1 Ā pēnei ka kite tātou i te tekateka, me te tikoki o ngā ngākau o ngā tamariki a te tangata; āe rā, kei te kite tātou i te Ariki i runga i tōna painga nui mutunga kore e manaaki ana, ā, e whakakake ana i te hunga e whakawhirinaki nei ki a ia.

2 Āe rā, kei te kite anō tātou i te wā pū anō e whakakake nei i tana iwi, āe rā, i runga i te huanga o ā rātou māra, i ā rātou kāhui o ia tū, o ia tū, i ā rātou kōura, i ā rātou hiriwā, i ngā mea utu nui katoa me ngā mahinga toi o ia āhua, o ia āhua; e tohu ana i ō rātou oranga, ā, e whakaputa ana i a rātou i ngā ringaringa o ō rātou hoariri; e whakangāwari ana i ngā ngākau o ō rātou hoariri kia kore ai e whakapuaki i ngā pakanga ki a rātou; āe rā, hei whakarāpopoto, e mahi ana i ngā mea katoa hei oranga, ā, hei hari mō tana iwi; āe rā, i reira te wā e whakapakeke ai rātou i ō rātou ngākau, ā, ka wareware ki te Ariki tō rātou Atua, ā, ka takatakahia iho i raro i ō rātou waewae te Mea Tapu—āe rā, pēnei nā tō rātou ngāwari, me tō rātou kake tino nui whakaharahara.

3 Ā pēnei tātou kite ai, nā, ki te kore te Ariki e whakawhiu i tana iwi ki ngā whakamamaetanga maha, āe rā, ki te kore ia e toro iho ki a rātou i runga i te mate me te whakawehi, ki te matekai me ngā tūmomo urutā katoa o ia āhua, o ia āhua, kāore rātou e mahara ki a ia.

4 Auē, anō te kuare, anō te tekateka, anō te kino, me te whakarēweratanga, ā, anō te hohoro ki te mahi kino, ā, anō te pūhoi a ngā tamariki a te tangata ki te mahi pai; āe rā, anō te hohoro ki te whakarongo atu ki ngā kupu a te mea kino, me te whakatau i ō rātou ngākau ki runga i ngā mea tekateka o te ao!

5 Āe rā, anō te hohoro kia neke ake i runga i te whakapehapeha; āe rā, anō te hohoro ki te whakamanamana, me te mahi i ngā tūmomo mea katoa e kino ana; ā, anō tō rātou pūhoi ki te mahara ki te Ariki tō rātou Atua, me te whai taringa atu ki āna kupu ngārahu, āe rā, anō te pūhoi ki te hīkoi i runga i ngā huarahi o te whai mātauranga!

6 Nana, kāore ō rātou hiahia ki te Ariki tō rātou Atua, nāna nei rātou i hanga, kia whakahaere, ā, kia kīngi i runga i a rātou; ahakoa tōna painga nui me tana aroha ki a rātou, ka whakakore rātou i āna kupu ngārahu, ā, kāore rātou e pai ki a ia hei kaiārahi mō rātou.

7 Auē, anō te nui o te korekorehanga o ngā tamariki a te tangata; āe rā, he iti pū anō rātou i te puehu o te whenua.

8 Nana rā, ka nekeneke te puehu o te whenua ki wiwī, ki wawā, tae noa ki te weheruatanga ake, i runga i te whakahau a tō tātou Atua nui, ā, tō tātou Atua ora tonu.

9 Āe rā, nana, tūoioi ana, ngāueue ana ngā pukepuke me ngā maunga i tōna reo.

10 Ā, pakaru iho ana ērā i te kaha o tana reo, ā, meinga ana hei mea papatairite, āe rā, anō nei he raorao.

11 Āe rā, ngāueue ana te whenua katoa i te kaha o tana reo;

12 Āe rā, pīoioi ana ngā tūāpapa, ki te pokapū anō, i te kaha o tōna reo.

13 Āe rā, mēnā ka kī atu ia ki te whenua—Neke—kua neke ia.

14 Āe rā, mēnā ka kī atu ia ki te ao—Me hoki whakamuri koe, kia maha atu anō ngā hāora o te rā—kua meatia;

15 Ā pēnei, ka hoki whakamuri te ao e rite ana ki tana kupu, ā, ki tā te tangata titiro kua tū kau te rā; āe rā, ā nana, e pēnei ana anō; nā te mea e pono ana ko te ao e neke ana ehara i te rā.

16 Ā nana, tēnei anō, mēnā ka kī atu ia ki ngā wai o te rire nui—Kia maroke ake koe—kua meatia.

17 Nana, mēnā ka kī atu ki tēnei maunga—Kia ara ake koe, ā, kia nuku mai, ā, kia hinga iho ki runga ki tērā pā, kia tanumia ake ai—nana kua meatia.

18 Ā nana, mēnā ka hunaia ake e tētahi tangata tētahi taonga i te whenua, ā, ka kī ake te Ariki—Tukuna kia kangaia taua mea, nā te kino o te tangata nāna nei i huna ake—nana, ka kangaia taua mea.

19 Ā, mēnā ka kī ake te Ariki—Kia kangaia koe, kia kore ai koe e kitea ake anō mai i tēnei wā haere ake nei mō āke tonu atu—nana, kāore e kitea e tētahi tangata haere ake nei mō āke tonu atu.

20 Ā nana, mēnā ka kī atu te Ariki ki tētahi tangata—Ka kangaia koe mō āke tonu atu nā ōu kino—ka meatia.

21 Ā, mēnā ka kī ake te Ariki—Ka hātepea atu koe i tōku aroaro nā ōu kino—ka meinga e ia kia pērā.

22 Auē te mate mō te tangata e kī ake i tēnei, nā te mea mō te tangata e mahi nei i te kino, ā, tē taea te whakaora; nō reira, mō tēnei take, kia whakarauorangia ai te tangata, i whakapuakina ai te rīpenetātanga.

23 Nō reira, ka manaakitia te hunga e rīpenetā, ā, e whakarongo ki te reo o te Ariki tō rātou Atua; nā te mea koinei te hunga e whakarauorangia ai.

24 Ā, mā te Atua e tuku, i tana raneatanga nui, kia kūmea mai ai ngā tāngata ki te rīpenetātanga me ngā mahinga pai, kia whakahokia mai ai rātou ki te aroha, kia rite ki ā rātou mahi.

25 Ā, e hiahia ana au kia whakarauorangia ngā tāngata katoa. Engari e pānui ana tātou, nā, hei te rā nui whakamutunga ka makaia atu ētahi, āe rā, ka makaia atu i te aroaro o te Ariki;

26 Āe rā, ka whakataua rātou ki tētahi āhuatanga pōuri mutunga kore, e tutuki ana i ngā kupu e mea ana: Ka whiwhi te hunga kua mahi pai i te oranga tonutanga; ā, ka whiwhi te hunga kua mahi kino i te pōuritanga mutunga kore. Ā pēnei anō. Āmine.