1. E teianei, kia oti ta Iesu tuatua anga i teianei ua tuatua, kua uri akaou mai aia ki te au urupu tangata, e kua amama akera tona vaa kia ratou, na ko atura, koia tika taku e karanga atu kia kotou na, auraka e akaapa atu kia kore kotou akaapaia mai.

2. Ko ta kotou e akaapa i etai ke ra, e akaapa katoaia kotou i te reira, ko te aite ta kotou e aite atu, ko ta kotou rai ïa kia akaaiteia mai.

3. Eaa koe i akaraʼi i te tangaiti i roto i te mata o to taeake ra, e kare koe i kite e tei roto i toou uaorai maata te rakau maata?

4. Eaa oki koe e tikai kia karanga atu ki toou taeake e, omai, naku e kiriti i te tangaiti i roto i toou mata, e i na, tei roto i toou uaorai mata te rakau maata.

5. E tera ra pikikaa e, na mua i te kiriti i te rakau maata i roto i toou uaorai mata, ei reira koe e kite meitaki ei, kia kiriti i te tangaiti i roto i te mata o to taeake.

6. Auraka te mea tapu e apainaia atu na te puakaoa, auraka katoa ta kotou poe e titiriia atu na te puaka, ko te takatakaiia aea e to ratou vaevae, ko te ariu mai aea e kakati ia kotou.

7. E pati e e orongaia mai ta kotou, e kimi, e kiteaia ïa ta kotou, e topapa atu, e kiritiia mai te pa ia kotou.

8. Ko te aronga katoa oki i pati ra, kua rauka ïa, e ko tei kimi ra, e kitea ïa, e tei topapa ra, e kiritiia mai te pa ia ratou.

9. Koai ïa tangata i rotopu ia kotou, kia pati mai tana tamaiti i te kai e kua apai atu i te toka nana?

10. E kia pati mai i te ika, ka apai atu aina i te ovi nana?

11. Me ka rauka ia kotou, e te aronga kino kia oronga i te mea meitaki na ta kotou au tamariki, kare ainei to kotou Metua i te ao ra, e oronga i te mea meitaki ki te aronga i pati atu kiaia ra?

12. E te au mea katoa ta kotou ka inangaro i te tangata kia rave mai kia kotou, kia akapera atu rai kia ratou, ko ta te ture ïa e ta te au peroveta.

13. E tomo kotou na te ngutupa oiti, te atea maata nei te ngutupa, e te pararauare nei te mataara, e tae atu ei ki te mate, e manganui te ka na reira i te tomo.

14. Te kokota ua nei te ngutupa, e e piri oki te mataara, e tae atu ei ki te ora, e tokoia ua ake tei kite i te reira.

15. Kia matakite i te au peroveta pikikaa, ko tei aere mai kia kotou ma te kakau mamoe ra, kareka a roto, e luko taae ïa.

16. Ka kite kotou ia ratou ki ta ratou ua, no runga aina te vine i te tataramoa te aaki anga mai, e te suke no runga aina i te rakau taratara?

17. Ka ua mai te au rakau meitaki katoa i te ua meitaki, e te au rakau kikino ra, e ua mai ïa i te ua kino.

18. Kare e tika i te rakau meitaki kia ua mai i te ua kino, kare katoa te rakau kino e ua mai i te ua meitaki.

19. Te au rakau katoa kare e ua mai i te ua meitaki ra, e tipuia ïa, e ka titiriia ki roto i te ai.

20. Ka kite kotou ia ratou i ta ratou ka ua maira.

21. Kare te aronga katoatoa e tuatua mai iaku e, e te Atu, e te Atu e tae ki te basileia o te ao, ko tei akono ra i te anoano o taku Metua i te ao ra.

22. E manganui te ka tuatua mai kiaku i taua rā ra, E te Atu e te Atu, kare ainei matou i apii i toou ingoa, e i tuaru i te au demoni ki toou ingoa, e i rave i te au akairo e manganui ki toou ingoa?

23. Ei reira ka karanga atu au kia ratou, kare takiri au i kite ia kotou, e aere ke atu kotou, te aronga rave ara.

24. E teianei, ko tei akarongo mai i taku nei tuatua, e akono atura, e arite au iaia ki tetai tangata pakari, ko tei akatu i tona are ki runga i te papa toka.

25. E topa iora te ua, e tae iora te vai puke, e te matangi oki i te arara viviki anga ki runga i taua are ra, kare rava i keu, no te mea, e tika te turanga.

26. Kareka tei akarongo ua mai i taku nei tuatua, e kare i akono, e e arite au iaia ki te neneva, ko tei akatu i tona are ki runga i te one.

27. E topa iora te ua, e tae iora te vai puke, e te matangi oki i te arara viviki anga mai ki rungao i taua are ra, inga iora, e e ngaangaa maata to taua are ra.