1 Kag karon, natabo ini nga si Alma, nga nalagyo sa mga alagad ni haring Noe, naghinulsol sang iya mga sala kag mga kalainan, kag naglibot sing sekreto sa katawhan, kag nagsugod sa pagpanudlo sang mga pulong ni Abinadi—

2 Huo, parte sa sinang magaabot, kag parte man sa pagkabanhaw sang mga minatay, kag sang pagtubos sang katawhan, nga igapahanabo paagi sa gahum, kag mga pag-antos, kag kamatayon ni Cristo, kag sang iya pagkabanhaw kag pagkayab pa-langit.

3 Kag ang tanan nga nagapamati sa iya pulong iya gintudloan. Kag gintudloan niya sila sing sekreto agud nga indi ini mahibaloan sang hari. Kag madamo ang nagpati sa iya mga pulong.

4 Kag natabo ini nga ang tanan nga nagpati sa iya nagkadto sa isa ka lugar nga ginatawag nga Mormon, nga nagbaton sang ngalan sini halin sa hari, nga yara sa mga dulonan sang duta nga may madamo, sa mga tinion ukon sa mga panahon, sang mabangis nga mga sapat.

5 Karon, didto sa Mormon may isa ka tuburan sang putli nga tubig, kag si Alma nagkadto didto, kay malapit didto sa tubig may isa ka kasiutan sang magagmay nga kahoy, nga sa diin ginatago niya ang iya kaugalingon kon adlaw sa mga pagpangita sang hari.

6 Kag natabo ini nga ang tanan nga nagpati sa iya nagkadto didto agud magpamati sang iya mga pulong.

7 Kag natabo ini, pagkatapos sang madamo nga inadlaw madamo ang nagtililipon sa lugar sang Mormon agud magpamati sang mga pulong ni Alma. Huo, ang tanan nagtililipon nga nagpati sa iya pulong agud magpamati sa iya. Kag gintudloan niya sila, kag nagwali sa ila sang paghinulsol, kag pagtubos, kag pagtuo sa Ginuo.

8 Kag natabo ini nga nagsiling sia sa ila: Tan-awa, yari ang mga tubig sang Mormon (kay amo ini ang pagtawag sang mga ini) kag karon, tungod maluyag kamo nga magsulod sa panong sang Dios, kag tawagon nga iya katawhan, kag sugot nga magpas-an sang mga palas-anon sang isa kag isa agud nga mangin mamag-an ang mga ini;

9 Huo, kag handa nga magpangalisud upod sinang mga nagapangalisud; huo, kag magpaumpaw sinang mga nagakinahanglan sang kaumpawan, kag magtindog bilang mga saksi sang Dios sa tanan nga tion kag sa tanan nga butang, kag sa tanan nga lugar nga mangin yara kamo, bisan tubtob sa kamatayon, agud matubos kamo sang Dios, kag maisip upod sinang mga sa una nga pagkabanhaw, agud makaangkon kamo sang kabuhi nga wala’y katapusan—

10 Karon ginasiling ko sa inyo, kon amo ini ang handum sang inyo mga tagipusuon, ano bala ang inyo ginapamatok sa pagpabunyag sa ngalan sang Ginuo bilang isa ka saksi sa iya atubang nga nagsulod kamo sa isa ka kasugtanan upod sa iya nga magaalagad kamo sa iya kag magtuman sang iya mga kasugoan agud ibubo niya ang iya Espiritu sing bugana pa gid sa inyo?

11 Kag karon sang nabatian sang katawhan ining mga pulong, nagpinalakpak sila sang ila mga kamot tungod sang kalipay, kag nagsininggit: Amo ini ang handum sang amon mga tagipusuon.

12 Kag karon natabo ini nga gindala ni Alma si Helam, sia nga isa sang mga nauna, kag naglusong kag nagtindog sa tubig, kag nagpangamuyo nga nagasiling: O Ginuo, ibubo ang imo Espiritu sa sining imo alagad agud mahikot niya ining buluhaton nga may pagkabalaan sang tagipusuon.

13 Kag sang nahambal na niya ining mga pulong, ang Espiritu sang Ginuo nag-abot sa iya, kag nagsiling sia: Helam, ginabunyagan ko ikaw, nga may awtoridad halin sa Dios nga Makagagahum, bilang isa ka pamatuod nga nagsulod ikaw sa isa ka kasugtanan nga mag-alagad sa iya tubtob nga mapatay ka tuhoy sa mortal nga lawas; kag kabay nga ang Espiritu sang Ginuo mabubo sa imo; kag kabay nga hatagan niya ikaw sang kabuhi nga wala’y katapusan paagi sa pagtubos ni Cristo nga iya ginhanda halin pa sa pagtuga sang kalibutan.

14 Kag pagkatapos nga nahambal ni Alma ining mga pulong, pareho sanday Alma kag Helam nga nagtugmaw sa tubig; kag nagbutwa sila kag nagtakas halin sa tubig nga nagakasadya, nga napuno sang Espiritu.

15 Kag sa liwat, si Alma nagdala sing isa pa, kag naglusong sa ika-duha nga tion sa tubig, kag ginbunyagan sia pareho sa nauna, lamang wala na niya liwat gintugmaw ang iya kaugalingon sa tubig.

16 Kag sa amo nga paagi ginbunyagan niya ang tanan nga nagkadto sa lugar sang Mormon; kag yara sila sa kadamuon nga mga duha ka gatos kag apat ka mga tawo; huo, kag ginbunyagan sila sa mga tubig sang Mormon, kag napuno sang grasya sang Dios.

17 Kag gintawag sila nga simbahan sang Dios, ukon ang simbahan ni Cristo sugod sa sina nga tion. Kag natabo ini nga kon sin-o man ang nabunyagan paagi sa gahum kag awtoridad sang Dios gindugang sa iya simbahan.

18 Kag natabo ini nga si Alma, nga may awtoridad halin sa Dios, nag-ordin sang mga pari; bisan isa ka pari sa tagsa ka singkwenta sang ila kadamuon ang iya gin-ordinan nga magwali sa ila, kag magtudlo sa ila parte sa mga butang nga may kahilabtanan sa ginharian sang Dios.

19 Kag ginsugo niya sila nga dapat wala sila sing itudlo luwas lang nga ang mga ini mga butang nga iya ginpanudlo, kag inang mga ginpanghambal sang baba sang balaan nga mga propeta.

20 Huo, bisan sia nagsugo sa ila nga dapat wala sila sing iwali luwas lang nga ini paghinulsol kag pagtuo sa Ginuo nga nagtubos sa iya katawhan.

21 Kag ginsugo niya sila nga dapat wala sing pagbinaisay sa isa kag isa, kundi nga magtulok sila sa palaabuton sa isa ka mata, nga may isa ka pagtuo kag isa ka bunyag, nga ang ila mga tagipusuon nabugkos sa pag-isa kag sa gugma sa isa kag isa.

22 Kag gani ginsugo niya sila nga magwali. Kag gani nangin mga anak sila sang Dios.

23 Kag ginsugo niya sila nga dapat nila tipigan ang adlaw nga inugpahuway, kag pakabalaanon ini, kag adlaw-adlaw dapat man sila maghatag sing mga pagpasalamat sa Ginuo nga ila Dios.

24 Kag ginsugo man niya sila nga ang mga pari nga iya gin-ordinan dapat nga magpangabudlay sa ila kaugalingon nga mga kamot para sa ila palangabuhian.

25 Kag may isa ka adlaw sa tagsa ka semana nga ginpain agud nga magtililipon sila sang ila mga kaugalingon agud magtudlo sa katawhan, kag agud magsimba sa Ginuo nga ila Dios, kag amo man, sa masami suno sa ila masarangan, agud magtililipon sang ila mga kaugalingon.

26 Kag ang mga pari indi dapat magsandig sa katawhan para sa ila palangabuhian; kundi para sa ila pagpangabudlay magabaton sila sang grasya sang Dios, agud nga mangin mabakod sila sa Espiritu, nga may ihibalo parte sa Dios, agud nga makatudlo sila nga may gahum kag awtoridad halin sa Dios.

27 Kag sa liwat si Alma nagsugo nga ang katawhan sang simbahan dapat magpaambit sang ila manggad, ang tagsa-tagsa suno sa sinang yara sa iya; kon may iya sia nga mas bugana dapat sia magpaambit sing mas bugana; kag sia nga may diutay gid lamang, diutay man ang dapat pangayuon; kag sia nga wala dapat nga hatagan.

28 Kag sa amo nga paagi sila dapat magpaambit sang ila manggad sa ila kaugalingon nga kabubut-on kag maayo nga mga handum tuhoy sa Dios, kag sa sinang mga pari nga nagakinahanglan, huo, kag sa tagsa ka nagakinahanglan nga hublas nga kalag.

29 Kag ini ginsiling niya sa ila, bilang sinugo sang Dios; kag naglakat sila sing matarong sa atubang sang Dios nga nagapaambit sa isa kag isa sa dutan-on kag sa espirituhanon suno sa ila mga panginahanglan kag sa ila mga kakulang.

30 Kag karon natabo ini nga ini tanan ginhimo sa Mormon, huo, sa tupad sang mga tubig sang Mormon, sa lasang nga malapit sa mga tubig sang Mormon; huo, ang lugar sang Mormon, ang mga tubig sang Mormon, ang lasang sang Mormon, daw ano katahum sang mga ini sa mga mata nila nga nakahibalo parte sa ila Manunubos; huo, kag daw ano sila kabulahan kay magakanta sila sang pagdayaw sa iya tubtob sa wala’y katapusan.

31 Kag ining mga butang ginhimo sa mga dulonan sang duta agud nga ang mga ini indi mahibaloan sang hari.

32 Apang tan-awa, natabo ini nga ang hari, nga nakatukib sing hublag sa tunga sang katawhan, nagpadala sang iya mga alagad agud bantayan sila. Gani sa adlaw nga nagatililipon sila sang ila mga kaugalingon sa pagpamati sang pulong sang Ginuo ginbuyagyag sila sa hari.

33 Kag karon ang hari nagsiling nga si Alma nagasugyot sa katawhan sa pagrebelde batok sa iya; gani nagpadala sia sang iya kasoldadohan agud laglagon sila.

34 Kag natabo ini nga si Alma kag ang katawhan sang Ginuo ginsugiran parte sang nagapakadto nga kasoldadohan sang hari; gani ginhimos nila ang ila mga tolda kag ang ila mga panimalay kag nagkadto sa kamingawan.

35 Kag yara sila sa kadamuon nga mga apat ka gatos kag singkwenta ka mga tawo.