1 Huo, bisan si Isaias wala bala nagsiling: Sin-o bala ang nagpati sang amon balita, kag kay sin-o bala ginapahayag ang butkon sang Ginuo?

2 Kay magatubo sia sa iya atubang pareho sing isa ka linghod nga tanom, kag pareho sing isa ka gamot halin sa mala nga duta; wala sia sing talalupangdon nga dagway ukon kaanyag; kag kon makita naton sia wala sing katahum nga handumon naton sia.

3 Ginkaugtan sia kag ginsikway sang mga tawo; isa ka tawo sang mga kasubo, kag nakakilala sang kalisud; kag gintalikdan naton sia; ginkaugtan sia, kag wala naton sia pagtalupangda.

4 Sa pagkamatuod ginpas-an niya ang aton mga kalisud, kag gindala ang aton mga kasubo; apang ginkabig naton sia nga ginsilotan, ginsakit sang Dios, kag ginpaantos.

5 Apang ginpilas sia tungod sang aton mga kalapasan, ginhanog sia tungod sang aton mga kalainan; ang silot sang aton paghidaet yara sa iya; kag paagi sa iya mga lapdos ginpaayo kita.

6 Tanan kita, pareho sang mga carnero, nagtalalang; nagliso kita ang tagsa-tagsa sa iya kaugalingon nga dalanon; kag ang Ginuo nagpapas-an sa iya kaugalingon sang mga kalainan naton tanan.

7 Ginpigos sia, kag nag-antos sia, apang wala sia nagtikab sang iya baba; gindala sia pareho sing isa ka kordero sa ihawan, kag pareho nga apa ang isa ka carnero sa atubang sang iya mga manug-alot sa amo man wala sia nagtikab sang iya baba.

8 Ginkuha sia halin sa bilanggoan kag halin sa paghukom; kag sin-o ang magapahayag sang iya kaliwatan? Kay ginkakas sia halin sa duta sang mga buhi; tungod sang mga kalapasan sang akon katawhan sia ginsilotan.

9 Kag ginhimo niya ang iya lulubngan upod sa mga malain, kag upod sa manggaranon sa iya kamatayon; bangod wala sia sing ginhimo nga malain, kag wala man sing bisan ano nga kabutigan sa iya baba.

10 Apang nahamuot ang Ginuo sa paghanog sa iya; ginpakalisud niya sia; kon pagahimuon mo ang iya kalag nga isa ka halad para sa sala makita niya ang iya kaliwatan, palawigon niya ang iya mga adlaw, kag ang kahamuot sang Ginuo magauswag sa iya kamot.

11 Makita niya ang pag-antos sang iya kalag, kag malipay; sa iya ihibalo ang akon matarong nga alagad magapakamatarong sang madamo; kay magapas-an sia sang ila mga kalainan.

12 Gani hatagan ko sia sing bahin nga upod sa mga kadalagkoan, kag bahinon niya ang inagaw upod sa mga makusog; bangod gin-ula niya ang iya kalag tubtob sa kamatayon; kag naisip sia upod sa mga makasasala; kag gindala niya ang mga sala sang madamo, kag naghimo sang pagpanabang para sa mga makasasala.