i nga pu e rua, ka riri atu aia i tetai, e ka anoano atu i tetai, me kore ra, ka piri ki tetai, e akavaavaa atu i tetai. Ko kotou nei oki, kare e tika kia akono atu i te Atua e te Mamona.

25. E teianei, kia oti ta Iesu tuatua anga i teia nei au tuatua, kua akara akera aia ki te tino ngauru ma rua tana i iki, e kua na ko atura kia ratou, E akamaara i te au tuatua taku i akakite atu, no te mea, ko kotou oki taku i iki ei tauturu i teia au tangata. No reira, te karanga atu nei au kia kotou, auraka e taitaia i to kotou ora, ta kotou ka kai, e ta kotou ka inu, e te kakau no to kotou kopapa. Kare aina i maata te ora i te kai, e te kopapa i te kakau?

26. Ka akara na i te au manu o te reva, kare ratou i tanu, kare oki i kokoti kare oki e akaputu i te kai ki roto i te are vairanga, na to kotou Metua ra i te ao i angai ia ratou. Kare ainei e meitaki maata to kotou i to ratou?

27. Koai oki ia kotou, e tika kia akaroa atu i tona kopapa, e okotai kupiti?

28. E eaa kotou e apiapi ei i te kakau? Ka maara na i te au lili o te enua, e to ratou tupu anga, kare ratou i angaanga, e kare oki i tui.

29. E karanga atu au kia kotou, kare ua atu te manea o Solomona e tona kaka katoatoa i aite ki tetai o te reira.

30. Me kua akapera oki te Atua i te akamanea anga i te mauku o te enua, te vai nei i teia ra, e apopo kua uriia ki roto i te umu, kare ainei aia e akakakau ia kotou, me kare kotou i te aronga akarongo meangiti?

31. E teianei, auraka e apiapi ua, ka na ko ei e, Eaa ua ta matou ka kai? E eaa ua ta matou ka inu? E eaa ua to matou kakau kia aao?

32. Kua kite ana oki to kotou Metua i te ao ra, e ka inangaro pouroa kotou i teia au mea nei.

33. E na mua ra kotou i te kimi i te basileia o te Atua e te tuatua tika nana ra, e ka kapiti katoaia mai teia au mea kia kotou.

34. E teianei, auraka kotou e apiapi i to apopo ra, na apopo e apiapi iaia uaorai. Ko te ra ko tona uaorai kino ïa.