1 Ā, i pahawa ake, nā, i taua tau rā anō, nana, ka tukuna atu e Nīwhai te nohoanga-whakawā ki tētahi tangata nōna nei te ingoa ko Hetorama.

2 Nā te mea kua whakapūmautia ō rātou ture me ō rātou tikanga e te reo o te iwi, ā, kua tokomaha ake te hunga i kōwhiri ai i te kino i te hunga i kōwhiri ai i te pai, nō reira i te pakari haere rātou mō te whakangaromanga, nā te mea kua pokea ngā ture.

3 Āe rā, ehara tēnei i te katoa; he iwi kakī mārō rātou, nā konā kāore i taea rātou te whakakāwanatia e te ture, e te tika rānei, ki te kore rātou e whakangaromia.

4 Ā, i pahawa ake, nā, kua taumaha haere a Nīwhai nā tō rātou hē; ā, ka tukuna atu e ia te nohoanga-whakawā, ā, ka mau ki runga ki a ia te tikanga ki te kauhau i te kupu a te Atua i te toenga atu o ōna rā katoa, me tōna teina anō a Rīhai, te toenga atu o ōna rā katoa;

5 Nā te mea i mahara rāua ki ngā kupu i kōrerotia ai e tō rāua matua a Heramana ki a rāua. Ā, koinei ngā kupu i kōrerotia ai e ia:

6 Nana, e aku tama, e hiahia ana au kia mahara kōrua ki te pupuri i ngā whakahaunga a te Atua; ā, e hiahia ana au kia whakapuaki atu ki te iwi i ēnei kupu. Nana, kua hoatu e au ki a kōrua ngā ingoa o ō tātou mātua tuatahi i puta mai ai i te whenua o Hiruharama; ā, kua pēnei tāku, nā, ina mahara kōrua ki ō kōrua ingoa ka mahara kōrua ki a rāua; ā, ina mahara kōrua ki a rāua ka mahara kōrua ki ā rāua mahinga; ā, ina mahara kōrua ki ā rāua mahinga ka mōhio kōrua ki te mea i kōrerotia ake ai, i tuhituhia ake ai anō hoki, he tangata pai rāua.

7 Nō reira, e aku tama, e hiahia ana au kia mahi kōrua i ērā e pai ana, kia taea ai te kōrero mō kōrua, te tuhituhi anō hoki mō kōrua, e rite ana ki ērā mea kua kōrerotia ake, kua tuhituhia ake mō rāua.

8 Ināianei ā e aku tama, nana, he mea anō āku e hiahia nei ahau mō kōrua, koia tēnei, kia kore kōrua e mahi i ēnei mea kia taea ai e kōrua te whakamanamana, engari kia mahi kōrua i ēnei mea hei whakatakoto ake mō kōrua ake anō he taonga i te rangi, āe rā, he mea mau tonu, ā, he mea e kore nei e memeha noa atu; āe rā, kia riro i a kōrua tērā koha utu nui o te oranga tonutanga, ko ngā mea e whakapae ana tātou kua hoatu nei ki ō tātou tūpuna.

9 Kia mahara, mahara, e aku tama, ki ngā kupu i kōrerotia ai e kīngi Peniamine ki tana iwi; āe rā, kia mahara kāore he huarahi kē atu, he mea kē atu rānei e whakaorangia ai te tangata, mā roto anake i te toto whakamārie o Ihu Karaiti, ko ia e haere mai ai; āe rā, kia mahara kei te haere mai ia ki te hoko i te ao.

10 Ā, kia mahara anō hoki ki ngā kupu i kōrerotia ai e Amureke ki a Tēroma, i te pā o Amonaihā; nā, i kī atu ia ki a ia, nā, kāore e kore ka haere mai te Ariki ki te hoko i tana iwi, engari kāore ia e haere mai ki te hoko i a rātou i roto i ō rātou hara, engari ki te hoko i a rātou mai i ō rātou hara.

11 Ā, he mana tōna kua hoatu ki a ia e tōna Matua ki te hoko i a rātou mai i ō rātou hara nā te rīpenetātanga; nō reira kua tono anahera mai ia ki te whakapuaki i ngā āhuatanga o ngā tikanga o te rīpenetātanga, e kūmea mai nei ki raro i te mana o te Kaihoko, ki te whakaoranga o ō rātou wairua.

12 Ināianei ā, e aku tama, kia mahara, kia mahara hei runga i te kāmaka o tō tātou Kaihoko, koia nei ko te Karaiti, te Tama a te Atua, e hanga ai kōrua i tō kōrua tūāpapa; ina tonoa mai nei e te rēwera āna hau kaha, āe rā, āna pere uira i roto i te āwhiowhio, āe rā, ina patua iho kōrua e āna whatu me āna marangai katoa, kāore ōna kaha ki runga i a kōrua ki te kukume iho i a kōrua ki te tawhā o te pōuri me te auē mutunga kore, nā te kāmaka kua hanga nei kōrua ki runga, koia tētahi tūāpapa tūturu, he tūāpapa tēnā mēnā ka hangaia e ngā tāngata ki runga e kore rātou e hinga.

13 Ā, i pahawa ake, nā, koinei ngā kupu i whakaakona ai e Heramana ki ana tama; āe rā, i whakaako ia i a rāua ki ngā mea maha tē taea te tuhituhi, me ngā mea maha kua tuhituhia.

14 Ā, i mahara rāua ki āna kupu; nō reira rāua haere atu ai, e pupuri ana i ngā whakahaunga a te Atua, ki te whakaako i te kupu a te Atua ki waenganui i te iwi katoa o Nīwhai, e tīmata ana ki te pā o Mōmona;

15 Ā, atu i reira ki te pā o Kire; ā, mai i te pā o Kire ki te pā o Mureke;

16 Ā, mai i tētahi pā ki tētahi atu, tae atu ki te wā kua haere atu rāua ki waenganui i te iwi katoa o Nīwhai e noho ana i te whenua whakatetonga; ā, mai i reira ki roto i te whenua o Harahemara, ki waenganui i ngā Rāmana.

17 Ā, i pahawa ake, nā, i kauhau rāua i runga i te kaha nui, nā konā whakapōrarurarutia aua kaitītore tokomaha kua whakawhiti atu i ngā Nīwhai, nā konā ka haere mai rātou ki te whāki i ō rātou hara, ā, ka rumakina ki te rīpenetātanga, ā, ka hoki wawe atu ki ngā Nīwhai kia ngana ai ki te whakatikatika i ā rātou mahi hē i mahia ai e rātou.

18 Ā, i pahawa ake, nā, ka kauhau a Nīwhai rāua ko Rīhai ki ngā Rāmana i runga i te kaha me te mana nui, nā te mea i a rāua te kaha me te mana kua hoatu ki a rāua kia taea ai e rāua te kōrero, ā, kua hoatu ki a rāua anō ērā mea hei kōrerotanga mā rāua—

19 Nō reira i mīharo rawa atu ngā Rāmana i ā rāua kōrero, ki te whakapakepake i a rātou, nā konā kua neke atu i te waru mano o ngā Rāmana kei te whenua o Harahemara me ngā wāhi huri noa i rumakina ai ki te rīpenetātanga, ā, i whakapakepakehia mō te whakarihariha o ngā whakarerenga iho a ō rātou tūpuna.

20 Ā, i pahawa ake, nā, ka haere atu a Nīwhai rāua ko Rīhai i reira ki te whenua o Nīwhai.

21 Ā, i pahawa ake, nā, ka kahakina rāua e te tauā o ngā Rāmana, ā, ka makaia ki roto i te whareherehere; āe rā, ki roto pū anō i taua whareherehere i makaia ai a Amona rātou ko ana teina e ngā pononga a Rimihi.

22 Ā, whai muri iho i tā rāua makanga ki roto i te whareherehere mō ngā rā maha kāore hoki he kai, nana, ka kuhu atu rātou ki roto i te whareherehere kia whakamatea ai rāua.

23 Ā, i pahawa ake, nā, ka karapotia a Nīwhai rāua ko Rīhai me te mea nei he ahi, nā konā rā anō kīhai rātou i māia kia whakapā atu ō rātou ringaringa ki runga i a rāua kei pāhunu rātou. Hei aha koa, kīhai i pāhunu a Nīwhai rāua ko Rīhai; ā, i te tū rāua me te mea nei kei roto i te ahi, ā, kīhai rāua i pāhunu.

24 Ā, i tā rāua kitenga atu i a rāua e karapotia ana ki tētahi pou ahi, ā, kāore rāua e pāhunutia ana, ka māia ō rāua ngākau.

25 Nā te mea i kite rāua kāore ngā Rāmana i māia kia whakapā ai i ō rātou ringaringa ki runga i a rāua; kāore rānei rātou i māia ki te whakatata atu ki a rāua, engari ka tū me te mea nei kua reokore i te māharo nui.

26 Ā, i pahawa ake, nā, ka tū atu a Nīwhai rāua ko Rīhai, ā, ka tīmata ki te kōrero atu ki a rātou, e mea ana: Kaua e wehi, nana rā, nā te Atua tēnei mea mīharo i whakaatu atu nei ki a koutou, mā konei kite ai koutou tē taea e koutou te whakapā i ō koutou ringaringa ki runga i a māua ki te whakamate i a māua.

27 Ā nana, i tā rāua kōrerotanga i ēnei kupu, ka ngāueue rawa te whenua, ā, ka ngāueue anō ngā pakitara o te whareherehere me te mea nei whano ka hinga iho ki te whenua; engari nana, kāore ērā i hinga. Ā nana, he Rāmana, he kaitītore Nīwhai te hunga i roto i te whareherehere.

28 Ā, i pahawa ake, nā, ka taumarumarutia rātou e tētahi kapua pōuriuri, ā, ka tau iho tētahi wehi nui whakapāwera ki runga i a rātou.

29 Ā, i pahawa ake, nā, ka tau mai tētahi reo me te mea nei kei runga i te kapua pōuriuri, e mea ana: Kia rīpenetā koutou, kia rīpenetā koutou, ā, kaua e whai tonu atu ki te whakangaro i aku pononga kua tonoa atu nei e au ki te whakapuaki i ngā rongo whakahari.

30 Ā, i pahawa ake i te wā i rongo ai rātou i tana reo, ā, ka kite rātou ehara ia i te reo whatitiri, ehara rānei i te reo ngangau nui, engari nana, he reo iti, he mea tino rangimārie me te mea nei he kōhimuhimu, ā, ka ngoto rawa ki te tino wairua—

31 Ā, ahakoa te rangimārie o te reo, nana ka ngāueue rawa te whenua, ā, ka ngāueue anō ngā pakitara o te whareherehere, me te mea nei whano ka hinga iho ki te whenua; ā nana kīhai te kapua pōuriuri, kua taumarumarutia rātou, i korara atu—

32 Ā nana ka tau mai anō te reo, e mea ana: Kia rīpenetā koutou, kia rīpenetā koutou, nā te mea kua tata mai te kīngitanga o te rangi; ā, kaua e whai tonu ki te whakangaro i aku pononga. Ā, i pahawa ake, nā, ka ngāueue anō te whenua, ā, ka ngāueue ngā pakitara.

33 Hei āpiti atu anō ka puta tuatoru mai te reo, ā, ka kōrero atu ki a rātou i ngā kupu whakamīharo tē taea te kōrero e te tangata; ā, ka ngāueue anō ngā pakitara, ā, ka ngāueue te whenua me te mea nei ka weheruatia.

34 Ā, i pahawa ake, nā, kāore i taea e ngā Rāmana te tahuti atu nā te kapua pōuriuri i taumarumarutia nei rātou; āe rā, tē taea te korikori nā te wehi i tau ai ki runga i a rātou.

35 Nā, i reira tētahi i waenganui i a rātou i whānau mai ai i ngā Nīwhai, nō roto mai anō i te hāhi o te Atua i tōna wā engari kua tītore atu i reira.

36 Ā, i pahawa ake, nā, ka tahuri ia i a ia anō, ā nana, ka kite atu ia mā roto i te kapua pōuriuri i ngā mata o Nīwhai rāua ko Rīhai; ā nana, i tino kānapanapa rawa, me te mea nei ko ngā mata anahera. Ā, ka kite ia i tā rāua hiki ake i ō rāua karu ki te rangi; ā, i te āhua rāua me te mea nei i te kōrero, i te hāpai ake i ō rāua reo ki tētahi mea i kite ai rāua.

37 Ā, i pahawa ake, nā, ka karanga atu tēnei tangata ki te whakaminenga, kia tahuri mai rātou kia kite. Ā nana, kua hoatu he kaha ki a rātou kia tahuri ai kia kite; ā, ka kite rātou i ngā mata o Nīwhai rāua ko Rīhai.

38 Ā, ka kī atu rātou ki te tangata: Nana, he aha te tikanga o ēnei mea katoa, ā, kei te kōrero tahi ēnei tāngata ki a wai?

39 Nā, ko Aminatapa te ingoa o tēnei tangata. Ā, ka kī atu a Aminatapa ki a rātou: Kei te kōrero tahi rāua ki ngā anahera a te Atua.

40 Ā, i pahawa ake, nā, ka kī atu ngā Rāmana ki a ia: Me aha mātou, kia tangohia atu ai tēnei kapua pōuriuri e taumarumaruhia nei tātou?

41 Ā, ka kī atu a Aminatapa ki a rātou: Me rīpenetā koutou, me te karanga ake ki te reo, tae atu ana ki te wā ka whai whakapono koutou i te Karaiti, kua whakaakona ki a koutou e Arami, me Amureke, me Tēroma; ā, ina pēnei koutou, ka tangohia atu te kapua pōuriuri e taumarumarutia ana koutou.

42 Ā, i pahawa ake, nā, ka tīmata katoa tā rātou karanga ake ki te reo o te mea nāna nei te whenua i ngāueue; āe rā, ka karanga ake rātou tae noa atu ki te wā i korara atu te kapua pōuriuri.

43 Ā, i pahawa ake, nā, i te wā i whiua atu ō rātou karu huri noa, ā, ka kite atu kua korara atu te kapua pōuriuri e taumarumarutia nei rātou, nana, ka kite rātou kua karapotia nei rātou, āe rā ia wairua, e tētahi pou ahi.

44 Ā, kei waenganui a Nīwhai rāua ko Rīhai i a rātou; āe rā, kua karapotia rātou; āe rā, kei roto rātou me te mea nei i te kāpura muramura, heoi kāore i pāmamae i a rātou, kīhai rānei i pā atu ki ngā pakitara o te whareherehere; ā, ka kī rātou i te hari tē taea te kōrero, ā, e kī ana i te korōria.

45 Ā nana, ka heke iho te Wairua Tapu o te Atua i te rangi, ā, ka uru atu ki roto i ō rātou ngākau, ā, kua kī rātou me te mea nei i te ahi, ā, kua taea e rātou te kōrero i ngā kupu whakamīharo.

46 Ā, i pahawa ake, nā, ka tau mai tētahi reo ki a rātou, āe rā, he reo āhuareka, me te mea nei he kōhimuhimu, e mea ana:

47 Kia tau te rangimārie, kia tau te rangimārie ki runga i a koutou, nā tō koutou whakapono i taku Mea Arohaina, nō te tūāpapa ia o te ao.

48 Ināianei ā, i tā rātou rongonga i tēnei ka whiu ake rātou i ō rātou karu ki runga me te mea nei ki te titiro ki te wāhi i ahu mai ai te reo; ā nana, ka kite rātou i te tūwheratanga ake o ngā rangi; ā, ka heke iho ngā anahera i te rangi, ā, ka minita atu ki a rātou.

49 Ā, neke atu i te toru rau ngā wairua i kite ai, ā, i rongo ai i ēnei mea; ā, kua whakahaua rātou kia haere atu, ā, kia kaua e mīharo, kia kaua rānei e rangirua.

50 Ā, ka pahawa ake, nā, ka haere atu rātou, ā, ka minita atu ki te iwi, e whakapuaki ana puta noa i ngā rohe katoa huri noa i ngā mea i kite ai, ā, i rongo ai, nā konā whakapakepake ai te wāhi nui o ngā Rāmana ki tā rātou, nā te nui o ngā whakaatu i whiwhi ai rātou.

51 Ā, ko ngā mea i whakapakepakehia nei ka papare ake i a rātou rākau whawhai, me tō rātou mauāhara anō hoki me ngā whakarerenga iho a ō rātou tūpuna.

52 Ā, i pahawa ake, nā, ka tukuna atu e rātou ki ngā Nīwhai ngā whenua i nohoia ai e rātou.