1 Ināianei ā i pahawa ake i a Hamuera, te Rāmana, i poropiti i ngā mea maha rawa atu tē taea te tuhituhi.

2 Ā nana, ka kī atu ia ki a rātou: Nana, kei te hoatu e au tētahi tohu ki a koutou; nā te mea e rima tau anō e haere mai ana, ā nana, kātahi ka haere mai te Tama a te Atua ki te hoko i te hunga katoa e whakapono ai ki tōna ingoa.

3 Ā nana, ka hoatu e au tēnei ki a koutou hei tohu hei te rā o tana haerenga mai; nana rā, ka nui ngā māramatanga i te rangi, nā konā hei te pō i mua i tana haerenga mai kāore he pōuritanga, nā konā ki tā te tangata titiro atu, anō nei he awatea.

4 Nō reira, kotahi te rā, kotahi te pō, kotahi anō te rā, anō nei kotahi noa iho te rā, ā, kāore i tau iho te pō; ā, ka pēnei ki a koutou hei tohu; nā te mea ka mōhio koutou e pā ana ki te tākiritanga o te rā me tōna tōnga; nō reira ka tino mōhio rātou, nā, e rua ngā rā, ā, kotahi te pō; hei aha koa kāore e pōuri te pō; ā, koia te pō i mua i tana whānautanga mai.

5 Ā nana, ka rewa ake anō he whetū hou, he mea kāore anō kia kitea noatia e koutou; ā, ko tēnei anō hoki hei tohu ki a koutou.

6 Ā nana ehara tēnei i te katoa, ka nui ngā tohu me ngā mea mīharo i te rangi.

7 Ā, ka pahawa ake, nā, ka mīharo koutou, ā, ka māharo, nā konā ka hinga iho koutou ki te whenua.

8 Ā, ka pahawa ake, nā, ko te tangata e whakapono ai ki te Tama a te Atua, koia ake anō te mea e whiwhi i te oranga tonutanga.

9 Ā nana, pēnei tā te whakahau a te Ariki ki ahau, nā tana anahera, kia haere mai au me te kōrero atu i tēnei mea ki a koutou; āe rā, kua whakahau mai ia kia poropiti atu au i ēnei mea ki a koutou; āe rā, kua kōrero mai ia ki ahau: Karanga atu ki tēnei iwi, e rīpenetā me te whakarite i te huarahi a te Ariki.

10 Ināianei ā, nā te mea he Rāmana ahau, ā, kua kōrero atu au ki a koutou i ngā kupu kua whakahaua au e te Ariki, ā, nā te mea he pakeke ērā ki a koutou, kei te riri mai koutou ki ahau, ā, kei te whai koutou ki te whakangaro i ahau, ā, kua makaia atu au i waenganui i a koutou.

11 Ā, ka rongo koutou i aku kupu, nā tēnei take i piki ake ai au ki runga i ngā taiapa o tēnei pā, kia rongo ai koutou, ā, kia mōhio ai koutou i ngā whakawākanga a te Atua e tāria nei koutou nā ō koutou hē, ā, kia mōhio anō hoki koutou ki ngā tikanga o te rīpenetātanga;

12 Hei āpiti anō kia mōhio koutou ki te haerenga mai a Ihu Karaiti, te Tama a te Atua, te Matua o te rangi me te whenua, te Kaihanga o ngā mea katoa mai i te tīmatanga; ā, kia mōhio koutou ki ngā tohu o tana haerenga mai, i runga i te whakaaro ka whakapono koutou i runga i tōna ingoa.

13 Ā, mēnā ka whakapono koutou i runga i tōna ingoa ka rīpenetā koutou i ō koutou hara, mā konā riro i a koutou tētahi murunga hara mā roto i āna mahi pai.

14 Ā nana, anō, ka hoatu nei e au tētahi atu tohu ki a koutou, āe rā, he tohu mō tōna matenga.

15 Nana rā, me mate rawa ia e puta mai ai te whakaoranga; āe rā, e tika ana anō kia mate ia, kia puta mai ai te aranga o te hunga mate, kia kūmea mai te tangata i reira ki roto i te aroaro o te Ariki.

16 Āe rā, nana, ka pahawa ake te aranga i tēnei matenga, ā, ka hokona ngā tāngata katoa i te matenga tuatahi—ko taua matenga o te wairua; mō ngā tāngata katoa, nā te takanga o Arama kua hātepea atu i te aroaro o te Ariki, kua whakaarohia he mea mate, ki ngā mea o te tīnana me ngā mea anō hoki o te wairua.

17 Engari nana, ka hokona te tangata e te aranga ake o te Karaiti, āe rā, ko ngā tāngata katoa pū anō, ā, ka whakahokia mai rātou ki roto i te aroaro o te Ariki.

18 Āe rā, ka pahawa ake i konā te tikanga o te rīpenetātanga, nā, e kore nei e tuakina iho te tangata e rīpenetā ai, ā, e makaia atu ki roto i te ahi; engari ka tuakina iho te tangata e kore nei e rīpenetā, ā, ka makaia atu ki roto i te ahi; ā, ka tau iho anō ki runga i a rātou tētahi matenga o te wairua, āe rā, he matenga tuarua, nā te mea kua hātepea atu rātou e rite ana ki te taha o ngā mea e pā ana ki te tika.

19 Nō reira kia rīpenetā koutou, kia rīpenetā koutou, kei tuku koutou i a koutou anō kia riro i te whakahēnga i runga i tā koutou mātau ki ēnei mea me tā koutou kore nei i mahi, ā, ka kūmea iho koutou ki tēnei matenga tuarua.

20 Engari nana, he rite anō ki tāku i kī atu ai ki a koutou e pā ana ki tētahi atu tohu, he tohu mō tōna matenga, nana, hei taua rā e pā ai te matenga ki a ia ka whakapōuritia te rā, ā, kāore ia e tuku mai i tōna māramatanga ki a koutou; ā, me te marama me ngā whetū anō hoki; ā, kāore rawa he māramatanga i runga i te mata o te whenua, mai i te wā e pā ai te matenga ki a ia, mō te takiwā o ngā rā e toru, ki te wā e ara ake anō ia i te mate.

21 Āe rā, hei taua wā e riro ake ai i a ia te kēhua ka ai he whatitiri me ngā hikonga uira mō te takiwā o ngā hāora maha, ā, ka tūoioi, ā, ka ngāueue te whenua; ko ngā toka kei runga nei i te mata o te whenua, ngā mea kei runga i te whenua me ngā mea kei raro, e mōhio nei koutou he mārō i tēnei wā, ko te wāhi nui o reira he mea kotahi e mārō ana, ka pākarukaru ake;

22 Āe rā, ka pakaru ēnei ki waenganui, ā, ka kitea nō muri iho i roto i ngā karapiti me ngā tawhā, ā, i ngā kongakonga i runga i te mata o te whenua katoa, āe rā, i runga i te whenua, ā, i raro anō hoki.

23 Ā nana, ka puta mai ngā tūpuhi nunui, ā, ka whakapapatairite iho ngā maunga maha, kia rite ki te raorao, ā, ka maha ngā wāhi e kīa nei ināianei he raorao e meinga ai hei maunga, he nui tōna tiketike.

24 Ā, ka wāwāhi ake ngā huarahi maha, ā, ka whakaururuatia ngā pā maha.

25 Ā, ka tūwhera ake ngā rua tūpāpaku maha, ā, ka tukuna ake ōna mate tokomaha; ā, ka puta mai te hunga tapu ki ngā mea tokomaha.

26 Ā nana, pēnei kua kōrero mai te anahera ki ahau; nā te mea i kī mai ia ki ahau ka puta mai ngā whaititiri me ngā hikonga uira mō te takiwā o ngā haora maha.

27 Ā, i kī mai ia ki ahau, i ngā whatitiri me ngā hikonga uira e ai ana, me te tūpuhi, ka ai ēnei mea, ā, ka kapi te mata o te whenua katoa i te pōuritanga mō te takiwā o ngā rā e toru.

28 Ā, ka kī mai te anahera ki ahau, nā, ka kite ngā mea tokomaha i ngā mea nui ake i ēnei, i runga i te take kia whakapono rātou ka pahawa ake ēnei tohu me ēnei mea whakamīharo i runga i te mata katoa o tēnei whenua, kia kore ai he take mō te whakapono kore i roto i ngā tamariki a te tangata—

29 Ā tēnei i runga i te take kia whakaorangia ngā tāngata katoa e whakapono ai, ā, ko ngā tāngata e kore nei e whakapono, ka tau iho tētahi whakawākanga tika ki runga i a rātou; hei āpiti anō mēnā ka whakahēngia rātou nā rātou anō taua whakahēnga i kukume ai ki runga i a rātou.

30 Ināianei ā kia mahara, kia mahara, e aku teina, ko ngā tāngata e mate ana, ka mate ko ia anake; ā, ko te tangata e mahi hē ana, ka mahia ki a ia anō; nana rā, kua wātea koutou; kua tukuna koutou kia mahi mō koutou ake anō; nana rā, kua hoatu e te Atua he mātauranga ki a koutou, ā, nāna koutou i whakawātea.

31 Kua hoatu e ia ki a koutou kia mōhio ai koutou ki te pai i te kino, ā, kua hoatu e ia ki a koutou kia whiriwhiri ai koutou i te oranga, i te matenga rānei; ā, ka taea e koutou te mahi pai, ā, kia whakahokia koutou ki tērā e pai ana, kia whakahokia tērā rānei e pai ana ki a koutou; ka taea rānei e koutou te mahi kino, ā, kia whakahokia atu tērā e kino ana ki a koutou.