1 Kag karon si Abinadi nagsiling sa ila: Luyag ko nga mahangpan ninyo nga ang Dios mismo magapanaog sa tunga sang mga anak sang katawhan, kag magatubos sang iya katawhan.

2 Kag bangod magakabuhi sia sa unod pagatawgon sia nga Anak sang Dios, kag bangod napaidalom niya ang unod sa kabubut-on sang Amay, sia ang Amay kag ang Anak—

3 Ang Amay, bangod ginpanamkon sia paagi sa gahum sang Dios; kag ang Anak, tungod sang unod; gani nahimo sia nga ang Amay kag Anak—

4 Kag sila isa ka Dios, huo, ang Wala’y Katapusan nga Amay mismo sang langit kag duta.

5 Kag gani ang unod nga napaidalom sa Espiritu, ukon ang Anak sa Amay, nga isa ka Dios, magaantos sang pagsulay, kag indi magpadaug sa pagsulay, kundi nga magatugot sang iya kaugalingon nga yagutaon, kag bunalon, kag tabugon, kag isikway sang iya katawhan.

6 Kag pagkatapos sini tanan, pagkatapos sang paghikot sang madamo nga dalagko nga mga milagro sa tunga sang mga anak sang katawhan, pagadal-on sia, huo, bisan pareho sang ginsiling ni Isaias, nga pareho nga apa ang isa ka carnero sa atubang sang iya manug-alot, sa amo man wala sia nagtikab sang iya baba.

7 Huo, sa amo man pagadal-on sia, ilansang sa krus, kag patyon, ang unod nga mapaidalom bisan tubtob sa kamatayon, ang kabubut-on sang Anak mapaidalom sa kabubut-on sang Amay.

8 Kag sa amo nga paagi ginabugto sang Dios ang mga gapos sang kamatayon, nga naangkon ang kadalag-an batok sa kamatayon; nga nagahatag sa Anak sing gahum sa paghimo sang pagpanabang para sa mga anak sang katawhan—

9 Nga nagkayab sa langit, nga may tagipusuon sang kaluoy; nga napuno sang kaluoy sa mga anak sang katawhan; nga nagatindog sa tunga nila kag sang hustisya; nga nagbugto sang mga gapos sang kamatayon, nagdala sa iya kaugalingon sang ila kalainan kag sang ila mga kalapasan, nga nagtubos sa ila, kag nagsabat sang mga ginapangayo sang hustisya.

10 Kag karon ginasiling ko sa inyo, sin-o ang magapahayag sang iya kaliwatan? Tan-awa, ginasiling ko sa inyo, nga pagkatapos nga ang iya kalag nahimo nga isa ka halad para sa sala makita niya ang iya kaliwatan. Kag karon ano ang inyo masiling? Kag sin-o ang iya mangin kaliwatan?

11 Tan-awa ginasiling ko sa inyo, nga kon sin-o man ang nakabati sang mga pulong sang mga propeta, huo, sang tanan nga balaan nga propeta nga nagpropesiya parte sang pagkari sang Ginuo—ginasiling ko sa inyo, nga ang tanan sinang mga nagpamati sa ila mga pulong, kag nagpati nga ang Ginuo magatubos sang iya katawhan, kag nagpaabot sa sinang adlaw para sa kapatawaran sang ila mga sala, ginasiling ko sa inyo, nga amo ini sila ang iya kaliwatan, ukon sila ang mga manunubli sang ginharian sang Dios.

12 Kay sila ining ang ila mga sala iya ginpas-an; sila ining para sa ila nagpakamatay sia agud matubos sila halin sa ila mga kalapasan. Kag karon, indi bala sila iya kaliwatan?

13 Huo, kag indi bala ang mga propeta, ang tagsa nga nagtikab sang iya baba agud magpropesiya, nga wala mahulog sa kalapasan, ang buot ko silingon ang tanan nga balaan nga propeta halin pa sang pagsugod sang kalibutan? Ginasiling ko sa inyo nga sila iya kaliwatan.

14 Kag sila ining nagbantala sang paghidaet, nga nagdala sang maayong balita sang kaayohan, nga nagbantala sang kaluwasan; kag nagsiling sa Sion: Ang imo Dios nagahari!

15 Kag O daw ano katahum sa mga bukid ang ila mga tiil!

16 Kag sa liwat, daw ano katahum sa mga bukid ang mga tiil sinang mga nagabantala gihapon sang paghidaet!

17 Kag sa liwat, daw ano katahum sa mga bukid ang mga tiil sinang mga magabantala pagkatapos sini sang paghidaet, huo, halin sa sini nga tion, padayon tubtob sa wala’y katapusan!

18 Kag tan-awa, ginasiling ko sa inyo, indi lamang ini. Kay O daw ano katahum sa mga bukid ang mga tiil niya nga nagadala sang maayong balita, nga amo ang tagtukod sang paghidaet, huo, bisan ang Ginuo, nga nagtubos sang iya katawhan; huo, sia nga naghatag sang kaluwasan sa iya katawhan;

19 Kay kon indi tungod sang pagtubos nga iya ginhimo para sa iya katawhan, nga ginhanda halin pa sa pagtuga sang kalibutan, ginasiling ko sa inyo, kon indi tungod sini, ang tanan nga tawo pat-od gid nga nadula kuntani.

20 Apang tan-awa, ang mga gapos sang kamatayon magakalabugto, kag ang Anak magahari, kag may gahum sa kamatayon; gani, ipahanabo niya ang pagkabanhaw sang mga minatay.

21 Kag may magaabot nga pagkabanhaw, bisan ang una nga pagkabanhaw; huo, bisan ang pagkabanhaw nila sadto, kag nila subong, kag nila nga magaabot, bisan tubtob sa pagkabanhaw ni Cristo—kay sa amo sia sina pagatawgon.

22 Kag karon, ang pagkabanhaw sang tanan nga propeta, kag sang tanan sinang mga nagpati sa ila mga pulong, ukon sang tanan sinang mga nagtuman sang mga kasugoan sang Dios, magabangon sa una nga pagkabanhaw; gani, sila ang una nga pagkabanhaw.

23 Pagabangonon sila agud magpuyo upod sa Dios nga nagtubos sa ila; tungod sini may kabuhi sila nga wala’y katapusan paagi kay Cristo nga nagbugto sang mga gapos sang kamatayon.

24 Kag sila ining mga may bahin sa una nga pagkabanhaw; kag sila ining nagkalamatay antes nagkari si Cristo, sa ila pagkawala’y hinalung-ong, nga ang kaluwasan wala mapahayag sa ila. Kag tungod sini ang Ginuo magapahanabo sang pagpanumbalik sang mga ini; kag may bahin sila sa una nga pagkabanhaw, ukon may kabuhi nga wala’y katapusan, kay natubos sang Ginuo.

25 Kag ang magagmay nga kabataan may kabuhi man nga wala’y katapusan.

26 Apang tan-awa, kag magkahadlok, kag magkurog sa atubang sang Dios, kay dapat kamo nga magkurog; kay ang Ginuo wala nagatubos sang nagarebelde batok sa iya kag nagakalamatay sa ila mga sala; huo, bisan ang tanan sadtong mga nagkaladula sa ila mga sala halin pa sang pagsugod sang kalibutan, nga hungod nga nagrebelde batok sa Dios, nga nakahibalo sang mga kasugoan sang Dios, kag indi magtuman sang mga ini; sila ining wala sing bahin sa una nga pagkabanhaw.

27 Gani indi bala dapat kamo nga magkurog? Kay ang kaluwasan wala nagaabot sa amo sina sa ila; kay ang Ginuo wala nagtubos sang amo sina sa ila; huo, ukon ang Ginuo indi man makatubos sang amo sina sa ila; kay indi niya masupak ang iya kaugalingon; kay indi niya masupak ang hustisya kon may kinamatarong ini.

28 Kag karon ginasiling ko sa inyo nga ang tion magaabot nga ang kaluwasan sang Ginuo igapahayag sa tagsa ka nasyon, kaliwat, lengguahe, kag katawhan.

29 Huo, Ginuo, ang imo mga manugbantay magabayaw sang ila tingug; sa tingug nga tingob magakanta sila; kay makita nila sing mata sa mata kon ibalik liwat sang Ginuo ang Sion.

30 Maghugyaw sa kalipay; magkanta sing tingob kamo nga nalaglag nga mga lugar sang Jerusalem; kay ginpasulhay sang Ginuo ang iya katawhan, gintubos niya ang Jerusalem.

31 Ginpakita sang Ginuo ang iya balaan nga butkon sa mga mata sang tanan nga nasyon; kag ang tanan nga yara sa mga punta sang kalibutan makakita sang kaluwasan sang aton Dios.