1 Nana, i pahawa ianei ake, nā, i te kōrerotanga a Nīwhai i ēnei kupu, ka oma atu ētahi tāngata i waenganui i a rātou ki te nohoanga-whakawā; āe rā, tokorima ngā mea i haere, ā, ka kōrero rātou ki a rātou anō, i a rātou e haere atu ana:

2 Nana, ka mōhio tūturu nei tātou ināianei mehemea he poropiti tēnei tangata, ā, mehemea rānei i whakahau te Atua i a ia ki te poropiti i ngā mea whakamīharo ki a tātou. Nana, kāore tātou e whakapono nāna i mea ēnei mea; āe rā, kāore tātou e whakapono ana he poropiti ia; hei aha koa, mehemea he pono tēnei mea nāna nei i poropiti e pā ana ki te kaiwhakawā matua, arā, kua mate ia, kātahi tātou ka whakapono, nā, he pono ērā atu kupu kua kōrerotia nei e ia.

3 Ā, i pahawa ake, nā, ka oma atu rātou i runga i tō rātou kaha, ā, ka tae atu ki te nohoanga-whakawā; ā nana, kua hinga iho te kaiwhakawā matua ki runga i te whenua, ā, i te takoto ia i roto i ōna toto.

4 Ināianei ā nana, i tino mīharo rawa rātou i tā rātou kitenga i tēnei mea, nā konā hinga anō rātou ki te whenua; nā te mea kīhai rātou i whakapono ki ngā kupu kua kōrerotia nei e Nīwhai e pā ana ki te kaiwhakawā matua.

5 Engari ināianei, i tā rātou kitenga atu kua whakapono rātou, ā, ka pā iho te wehi ki runga i a rātou kei tau mai ngā whakawākanga katoa kua kōrerotia nei e Nīwhai ki runga i te iwi; nō reira i wiriwiri rātou, ā, kua hinga ki te whenua.

6 Nā, i te wā tonu i kōhurutia ai te kaiwhakawā—he mea wero e tana teina, e tētahi kahu huna, ā, ka tahuti atu ia, ā, ka oma haere nei ngā pononga ki te whāki atu ki te iwi, e whakaarahia atu ana te karanga o te kōhuru ki waenganui i a rātou;

7 Ā nana ka whakahuihui tahi nei te iwi i a rātou anō ki te wāhi i reira te nohoanga-whakawā—ā nana, i mīharo rawa atu rātou i tā rātou kitenga atu i aua tāngata tokorima kua hinga iho nei ki te whenua.

8 Ināianei ā nana, kāore te iwi i paku mōhio ki tētahi mea e pā ana ki te whakaminenga i huitahi ai i te māra a Nīwhai; nō reira ka kōrero rātou i waenganui i a rātou anō: Koinei ngā tāngata nāna nei te kaiwhakawā i kōhuru, ā, kua patua rātou e te Atua kia kore ai rātou e tahuti atu ai i a tātou.

9 Ā, i pahawa ake, nā, ka hopukina rātou e rātou, ā, ka hereheretia rātou, ka makaia rātou ki roto i te whareherehere. Ā, kua tukuna atu tētahi whakapuakitanga puta noa i te whenua e mea ana kua whakamatea te kaiwhakawā, ā, kua hopukina atu ngā kaikōhuru, ā, kua makaia ki roto i te whareherehere.

10 Ā, i pahawa ake, nā, i te aonga ake o te rā ka huihui tahi te iwi i a rātou anō ki te tangi me te nohopuku, i te nehunga o te kaiwhakawā matua nui kua whakamatea nei.

11 Ā pēnei, ko aua kaiwhakawā i tae atu rā ki te māra a Nīwhai, i rongo anō i āna kupu, kua huitahi atu anō rātou i te nehunga.

12 Ā, i pahawa ake, nā, ka uiui atu i waenganui i te iwi, e mea ana: Kei hea ngā tāngata tokorima i tonoa atu ai kia kite atu mehemea kua mate te kaiwhakawā matua? Ā, ka whakautu rātou ka mea: Kāore mātou i te mōhio e pā ana ki tēnei tokorima nāu nei i tono; engari he tokorima ko rātou nei ngā kaikōhuru, kua makaia atu ki roto i te whareherehere.

13 Ā, i pahawa ake, nā, i te hiahia ngā kaiwhakawā kia mauria mai ai rātou; ā, ka mauria mai rātou, ā nana ko rātou te tokorima i tonoa atu ai; ā nana ka uia atu rātou e ngā kaiwhakawā kia mōhio ai e pā ana ki tēnei mea, ā, ka kōrero atu rātou ki a rātou i ngā mea katoa i mahi nei rātou, e mea ana:

14 I oma mātou, ā, ka tae mai ki te wāhi o te nohoanga-whakawā, ā, i tā mātou kitenga atu i ngā mea katoa e rite ana ki tā Nīwhai i poropiti ai, ka mīharo mātou nā konā hinga iho ai ki te whenua; ā, i tā mātou ohonga ake i te mīharotanga, nana i makaia mātou e rātou ki roto i te whareherehere.

15 Nā, mō te kōhurutanga o tēnei tangata, kāore mātou e mōhio ana nā wai i mahi; ā, ko tēnei anake e mōhio nei mātou, i oma mai mātou, ā, i haere mai mātou kia rite ki tā koutou i hiahia ai, ā nana kua mate ia, e rite ana ki ngā kupu a Nīwhai.

16 Ināianei ā i pahawa ake, nā, ka whakamāramatia atu tēnei mea ki te iwi e ngā kaiwhakawā, ā, ka karanga atu ki a Nīwhai, e mea ana: Nana, e mōhio ana tātou kāore e kore kua whakarite tahi a Nīwhai me ētahi atu kia whakamate ai i te kaiwhakawā, kātahi ka taea e ia te whakapuaki mai ki a tātou, kia whakatahuri mai i a tātou ki tana whakapono, kia whakatiketike ia i a ia anō hei tangata nui, kua kōwhiria e te Atua, ā, hei poropiti.

17 Ināianei ā nana, ka hura i tā tēnei tangata, ā, ka whāki ia i tana hē, ā, ka whakamōhio mai ia ki a tātou ko wai te kaikōhuru tūturu o tēnei kaiwhakawā.

18 Ā, i pahawa ake, nā, ka tukua noatia aua tāngata tokorima i runga i te rā nehu. Hei aha koa, ka kohete rātou i ngā kaiwhakawā mō ngā kupu i kōrerotia ai e rātou e whakahē ana i a Nīwhai, ā, ka tohetohe takitahi atu ki a rātou, nā konā whakapōrarutia ai rātou e rātou.

19 Hei aha koa, ka mea rātou kia hopukina a Nīwhai, ā, kia herea, ā, kia mauria mai ai ki mua i te whakaminenga, ā, ka tīmata tā rātou uiui atu i a ia i ngā āhuatanga maha kia mau ai ia i a rātou, kia whakapaengia ia e rātou kia mate—-

20 E mea ana ki a ia: He tangata whaihoa koe; ko wai tēnei tangata nāna nei tēnei kōhuru? Nā, whakamōhiotia mai ki a mātou, me te whāki mai i tō hē; e mea ana, Nana anei te pūtea; waihoki ka tuku anō mātou i a koe kia ora mēnā rānei ka whāki mai koe ki a mātou, me te whāki mai anō tā kōrua i whakarite ai.

21 Engari ka kī atu a Nīwhai ki a rātou: E koutou ngā kuare, e koutou te hunga ngākau kokoti kore, e koutou te hunga kāpō, me koutou ngā tāngata kakī mārō, e mōhio ana rānei koe me pēhea te roa e tuku ai te Ariki tō koutou Atua i a koutou kia haere tonu ai i runga i tā koutou huarahi hara?

22 Auē, e tika ana me tīmata tā koutou tangi me tā koutou auē, nā te whakangaromanga nui e tāria nei koutou i tēnei wā tonu, ki te kore koutou e rīpenetā.

23 Nana e mea ana koutou kua whakarite ahau ki tētahi tangata māna hei kōhuru i a Hetorama, tō tātou kaiwhakawā matua. Engari nana, ko taku kupu tēnei ki a koutou, he mea tēnei nā taku poropititanga atu ki a koutou e mōhio ai koutou e pā ana ki tēnei mea; āe rā, hei whakaaturanga mai anō ki a koutou, nā, i mōhio au ki ngā whakarihariha me ngā mōrikarika i waenganui i a koutou.

24 Ā, nā te mea kua pēnei au, e mea ana koutou kua whakarite au ki tētahi tangata māna hei mahi tēnei mea; āe rā, nā te mea i whakaatu atu au ki a koutou i tēnei tohu kei te riri koutou ki ahau, ā, e whai ana ki te whakangaro i tōku oranga.

25 Ināianei ā nana, māku tētahi atu tohu e whakaatu atu ki a koutou, kātahi ka kite mēnā rānei ka whai koutou ki te whakangaro i ahau i runga i tēnei mea.

26 Nana ko taku kupu tēnei ki a koutou: Haere atu ki te whare o Heanatuma, ko ia te teina o Hetorama, ā, me kī atu ki a ia—

27 Kua whakarite a Nīwhai, te poropiti whakataruna, e poropiti ana mō ngā kino nui e pā ana ki tēnei iwi, ki a koe, nā konei koe i kōhuru ai i a Hetorama, ko ia tō tuakana?

28 Ā nana, ka kī atu ia ki a koutou, Kāo.

29 Ā, ka kī atu koutou ki a ia: Nāu tō tuakana i kōhuru?

30 Ā, ka tū wehi ia, ā, kāore i te mōhio he aha e mea ai. Ā nana, ka whakakore atu ia ki a koutou; ā, ka tinihanga hoki ia me te mea nei kei te ohorere; hei aha koa, ka whakapuaki atu ia ki a koutou kāore ōna hē.

31 Engari nana, ka tirohia ia e koutou, ā, ka kite koutou i te toto i runga i ngā remu o tōna kahu.

32 Ā, i tā koutou kitenga atu i tēnei, ka kī ake koutou: Nō hea tēnei toto? E kore ianei mātou e mōhio ana koia te toto o tō tuakana?

33 Kātahi ia ka wiriwiri, ā, ka kiritea te āhua, anō nei kua tau te mate ki runga i a ia.

34 Kātahi ia ka kī ake: Nā tēnei wehi me tēnei kiriteatanga kua tau iho ki runga ki a koe, nana, e mōhio ana mātou e hē ana koe.

35 Kātahi ka nui ake te wehi e tau ai ki runga ki a ia; kātahi ia ka whāki atu ki a koutou, ā, kāore tonu ia e whakakore anō nāna nei tēnei kōhurutanga.

36 Kātahi ia ka kī atu ki a koutou, kāore au, a Nīwhai, e paku mōhio ana e pā ana ki tēnei mea hāunga kua homai ki ahau e te mana o te Atua. Kātahi ka mōhio koutou he tangata pono ahau, ā, kua tonoa au ki a koutou i te Atua.

37 Ā, i pahawa ake, nā, ka haere rātou, ā, ka pērā i tā Nīwhai i kōrero ai ki a rātou. Ā nana, he pono ngā kupu i kōrero ai ia; nā te mea e rite ana ki ngā kupu tāna i whakakorekore ai; waihoki e rite ana ki ngā kupu tāna i whāki ai.

38 Ā, ka mauria atu ia kia whakaatu atu ia, nā, ko ia pū anō te kaikōhuru, nā konā tukua noatia atu ai te tokorima, me Nīwhai anō hoki.

39 Ā, i reira ētahi o ngā Nīwhai i whakapono ai ki ngā kupu a Nīwhai; ā, i reira anō ētahi, e whakapono ai nā te whakaaturanga a te tokorima, nā te mea kua whakatahuritia mai rātou i a rātou i te whareherehere.

40 Ināianei ā i reira ētahi i waenganui i te iwi, i kī ake ai he poropiti a Nīwhai.

41 Ā, i reira anō ētahi atu i kī ake ai: Nana, he atua ia, nā te mea mēnā ehara ia i te atua kua kore ia e āhei ki te mōhio ki ngā mea katoa. Nana rā, kua kōrero mai ia i ngā whakaaro o ō tātou ngākau, ā, kua kōrero mai anō hoki ia i ngā mea ki a tātou; ā, kua whakakitea mai e ia te kaikōhuru tūturu o tō tātou kaiwhakawā matua.