မော်မုန် ၃

အခန်းကြီး ၃

မော်မုန်သည် နီဖိုင်းအမျိုးသားတို့အား နောင်တရခြင်းကို ဟစ်ကြော်၏—သူတို့သည် ကြီးစွာသော အောင်နိုင်ခြင်းကို ရရှိ၍၊ ကိုယ့်ခွန်အားကို ချီးမွမ်းကြ၏—မော်မုန်သည် သူတို့ကို ဦးဆောင်ရန် ငြင်းပယ်၏၊ သူတို့အတွက် သူ၏ဆုတောင်းခြင်းများမှာ ယုံကြည်ခြင်းမပါဘဲရှိ၏—မော်မုန်ကျမ်းသည် ဣသရေလမျိုးနွယ်စု တစ်ဆယ်နှစ်စုတို့အား ဧဝံဂေလိတရားတော်ကို ယုံကြည်ရန် ဖိတ်ခေါ်၏။ အေဒီ ၃၆၀–၃၆၂ ခန့်။

၁ ဤသို့အားဖြင့်အချိန်တန်လာသောအခါ၊ လာမန်အမျိုးသားတို့သည် နောက်ထပ် ဆယ်နှစ်ကုန်လွန်သွားသည့်တိုင်အောင် တစ်ဖန်စစ်မတိုက်ကြ။ ရှုဦးလော့၊ ငါသည် ငါ၏လူမျိုး နီဖိုင်းအမျိုးသားတို့ကို တိုက်ပွဲဖြစ်ရာအချိန်အတွက် မိမိတို့၏ပြည်နှင့် မိမိတို့၏လက်နက်များကို ပြင်ဆင်ရာ၌ လုပ်ကိုင်စေ၏။

၂ ဤသို့အားဖြင့်အချိန်တန်လာသောအခါ၊ ငါ့ကို ကိုယ်တော်ရှင်မိန့်တော်မူသည်ကား၊ ဤလူမျိုးတို့ကို ဟစ်ကြော်ရမည်မှာ—သင်တို့နောင်တရကြလော့၊ ငါ့ထံသို့လာကြလော့၊ သင်တို့ဗတ္တိဇံခံကြလော့၊ ငါ၏အသင်းတော်ကို တစ်ဖန်တည်ထောင်ကြလော့၊ သင်တို့သည် ချမ်းသာရကြလိမ့်မည်။

၃ ငါသည်လည်း ဤလူမျိုးတို့ကို ဟစ်ကြော်၏။ သို့ရာတွင်၊ ထိုအမှုမှာ အချည်းနှီးဖြစ်၏။ သူတို့သည် မိမိတို့ကို ချမ်းသာပေးတော်မူ၍၊ နောင်တရခြင်းအတွက် အခွင့်ကို ပေးသူမှာ ကိုယ်တော်ရှင်ဖြစ်တော်မူကြောင်းကို နားမလည်ကြ။ ရှုဦးလော့၊ သူတို့၏ ဘုရားသခင်ကိုယ်တော်ရှင်ကို ဆန့်ကျင်၍ သူတို့စိတ်နှလုံးကို မာကျောစေကြ၏။

၄ ဤသို့အားဖြင့်အချိန်တန်လာသောအခါ၊ ဤဆယ်နှစ်ကုန်လွန်သွားပြီးနောက်၊ ခရစ်တော်ကြွလာတော်မူခြင်းမှ စုစုပေါင်းသုံးရာခြောက်ဆယ်နှစ်ကြာသောအချိန်၌ လာမန်အမျိုးသားတို့၏မင်းကြီးသည်၊ ငါတို့ကို စစ်တိုက်ရန် တစ်ဖန်လာခြင်းငှာ၊ သူတို့ပြင်ဆင်လျက်ရှိကြောင်း အသိပေးသည့် အမှာစာတစ်စောင်ကို ငါ့ထံပို့၏။

၅ ဤသို့အားဖြင့်အချိန်တန်လာသောအခါ၊ ငါသည် ငါ၏လူမျိုးတို့ကို တောင်ဘက်လားရာပြည်သို့ သွားသည့် ကျဉ်းမြောင်းသောလမ်းအနီး၊ နယ်နိမိတ်အရပ်ရှိ မြို့တစ်မြို့ဖြစ်သည့် လူဆိတ်ညံရာအရပ်သို့ သူတို့ကိုယ်သူတို့ အတူတကွ စုဝေးစေ၏။

၆ ထိုအရပ်၌၊ ငါတို့သည် ငါတို့၏တပ်များကို နေရာချကြ၏၊ လာမန်အမျိုးသားတို့၏တပ်များကို ဆီးတားနိုင်ခြင်းငှာ၊ ငါတို့၏ပြည်တစ်စုံတစ်ခုကိုမျှ သူတို့ မရယူနိုင်ကြစေခြင်းပေတည်း။ ထို့ကြောင့်၊ ငါတို့သည် ငါတို့၏တပ်ဖွဲ့ခပ်သိမ်းတို့ဖြင့် သူတို့တစ်ဖက်၌ အင်အားခိုင်မာစေကြ၏။

၇ ဤသို့အားဖြင့်အချိန်တန်လာသောအခါ၊ သုံးရာခြောက်ဆယ်တစ်နှစ်မြောက်တွင်၊ လာမန်အမျိုးသားတို့သည် ငါတို့ကိုစစ်တိုက်ခြင်းငှာ၊ လူဆိတ်ညံရာမြို့သို့ ဆင်းလာကြ၏။ ဤသို့အားဖြင့်အချိန်တန်လာသောအခါ၊ ထိုနှစ်တွင် ငါတို့သည် သူတို့ကို အနိုင်ရသဖြင့်၊ သူတို့သည် နေရင်းပြည်သို့ တစ်ဖန်ပြန်သွားကြ၏။

၈ သုံးရာခြောက်ဆယ်နှစ်နှစ်မြောက်တွင် သူတို့သည် စစ်တိုက်ခြင်းငှာ တစ်ဖန်ဆင်းလာကြ၏။ ငါတို့သည်လည်း သူတို့ကို တစ်ဖန်အနိုင်ရသဖြင့်၊ သူတို့၏များစွာသောသူတို့ကို ကွပ်မျက်၍ အသေကောင်တို့သည်လည်း ပင်လယ်ထဲသို့ ပစ်ချခံရကြ၏။

၉ ယခုမူကား၊ ငါ၏လူမျိုးနီဖိုင်းအမျိုးသားတို့သည် သူတို့ပြုသည့် ဤကြီးစွာသောအမှုကြောင့်၊ သူတို့ကိုယ်တိုင်၏ခွန်အား၌ ဝါကြွားစပြု၍၊ သူတို့ရန်သူတို့၏ကွပ်မျက်ခြင်းကို ခံရသော ညီအစ်ကိုတို့၏ အသွေးအတွက် ကိုယ်တိုင် လက်တုံ့ပြန်မည့်အကြောင်း ကောင်းကင်ဘုံရှေ့ ၌ကျိန်ဆိုစပြုကြ၏။

၁၀ သူတို့သည် မိမိတို့၏ရန်သူများကို သွား၍စစ်တိုက်မည့်အကြောင်း၊ ထိုပြည်၏မျက်နှာပြင်မှ ပယ်ရှင်းမည့်အကြောင်း၊ ကောင်းကင်ဘုံကို တိုင်တည်၍၊ ထို့အတူ ဘုရားသခင်၏ပလ္လင်တော်ကိုလည်းတိုင်တည်၍ ကျိန်ဆိုကြ၏။

၁၁ ဤသို့အားဖြင့်အချိန်တန်လာသောအခါ၊ ဤလူမျိုးတို့၏ဆိုးညစ်ခြင်းနှင့် စက်ဆုပ်ရွံရှာဖွယ်အမှုတို့ကြောင့် ငါမော်မုန်သည် ယခုအချိန်မှစ၍ သူတို့၏အကြီးအကဲနှင့် တပ်မှူးအဖြစ်မှ ရှင်းရှင်းငြင်းပယ်၏။

၁၂ ရှုလော့၊ ငါသည် သူတို့ကို ဦးဆောင်၏။ သူတို့၏ဆိုးညစ်ခြင်းများ ရှိသော်ငြားလည်း၊ သူတို့ကို တိုက်ပွဲသို့ အကြိမ်များစွာဦးဆောင်၍၊ ငါ့အထဲ၌ရှိသည့် ဘုရားသခင်၏ချစ်ခြင်းအတိုင်း ငါ၏စိတ်နှလုံးအကြွင်းမဲ့ဖြင့် ချစ်၏။ ငါ၏စိတ်ဝိညာဉ်သည်လည်း သူတို့အတွက် ငါ၏ဘုရားသခင်ထံသို့ ဆုတောင်းခြင်း၌ တစ်နေ့လုံး သွန်းလောင်း၏။ သို့သော်လည်း၊ သူတို့စိတ်နှလုံး၏မာကျောခြင်းကြောင့် ထိုဆုတောင်းခြင်းမှာ ယုံကြည်ခြင်းမပါဘဲရှိ၏။

၁၃ သုံးကြိမ်တိုင်အောင် ငါသည် သူတို့ကို သူတို့ရန်သူများလက်မှ ကယ်လွှတ်သော်လည်း သူတို့သည် သူတို့၏အပြစ်များမှ နောင်တရခြင်းမရှိကြ။

၁၄ သူတို့၏ရန်သူများထံသို့ သွား၍စစ်တိုက်ပြီးလျှင်၊ ညီအစ်ကိုတို့၏အသွေးအတွက် ကိုယ်တိုင် လက်တုံ့ပြန်မည်ဖြစ်ကြောင်း ငါတို့၏ ကိုယ်တော်ရှင်နှင့် ကယ်တင်ရှင်ယေရှုခရစ်တော် တားမြစ်ထားတော်မူသည့် အရာမှန်သမျှကို တိုင်တည်၍ ကျိန်ဆိုကြသောအခါ၊ ရှုလော့၊ ကိုယ်တော်ရှင်၏အသံသည် ငါ့ထံသို့ ရောက်လာ၍၊ မိန့်တော်မူလေသည်ကား၊

၁၅ လက်တုံ့ပြန်ခြင်းမှာ ငါ၏အမှုဖြစ်၏၊ ငါဆပ်ပေးမည်။ ဤလူမျိုးတို့သည် ငါ သူတို့ကို ကယ်လွတ်တော်မူလေပြီးနောက် နောင်တရခြင်းမရှိကြသောကြောင့်၊ ရှုလော့၊ သူတို့သည် မြေကြီးမျက်နှာပြင်မှ ပယ်ရှင်းခံရလိမ့်မည်။

၁၆ ဤသို့အားဖြင့်အချိန်တန်လာသောအခါ၊ ငါသည် ငါ၏ရန်သူတို့ကို ဆန့်ကျင်၍တိုက်ခိုက်ရန် ရှင်းရှင်းငြင်းဆိုခဲ့၏။ ငါ့ကို ကိုယ်တော်ရှင်မိန့်မှာတော်မူသည့် အတိုင်းပင် ဆောင်ရွက်၏။ ငါသည် ဖြစ်လာမည့်အရာတို့ အကြောင်းကို သက်သေခံသည့် ဝိညာဉ်တော်၏ ထင်ရှားစွာ ပြတော်မူခြင်းတို့အတိုင်း၊ ငါမြင်ရ၊ ကြားရသောအရာတို့ကို လောကသို့ ထင်ရှားစွာပြရန် ရပ်ကြည့်သက်သေတစ်ဦး အဖြစ်ရှိခဲ့၏။

၁၇ ထို့ကြောင့်၊ ငါသည် အသင် တပါးအမျိုးသားတို့ထံသို့ ရေး၏။ အသင်ဣသရေလအမျိုးသားတို့ထံသို့လည်း ရေး၏၊ အမှုတော်ကို စတင်သောအချိန်၌ သင်တို့သည် သင်တို့၏အမွေခံရာပြည်သို့ ပြန်သွားရန် ပြင်ဆင်ရပေတော့မည်။

၁၈ ထိုမှတစ်ပါး၊ ရှုလော့၊ ငါသည် မြေကြီးစွန်းသား ခပ်သိမ်းတို့ထံသို့၊ ထိုမှတစ်ပါး၊ ယေရှု ယေရုရှလင်နယ်မြေ၌ သူ၏တပည့်တော်များအဖြစ် ရွေးကောက်ထားတော်မူသည့် တစ်ဆယ် နှစ်ပါးသော သူတို့အားဖြင့် သင်တို့၏ အကျင့်များအတိုင်း တရားစီရင် ခံရကြမည့် အသင်ဣသရေလမျိုးနွယ်စုတစ်ဆယ်နှစ်စုတို့ထံသို့ ရေး၏။

၁၉ ဤပြည်၌ ယေရှုက ရွေးကောက်တော်မူသည့် တစ်ဆယ်နှစ်ပါးသောသူတို့အားဖြင့် တရားစီရင် ခံရကြမည့် ဤလူမျိုးတို့၏ကျန်ကြွင်းသောသူတို့အဖို့ကိုလည်း ရေး၏။ ထိုတစ်ဆယ်နှစ်ပါးသည်လည်း ယေရှုယေရုရှလင်နယ်မြေ၌ ရွေးကောက်တော်မူသောသူ အခြားသောတစ်ဆယ်နှစ်ပါးတို့အားဖြင့် တရားစီရင် ခံရကြလိမ့်မည်။

၂၀ ဤအရာတို့ကိုလည်း ဝိညာဉ်တော်သည် ငါ့ကို ထင်ရှားစွာ ပြတော်မူ၏။ ထို့ကြောင့်၊ ငါသည် ခပ်သိမ်းသော သင်တို့ထံသို့ ရေး၏။ ဤအကြောင်းရင်းကြောင့်၊ ငါသည် သင်တို့ထံသို့ရေး၏၊ သင်တို့အားလုံး၊ အမှန်စင်စစ်၊ အာဒံ၏ လူသားမိသားစုဝင်အယောက်တိုင်း ခရစ်တော်၏တရားပလ္လင်ရှေ့ ၌ ရပ်ရမည့်အကြောင်း၊ ထို့အတူ၊ သင်တို့သည် အကျင့်များ ကောင်းသည်ဖြစ်စေ၊ ဆိုးသည်ဖြစ်စေ ထိုအကျင့်များအတွက် တရားစီရင်ခံရစေရန် ရပ်ရမည့်အကြောင်းကို သိနိုင်ကြစေခြင်းငှာပေတည်း။

၂၁ သင်တို့၌ရှိမည့် ယေရှုခရစ်တော်၏ဧဝံဂေလိတရားတော်ကို ယုံကြည်နိုင်စေခြင်းငှာလည်းဖြစ်၏။ ထို့အတူ ယုဒလူမျိုးတို့၊ ကိုယ်တော်ရှင်၏ပဋိညာဉ်ခံလူမျိုးတို့သည် သူတို့ကွပ်မျက်သည့် ထိုယေရှုအား မှန်သောခရစ်တော်နှင့် မှန်သောဘုရားသခင် ဖြစ်တော်မူလေကြောင်း သူတို့မြင်ရ၊ ကြားရသည့်သူတည်းဟူသော သူ့အပြင် အခြားသောသက်သေကို ရရှိကြစေခြင်းငှာလည်းဖြစ်၏။

၂၂ ထို့အတူ၊ ငါသည် ခပ်သိမ်းသော အသင်မြေကြီးစွန်းသားတို့ကို နောင်တရစေရန်နှင့် ခရစ်တော်၏တရားပလ္လင်ရှေ့၌ ရပ်ဖို့ ပြင်ဆင်စေရန် ဖျောင်းဖျနိုင်ခြင်းငှာ အလိုရှိ၏။