1 Ināianei ā i pahawa ake i te tau whā ngahuru mā toru o te whakahaeretanga a ngā kaiwhakawā, kāore tētahi tautohetohenga i waenganui i te iwi o Nīwhai hāunga te whakapehapeha iti i roto i te hāhi, nā konā puta ai ētahi tītorehanga iti i waenganui i te iwi, i houhia te rongo o ērā āhuatanga i te mutunga o te tau whā ngahuru mā toru.

2 Ā, kāore he tautohetohenga i waenganui i te iwi i te tau whā ngahuru mā whā; kāore rānei he tautohetohenga nui i te tau whā ngahuru mā rima.

3 Ā, i pahawa ake i te tau whā ngahuru mā ono, āe rā, he nui ngā tautohetohenga me ngā tītorehanga maha; nā tēnei ka hira noa ake ngā tāngata i puta atu i roto i te whenua o Harahemara, ā, ka haere atu ki te whenua whakateraki kia nōhia ai te whenua.

4 Ā, he tawhiti rawa tā rātou haere, nā konei ka tae atu rātou ki ngā wai nunui me ngā awa maha.

5 Āe rā, i marara haere rātou ki ngā wāhi katoa o te whenua, ki roto i ngā wāhi katoa kīhai nei i whakamōwaitia, ā, kāore he rākau, nā te nui o ngā tāngata i nōhia ai te whenua i mua.

6 Ināianei ā, kāore i tītōhea tētahi wāhi o te whenua, engari kāore he rākau; heoi, nā te nui o te whakangaromanga o te iwi i nōhia ai te whenua i mua kua karangatia he whenua tītōhea.

7 Ā, i te mea he iti noa ngā rākau i runga i te whenua, hei aha koa ka tino mātanga haere te iwi i haere atu ai ki reira ki te mahi raima; nō reira rātou hanga ai i ngā whare raima, i reira noho ai rātou.

8 Ā, i pahawa ake, nā, ka tokomaha haere rātou, ā, ka marara haere rātou, ā, ka haere atu i te whenua whakatetonga ki te whenua whakateraki, ā, ka whakawhānui haere, nā konei tīmata ai tā rātou kapi haere i te mata o te whenua katoa, mai i te moana ki te tonga ki te moana ki te raki, mai i te moana ki te uru ki te moana ki te rāwhiti.

9 Ā, i noho te iwi i te whenua whakateraki i roto i ngā tēneti, me ngā whare raima, ā, i tukua e rātou ngā rākau katoa e pihi ake ai i runga i te mata o te whenua kia tupu ake ai, kia whairākau ai rātou a tōna wā hei waihanga ai i ō rātou whare, āe rā, ō rātou pā, me ō rātou temepara, me ō rātou wharekarakia, me ō rātou wāhi haumaru, me ō rātou whare katoa o ia āhua, o ia āhua.

10 Ā, i pahawa ake i te mea he iti noa iho te rākau i te whenua whakateraki, he nui ngā mea i mauria mai ai mā runga kaipuke.

11 Ā pēnei, mā konei taea ai te iwi i te whenua whakateraki e rātou te hanga i ngā pā maha, ki te rākau, ki te raima hoki.

12 Ā, i pahawa ake, nā, he tokomaha nō te iwi o Amona, i whānau mai ai he Rāmana, i haere atu anō ki tēnei whenua.

13 Ināianei ā, he maha ngā tuhinga i puritia ai mō ngā whakahaeretanga o tēnei iwi, e ngā tāngata tokomaha o tēnei iwi, he mea āta whakataki, he mea tino nui, e pā ana ki a rātou.

14 Engari nana, ko te wāhi whakaterau o te whakahaeretanga o tēnei iwi, āe rā, ko te tuhinga mō ngā Rāmana, mō ngā Nīwhai, me ā rātou pakanga, me ngā tautohetohenga, me ngā tītorehanga, me ā rātou kauhautanga, me ā rātou poropititanga, me ā rātou utanga kaipuke me ā rātou waihanga kaipuke, me tā rātou waihanga temepara, me ngā whare karakia me ō rātou wāhi haumaru, me tō rātou tika, me tō rātou whakarihariha, me ā rātou kōhuru, me ā rātou tāhae, me ā rātou pāhuatanga, me ā rātou mōrikarika me ā rātou pūremutanga, e kore nei e whakapurua ki roto i tēnei mahinga.

15 Engari nana, he maha ngā pukapuka me ngā tuhinga maha o ia āhua i reira, ā, kua puritia te nuinga e ngā Nīwhai.

16 Ā, kua tukuna iho mai i tētahi whakatipuranga ki tētahi atu e ngā Nīwhai, tae noa atu ana ki tā rātou takanga iho ki roto i te hē, ā, kua kōhurutia, pāhuatia, kua arumia anōtia, kua āia anōtia atu, kua patua anōtia, kua whakamararatia anōtia atu i runga i te mata o te whenua, ā, kua hanumi atu ki ngā Rāmana tae atu ana ki te wā kāore rātou e kīa ana he Nīwhai rātou, riro ana hei mea kino, hei mea mohoao, hei mea horetītī, āe rā, riro ana hei Rāmana.

17 Ināianei ā, ka hoki anō au ki taku tuhinga; nō reira, kua pahemo atu ngā mea kua kōrerotia ake nei e au whai muri iho i ngā tautohetohenga nui, me ngā raruraru, me ngā pakanga, me ngā tītorehanga, i waenganui i te iwi o Nīwhai.

18 Ka mutu te tau whā ngahuru mā ono o te whakahaeretanga a ngā kaiwhakawā;

19 Ā, i pahawa ake, nā, he nui tonu te tautohetohenga i roto i te whenua, āe rā, i te tau whā ngahuru mā whitu pū anō, i te whā ngahuru mā waru anō hoki.

20 Hei aha koa ka whakakī a Heramana i te nohoanga-whakawā i runga i te tika me te pono; āe rā, ka tākare ia ki te pupuri i ngā ture, me ngā whakawā, me ngā whakahaunga a te Atua; ā, i mahi tonu ia i ērā mea e tika ana i te tirohanga a te Atua; ā, i hīkoi ia i runga i ngā ara o tōna matua, nā konā kake ai ia i te whenua.

21 Ā, i pahawa ake, nā, tokorua āna tama. Ka hoatu e ia te ingoa Nīwhai ki te mātāmua, ā, ka hoatu ki te pōtiki, te ingoa Rīhai. Ā, ka tīmata tā rāua tupuranga ake i roto i te Ariki.

22 Ā, i pahawa ake, nā, ka mutu haere ngā pakanga me ngā tautohetohenga, paku noa iho, i waenganui i te iwi o Nīwhai, i te pito whakamutunga o te tau whā ngahuru mā waru o te whakahaeretanga a ngā kaiwhakawā i runga i te iwi o Nīwhai.

23 Ā, i pahawa ake i te tau whā ngahuru mā iwa o te whakahaeretanga a ngā kaiwhakawā, ka whakapūmauhia te rangimārie mau roa i te whenua, ko ngā mea katoa hāunga ko ngā whakakotahitanga huna kua whakapūmauhia nei e te kaitāhae a Kariatono i roto i te wāhi o te whenua e nōhia rawatia ana, koirā mea i taua wā kīhai i mōhiotia e te hunga i te upoko o te kāwanatanga; nō reira kāore rātou i whakangaromia atu i te whenua.

24 Ā, i pahawa ake, nā, he tino nui rawa atu te oranga i te hāhi i taua tau anō, nā konā he mano tini te hunga i hono mai ai i a rātou anō ki te hāhi, ā, kua rumakina ki te rīpenetātanga.

25 Ā, anō te nui o te oranga o te hāhi, he maha anō ngā manaakitanga i maringi iho ki runga i te iwi, nā tēnei kua tino mīharo rawa ake anō ngā pirihi teitei me ngā kaiako tē taea te mehua.

26 Ā, i pahawa ake, nā, ka kaha te mahi a te Ariki i runga i te rūmakitanga me te hono i te tini o ngā wairua ki te hāhi a te Atua, āe rā, i ngā mano tini pū anō.

27 Pēnei kite ai tātou e aroha ana te Ariki ki te hunga katoa e karanga ake ai ki tōna ingoa tapu, i runga i te tapatahitanga o ō rātou ngākau.

28 Āe rā, pēnei kite ai tātou kua tūwhera te tatau o te rangi ki te katoa, arā, ki te hunga katoa e whakapono ai ki runga i te ingoa o Ihu Karaiti, ko ia te Tama a te Atua.

29 Āe rā, ka kite tātou ko te tangata e hiahia ana ka mau ki te kupu a te Atua, e ora tonu nei, e mana tonu nei, māna tonu e whakawehe atu ngā tinihanga me ngā māhanga me ngā whakawainga a te rēwera, ā, ka ārahina tā te Karaiti tangata i runga i ngā huarahi kūiti, ā, i te huarahi whāiti e whakawhiti atu ana i taua tawhā mutunga kore o te pōuritanga kua whakaritea nei hei horomanga ake i te hunga kino—

30 Me te kawe i ō rātou wairua, āe rā, ō rātou wairua mate kore, ki te ringa matau o te Atua i te kīngitanga o te rangi, kia nohotahi ai me Aperahama, me Ihaka, me Hākopa, me ō tātou tūpuna tapu, ā, e kore nei e puta atu anō.

31 Ā, hono tonu nei te hari i tēnei tau i te whenua o Harahemara, ā, i roto i ngā rohe katoa huri noa, i roto pū anō i ngā whenua katoa kua nōhia nei e ngā Nīwhai.

32 Ā, i pahawa ake, nā, he rangimārie, he koa nui whakaharahara i te toenga atu o te tau whā ngahuru mā iwa; āe rā, hua tonu anō te rangimārie me te hari nui i te tau rima ngahuru o te whakahaeretanga a ngā kaiwhakawā.

33 Ā, i mau tonu anō te rangimārie i te tau rima ngahuru mā tahi o te whakaheretanga a ngā kaiwhakawā, hāunga te whakapehapeha i tīmata ai ki te uru ki roto i te hāhi—kāore i roto i te hāhi o te Atua, engari ki roto i ngā ngākau o te iwi nāna nei te kī nō te hāhi rātou o te Atua.

34 Ā, kua neke ake rātou i runga i te whakahīhī, tae atu ana ki te whakatoinga i ō rātou huānga tokomaha. Nā, he kino nui tēnei, nā tēnei ka meinga te wāhi ngākau iti o te iwi kia mamae ai i ngā whakatoinga nui, ā, kia kautū ai i roto i ngā whakamamaetanga maha.

35 Hei aha koa ka putuputu tā rātou nohopuka me ā rātou inoi, ā, ka pakari haere, ā, ka pakari haere i roto i tō rātou whakaitinga, ā, ka ū rawa i runga i te whakapono o te Karaiti, tae atu ana ki te whakakīnga i ō rātou ngākau ki te hari me te rangimārie, āe rā, ka whakamākia, ā, ka whakatapua ō rātou ngākau, ko taua whakatapunga e puta mai ana i te tukunga i ō rātou ngākau ki te Atua.

36 Ā, i pahawa ake, nā, ka mutu te tau rima ngahuru mā rua i runga i te rangimārie anō hoki, hāunga ko te whakapehapeha tino nui rawa kua uru atu ki roto i ngā ngākau o te iwi; ā, he mea nā ō rātou taonga tino nui me tō rātou kake i runga i te whenua; ā, i tupu anō ki runga i a rātou mai i tētahi rā ki tētahi rā.

37 Ā, i pahawa ake i te tau rima ngahuru mā toru o te whakaheretanga a ngā kaiwhakawā, ka mate a Heramana, ā, ka tīmata tana tama mātāmua a Nīwhai hei kaiwhakahaere i muri i a ia. Ā, i pahawa ake, nā, ka whakakī ia i te nohoanga-whakawā i runga i te tika me te pono; āe rā, i pupuri ia i ngā whakahaunga a te Atua, ā, ka hīkoi ia i ngā huarahi o tana matua.