1. I to Iesu kake anga atu ki te rangi, kua aere ke atu te tangata tini, te tangata e tana vaine, tana au tamariki, ki tona au ngutuare.

2. Kua rongoia akera te reira i rotopu i te au tangata i taua taime rai, i mua ake ka poiri atu ei, koia oki kua kite ana te tangata tini ia Iesu, e kua matuapuru aia ia ratou nei, e ka oki akaou mai aia apopo.

3. Ae, i taua po katoa, kua akakite aereia no runga ia Iesu e kua tuku akera ratou i te tuatua ki te au tangata e manganui, ae, e maata tikai, kua tauta tikai ratou i taua po ra, kia popongi ake, tei te ngai ratou e akaari mai ei a Iesu iaia ki te tangata tini.

4. E kia popongi ake, kia putuputu mai te tangata tini, i na, ko Niphai e tona teina tana i akatu mai mei te mate mai, ko Timoteo oki te ingoa e tana tamaiti, ko Iona, e Matoni, e Matonia, tona taeake, e Kumeni, e Kumenoni, e Ieremia, e Semenona, e Iona, e Zedekia e Isaia, ko te ingoa teia o te au pipi ta Iesu i iki, ko ratou oki tei aere atu ki mua i te tangata tini.

5. No te maata rava o teia iti tangata nei, kua tuaia, e tai ngauru ma rua pupu.

6. Kua apii atura te tino ngauru ma rua i teia iti tangata, e i na, kua pati iora ratou ki te iti tangata kia tuturi ki raro, e kia pure ki te Metua, na roto i te ingoa o Iesu.

7. E kua pure atura te au pipi ki te Metua, na roto i te ingoa o Iesu. E muri akera, kua tu maira ratou ki runga, e kua apii atura i te au tangata.

8. E kia oti akera ia ratou i te akakite, i te au tuatua ravarai ta Iesu i akakite mai kia ratou, kare rava i tuke i ta Iesu i tuatua ana, e i na, kua tuturi akaou ratou ki raro e kua pure atu ki te Metua, na roto i te ingoa o Iesu.

9. E kua pati iora ratou i ta ratou i anoano tikai, e kua inangaro e kia orongaia mai te Vaerua Tapu kia ratou.

10. E kia oti ta ratou pure anga, kua aere atura ratou ki te nia o te kauvai, kua aru atu ra te iti tangata.

11. E kua aere atura a Niphai ki raro i te vai e kua bapetizoia iora.

12. E kua kake akaou maira ki vao mei roto mai i te vai, e kua akamata akera i te bapetizo. Kua bapetizo iora aia i te au tangata ta Iesu i iki.

13. E kia oti pouroa ratou i te bapetizoia, kua kake mai ratou ki runga mei raro mai i te vai, e kua to maira te Vaerua Tapu ki runga ia ratou, e kua ki akera ratou i te Vaerua Tapu e te ai.

14. E i na, kua koropiniia akera ratou e tetai mea, mei te tu rai o te ai, kua topa mai te reira mei te rangi mai, e kua kitea te reira e te au tangata, e kua riro oki ratou ei kite no te reira, e kua eke mai te au angela mei te rangi mai, e kua matuapuru mai oki ia ratou.

15. E te tuatua ua ra te au angela kia ratou, ko Iesu iora i rotopu ia ratou, e kua akapumaana maira ia ratou.

16. Kua tuatua iora aia ki te iti tangata, e kua akaue atura ia ratou, kia tuturi akaou ratou ki raro, ma te au pipi katoa nana ra.

17. E kia tuturi iora ratou ki raro, kua akaue atura aia i tana au pipi kia pure ratou.

18. E i na, kua akamata iora ratou i te pure. E kua pure ratou kia Iesu, i te kapiki anga iaia to ratou Atua e to ratou Atu.

19. Kua akaruke akera a Iesu ia ratou, aere ke ua atura ki te atea ke mei ia ratou, e kua akatopa iora iaia uaorai ki raro, e kua na ko atura,

20. E te Metua, te akameitaki nei au ia koe, ko koe i oronga mai i te Vaerua Tapu ki teia au tangata taku i iki, e no to ratou akarongo oki iaku, i iki ei au ia ratou mei roto mai i teianei ao.

21. E te Metua, te pati atu nei au kia oronga mai koe i te Vaerua Tapu kia ratou katoatoa te ka akarongo i ta ratou tuatua.

22. E te Metua, kua oronga oki koe i te Vaerua Tapu kia ratou, no tei akarongo oki ratou iaku, te kite ra oki koe i to ratou akarongo kiaku no te mea, te akarongo ra koe i ta ratou pure, te pure ra ratou kiaku, e te pure ra oki ratou kiaku, no te mea tei ko nei oki au.

23. E teianei e te Metua, te pure nei au no ratou, e ratou oki te ka akarongo ki ta ratou tuatua, kia akarongo katoa mai ratou kiaku, kia okotai oki au kia ratou mei ia koe, e te Metua, i roto iaku nei, e kia okotai oki tatou.

24. E kia oti ta Iesu pure anga ki te Metua, kua aere maira aia ki tana au pipi, e i na, te pure ua ra ratou ma te akamutumutu kore, kare oki i akamaata i te tuatua, no te mea kua orongaia ra kia ratou, i te au tuatua ta ratou ka pure, e kua ki iora ratou i te inangaro.

25. E kua akameitaki iora a Iesu ia ratou, te pure ra oki kiaia, e kua mata katakata atu ra aia kia ratou, e kua kaka maira te marama o tona mata ki rungao ia ratou, e i na, kua teatea akera ratou, mei te mata e te kakau o Iesu, e i na, ko te teatea ra, kua teatea atu ïa i te au mea teatea ravarai, kare atu e mea teatea i runga i te enua nei e akaaiteia atu ei ki tona teatea.

26. E kua karanga atura a Iesu kia ratou, e tamou i te pure, e kare rai ratou i akamutu i te pure.

27. E kua uri ke atu aia mei ia ratou, e kua akaatea iti atu, e kua tupou iora ki raro, e kua pure akaou atura ki te Metua, i te na ko anga atu e,

28. E te Metua e, te akameitaki atu nei au ia koe, no tei akatiama koe i te aronga taku i iki, no to ratou akarongo, e te pure atu nei au no ratou, e no ratou te ka akarongo ki ta ratou tuatua, kia tamaia ratou iaku nei, na roto i te akarongo anga i ta ratou au tuatua, mei ia ratou i tamaiaʼi.

29. E te Metua e, kare au e pure ana no teianei ao, no ratou ra taau i oronga mai mei roto mai i teianei ao, no to ratou akarongo, kia tamaia ratou iaku nei, e kia vai au ki roto ia ratou, mei ia koe, e te Metua i roto iaku, kia okotai oki tatou, kia akakakaia oki au i roto ia ratou.

30. E kia oti ia Iesu i te tuatua i teia nei au tuatua, kua oki akaou mai aia ki tana au pipi, e i na, te pure rai ratou, ma te tukutuku kore kiaia, kua mata katakata akaou atu aia kia ratou, e i na, kua teatea iora ratou, mei ia Iesu rai.

31. E kua akaatea iti akaou aia mei ia ratou e kua pure akaou ki te Metua.

32. Kare rava e rauka i tetai arero kia tuatua i te tuatua tana i pure atu, e kare oki e rauka kia tataia e tetai tangata te tuatua tana i pure atu.

33. Kua rongo ra te au tangata, e kua riro ei kite, e kua tuera ua to ratou ngakau ma te kite i te au tuatua tana i pure atu.

34. Kua umere akera ratou i te tuatua tana i pure ra, tei kore rava e rauka kia tataia, me kore ra, kia tuatuaia e tetai tangata.

35. E kia akaoti tana pure anga, kua oki akaou mai aia ki tana au pipi, na ko atura kia ratou, Kare rava au i kite ana i tetai, e akarongo maata mei teia te tu i te ngati Iuda, no reira, kare au i akaari i te au semeio mamaata, no to ratou akarongo kore.

36. Koia tika taku e karanga atu kia kotou, kare takiri ratou i kite ana i tetai au mea mamaata, mei ta kotou e akara nei, e kare oki ratou i rongo ana i tetai au mea mamaata mei ta kotou e akarongo nei.