1 Kag natabo ini nga nagbalik ang mga kasoldadohan sang hari nga napaslawan sa pagpangita sang katawhan sang Ginuo.

2 Kag karon tan-awa, diutay ang mga puwersa sang hari bangod nabuhinan, kag didto nagsugod nga may pagbinahin-bahin sa nagkalabilin sang katawhan.

3 Kag ang mas diutay nga bahin nagsugod sa pagpabutyag sing madamo nga pagpamahog batok sa hari, kag didto nagsugod nga may dako nga pagbinaisay sa tunga nila.

4 Kag karon may isa ka lalaki sa ila nga ang ngalan amo si Gideon, kag sia nga isa ka mabukod nga lalaki kag isa ka kaaway sang hari, gani naggabot sia sang iya espada, kag nagsumpa sa iya kaakig nga patyon niya ang hari.

5 Kag natabo ini nga nakig-away sia batok sa hari; kag sang nakita sang hari nga madali na lang sia mapierdi sini, nalagyo sia kag nagdalagan kag nagsaka sa tore nga malapit sa templo.

6 Kag ginlagas sia ni Gideon kag malapit na lang sia nga makaabot sa ibabaw sang tore agud patyon ang hari, kag ang hari nagtulok sa palibot sa duta sang Semlon, kag tan-awa, ang kasoldadohan sang mga Lamanhon yara na sa sulod sang mga dulonan sang duta.

7 Kag karon ang hari nagpakitluoy sa kalisud sang iya kalag nga nagasiling: Gideon, kaluoyi ako, kay ang mga Lamanhon nagasalakay sa aton, kag laglagon nila kita; huo, laglagon nila ang akon katawhan.

8 Kag karon ang hari wala man gid sing pagkabalaka sa iya katawhan nga pareho sang iya pagkabalaka sa iya kaugalingon nga kabuhi; bisan pa amo sini, wala sia ginpatay ni Gideon.

9 Kag ang hari nagsugo sa katawhan nga magpalagyo sila sa mga Lamanhon, kag sia mismo nag-una sa ila, kag nagpalagyo sila padulong sa kamingawan upod ang ila mga babayi kag ang ila mga kabataan.

10 Kag natabo ini nga ginpanglagas sila sang mga Lamanhon, kag nalab-ot sila, kag nagsugod sa pagpamatay sa ila.

11 Karon natabo ini nga ang hari nagsugo sa ila nga dapat bayaan sang tanan nga lalaki ang ila mga asawa kag ang ila mga kabataan, kag magpalagyo sa mga Lamanhon.

12 Karon madamo ang indi magbiya sa ila, kundi mas ginpili pa nga magpabilin kag magkalamatay upod sa ila. Kag ginbayaan sang iban ang ila mga asawa kag ang ila mga kabataan kag nagpalagyo.

13 Kag natabo ini nga ang mga nagpabilin upod sa ila mga asawa kag sa ila mga kabataan nagsugo sang ila matahum nga mga anak nga babayi nga mag-atubang kag magpakitluoy sa mga Lamanhon nga indi nila sila pagpamatyon.

14 Kag natabo ini nga ang mga Lamanhon naluoy sa ila kay nabihag sila sa katahum sang ila mga babayi.

15 Gani wala sila ginpamatay sang mga Lamanhon, kag gindala sila nga mga bihag kag ginbalik sa duta sang Nefi, kag gintugotan sila nga mapanag-iyahan nila ang duta sa idalom sang mga kondisyon nga itugyan nila si haring Noe sa mga kamot sang mga Lamanhon, kag ihatag ang ila pagkabutang, bisan ang katunga sang tanan nila nga ginapanag-iyahan, katunga sang ila mga bulawan, kag ila mga pilak, kag tanan nila nga malahalon nga mga butang, kag sa amo nga paagi dapat sila magbayad sang buwis tuig-tuig sa hari sang mga Lamanhon.

16 Kag karon may isa sang mga anak nga lalaki sang hari sa sinang mga gindala nga bihag nga ang ngalan amo si Limhi.

17 Kag karon si Limhi luyag nga indi pagpatyon ang iya amay; apang, si Limhi nakahibalo sang mga kalainan sang iya amay, kay sia mismo isa ka matarong nga tawo.

18 Kag natabo ini nga si Gideon nagpadala sing sekreto sang mga tinawo sa kamingawan agud magpangita sang hari kag sang mga kaupod niya. Kag natabo ini nga nasugata nila ang mga tawo sa kamingawan, tanan luwas sa hari kag sa iya mga pari.

19 Karon nagsumpa sila sa ila mga tagipusuon nga mabalik sila sa duta sang Nefi, kag kon ang ila mga asawa kag ang ila mga kabataan ginpamatay, kag amo man ang mga nagpabilin upod sa ila, nga magatinguha sila sa pagtimalus, kag magpakamatay man upod sa ila.

20 Kag ang hari nagsugo sa ila nga indi sila dapat magbalik; kag naakig sila sa hari, kag ginpahanabo nga mag-antos sia, bisan tubtob sa kamatayon paagi sa kalayo.

21 Kag naghana sila nga pangdakpon man ang mga pari kag pamatyon sila, kag nagpalagyo sila.

22 Kag natabo ini nga nagahana na sila nga magbalik sa duta sang Nefi, kag nasugat-an nila ang mga tinawo ni Gideon. Kag ginsugiran sila sang mga tinawo ni Gideon sang tanan nga natabo sa ila mga asawa kag sa ila mga kabataan; kag ang mga Lamanhon nagtugot sa ila nga maangkon nila ang duta paagi sa pagbayad sang buwis sa mga Lamanhon nga katunga sang tanan nila nga ginapanag-iyahan.

23 Kag ginsugiran sang mga tawo ang mga tinawo ni Gideon nga ginpatay nila ang hari, kag ang iya mga pari nagpalagyo sa ila palayo pa gid padulong sa kamingawan.

24 Kag natabo ini nga sang makatapos na sila sang seremonya, nga nagbalik sila sa duta sang Nefi, nga nagakasadya bangod ang ila mga asawa kag ang ila mga kabataan wala ginpamatay; kag ginsugiran nila si Gideon kon ano ang ila ginhimo sa hari.

25 Kag natabo ini nga ang hari sang mga Lamanhon naghimo sing isa ka panumpa sa ila nga indi sila pagpamatyon sang iya katawhan.

26 Kag si Limhi man, bilang anak sang hari, nga ang ginharian ginhatag sa iya sang katawhan, naghimo sang panumpa sa hari sang mga Lamanhon nga ang iya katawhan magabayad sing buwis sa iya, bisan katunga sang tanan nga ila ginapanag-iyahan.

27 Kag natabo ini nga nagsugod si Limhi sa pagtukod sang ginharian kag sa pagpaluntad sang paghidaet sa iya katawhan.

28 Kag ang hari sang mga Lamanhon nagbutang sang mga bantay sa palibot sang duta agud nga mapatinir niya ang katawhan ni Limhi sa duta, agud nga indi sila magkadto sa kamingawan; kag ginsuporta niya ang iya mga bantay halin sa buwis nga ginabaton niya halin sa mga Nefinhon.

29 Kag karon si haring Limhi nakaangkon sing dalayon nga paghidaet sa iya ginharian sa sulod sang duha ka tuig sa bagay nga ang mga Lamanhon wala nagpanggamo sa ila ukon nagtinguha sa paglaglag sa ila.