အခန်းကြီး ၆
နီဖိုင်းအမျိုးသားတို့သည် နောက်ဆုံးတိုက်ပွဲအတွက်၊ ကူမော်ရတောင်ကုန်းသို့ စုဝေးကြ၏—မော်မုန်သည် သန့်ရှင်းမွန်မြတ်သော မှတ်တမ်းများကို ကူမော်ရတောင်ကုန်း၌ ဝှက်ထား၏—လာမန်အမျိုးသားတို့သည် အောင်မြင်ကြ၏၊ နီဖိုင်းပြည်ပျက်စီး၏—ရာပေါင်း၊ ထောင်ပေါင်းမျာစွာသောသူတို့သည် ဓားဖြင့် ကွပ်မျက်ခံရ၏။ အေဒီ ၃၈၅ ခန့်။
၁ ယခုမူကား၊ ငါသည် ငါ၏လူမျိုးနီဖိုင်းအမျိုးသားတို့၏ ပျက်စီးခြင်းနှင့်စပ်လျဉ်းသည့် ငါ၏မှတ်တမ်းကို လက်စသတ်၏။ ဤသို့အားဖြင့်အချိန်တန်လာသောအခါ၊ ငါတို့သည် လာမန်အမျိုးသားတို့ရှေ့မှ ချီတက်ကြ၏။
၂ ငါ၊ မော်မုန်သည်လည်း လာမန်အမျိုးသားတို့၏ မင်းကြီးထံသို့ အမှာစာတစ်စောင်ကို ရေး၍၊ ငါတို့၏လူတို့ကို ကူမော်ရဟု ခေါ်သောတောင်ကုန်းအနီးရှိ ကူမော်ရပြည်သို့ အတူတကွ စုဝေးနိုင်ကြစေခြင်းငှာ၊ အခွင့်ပေးပါမည့်အကြောင်း တောင်းဆို၏။ ငါတို့သည် ထိုအရပ်၌ သူတို့ကို စစ်တိုက်နိုင်ကြပေမည်။
၃ ဤသို့အားဖြင့်အချိန်တန်လာသောအခါ၊ လာမန်အမျိုးသားတို့၏မင်းကြီးသည် ငါတောင်းဆိုသည့်အရာတို့ကို ငါ့အား ပေး၏။
၄ ဤသို့အားဖြင့်အချိန်တန်လာသောအခါ၊ ငါတို့သည် ကူမော်ရပြည်သို့ ချီတက်ကြပြီးလျှင်၊ ကူမော်ရတောင်ကုန်းပတ်လည်၌ ငါတို့၏တဲများကို ဆောက်ကြ၏။ ထိုပြည်သည်လည်း များစွာသောရေများ၊ မြစ်များနှင့် စမ်းရေတွင်းများရှိရာပြည် ဖြစ်၏။ ငါတို့သည် ဤအရပ်၌ လာမန်အမျိုးသားတို့အပေါ် အခွင့်သာခြင်းရရန် မျှော်လင့်ခြင်းရှိ၏။
၅ သုံးရာရှစ်ဆယ်လေးနှစ် ကုန်လွန်သွားသောအချိန်၌ ငါတို့သည် ငါတို့လူမျိုးတို့၏ ကျန်ကြွင်းသောသူခပ်သိမ်းတို့ကို ကူမော်ရပြည်သို့ စုဝေးကြ၏။
၆ ဤသို့အားဖြင့်အချိန်တန်လာသောအခါ၊ ငါတို့သည် ခပ်သိမ်းသော ငါတို့၏လူမျိုးတို့ကို ကူမော်ရပြည်သို့ တစ်လုံးတစ်ဝတည်း စုဝေးကြပြီးသောအချိန်၌၊ ရှုလော့၊ ငါမော်မုန်သည် အိုမင်းစပြုလာ၏။ ငါ့လူမျိုးတို့၏နောက်ဆုံး ရုန်းကန်ခြင်းဖြစ်မည်ကို သိသောကြောင့်လည်းကောင်း၊ ငါတို့ဘိုးဘေးတို့ လက်ဆင့်ကမ်းပေးခဲ့သည့်၊ သန့်ရှင်းမွန်မြတ်သော မှတ်တမ်းများကို လာမန်အမျိုးသားတို့၏လက်တွင်းသို့ ကျရောက်ရန် အခွင့်မပေးရမည့်အကြောင်း (အကြောင်းမူကား၊ လာမန်အမျိုးသားတို့သည် ထိုမှတ်တမ်းများကို ဖျက်ဆီးလိမ့်မည်) ကိုယ်တော်ရှင်၏ မိန့်မှာတော်မူခြင်းကို ခံထားရလျက်ရှိသောကြောင့်လည်းကောင်း၊ ထို့ကြောင့် ငါသည် နီဖိုင်း၏ပုရပိုက်ပြားများဖြင့် ဤမှတ်တမ်းကို ပြုစု၍၊ ငါ့သားမော်ရော်နိုင်းသို့ ငါပေးသည့် ဤအနည်းငယ်သော ပုရပိုက်ပြားများမှတစ်ပါး၊ ကိုယ်တော်ရှင်၏လက်တော်အားဖြင့် ငါ့ထံသို့ ယုံကြည်လွှဲအပ်လေသည့် အလုံးစုံသောမှတ်တမ်းများကို ကူမော်ရတောင်ကုန်း၌ ဝှက်ထား၏။
၇ ဤသို့အားဖြင့်အချိန်တန်လာသောအခါ၊ မိမိတို့၏ ဇနီးများနှင့် သားသမီးများတို့ဖြင့် အတူရှိသည့် ငါ၏လူမျိုးတို့သည် ယခုတွင်၊ လာမန်အမျိုးသားတို့၏တပ်များ သူတို့ဆီသို့ ချီတက်လာနေသည်ကို မြင်ကြ၏။ ဆိုးညစ်သောသူတို့၏ရင်ကို ပြည့်စေသည့် သေခြင်းအကြောင်း ကြောက်ရွံ့ဖွယ်ကောင်းသော အကြောက်တရားဖြင့်လည်း၊ သူတို့ကို တိုက်ခိုက်ခြင်းငှာ စောင့်နေကြ၏။
၈ ဤသို့အားဖြင့်အချိန်တန်လာသောအခါ၊ သူတို့သည် ငါတို့ကို လာ၍စစ်တိုက်ကြ၏၊ သူတို့၏အရေအတွက်များခြင်းကြောင့်၊ အယောက်တိုင်း ကြောက်စိတ်နှင့် ပြည့်ကြ၏။
၉ ဤသို့အားဖြင့်အချိန်တန်လာသောအခါ၊ သူတို့သည် ငါ၏လူမျိုးများကို ဓားဖြင့်၊ ထို့အတူ လေးဖြင့်၊ ထို့အတူ မြားဖြင့်၊ ထို့အတူ ပုဆိန်ဖြင့်၊ ထို့အတူ အမျိုးမျိုးသော စစ်တိုက်ရာလက်နက်တို့ဖြင့် တိုက်ခိုက်ကြ၏။
၁၀ ဤသို့အားဖြင့်အချိန်တန်လာသောအခါ၊ ငါ၏လူတို့သည် အထူးသဖြင့်၊ ငါနှင့်အတူရှိသည့် ငါ၏လူတစ်သောင်းသည်ပင် ခုတ်ချခံရ၏၊ ငါသည်လည်း ဒဏ်ရာရ၍ သူတို့အလယ်၌ လဲကျ၏။ ထိုသူတို့သည်လည်း ငါ့အနီးမှ ကျော်လွန်သွားကြသဖြင့် ငါ့အသက်ကို အဆုံးမစီရင်ကြ။
၁၁ သူတို့သည်လည်း ဖြတ်ကျော်သွား၍၊ ငါတို့နှစ်ဆယ်လေးဦး (ထိုသူတို့၌ ငါ့သား မော်ရော်နိုင်း ပါဝင်၏) မှတစ်ပါး၊ ငါ၏လူခပ်သိမ်းတို့ကို ခုတ်ချလေသောအချိန်၌၊ ငါတို့သည် ငါတို့၏လူမျိုးတို့သေရာမှ အသက်ရှင်ကျန်ရစ်ကြ၏၊ နက်ဖြန်နေ့၌ လာမန်အမျိုးသားများ သူတို့၏တပ်စခန်းများသို့ ပြန်လာကြသည့် အချိန်တွင်၊ ငါရှေ့မှ ဦးဆောင်သည့်၊ ခုတ်ချခံရသူ ငါ၏လူအယောက်တစ်သောင်းကို ကူမော်ရတောင်ထိပ်မှ မြင်ကြ၏။
၁၂ ငါ့သား မော်ရော်နိုင်းအားဖြင့် ဦးဆောင်သည့် ငါ၏လူအယောက်တစ်သောင်းကိုလည်း မြင်ကြ၏။
၁၃ ရှုဦးလော့၊ ဂိဂိဒေါန၏အယောက်တစ်သောင်းသည်လည်း ကျဆုံး၏၊ သူသည်လည်း ထိုသူတို့အလယ်၌ ရှိ၏။
၁၄ လာမသည်လည်း သူ၏လူတစ်သောင်းနှင့်အတူ ကျဆုံး၏။ ဂိလဂါလသည်လည်း သူ၏လူတစ်သောင်းနှင့်အတူ ကျဆုံး၏။ လင်မဟသည်လည်း သူ၏လူတစ်သောင်းနှင့်အတူ ကျဆုံး၏။ ယေနေရုံသည်လည်း သူ၏လူတစ်သောင်းနှင့်အတူ ကျဆုံး၏။ ထို့အတူ ကူမင်နီဟ၊ ထို့အတူ မော်ရော်နိဟ၊ ထို့အတူ အန္တိယောနုံ၊ ထို့အတူ ရှိဗလုံ၊ ထို့အတူ ရှေမ၊ ထို့အတူ ယောရှတို့သည်လည်း သူတို့၏လူတစ်သောင်းအသီးသီးနှင့်အတူ ကျဆုံးကြ၏။
၁၅ ဤသို့အားဖြင့်အချိန်တန်လာသောအခါ၊ သူတို့၏လူတစ်သောင်းအသီးသီးနှင့်အတူ ဓားဘေးဖြင့် ကျဆုံးသူ နောက်ထပ် အကြီးအကဲ ဆယ်ဦးရှိသေး၏။ အမှန်စင်စစ်၊ ငါနှင့်အတူရှိသည့် ထိုနှစ်ဆယ်လေးဦး၊ ထို့အတူ တောင်ဘက်တိုင်းပြည်များထဲသို့ လွတ်မြောက်သွားသူ အနည်းငယ်၊ ထို့အတူ လာမန်အမျိုးသားများထံသို့ ကူးပြောင်းသွားသူ အနည်းငယ်တို့မှတစ်ပါး၊ ငါ၏လူအားလုံးတို့ ကျဆုံးကြ၏။ သူတို့၏ အသား၊ အရိုးနှင့် အသွေးတို့သည် သူတို့ကို ကွပ်မျက်သူတို့၏ လက်အားဖြင့် ထိုပြည်ပေါ်၌ ပုပ်ပျက်စေရန်၊ ပြိုကျပျက်စီး၍၊ သူတို့၏အမိ မြေကြီးသို့ ပြန်သွားစေခြင်းငှာ စွန့်ပစ်ထားခံရလျက် မြေကြီးမျက်နှာပြင်ပေါ်၌ ကျလျက် ရှိလေသတည်း။
၁၆ ငါ၏လူမျိုးတို့အထဲမှ ကွပ်မျက်ခံရသူများကြောင့်၊ ငါ၏စိတ်ဝိညာဉ်သည်လည်း ပြင်းစွာသောဝေဒနာနှင့် ကွဲကြေ၍ ငါဟစ်ကြွေးလေသည်ကား၊
၁၇ အို အသင် ချောမောသောသူတို့၊ သင်တို့သည် ကိုယ်တော်ရှင်၏လမ်းစဉ်များမှ အဘယ်သို့အားဖြင့် စွန့်ခွာနိုင်ကြလေသနည်း။ အို အသင် ချောမောသောသူတို့၊ သင်တို့ကို လက်ခံရန် ဖွင့်ထားသောလက်များဖြင့် ရပ်သည့် ယေရှုကို အသင်တို့သည် အဘယ်သို့အားဖြင့် ငြင်းပယ်နိုင်ကြလေသနည်း။
၁၈ ရှုလော့၊ သင်တို့သည် ဤသို့ မပြုကြလျှင်၊ ကျဆုံးမည်မဟုတ်။ သို့ရာတွင် ရှုလော့၊ သင်တို့ကျဆုံး၍၊ ငါသည် သင်တို့ဆုံးရှုံးရခြင်းကြောင့် ငိုကြွေးမြည်တမ်း၏။
၁၉ အို အသင် ချောမောသော သားသမီးများတို့၊ အသင် အဘများနှင့် အမိများတို့၊ အသင် ခင်ပွန်းများနှင့် ဇနီးများတို့၊ အသင် ချောမောသောသူများတို့၊ အသင်တို့သည် အဘယ်သို့အားဖြင့် ကျဆုံးနိုင်ကြလေပြီနည်း။
၂၀ သို့ရာတွင် ရှုလော့၊ အသင်တို့ သွားလေပြီဖြစ်၍၊ ငါ၏ဝမ်းနည်းခြင်းများက သင်တို့၏ပြန်လာခြင်းကို မဖြစ်စေနိုင်။
၂၁ ထို့အတူ သင်တို့၏ သေခြင်းရှိသောကိုယ်က သေခြင်းမရှိရာကို ခြုံရမည့်နေ့ မကြာမြင့်မီ ကျရောက်လာ၏၊ ယခု ပုပ်ပျက်၍၊ ပျက်စီးနေသည့် ဤကိုယ်ခန္ဓာတို့သည် မကြာမြင့်မီတွင် မပုပ်ပျက်တတ်သော ကိုယ်ခန္ဓာများ ဖြစ်လာရမည်။ ထို့နောက်တွင်၊ သင်တို့သည် သင်တို့၏ အကျင့်များအတိုင်း တရားစီရင်တော်မူခြင်းကို ခံရကြစေရန် ခရစ်တော်၏တရားပလ္လင်ရှေ့၌ ရပ်ရကြရမည်။ သင်တို့သည် ဖြောင့်မတ်ကြလျှင်၊ သင်တို့၏ရှေ့မှ သွားနှင့်လေပြီးဖြစ်သော သင်တို့၏ဘိုးဘေးတို့နှင့်အတူ ကောင်းချီးမင်္ဂလာကို ခံစားရကြ၏။
၂၂ အို အသင်တို့သည် ဤကြီးစွာသော ပျက်စီးခြင်း သင်တို့အပေါ်သို့ မကျရောက်လာမီက နောင်တရသင့်ပေ၏။ သို့ရာတွင် ရှုလော့၊ သင်တို့သွားကြလေပြီ၊ အဘ၊ အမှန်စင်စစ်၊ ကောင်းကင်၏ထာဝရအဘသည် သင်တို့၏အခြေအနေကို သိ၏။ သူ၏တရားတော်မူခြင်းနှင့် ကရုဏာတော်တို့အတိုင်း သင်တို့ကို ပြုတော်မူ၏။