1 Ināianei ā i pahawa ake, nā, i te kōrerotanga a Nīwhai i ēnei kupu, nana, i reira ētahi tāngata he kaiwhakawā rātou, nō taua ope huna anō hoki o Karianato, ā, i riri rātou, ā, i karanga atu nei rātou ki a ia, e mea ana ki te iwi: He aha koutou e kore ai e mau ki tēnei tangata me te kawe atu i a ia, kia whakahēngia ia e rite ana ki tana hē kua mahia e ia?

2 He aha koutou e titiro atu ai ki tēnei tangata, me te whakarongo ki a ia e taunu ana i tēnei iwi me tō tātou ture?

3 Nana rā, kua kōrero atu a Nīwhai ki a rātou e pā ana ki te kino o tō rātou ture; āe rā, he maha ngā mea i kōrero ai a Nīwhai e kore nei e taea te tuhi; ā, kāore he mea kotahi i kōrerotia ai e ia e tauaro ana ki ngā whakahaunga a te Atua.

4 Ā, i riri aua kaiwhakawā ki a ia mōna i kōrero mārama ki a rātou e pā ana ki ā rātou mahinga huna o te pōuritanga; hei aha koa, kāore rātou i māia kia pā atu ō rātou ake ringaringa ki runga ki a ia, nā te mea i wehi rātou i te iwi kei karanga ake rātou mō tō rātou hē.

5 Nō reira i karanga atu rātou ki te iwi, e mea ana: He aha koutou e tuku ai i tēnei tangata kia taunu ai i a tātou? Nana rā kei te whakahē ia i tēnei iwi, tae atu ana ki te whakangaromanga; āe rā, ka murua atu anō hoki ēnei pā nui ō tātou i a tātou, kia kore tātou e whaiwāhi ai ki roto rā.

6 Ināianei ā e mōhio ana tātou kāore e taea ana tēnei, nana rā, he mea kaha tātou, ā, he nui ō tātou pā, nō reira kāore e taea ana e ō tātou hoariri te whaikaha ki runga i a tātou.

7 Ā, i pahawa ake, nā, pēnei tā rātou whakaohooho ake i te iwi kia riri ai ki a Nīwhai, ā, ka whakatutūngia ngā tautohetohenga i waenganui i a rātou; nā te mea i reira ētahi i karanga atu ai: Waiho atu tēnei tangata, nā te mea he tangata pai ia, ā, kāore e kore ka puta mai aua mea kua kōrerotia nei e ia ki te kore tātou e rīpenetā;

8 Āe rā, nana, ka tau mai ngā whakawākanga katoa kua whakaatungia mai nei e ia ki runga i a tātou; nā te mea kei te mōhio tātou e tika tana whakaaturanga mai ki a tātou e pā ana ki ō tātou hē. Ā nana he maha ērā, ā, e mōhio ana ia anō hoki ki ngā mea katoa e tau mai ai pērā i tāna mōhio ki ō tātou hē;

9 Āe rā, ā nana, mehemea ehara ia i tētahi poropiti kua kore i taea e ia te whakaatu mai e pā ana ki aua mea.

10 Ā, i pahawa ake, nā, ka meinga aua tāngata i whai ai ki te whakangaro i a Nīwhai nā tō rātou wehi, nā, kia kaua rātou e pā atu i ō rātou ringaringa ki runga ki a ia; nō reira ia tīmata anō ai tana kōrero atu ki a rātou, e kite ana kua aro mai ētahi ki a ia, nā konā wehi ai te toenga atu o rātou.

11 Nō reira i akiakina ia kia kōrero atu anō ki a rātou e mea ana: Nana, e aku teina, kāore anō koutou kia pānui, nā, i hoatu e te Atua he mana ki te tangata kotahi, ko Mohi pū anō, kia patua iho ai ngā wai o te Moana Whero, ā, ka weheruatia i tētahi taha, i tētahi taha, nā konā ngā Iharaira, ko rātou nei ō tātou tūpuna, whakawhiti atu ai i runga i te whenua maroke, ā, ka katia iho ngā wai ki runga i ngā tauā o ngā Ihipiana, ā, horomia ake ana rātou?

12 Ināianei ā nana, mehemea i hoatu e te Atua tēnei mana nui ki tēnei tangata, me aha koutou e tautohetohe ai i waenganui i a koutou anō, me te kī ake kāore ia i homai ki ahau he mana e mōhio ai au e pā ana ki ngā whakawākanga e tau iho ai ki runga i a koutou ki te kore koutou e rīpenetā?

13 Engari, nana, ehara i te mea kei te whakakore anake i aku kupu, engari kei te whakakore anō hoki koutou i ngā kupu katoa kua kōrerotia nei e ō tātou tūpuna, me ngā kupu anō hoki kua kōrerotia nei e tēnei tangata, e Mohi, anō te nui o te mana i hoatu nei ki a ia, āe rā, ko ngā kupu kua kōrerotia nei e ia e pā ana ki te haerenga mai a te Mīhaia.

14 Āe rā, kāore rānei ia i whakaatu atu, nā, ka haere mai te Tama a te Atua? Ā, pērā i tana whakairi ake i te nākahi parāhe i te koraha, waihoki ka whakairingia ake ia e haere mai ai.

15 Ā, ka ora ngā tāngata katoa e titiro atu ai ki te nākahi, pērā pū anō ka ora ngā tāngata katoa e titiro atu ai ki te Tama a te Atua i runga i te whakapono, me te wairua iro, tae atu ana ki taua oranga e mau tonu ana.

16 Ināianei ā nana, ehara i te mea ko Mohi anake i whakaatu atu ai mō ēnei mea, engari ko ngā poropiti tapu katoa anō hoki, mai i ōna rā tae noa atu ki ngā rā o Aperahama.

17 Āe rā, ā nana, i kite a Aperahama i tana haerenga mai, ā, kua kī i te koa, ā, ka hari.

18 Āe rā, ā nana ko taku kupu tēnei ki a koutou, ehara i te mea i mōhio a Aperahama anake ki ēnei mea, engari he maha ngā mea i mua i ngā rā o Aperahama i karangatia ai i runga i te ritenga tapu o te Atua; āe rā, i runga pū anō i te ritenga o tana Tama; ā, pēnei kia whakakitea atu ai ki te iwi, he maha ngā tau manomano i mua i tana haerenga mai, nā, ka puta pū anō mai te whakaoranga ki a rātou.

19 Ināianei ā e hiahia ana au kia mōhio koutou, nā, he tokomaha ngā poropiti kua whakaatungia mai nei mō ēnei mea mai i ngā rā anō o Aperahama; āe rā, nana, i whakaatu kaha nei te poropiti a Henohi; nā konā whakamatea ai ia.

20 Ā nana, ko Henoka anō hoki, me Eria anō hoki, me Ihāia anō hoki, me Heremaia anō hoki, (ko Heremaia taua poropiti anō nāna nei i whakaatu atu mō te whakangaromanga o Hiruharama) ināianei ā kei te mōhio tātou i whakangaromia a Hiruharama e rite ana ki ngā kupu a Heremaia. Kāti rā, he aha e kore ai te Tama a te Atua e haere mai ai, e rite ana ki tana poropititanga?

21 Ināianei ā ka tautohe koutou i te pono o te whakangaromanga o Hiruharama? Ka kī ake koutou kīhai ngā tama a Herekia i whakamatea, ko rātou katoa atu i a Mureke? Āe rā, kāore koutou e kite, nā, kei waenganui i a tātou ngā uri o Herekia, ā, kua āia atu rātou i te whenua o Hiruharama? Engari nana, ehara tēnei i te katoa—

22 I āia atu tō tātou matua a Rīhai i te whenua o Hiruharama nā te mea i whakaatu atu ia mō ēnei mea. I whakaatu atu a Nīwhai anō hoki mō ēnei mea, ā, tata pū ō tātou tūpuna katoa, tae noa mai ki tēnei wā tonu; āe rā, kua whakaatu rātou mō te haerenga mai a te Karaiti, ā, kua titiro whakamua, ā, kua hari i tana rā e haere ake nei.

23 Ā nana, ko ia te Atua, ā, kei tō rātou taha ia, ā, i whakakite atu ia i a ia anō ki a rātou, nā, kua hokona rātou e ia; ā, i hoatu rātou i te korōria ki a ia, nā tērā mea e puta mai nei.

24 Ināianei ā, e kite ana kei te mōhio koutou ki ēnei mea, ā, tē taea e koutou te whakakore i ērā ki te kore koutou e rūkahu, nō reira kua hē koutou i tēnei, nā te mea kua whakaparahakongia ēnei mea katoa e koutou, ahakoa he nui ngā whakaaturanga kua whiwhi nei koutou; āe rā, kua whiwhi pū anō koutou i ngā mea katoa, ko ngā mea i te rangi me ngā mea katoa kei runga i te whenua, hei whakaaturanga kei te pono ērā mea.

25 Engari nana, kua whakaparahako koutou i te pono, ā, kua haututū atu ki tō koutou Atua tapu; ā, hei tēnei wā anō, mahue tā koutou whakatakoto ake i ngā taonga mō koutou ake anō i te rangi, kāore he mea hei whakakino i reira, ā, kāore e tae atu tētahi mea e poke ana, kei te pūranga ake koutou mō koutou ake anō te riri mō te rā whakawā.

26 Āe rā, kei te pakari haere koutou i tēnei wā pū anō, nā ō koutou kōhuru me ā koutou pūremu me ā koutou whakarihariha, mō te whakangaromanga mutunga kore; āe rā, ki te kore koutou e rīpenetā ka tau wawe iho mai nei tēnā ki runga i a koutou.

27 Āe rā, titiro kei ō tātou tatau ināianei; āe rā, haere ake koutou ki roto ki te nohoanga-whakawā, ā, kimihia; ā nana, kua kōhurutia tō koutou kaiwhakawā, ā, kei te takoto iho ia i ōna toto; ā, kua kōhurutia ia e tana teina, e whai nei ki te noho i te nohoanga-whakawā.

28 Ā nana, nō tō koutou ope huna rāua tahi, ko Karianato tōna kaitito me te mea kino e whai nei ki te whakangaro i ngā wairua o te tangata.