1 Ināianei ā, e aku teina aroha, nana, kei te whakapuaki au ki a koutou ki te kore koutou e rīpenetā ka mahue atu ō koutou whare kia tū kau ana.

2 Āe rā, ki te kore koutou e rīpenetā, ka whaitake nui ā koutou wahine kia tangi i te rā e whāngai ū ana rātou; nā te mea ka ngana rātou ki te tahuti atu engari kāore he haumarutanga mō rātou; āe rā, auē te mate mō rātou e hapū ana, nā te mea ka taumaha rātou, ā, tē taea te tahuti atu; nō reira, ka takatakahia iho rātou, ā, ka mahue iho kia mate.

3 Āe rā, auē te mate mō tēnei iwi e karangatia ana ko te iwi o Nīwhai ki te kore rātou e rīpenetā, ina kite rātou i ēnei tohu me ēnei mea whakamīharo e whakakitea atu ki a rātou; nana rā, he iwi kōwhiria rātou e te Ariki; āe rā, kua arohaina e ia te iwi o Nīwhai, ā, kua kohetehia rātou e ia; āe rā, kua kohetehia rātou e ia i ngā rā o ō rātou kino nā te mea i arohaina rātou e ia.

4 Engari nana e aku teina, kua mauāhara ia ki ngā Rāmana nā te mea kua hono tonu ā rātou mahi kino, ā pēnei nā te kino o ngā whakarerenga iho a ō rātou tūpuna. Engari nana, kua puta mai te whakaoranga ki a rātou mā te kauhautanga a ngā Nīwhai; ā mō tēnei take i whakaroa ake te Ariki i ō rātou rā.

5 Ā, e hiahia ana au kia kite atu i te wāhi nui o rātou kei te ara o tō rātou haepapa, ā, kei te hīkoi tōtika i te aroaro o te Atua, ā, kei te ū rātou ki te pupuri i āna whakahaunga me āna ture me āna whakawākanga e ai ki te ture a Mohi.

6 Āe rā, ko taku kupu tēnei ki a koutou, kei te pēnei te wāhi nui o rātou, ā, kei te tākare rātou i runga i te ū ngenge kore kia kukume mai te toenga atu o ō rātou huānga ki te mātauranga o te pono; nō reira he tokomaha ngā mea e tāpiri atu ana ki ō rātou tokomahatanga ia te rā, ia te rā.

7 Ā nana, e mōhio ana koutou i a koutou anō, nā te mea kua kite koutou, ko te hunga katoa e kūmea mai ai ki te mātauranga o te pono, ā, kia mōhio ai ki ngā whakarerenga iho whakarihariha me ngā whakarerenga iho mōrikarika a ō rātou tūpuna, ā, ka ārahina ki te whakapono ki ngā karaipiture tapu, āe rā, ka ārahina rātou ki te whakapono ki te Ariki me te rīpenetātanga e ngā poropititanga a ngā poropiti tapu kua tuhia nei, ka puta mai tētahi panonitanga o te ngākau ki a rātou i taua whakapono me taua rīpenetātanga.

8 Nō reira, ko te hunga katoa i tae mai ai ki tēnei āhua, e mōhio nei koutou he kaha, ā, he ū i roto i te whakapono, ā, i roto i te mea nā konā whakawātea ai rātou.

9 Ā, e mōhio ana anō hoki koutou kua tanumia ake ā rātou rākau whawhai, ā, e wehi ana rātou kia hāpai ake anō i ērā mea kei hara rātou; āe rā, kei te kite koutou e wehi ana rātou kia hara—nana rā, ka tukua rātou e rātou anō kia takatakahia iho, ā, kia whakamatea e ō rātou hoariri, ā, kua kore rātou e hāpai ake i ā rātou hoari ki a rātou, ā, pēnei nā tō rātou whakapono i te Karaiti.

10 Ināianei ā, nā tō rātou ū, ina whakapono rātou ki taua mea e whakapono nei rātou, he mea nā tō rātou kaha, ina whakamāramatia ake rātou, nana, ka manaakitia rātou e te Atua, ā, ka whakaroahia atu ō rātou rā, ahakoa tō rātou hē—

11 Āe rā, ahakoa mēnā ka memeha atu i roto i te whakapono kore ka whakaroa te Ariki i ō rātou rā, tae noa atu ki te wā kua kōrerotia nei e ō tātou tūpuna, e te poropiti Hinohi anō hoki, ā, e ngā poropiti tokomaha anō, e pā ana ki te whakahokinga o ō tātou tuākana, ngā Rāmana, ki te mātauranga anō o te pono—

12 Āe rā, ko taku kupu tēnei ki a koutou, nā, hei ngā wā o muri atu nei kua tukuna atu ngā whakaari a te Ariki ki ō tātou tuākana, ngā Rāmana; ā, ahakoa ngā whakamamaetanga maha e pā ai ki a rātou, ā, ahakoa ka āia atu rātou ki wiwī, ki wawā i runga i te mata o te whenua, ā, ka arumia, ā, ka pākia, ā, ka whakamararatia ki tawhiti, kāore ō rātou haumarutanga, ka aroha te Ariki ki a rātou.

13 Ā tēnei kia rite ai ki te poropititanga, kia whakahokia mai anō rātou ki te mātauranga pono, koia te mātauranga o tō rātou Kaihoko, ā, ko tō rātou hepara pono nui, ā, kia tatauria i waenganui i āna hipi.

14 Nō reira ko taku kupu tēnei ki a koutou, ka pai ake tō rātou i tō koutou ki te kore koutou e rīpenetā.

15 Nana rā, me i whakaatu atu ngā mahi whakamīharo ki a rātou pērā i te whakaaturanga atu ki a koutou, āe rā, ki te hunga kua memeha atu i runga i te whakapono kore nā ngā whakarerenga iho a ō rātou tūpuna, kei te kite koutou mō koutou anō, nā, kua kore anō rātou i memeha atu i roto i te whakapono kore.

16 Nō reira, e ai tā te Ariki: Kāore rātou e whakangaromia rawatia e au, engari māku e mea hei te rā o taku mātauranga ka hoki mai rātou ki ahau, e ai tā te Ariki.

17 Ināianei ā nana, e ai tā te Ariki, e pā ana ki te iwi o ngā Nīwhai: Ki te kore rātou e rīpenetā, me te ngohengohe ki te mahi i tāku e pai ai, ka whakangaro rawa au i a rātou, e ai tā te Ariki, nā tō rātou whakapono kore ahakoa ngā mahinga maha kua mahi nei i waenganui i a rātou; āe pono ana kei te ora te Ariki ka ai ēnei mea, e ai tā te Ariki.