1 Ināianei ā, i pahawa ake, nā, he tokomaha ngā mea i rongo ai i ngā kupu a Hamuera, te Rāmana, i kōrerotia ai e ia i runga i ngā taiapa o te pā. Ā, ka haere atu te hunga katoa i whakapono ai ki āna kupu, ā, ka whai atu i a Nīwhai; ā, i te wā i haere atu ai, ā, i kite atu rātou i a ia ka whākina atu ō rātou hara ki a ia, ā, kīhai i whakakorehia atu, e hiahia ana kia rumakina ki te Ariki.

2 Engari ka riri te hunga katoa kīhai i whakapono ki ngā kupu a Hamuera ki a ia; ā, ka maka kōhatu atu ki a ia i runga i te taiapa; ā, he tokomaha anō i whiu pere atu ki a ia i a ia e tū ana i runga i te taiapa, engari i a ia te Wairua o te Ariki, nā konā kāore i taea e rātou te whakapā atu ki a ia ki ā rātou kōhatu me ā rātou pere.

3 Nā, i te wā i kite ai rātou tē taea e rātou te whakapā atu ki a ia, ka nui ake te hunga i whakapono ai ki āna kupu, nā konā haere atu ai rātou ki a Nīwhai kia rumakina.

4 Nana rā, i te rumaki a Nīwhai, ā, i te poropiti, i te kauhau, i te karanga ake i te rīpenetātanga ki te iwi, e whakaatu atu ana i ngā tohu me ngā mea whakamīharo, e mahi merekara ana i waenganui i te iwi, me kore pea rātou e mōhio ai meake haere mai ai te Karaiti—

5 E kōrero atu ana ki a rātou i ngā mea meake puta mai ai, kia mōhio ai rātou, ā, kia mahara ai rātou hei te wā o tā rātou putanga mai, nā, kua whakamōhiotia ērā mea ki a rātou i mua, i runga i te take e whakapono ai rātou; nō reira ka haere atu te hunga katoa i whakapono ai ki ngā kupu a Hamuera ki a ia kia rumakina ai, nā te mea i haere rīpenetā mai rātou e whāki ana i ō rātou hara.

6 Engari kāore te wāhi nui o rātou i whakapono ki ngā kupu a Hamuera; nō reira i tā rātou kitenga ake tē taea e rātou te whakapā atu ki a ia ki ā rātou kōhatu me ā rātou pere, ka karanga ake rātou ki ō rātou kaiwhakahau, e mea ana: Whakamaua tēnei tangata, ā, herea ia, nana rā he rēwera hoki tōna; ā, nā te kaha o te rēwera kei roto nei i a ia tē taea e tātou te whakapā atu ki a ia ki ā tātou kōhatu me ā tātou pere; nō reira whakamaua ia, ā, herea ia, ā, kahakina atu ia.

7 Ā, i a rātou e haere atu ana ki te whakapā i ō rātou ringaringa ki runga ki a ia, nana, ka rere iho ia i te taiapa, ā, ka tahuti atu ia i ō rātou whenua, āe rā, tae atu ana ki tōna ake whenua, ā, ka tīmata tana kauhau me te poropiti ki waenganui i tōna ake iwi.

8 Ā nana, kāore i rangona anō mōna i muri iho i waenganui i ngā Nīwhai; ā pēnei ngā āhuatanga o te iwi.

9 Ā pēnei mutu ai te tau waru ngahuru mā ono o te whakaheretanga a ngā kaiwhakawā i runga i te iwi o Nīwhai.

10 Ā pēnei mutu ai anō hoki te tau waru ngahuru mā whitu o te whakahaeretanga a ngā kaiwhakawā, e noho tonu ana te wāhi nui o te iwi i roto i te whakapehapeha me te whakarihariha, ā, ko te wāhi iti o te iwi e nui ake ana tā rātou āta hīkoi i te aroaro o te Atua.

11 Ā, koinei ngā āhuatanga anō hoki, i te tau waru ngahuru mā waru o te whakahaeretanga a ngā kaiwhakawā.

12 Ā, he iti noa iho ngā rerekētanga i roto i ngā āhuatanga o te iwi, hāunga te tīmatanga a te iwi kia whakapakeke ake i roto i te hē, me te mahi anō i ērā mea e tauaro ana ki ngā whakahaunga a te Atua, i te tau waru ngahuru mā iwa o te whakahaeretanga a ngā kaiwhakawā.

13 Engari i pahawa ake i te tau iwa ngahuru o te whakahaeretanga a ngā kaiwhakawā, i reira ngā tohu nui i hoatu ai ki te iwi, me ngā mea whakamīharo; ā, ka tīmata te whakatutukitanga i ngā kupu a ngā poropiti.

14 Ā, ka puta mai ngā anahera ki te tangata, ngā tangata matatau, ā, ka whakapuaki atu ki a rātou i ngā rongo whakahari o te pai; pēnei tīmata ai te whakatutukitanga i ngā karaipiture i tēnei tau.

15 Hei aha koa, ka tīmata tā te iwi whakapakeke i ō rātou ngākau, ko ngā mea katoa hāunga ko te wāhi i tino whakapono ai, nō ngā Nīwhai me ngā Rāmana anō hoki, ā, ka tīmata tā rātou whakawhirinaki ki runga i tō rātou ake kaha me tō rātou ake mātauranga, e mea ana:

16 Ko ētahi mea pea kua tika tā rātou whakapae, i roto i ngā mea maha; engari nana, e mōhio ana tātou kāore e taea te pahawa ake ēnei mea nui whakamīharo, ēnei mea kua kōrerotia ake nei.

17 Ā, ka tīmata tā rātou kōrerorero, ā, tā rātou tautohetohe i waenganui i a rātou anō, e mea ana:

18 Kāore e tika ana kia puta mai ai tētahi mea pērā i te Karaiti; me i tika, me ko ia te Tama a te Atua, te Matua o te rangi me te whenua, pērā i ērā kua kōrerotia ake nei, he aha ia e kore ai e whakakite mai i a ia anō ki a tātou pērā me tāna whakakite atu ki te hunga e noho nei ki Hiruharama?

19 Āe rā, he aha ia e kore ai e whakakite atu i a ia anō i tēnei whenua me te whenua o Hiruharama hoki?

20 Engari nana, e mōhio ana tātou he whakarerenga iho kino tēnei, kua tukua iho ki a tātou e ō tātou tūpuna, kia mea ai i a tātou kia whakapono ai ki tētahi mea nui whakamīharo e kore rawa e pahawa ake, engari e kore i waenganui i a tātou, engari i tētahi whenua pāmamao, he whenua kāore nei tātou i te mōhio; nō reira ka taea tātou e rātou te whakakuare, nā te mea tē taea e tātou te kite atu ki ō tātou ake karu mēnā rānei he pono ērā mea.

21 Ā ka pērā rātou, mā ngā tikanga tinihanga ngaro a te mea kino, e mahi ai i tētahi mea ngaro nui e kore nei e taea e tātou te mārama, e whakapēhi tonu iho nei i a tātou hei pononga ki ā rātou kupu, ā, hei pononga anō hoki ki a rātou, nā te mea e whakawhirinaki ana mātou ki a rātou ki te whakaako i a tātou te kupu; ā pēnei tā rātou whakakuare tonu i a tātou ki te tukua atu i a tātou anō ki a rātou, i ngā rā katoa o ō tātou oranga.

22 Ā, he maha atu anō ngā mea i pohewa ai te iwi i roto i ō rātou ngākau, he mea kuare, ā, he mea teka; ā, i te raru nui rātou, nā te mea he rite tonu tā Hātana whakaoho i a rātou kia putuputu ai tā rātou mahi kino; āe rā, ka kōpikopiko haere ia ki te kawe kōrero me ngā tautohetohenga i runga i te mata katoa o te whenua, me kore pea ia e whakapakeke i ngā ngākau o te iwi ki ērā mea e pai ana, ā, ki ērā mea katoa e puta mai ai.

23 Ā, ahakoa ngā tohu me ngā mea whakamīharo i meatia ai ki waenganui i te iwi o te Ariki, me ngā merekara maha i mea ai rātou, ka kaha pupuri a Hātana i runga i ngā ngākau o te iwi i runga i te mata katoa o te whenua.

24 Ā pēnei mutu ai te tau iwa ngahuru o te whakahaeretanga a ngā kaiwhakawā i runga i te iwi o Nīwhai.

25 Ā pēnei mutu ai te pukapuka a Heramana, e ai ki te tuhinga a Heramana me āna tama.