1. E kua putuputu maira te au tangata e manganui o Niphai ki te iero i te enua ko Bounetifula, te umere ua ra ratou tetai ki tetai, ma te akakite anga ki tetai i te akatukeanga maata tei tupu.

2. E te tuatua ua ra ratou no runga ia Iesu Mesia, e no te au akairo oki tei orongaia mai no tona mateanga.

3. E te tuatua ua ra ratou tetai ki tetai, kua akarongo akera ratou i tetai reo mei te mea e, no te rangi mai, e kua akarakara akera to ratou mata, kare oki ratou i kite i te ngai i aere mai ei taua reo ra, kare oki i te reo marokiakia, kare oki i te reo maata, no atu e, e reo iti poepoe, kua puta mai kia ratou tei akarongo, e tae rava mai ki roto i to ratou ngakau, e kua akamata to ratou kopapa i te ru, i na, kua puta tikai to ratou vaerua, e kua ka to ratou ngakau.

4. E kua rongo akaou ratou i taua reo ra, kare ra ratou i marama e noea mai.

5. E kua rongo akaou ratou i taua reo ra i te toru o te taime, e kua akatuera to ratou taringa kia rongo meitaki, e kua anga to ratou mata ki te ngai i aere mai ei te reo, e kua akara matariki iora ratou ki te rangi, te ngai no reira mai te reo.

6. E i na, i te toru o te taime, kua kite ratou i reira e noea mai te reira, e kua na ko maira kia ratou,

7. Ko taku tamaiti akaperepere teia, kua mareka rava au iaia, e kua akakaka au i toku ingoa iaia ra, e akarongo kotou iaia.

8. E kia marama i te reira, kua akara akera to ratou mata ki runga, e kite atura i tetai tangata i te eke anga mai mei te rangi mai, e kakau pu teatea oki tona, e kua aere maira kua tu ki rotopu ia ratou, e tei runga iaia te mata o te katoatoa, kare e rauka kia amama i te vaa kia tuatua atu tetai ki tetai, e kare oki ratou i kite e eaa teia, kua manako ratou e, e angela tei aere mai kia ratou.

9. E kua akatika iora aia i tona rima, e kua na ko atura ki te au tangata,

10. E i na, ko au ko Iesu Mesia ta te au peroveta i tuatua mai ka tae mai ki te ao nei.

11. E i na, ko au te marama, e te ora o te ao nei, kua inu oki au i te kapu kavangu ta te Metua i omai kiaku, e kua akakaka au i te Metua i te rave anga mai i te au ara a to teianei ao nei ki runga iaku, e kua kauraro i te anoano o te Metua i te au mea katoatoa mei te muatangana.

12. E kia oti tana tuatua anga i teianei au tuatua, kua tipapa te tangata katoatoa ki runga i te one, kua akamaara oki ratou e, kua totouia i rotopu ia ratou e, ka akaari mai te Mesia iaia uaorai kia ratou i muri ake i tona kake anga atu ki te rangi.

13. E kua tuatua maira te Atu kia ratou, na ko maira:

14. E tu, e aere mai ana kiaku nei, kia aa ana to kotou rima i toku nei kaokao, e kia kite oki kotou i te puta o te naero i roto i toku nei rima, e i toku nei vaevae, ei kite no kotou e, ko au te Atua o Iseraela, e te Atua o to te ao katoa, tei taiaia no te ara a to teianei ao.

15. E kua aere atura te katoatoa ki mua e kua aa i to ratou rima ki tona kaokao, e kua kite oki i te puta i tona rima e tona nga vaevae, ko teia ta ratou i rave tatakitai e pou ua atu te tangata katoatoa, kua akara tikai to ratou mata, e kua aa tikai to ratou rima, e ma te kite papu tikai, e kua aaki oki e, koia rai ta te au peroveta i tata, e ka tae mai.

16. E kia ope pouroa ratou i te aere e kia kite tikai no ratou uaorai kua kapiki atura ratou ma te reo okotai, i te na ko anga e,

17. Hosana, kia akameitakiia te ingoa o te Atua ngateitei, e kua akatopa iora ratou pouroa ki raro i te vaevae o Iesu e kua akamori atura iaia.

18. Kua tuatua iora aia kia Niphai, tei rotopu oki a Niphai i taua urupu tangata ra, e kua akaue atura iaia kia aere mai.

19. Kua tu iora a Niphai ki runga, e aere atura, e kua tupou iora iaia uaorai ki mua i te aroaro o te Atu, e ongi atura i tona vaevae.

20. Kua akaue atura te Atu, kia tu aia ki runga. E tu akera aia ki mua i tona aroaro.

21. E kua tuatua maira te Atu kiaia, Te oronga atu nei au i te mana kia koe, kia bapetizo koe i teia au tangata me oki akaou au ki te rangi.

22. E kua kapiki akaou akera a Iesu i tetai ke, e kua tuatua atura kia ratou mei te reira, e kua oronga kia ratou i te mana kia bapetizo. E kua na ko atura aia kia ratou, E na ko nei kotou i te bapetizo e auraka oki e tauetonoanga i rotopu ia kotou.

23. Tika tikai taku e karanga atu kia kotou, ko tei tataraara i tana au ara na roto i ta kotou au tuatua, e kua anoano kia bapetizoia na roto i toku nei ingoa, e na ko nei kotou kia bapetizo ia ratou. I na, e aere kotou ki raro i te vai e tu ei, e na roto i toku ingoa e bapetizo ei kotou ia ratou.

24. E teianei, ko teia te tuatua taau ka tuatua, e kapiki i to ratou ingoa, i te na ko anga e,

25. Kua akamanaia au e Iesu Mesia, te bapetizo nei au ia koe, na roto i te ingoa o te Metua, e no te Tamaiti, e no te Vaerua Tapu. Amene.

26. E i reira ka taruku iaia ki raro i te vai, e aere akaou mai ki vao mei roto mai i te vai.

27. Ko te tu teia me bapetizo kotou na roto i toku nei ingoa, i na, e tika tikai taku e karanga atu kia kotou, ko te Metua, e te Tamaiti e te Vaerua Tapu e okotai ïa, e tei roto au i te Metua, e tei roto te Metua iaku, e mei te Metua e au ra, e okotai ia.

28. E mei taku oki i akaue atu, kia na reira kotou kia bapetizo. E auraka rava ei tauetonoanga e tupu i rotopu ia kotou mei tei tupu ana, e auraka katoa ei tauetonoanga e tupu i rotopu ia kotou, no runga i te au tumu tuatua o taku nei apiianga mei ta kotou i rave ana.

29. E tika tika tikai taku e karanga atu kia kotou, me tei iaia ra te vaerua o te taumaro ra, kare aia noku, no te tiaporo aia, koia oki te metua o te taumaro anga, e te taoriori nei oki i te ngakau o te au tangata kia riri tetai ki tetai.

30. I na, kare teia i taku apiianga kia akariri atu i te ngakau o te au tangata tetai ki tetai, mari ra, ko teia taku apiianga, kia akaruke takiriia teianei au mea.

31. E i na, e tika tikai taku e karanga atu kia kotou, ka akakite atu au kia kotou i toku nei apiianga.

32. Ko teia oki toku apiianga, ko ta te Metua i oronga mai kiaku, e te akakite nei au i te tuatua no te Metua, e e akakite katoa nei te Metua i te tuatua noku, e te akakite katoa nei te Vaerua Tapu i te tuatua noku, e no te Metua, e te tuatua nei au, e te akaue nei te Metua i te au tangata ravarai, i te au ngai ravarai, kia tataraara, e kia akarongo mai kiaku.

33. E ko tei akarongo mai iaku ra e kua bapetizoia, ka ora ïa, e ko ratou oki te ka noo ki te basileia o te Atua.

34. E ko tei kore e akarongo mai iaku ra, e kare i bapetizoia, ka akaapaia aia.

35. Tika tika tikai taku e karanga atu kia kotou, ko teia taku apiianga, te akakite nei au i te reira e no ko mai i te Metua, e ko tei akarongo mai iaku ra, kua akarongo ïa i te Metua, e koia oki ta te Metua ka akakite i te tuatua noku ra, e ka oronga oki aia i te ai e te Vaerua Tapu kiaia.

36. E na reira oki te Atua i te akakiteanga iaku, e na te Vaerua Tapu e akakite atu kiaia i te Metua e au, no te mea, ko te Metua, e au, e te Vaerua Tapu, e okotai ïa.

37. E akakite akaou atu au kia kotou, e tataraara kotou, e kia aite ki te au tamariki mearikiriki, e kia bapetizoia na roto i toku nei ingoa me kore ra, kare e rauka ia kotou taua au mea ra.

38. E akakite akaou atu au kia kotou, e tataraara kotou, e kia bapetizoia oki na roto i toku ingoa, e kia aite ki te au tamariki mea rikiriki, me kore ra, kare kotou e ō ki te basileia o te Atua.

39. Tika, tika tikai taku e karanga atu kia kotou, e ko teia taku apiianga, e koia tei patu ki runga i teia, kua patuia ki runga i toku papa, e kare rava aia e taea e te ngutupa o Ade.

40. E ko te ka akamaata, me kore ra, ko te ka akameangiti i teia, e ka akamou i te reira no taku nei apiianga, no te kino oki iaia, e kare oki i patuia ki runga i toku nei papa, mari ra, kua patuia ki runga i te tango one ua, e te ngaa ua ra te ngutupa o ade kia ariki ia ratou, me tae mai te matangi, e te vai diluvi ki runga ia ratou.

41. No reira, ka aere atu kotou ki teianei au tangata, e akakite atu i te tuatua taku i tuatua atu, e tae ua atu ki te openga o te enua nei.