1 Ā, i pahawa ake i te tau whā ngahuru mā rua o te whakahaeretanga a ngā kaiwhakawā, whai muri iho i tā Moronaihā whakapūmautanga anō i te rangimārie i waenganui i ngā Nīwhai me ngā Rāmana, nana, kāore i reira tētahi hei whakakī i te nohoanga-whakawā; nō reira ka tīmata tētahi tautohetohenga anō i waenganui i te iwi e pā ana ki a wai hei whakakī ake i te nohoanga-whakawā.

2 Ā, i pahawa ake ka whakataua a Heramana, ko ia te tama a Heramana, hei whakakī i te nohoanga-whakawā, e te reo o te iwi.

3 Engari nana, i te whanga a Kihikumene, koia te mea nāna nei a Pahorana i kōhuru, ki te whakangaro i a Heramana anō hoki; ā, i tautokona ia e tana ope, ko rātou nei kua uru atu ki roto i tētahi kawenata kia kore rawa tētahi e mōhio ai ki tana whakarihariha.

4 Nā, i reira tētahi Kariatono, he tino pirihi ia ki te kōrero i ngā kupu maha, i tana mahi anō hoki, ki te mahi i ngā mahi kōhuru huna me te mahi tāhae; nō reira ka tū ia hei kaiārahi o te ope o Kihikumene.

5 Nō reira ka whakapatipatihia rātou e ia, me Kihikumene anō hoki, arā, me ka whakanohoia ia i te nohoanga-whakawā māna te hunga nō tana ope e whakanohonoho ki roto i ngā tūranga whaikaha me ngā tūranga whaimana i waenganui i te iwi; nō reira ka whai a Kihikumene ki te whakangaro i a Heramana.

6 Ā, i pahawa ake i a ia e haere atu ana ki te nohoanga-whakawā ki te whakangaro i a Heramana, nana, kua puta atu i te pō tētahi o ngā pononga a Heramana, ā, kua mau i a ia, i runga i te whakaāhua kē, tētahi mātauranga mō aua whakaritenga kua whakatakotohia iho e tēnei ope ki te whakangaro i a Heramana—

7 Ā, i pahawa ake, nā, ka tūtaki ia ki a Kihikumene, ā, ka hoatu ia ki a ia tētahi tohu; nō reira whakamōhio atu a Kihikumene ki a ia te mea i hiahia ai ia, e hiahia ana ia kia ārahina atu ia ki te nohoanga-whakawā e kōhuru ai ia i a Heramana.

8 Ā, i te mōhiotanga a te pononga a Heramana ki te ngākau katoa o Kihikumene, me tana whainga anō ki te kōhuru, ā, ko te whainga o aua hunga katoa o tana ope ki te kōhuru, ki te pāhua, me te rapu mana, (ā, koinei tā rātou mahere muna, me tā rātou whakakotahitanga) ka kī atu te pononga a Heramana ki a Kihikumene: Tukua tāua kia haere atu ai ki te nohoanga-whakawā.

9 Nā, ka tino hari a Kihikumene i tēnei, nā te mea i whakaaro ake ia ka tutuki i tāna i hiahia ai; engari nana, i a rāua e haere atu ana ki te nohoanga-whakawā, ka werohia a Kihikumene e te pononga a Heramana, ā, ngoto rawa ki te ngākau, nā, ka hinga mate iho ia kīhai hoki i aurere. Ā, ka oma atu ia me te whāki atu ki a Heramana i ngā mea katoa i kite ai, i rongo ai, i mahi ai ia.

10 Ā, i pahawa ake, nā, ka tonoa atu e Heramana ētahi kia mau tēnei ope kaitāhae me tēnei ope kaikōhuru, kia whakamatea rātou e rite ana ki te ture.

11 Engari nana, i te kitenga a Kariatono kīhai a Kihikumene i hoki mai, ka wehi ia kei whakangaromia ia; nō reira ka mea ia kia arumia tana ope i a ia. Ā, ka rere atu rātou ki waho atu i te whenua, mā tētahi ara huna, ki roto i te koraha; ā, pēnei i te haerenga atu a Heramana kia mau rātou kāore rātou i kitea noatia i tētahi wāhi.

12 Ā, ka kōrero anō mō tēnei Kariatono a muri ake nei. Ā, pēnei mutu ai te tau whā ngahuru mā rua o te whakahaeretanga a ngā kaiwhakawā i runga i te iwi o Nīwhai.

13 Ā nana, i te mutunga o tēnei pukapuka ka kite koutou kua puta ake tēnei Kariatono hei mea turaki, āe rā, hei mea tata whakangaromia katoatia e ia te iwi o Nīwhai.

14 Nana kāore au e mea ana kei te mutunga o te pukapuka a Heramana, engari e mea ana au kei te mutunga o te pukapuka a Nīwhai, mai i reira tangohia ai e au ēnei kōrero katoa kua tuhituhia nei e ahau.