1. Kua akaue akera aia te urupu tangata kia akamutu i te pure, e tana au pipi katoa. E kua akaue katoa aia e, auraka ra ratou e akaoti i te pure i roto i to ratou ngakau.

2. E kua akaue iora aia kia tu te katoatoa ki runga i to ratou vaevae, e kua tu akera ratou ki runga i to ratou vaevae.

3. E kua atiati iora aia i te varaoa ma te akameitaki, e kua oronga atu ki te au pipi kia kai.

4. E kia oti ratou i te kai, kua akaue atura aia ia ratou, kia atiati i te varaoa, e kia oronga atu ki te au tangata.

5. E kia oti ia ratou i te oronga atu ki te au tangata, kua oronga katoa atu aia i te wina kia ratou kia inu, e ma te akaue atu ia ratou kia oronga atu ki te tangata.

6. E teianei, kare ua e varaoa, e kare oki e wina, i apainaia mai e te au pipi, kare katoa a te au tangata.

7. Ina ra, kua oronga tikai aia i te varaoa kia ratou kia kai, e te wina kia inu.

8. E kua na ko atura kia ratou, koia tei kai i teianei varaoa, kua kai aia i toku kopapa na tona vaerua, e koia tei inu i teianei wina, kua inu aia i toku kopapa na tona vaerua, e kare rava tona vaerua e pongi, e kare oki e kaki vai, mari ra ka ki ua.

9. E kia oti te au tangata i te kai e te inu, e i na, kua ki akera ratou i te vaerua, e kua kapiki akera ratou ma te reo okotai, e ma te akakaka ia Iesu, ta ratou i kite e ta ratou i akarongo.

10. E kia oti ta ratou oronga anga i te kaka kia Iesu, kua tuatua maira aia kia ratou. I na, te akaoti nei au i te akaueanga ta te Metua i oronga mai kiaku nei, no runga i teia au tangata, koia te toenga o te ngutuare o Iseraela.

11. Te akamaara ra kotou e, i tuatua ana au kia kotou, e me tupu te tuatua a Isaia, i na oki, kua tataia te reira, e tei mua ïa ia kotou, e kimi i te reira.

12. Koia tika taku e karanga atu kia kotou, me tupu ake te reira, kua tupu i reira te koreromotu ta te Metua i papau ki tona au tangata te ngutuare o Iseraela.

13. Ei reira te toenga, ko tei akapueurikirikiia ki te orau o te enua e akaputuputu akaouia mai ei mei te itinga o te ra, e mei te opunga, e mei te apatonga e te tokerau, e ka aratakiia mai ratou ki te kite o to ratou Atua tei akaora ia ratou.

14. E kua akaue mai te Metua iaku, e kia oronga atu au i teia enua ei noo anga no kotou.

15. E te karanga atu nei au kia kotou, me kore te au Etene e tataraara i muri ake i orongaia te au akameitakianga kia ratou, e i muri ake to ratou akapueurikirikianga i toku au tangata,

16. Ei reira kotou te toenga o te ngutuare o Iakoba, ka aere atu ei ki rotopu ia ratou, e ei rotopu tikai kotou ia ratou, e manganui tikai oki ratou, e ei reira tikai oki e tau ia kotou mei te liona ou i rotopu i te au manu taae o te vaorakau, e mei te liona ou i rotopu i te anana mamoe, e me aere aia na roto ra, kua takatakaiia e ka katikatiia, e kare e tika i tetai i te akaora.

17. Ei reira to kotou rima e akateiteiiaʼi ki rungao i te au taeake e maro mai ia kotou ra, e ka tipu keia to kotou au enemi.

18. Ei reira au e akaputuputu mai ei i toku au tangata ki te ngai okotai, mei te tangata e akaputuputu i tana sitona ki te ngai vairanga.

19. E akariro au i toku ra au tangata ta te Metua i koreromotu, ae e akariro au i ta kotou ko ei auri, e to kotou maikuku ei veo. E ka ungaungatiti kotou, i te au tangata e manganui, e naku e akatupu to ratou puapinga ki te Atua, e ta ratou au mea ravarai, na te Atua ïa o te ao katoa ra. E i na, naku ïa e rave.

20. I na, kua tuatua maira te Metua, kia tae ki taua ra ra, e tautau ei te koke o te tuatua tika ki runga ia ratou, te tuatua maira te Metua, ae, ki runga i te au basileia katoatoa o te au Etene.

21. E ei reira oki au e akamou ei i toku iti tangata, te ngutuare o Iseraela.

22. E i na, ko teia te au tangata taku ka akanoo ki runga i teia enua, ei akatupu i te koreromotu, taku i papau ki to kotou Metua kia Iakoba, e riro oki te reira, ei Ierusalema Ou. E ka vai rai oki te mana o te rangi ki rotopu i teianei iti tangata, ae, ei rotopu katoa au ia kotou.

23. E i na, ko au oki teia ta Mose i tuatua ana ka na ko ei ra e, e akatupu oki te Atua i tetai peroveta no kotou mei roto i to kotou au taeake, mei iaku rai te tu, koia ta kotou e akarongo atu i te au tuatua katoa tana ka tuatua atu kia kotou. E te tangata e kare e akarongo atu ki taua peroveta ra, ka tipu keia aia mei rotopu i te au tangata.

24. Koia tika taku e karanga atu kia kotou, pouroa te peroveta mei ia Samuela e te aronga tei aru mai na muri, ko ratou tei tuatua kua akapapu i te tuatua noku.

25. E i na, ko kotou oki te au tamariki a taua au peroveta ra, e no te ngutuare o Iseraela kotou, e no kotou te koreromotu ta te Metua i papau ki to kotou ai metua, ka na ko ei kia Aberahama, Ei toou ra uanga e meitaki ei te au kopu katoa o te ao nei.

26. Kua akatu mai te Metua iaku na mua ia kotou e kua tono mai iaku kia akaora ia kotou, i te akaariu anga mai i te au tangata tataki tai mei ta ratou angaanga kino, no te mea, e tamariki kotou no te koreromotu.

27. E i muri ake i to kotou akameitaki angaia, ka akatupuia te koreromotu ta te Metua i papau kia Aberahama, ka na ko ei e, ei toou ra uanga e meitaki ei te au kopu o te ao nei, i te riringi anga mai o te Vaerua Tapu na roto iaku ki rungao i te au Etene, e na taua akameitaki anga o te Etene e akariro ia ratou ei ratou ei aronga ririnui i te akapueurikiriki ke anga i toku au tangata te ngutuare o Iseraela.

28. E riro oki ratou ei tumu e mate ei te au tangata o teianei enua. Ina ra, kia ariki ratou i te ki anga o taku nei evangelia, e me ka marokiakia to ratou ngakau i te patoi anga mai iaku, ka akaoki au i to ratou kino ki runga i to ratou uaorai upoko, te tuatua maira te Metua.

29. E ka akamaara rai au i te koreromotu taku i papau ki toku au tangata, e ka akaputuputu au ia ratou ki te ngai okotai, i toku tuatau tikai, kia oronga akaou atu au i te enua o to ratou ai metua ei noo anga no ratou, koia te enua ko Ierusalema, te enua taputou no ratou e tuatau ua atu, te tuatua maira te Metua.

30. Te tae mai ra te tuatau, e akoiaʼi te ki anga o taku nei evangelia kia ratou.

31. E ka irinaki mai oki ratou kiaku, e ko au, ko Iesu Mesia, te tamaiti a te Atua, e ma te pure atu ki te Metua na roto i toku ingoa.

32. Ei reira e akateitei ei to ratou au tiaki i to ratou reo, e ka imene kapipiti ratou no te mea, ka akara oki ratou te mata ki te mata.

33. Ei reira oki te Metua e akaputuputu akaou mai ei ia ratou, e oronga atu ei ia Ierusalema ei noo anga no ratou.

34. Ka rere oki ratou i te rekareka, ka imene te au ngai tanea o Ierusalema, kua akapumaana mai oki te Metua i tona au tangata, kua akaora oki aia ia Ierusalema.

35. Kua akatika te Metua i tona ra rima tapu ki mua i te mata o te au basileia, e ka kite te openga mai o te enua nei i te ora a te Metua, e mei te Metua e au ra, e okotai ïa.

36. Ei reira oki tei tataia ra e tupu ei, ka na ko mai ei e, E ara e ara, ka aao ana i to ririnui, e Ziona, ka aao ana i to kakau manea e Ierusalema, e te oire tapu, kua oti ra ua oki te tomo mai ki roto ia koe te peritome koreia e te viivii.

37. Ka ruru ana i te one pueu ia koe, ka tu ki runga, ka noo ei ki to nooanga e Ierusalema e, ka tatara ana koe i te tapeka i runga i to kaki na, e tera ra tamaine tuikaa a Ziona ra e.

38. I oko ana kotou ia kotou uaorai ki te puapinga kore, ka akaoraia rai kotou, kare ra i te moni.

39. Koia tika taku e karanga atu kia kotou, ka kite oki toku au tangata i toku ingoa, e kia tae ki taua ra ra, ei reira ratou e kite ei e, ko au oki tei tuatua ana kia ratou.

40. Ei reira ratou e karangaʼi e, Te manea o te vaevae o te karere ki runga i te maunga, ko tei apai mai i te tuatua meitaki ra, ko tei tutu aere i te au ra, ko tei apai mai i te tuatua meitaki, ko tei tutu aere i te ora ra, ko tei tuatua mai kia Ziona, tei to Atua ra te au.

41. Ei reira tetai reo e kapiki atu ei e, ka aere kotou, ka aere kotou ki vao, auraka e arapaki ua atu i tetai mea viivii ra, e aere kotou ki vao mai mei rotopu mai iaia ra, kia ma kotou e tei apai i te ariki a Iehova.

42. Kare kotou e aere rapurapu ua, kare rai e oro, ko Iehova oki te ka na mua ia kotou, e te Atua no Iseraela te ka na muri ia kotou.

43. I na, e manuia toku tavini, ka akateiteiia aia, ka apaiia aia ki runga, e e akateitei rava akeraia.

44. E aronga maata tei va ua ia koe, kua tuke te akara anga i tona mata ki to te tangata katoa ra, e tona tu i to te tamariki a te tangata nei.

45. Ka pipi katoa oki aia i te au enua e manganui, e topiri oki te au ariki i to ratou vaa ki mua iaia, e akara oki ratou i tei kore i akakiteia atu kia ratou, e tei kore i rongoia e ratou, ko ta ratou ïa ka kite.

46. Koia tika taku e karanga kia kotou, ka tupu pouroa teia au mea nei, mei ta te Metua i akaue mai iaku. Ei reira te koreromotu, ta te Metua i koreromotu ki tona au tangata e tupu ei, ei reira a Ierusalema e noo akaouiaʼi e toku au tangata, ka riro oki ei enua no ratou.