Ang Libro ni Mosias

1 Kag karon wala na sing pagbinaisay sa bug-os nga duta sang Zarahemla, sa tunga sang tanan nga katawhan nga nasakop ni haring Benjamin, sa bagay nga si haring Benjamin dalayon nga may paghidaet sa tanan nga nabilin niya nga mga adlaw.

2 Kag natabo ini nga may tatlo sia ka anak nga lalaki; kag gintawag niya ang ila mga ngalan nga Mosias, kag Helorum, kag Helaman. Kag ginpatudloan niya sila sa tanan nga lengguahe sang iya mga amay, agud nga paagi sa sini mangin mga lalaki sila nga may paghangop; kag agud nga makahibalo sila parte sa mga propesiya nga ginhambal paagi sa mga baba sang ila mga amay, nga ginhatag sa ila paagi sa kamot sang Ginuo.

3 Kag gintudloan man niya sila parte sa mga kasulatan nga nakurit sa mga lamina nga saway nga nagasiling: Mga anak ko, luyag ko nga panumdumon ninyo nga kon indi tungod sining mga lamina, nga nagaunod sining mga kasulatan kag sining mga kasugoan, pat-od gid nga nag-antos kita sa pagkaignorante, bisan tubtob sa sini nga tion, nga wala makahibalo sang mga misteryo sang Dios.

4 Kay indi mahimo nga ang aton amay nga si Lehi makadumdum sining tanan nga butang, agud nga matudlo ang mga ini sa iya mga anak, kon indi sa bulig sining mga lamina; kay tungod natudloan sia sa lengguahe sang mga Egiptohanon gani makabasa sia sining mga kinurit, kag matudlo ang mga ini sa iya mga anak, agud nga paagi sa sini mahimo nila nga matudlo ang mga ini sa ila mga anak, kag sa amo nagatuman sang mga kasugoan sang Dios, bisan tubtob sa sining panahon.

5 Ginasiling ko sa inyo, mga anak ko, nga kon indi tungod sining mga butang, nga gintago kag gin-amligan sang kamot sang Dios, agud nga mahimo naton nga mabasa kag mahangpan ang iya mga misteryo, kag maangkon ang iya mga kasugoan sing dalayon sa atubang sang aton mga mata, nga bisan ang aton mga amay nag-usmod kuntani sa pagkawala’y pagtuo, kag nangin pareho kita kuntani sang aton mga kauturan, ang mga Lamanhon, nga wala sing nahibal-an parte sining mga butang, ukon bisan pa gani wala nagapati sa mga ini kon ginatudlo sa ila tungod sang mga tradisyon sang ila mga amay nga indi husto.

6 O mga anak ko, luyag ko nga panumdumon ninyo nga matuod ining mga pulong, kag amo man nga matuod ining mga kasulatan. Kag tan-awa, ang mga lamina man ni Nefi, nga nagaunod sang mga kasulatan kag sang mga ginpanghambal sang aton mga amay halin sa tion nga nagbiya sila sa Jerusalem tubtob subong, kag matuod ang mga ini; kag mahibal-an naton ang kapat-uran sang mga ini tungod yari sa aton ang mga ini sa atubang sang aton mga mata.

7 Kag karon, mga anak ko, luyag ko nga dumdumon ninyo nga tun-an sing matutum ang mga ini, agud nga makabenepisyo kamo paagi sa sini; kag luyag ko nga tumanon ninyo ang mga kasugoan sang Dios, agud mag-uswag kamo sa duta suno sa mga promisa nga ginhimo sang Ginuo sa aton mga amay.

8 Kag madamo pa nga butang ang gintudlo ni haring Benjamin sa iya mga anak nga lalaki nga wala nasulat sa sini nga libro.

9 Kag natabo ini nga sang nakatapos si haring Benjamin sa pagtudlo sa iya mga anak nga lalaki, nga nagtigulang na sia, kag nabatyagan niya nga pat-od gid nga sa indi madugay magalakat sia sa alagyan sang bug-os nga duta; gani, naghunahuna sia nga ginakinahanglan nga ihatag niya ang ginharian sa isa sang iya mga anak nga lalaki.

10 Gani, nagpasugo sia nga dal-on si Mosias sa iya atubang; kag amo ini ang mga pulong nga ginhambal niya sa iya nga nagasiling: Anak ko, luyag ko nga maghimo ka sing pagbantala sa bug-os sining duta sa tunga sining tanan nga katawhan, ukon sa katawhan sang Zarahemla, kag sa katawhan ni Mosias nga nagapuyo sa duta, nga paagi sa sini mahimo sila nga mapanipon; kay sa buwas ibantala ko sa sining akon katawhan halin sa akon kaugalingon nga baba nga ikaw ang hari kag tagdumala sining katawhan, nga ginhatag sang Ginuo nga aton Dios sa aton.

11 Kag dugang pa sina, hatagan ko ining katawhan sing ngalan, nga paagi sa sini mahimo sila nga makilal-an sing labaw pa sa tanan nga katawhan nga gindala sang Ginuong Dios pagwa sa duta sang Jerusalem; kag ini pagahimuon ko bangod nangin matutum sila nga katawhan sa pagtuman sang mga kasugoan sang Ginuo.

12 Kag ihatag ko sa ila ang isa ka ngalan nga indi gid mapanas, luwas lang nga ini paagi sa kalapasan.

13 Huo, kag dugang pa sina ginasiling ko sa imo nga kon ining labing pinasulabi nga katawhan sang Ginuo mahulog sa kalapasan, kag mangin isa ka malain kag makilahion nga katawhan, nga ang Ginuo magatugyan sa ila, nga paagi sa sini mangin mahuyang sila pareho sang ila mga kauturan; kag indi na niya sila pag-amligan paagi sa iya wala’y tupong kag makatilingala nga gahum pareho sang iya pag-amlig tubtob subong sa aton mga amay.

14 Kay ginasiling ko sa imo, nga kon wala niya pag-iuntay ang iya butkon sa pag-amlig sa aton mga amay pat-od gid nga nahulog sila sa mga kamot sang mga Lamanhon, kag nangin mga biktima sang ila pagdumot.

15 Kag natabo ini nga sang nakatapos si haring Benjamin sining mga ginpanghambal sa iya anak, ginhatagan niya sia sing mga sugo parte sa tanan nga butang sang ginharian.

16 Kag dugang pa sina, ginhatagan man niya sia sing mga sugo parte sa mga kasulatan nga nakurit sa mga lamina nga saway; kag sa mga lamina man ni Nefi; kag amo man, sa espada ni Laban, kag sa bola ukon manuggiya, nga nagtuytuy sa aton mga amay patabok sa kamingawan, nga ginhanda sang kamot sang Ginuo nga paagi sa sini matuytuyan sila, ang tagsa-tagsa suno sa pagpamati kag katutum nga ila ginahatag sa iya.

17 Gani, kon indi sila matutum wala sila nagauswag ukon nagatin-ad sa ila pagpanglakaton, kundi nga ginatabog pabalik, kag nagaagom sang kasaklaw sang Dios sa ila; kag gani ginasakit sila sang tiggulutom kag tuman nga pag-antos, sa pagpukaw sa ila sa pagpanumdum sang ila tulumanon.

18 Kag karon, natabo ini nga si Mosias naglakat kag ginhimo ang suno sa ginsugo sa iya sang iya amay, kag nagpabantala sa tanan nga katawhan nga yara sa duta sang Zarahemla agud nga paagi sa sini mahimo nila nga matipon ang ila mga kaugalingon, sa pagtaklad sa templo agud mamati sa mga pulong nga ihambal sang iya amay sa ila.