1 Nana, i pahawa ianei ake i te tau ono ngahuru mā iwa o te whakahaeretanga a ngā kaiwhakawā i runga i te iwi o ngā Nīwhai, nā, ka hoki a Nīwhai, te tama a Heramana, ki te whenua o Harahemara mai i te whenua whakateraki.

2 Nā te mea kua haere atu ia ki waenganui i te iwi kei te whenua whakateraki, ā, i kauhau atu ia i te kupu a te Atua ki a rātou, ā, ka poropiti ia i ngā mea maha ki a rātou;

3 Ā, i whakaparahako rātou i āna kupu katoa, nā konā tē taea e ia te noho tonu i waenganui i a rātou, engari ka hoki atu anō ia ki tōna whenua tupu.

4 Ā, i tana kitenga atu i te iwi i roto i tētahi āhuatanga kino whakarihariha, me aua kaipāhua o Karianato e whakakīkī ana i ngā nohoanga-whakawā—kua riro hoki i a rātou te kaha me te mana o te whenua; e whakatahangia atu ana ngā whakahaunga a te Atua, kāore rawa hoki ō rātou tika i tōna aroaro; kāore rātou i mahi tika atu ki ngā tamariki a te tangata;

5 E whakahē ana i te hunga tika mō tō rātou tika; e tukuna atu ana te hunga hara me te hunga kino kei whakawhiua nā ā rātou pūtea; waihoki kia puritia tonutia ō rātou tūranga i te upoko o te kāwanatanga, ki te whakahaere me te mahi e rite ana ki ā rātou hiahia, kia rapu taonga, ā, kia rapu korōria i runga i te ao, ā, waihoki, kia māmā ake ai tā rātou mahi pūremu, tā rātou tāhae, tā rātou patu tangata, me tā rātou mahi e rite ana ki tā rātou i pai ai—

6 Nā, kua tau iho tēnei kino nui ki runga i ngā Nīwhai, i te takiwā o ngā tau ruarua; ā, i te kitenga o Nīwhai i tēnei, ka pupuhi ake tōna ngākau i runga i te pōuritanga i tōna uma; ā, ka hāmama ake ia i runga i te mamae o tōna wairua:

7 Auē, me i whiwhi ahau ki ōku rā i ngā rā i haere tuatahi mai ai tōku matua a Nīwhai i te whenua o Hiruharama, kia taea ai e ahau te hari tahi me ia i te whenua o te kupu whakaari; i reira ngāwari ai te akiaki i tōna iwi, e kaha ana ki te pupuri i ngā whakahaunga a te Atua, ā, e pūhoi ana kia ārahina atu ai ki roto i te hē; ā, i hōhoro rātou ki te whakarongo ki ngā kupu a te Ariki—

8 Āe rā, mehemea ko ōku rā i aua rā, kātahi tōku wairua ka hari i runga i te tika o ōku huānga.

9 Engari nana, kua whakataua au ki ēnei rā hei rā mōku, ā, kia kī ai tōku wairua i te pōuri nā te whakarihariha o ōku huānga.

10 Ā nana, i pahawa ianei ake, nā, i runga i tētahi pourewa, kei roto nei i te māra a Nīwhai, i te taha o te huanui e tika tonu atu ana ki te mākete matua, kei roto nei i te pā o Harahemara; nō reira, kua tuohu iho a Nīwhai i a ia anō ki runga i te pourewa i roto nei i tana māra, ko taua pourewa anō e tū tata ana ki te kūwaha māra e tika tonu atu ana ki te huanui.

11 Ā, i pahawa ake, nā, i reira ētahi tāngata e tōhipa atu ana, ā, ka kite ake i a Nīwhai i a ia e maringi atu ana i tōnu wairua ki te Atua i runga i te pourewa; ā, ka oma atu rātou, ā, ka kōrero atu ki te iwi he aha tā rātou i kite ai, ā, ka huitahi te iwi i ngā whakaminenga nui kia mōhio ai rātou he aha te take o tēnei tangihanga mō te whakarihariha o te iwi.

12 Ināianei ā, i te tūnga ake o Nīwhai ka kite ia i ngā whakaminenga tāngata kua huihui tahi mai nei.

13 Ā, i pahawa ake, nā, ka tūwhera ia i tōna māngai, ā, ka kī atu ki a rātou: Nana, he aha koutou i huihui tahi ai i a koutou anō? Kia kōrero atu au ki a koutou mō ō koutou kino?

14 Āe rā, nā te mea kua eke ake au ki runga i tōku pourewa kia riringi iho au i tōku wairua ki tōku Atua, nā te pōuri tino nui o tōku ngākau, koia he mea nā ō koutou hē!

15 Ā, nā taku tangihanga me taku auē kua huitahi anō koutou i a koutou anō, ā, kei te mīharo koutou; āe rā, e tika tonu nei tā koutou mīharo; āe rā, me mīharo koutou nā te mea kua hoatuhia koutou, nā, kua kaha tā te rēwera pupuri i ō koutou ngākau.

16 Āe rā, he aha koutou i ngāwari ai ki te whakawainga o te mea e whai ana ki te whiu atu i ō koutou wairua ki raro ki te pōuritanga me te auē mutunga kore?

17 Kia rīpenetā koutou, kia rīpenetā koutou! He aha koutou e mate ai? Kia tahuri koutou, kia tahuri koutou ki te Ariki tō koutou Atua. He aha ia i whakarere ai i a koutou?

18 Nā koutou i whakapakeke i ō koutou ngākau; āe rā, kāore koutou e whakarongo ki te reo o te hēpara pai; āe rā, kua whakapātaritari koutou i a ia kia riri ki a koutou.

19 Ā nana, mahue te whakahuihui i a koutou, ki te kore koutou e rīpenetā, nana, māna koutou e whakamarara atu kia meinga koutou hei kai mā ngā kurī me ngā kararehe mohoao.

20 Auē, me pēhea koutou i wareware nei i tō koutou Atua i taua rā anō nāna nei koutou i whakaputa?

21 Engari nana, he mea tēnei kia whai taonga, ā, kia whakamoemititia e te tangata, āe rā, kia whiwhi kōura me te hiriwā. Ā, kua whakatau iho koutou i ō koutou ngākau ki runga i ngā taonga me ngā mea tekateka o tēnei ao, mō konā kōhuru ai koutou, pāhua ai anō, tāhae ai anō, me te whakapae teka atu ki ō kiritata, me te mahi i ngā tūmomo kino katoa o ia āhua, o ia āhua.

22 Ā, mō tēnei take tau iho ai te auē ki runga i a koutou ki te kore koutou e rīpenetā. Nā te mea ki te kore koutou e rīpenetā, nana, ko tēnei pā nui, me aua pā nui anō hoki huri noa, huri noa, kei roto nei i te whenua e noho nei tātou, ā, ka murua atu kia kore koutou e whaiwāhi i reira; nana rā, kāore te Ariki e tuku kaha ki a koutou, pērā i tāna i mua, hei tū atu ki ō koutou hoariri.

23 Nana rā, pēnei tā te Ariki: E kore au e whakaatu atu ki te hunga kino tētahi wāhi o tōku kaha, kia nui ake tōku ki tētahi i tōku ki tētahi atu, engari ki te hunga e rīpenetā ana i ō rātou hara, me te whakarongo ki āku kupu. Nō reira, e hiahia ana ahau kia titiro koutou, e aku teina, nā, ka pai ake te mea mō ngā Rāmana i te mea mō koutou ki te kore koutou e rīpenetā.

24 Nana rā, he nui ake tō rātou tika i tō koutou, nā te mea kāore rātou i hē atu i te mātauranga kua whiwhi nei rātou; nō reira ka aroha te Ariki ki a rātou; āe rā, māna e whakaroa atu i ō rātou rā me te whakatokomaha ake i ō rātou uri, ina whakangaromia katoatia koutou ki te kore koutou e rīpenetā.

25 Āe rā, auē te mate mō koutou nā taua mōrikarika nui kua tau ki waenganui i a koutou; ā, kua whakahono atu koutou ki a ia, āe rā, ki taua ope huna kua whakapūmauhia e Karianato!

26 Āe rā, auē te mate mō koutou nā taua whakapehapeha kua tukuna e koutou kia uru ai ki roto i ō koutou ngākau, kua neke ake i a koutou ki tua atu i tērā e pai ana nā ā koutou taonga tino nunui rawa!

27 Āe rā, auē te mate mō koutou nā tō koutou whakrihariha me ō koutou mōrikarika!

28 Ā, ki te kore koutou e rīpenetā ka mate koutou; āe rā, ka murua pū anō atu ō koutou whenua i a koutou, ā, ka whakangaromia atu koutou i te mata katoa o te whenua.

29 Nana ināianei, ehara i a au ake te kōrero e mea ana ka puta mai ēnei mea, nā te mea ehara taku mōhioranga ki ēnei mea i ahau ake anō; engari nana, e mōhio ana ahau he pono ēnei mea nā te mea nā te Ariki te Atua ēnei mea i whakamōhio mai ki ahau, nō reira e whakaatu atu nei au ka puta ēnā mea.