1 Kag natabo ini nga si Limhi kag ang iya katawhan nagbalik sa siyudad sang Nefi, kag nagsugod sa pagpuyo liwat sa duta sing matawhay.

2 Kag natabo ini nga pagkatapos sang madamo nga inadlaw ang mga Lamanhon nagsugod nga mapukaw liwat sa kaakig batok sa mga Nefinhon, kag nagsugod sila sa pagkadto sa mga dulonan sang duta sa palibot.

3 Karon wala nila sila ginpamatay tungod sang panumpa nga ginhimo sang ila hari kay Limhi; apang ginapanampa nila sila sa ila mga pisngi, kag nagagamit sang ila awtoridad sa ila; kag nagsugod sa pagbutang sang mabug-at nga mga palas-anon sa ila mga likod, kag ginapanabog sila pareho sang ila ginahimo sa apa nga asno—

4 Huo, ini tanan nahimo agud matuman ang pulong sang Ginuo.

5 Kag karon tuman ang mga pag-antos sang mga Nefinhon, kag wala sing paagi nga maluwas nila ang ila mga kaugalingon halin sa ila mga kamot kay ang mga Lamanhon nagpalibot sa ila sa tanan nga bahin.

6 Kag natabo ini nga ang katawhan nagsugod sa pagkumod sa hari tungod sang ila mga pag-antos; kag nagsugod sila sa paghandum nga magpakig-away batok sa ila. Kag gintublag nila sing tuman ang hari sa ila mga reklamo; gani gintugotan niya sila nga himuon nila ang suno sa ila mga handum.

7 Kag nagtililipon sila liwat sang ila mga kaugalingon, kag nagsul-ob sang ila mga hinganib, kag nagpakig-away batok sa mga Lamanhon agud tabugon sila pagwa sa ila duta.

8 Kag natabo ini nga ginpierde sila sang mga Lamanhon, kag ginpanabog sila pabalik, kag ginpamatay ang madamo sa ila.

9 Kag karon may dako nga pagpangalisud kag panalambiton sa katawhan ni Limhi, ang balo nagapangalisud tungod sa iya bana, ang anak nga lalaki kag ang anak nga babayi nagapangalisud tungod sa ila amay, kag ang mga utod nga lalaki tungod sa ila mga kauturan.

10 Karon may madamo kaayo nga mga balo sa duta, kag nagtiyabaw sila sing tuman adlaw-adlaw, kay may tuman sila nga kahadlok sa mga Lamanhon.

11 Kag natabo ini nga ang ila dalayon nga mga pagtiyabaw nagpukaw sang nagkalabilin sang katawhan ni Limhi nga maakig batok sa mga Lamanhon; kag nagpakig-away sila liwat, apang ginpanabog sila liwat pabalik, nga nag-antos sang dako nga kapierdihan.

12 Huo, nagpakig-away sila liwat bisan sa ika-tatlo nga tion, kag nag-antos sa amo man nga paagi; kag yadtong mga wala napatay nagbalalik liwat sa siyudad sang Nefi.

13 Kag nagpaubos sila sang ila mga kaugalingon bisan tubtob sa yab-ok, nga nagpaidalom sang ila mga kaugalingon sa gota sang pagkaulipon, nga nagatugyan sang ila mga kaugalingon nga sakiton, kag panabugon diri kag didto, kag pabug-atan, suno sa mga kaluyag sang ila mga kaaway.

14 Kag ginpaubos nila ang ila mga kaugalingon bisan sa kadalumon sang pagpaubos; kag nagpakitluoy sila sing tuman sa Dios; huo, bisan sa bilog nga adlaw nagpakitluoy sila sa ila Dios nga luwason niya sila halin sa ila mga pag-antos.

15 Kag karon ang Ginuo mahinay sa pagpamati sang ila pagpakitluoy tungod sang ila mga kalainan; bisan pa amo sini ang Ginuo nagpamati sang ila mga pagpakitluoy, kag nagsugod sa pagpahumok sang mga tagipusuon sang mga Lamanhon sa bagay nga nagsugod sila sa pagpamag-an sang ila mga palas-anon; apang nakita sang Ginuo nga indi nagakaangay ang pagluwas sa ila halin sa pagkaulipon.

16 Kag natabo ini nga nagsugod sila sa pag-uswag sing hinay-hinay sa duta, kag nagsugod sa pagtanom sang uyas sing mas bugana, kag pagsagod sang mga panong, kag mga baka, sa bagay nga wala sila nag-antos sa gutom.

17 Karon may dako nga kadamuon sang mga babayi, labaw pa sangsa mga lalaki; gani si haring Limhi nagsugo nga ang tagsa ka lalaki dapat maghatag sa pagsuporta sang mga balo kag sa ila mga kabataan agud nga indi sila magkalamatay sa gutom; kag ini ila ginhimo tungod sang dako nga kadamuon sang mga nagkalamatay.

18 Karon ang katawhan ni Limhi nagaulupod sing tingob tubtob sa mahimo, kag gin-amligan ang ila mga uyas kag ang ila mga panong;

19 Kag ang hari mismo wala ginasalig ang iya kaugalingon sa gwa sang mga pader sang siyudad, luwas lang kon dala niya ang iya mga bantay upod sa iya, sa kahadlok nga basi sa ano man nga paagi mahulog sia sa mga kamot sang mga Lamanhon.

20 Kag nagsugo sia nga ang iya katawhan dapat magbantay sang duta sa palibot agud nga sa ano man nga paagi mahimo nila madakop yadtong mga pari nga nagpalagyo sa kamingawan nga pilit nga nagkuha sang mga anak nga babayi sang mga Lamanhon, kag nagtuga sang amo kadako nga kalaglagan nga matabo sa ila.

21 Kay luyag nila nga dakpon sila agud masilotan nila sila; kay nagakadto sila sa duta sang Nefi sa gab-i, kag ginahakot ang ila uyas kag madamo sang ila malahalon nga mga butang; gani patago nga naghulat sila sa ila.

22 Kag natabo ini nga wala na sing kinagamo sa tunga sang mga Lamanhon kag sang katawhan ni Limhi, bisan tubtob sa tion nga si Amon kag ang iya mga kauturan nag-abot sa duta.

23 Kag ang hari sang yara sia sa gwa sang mga ganhaan sang siyudad upod sa iya bantay, nakakita kay Amon kag sa iya mga kauturan; kag sa paghunahuna nga mga pari sila ni Noe gani nagsugo sia nga dakpon sila, kag gapuson, kag ihunong sa bilanggoan. Kag kon mga pari sila ni Noe nagsugo sia kuntani nga pamatyon sila.

24 Apang sang natukiban niya nga indi sila, kundi nga mga kauturan niya sila, kag nag-abot halin sa duta sang Zarahemla, napuno sia sing tuman kadako nga kalipay.

25 Karon si haring Limhi nagpadala, sang wala pa nakaabot si Amon, sing diutay lamang nga mga lalaki agud magpangita sang duta sang Zarahemla; apang wala nila nakit-an ini, kag nagtalang sila sa kamingawan.

26 Apang, nakasalapo sila sing isa ka duta nga ginpuy-an sadto sang mga tawo; huo, isa ka duta nga natabunan sang kaging nga mga tul-an; huo, isa ka duta nga ginpuy-an sadto sang mga tawo kag nalaglag; kag sila, nga naghunahuna nga amo ini ang duta sang Zarahemla, nagbalik sa duta sang Nefi nga nag-abot sa mga dulonan sang duta pila ka adlaw antes sang pag-abot ni Amon.

27 Kag may dala sila nga isa ka kasulatan, nga isa ka kasulatan sang katawhan nga ang mga tul-an ila nasalapoan; kag nakurit ini sa mga lamina nga milinahon.

28 Kag karon si Limhi napuno liwat sang kalipay sa pagkahibalo halin sa baba ni Amon nga si haring Mosias may isa ka dulot halin sa Dios nga paagi sini makapatpat sia sinang mga kinurit; huo, kag si Amon nagkasadya man.

29 Apang si Amon kag ang iya mga kauturan napuno sang kasubo bangod madamo sang ila mga kauturan ang napatay;

30 Kag amo man nga si haring Noe kag ang iya mga pari ang nangin kabangdanan nga ang katawhan naghimo sang madamo kaayo nga sala kag kalainan batok sa Dios; kag nagkalisud man sila tungod sang kamatayon ni Abinadi; kag amo man sa paghalin ni Alma kag sang katawhan nga nag-upod sa iya, nga nagtukod sing isa ka simbahan sang Dios paagi sa kusog kag gahum sang Dios, kag pagtuo sa mga pulong nga ginpanghambal ni Abinadi.

31 Huo, nagkalisud sila tungod sang ila paghalin kay wala nila mahibal-i kon diin sila nagpalagyo. Karon malipayon sila kuntani nga magbuylog sa ila kay sila mismo nagsulod sa isa ka kasugtanan upod sa Dios nga magaalagad sa iya kag magtuman sang iya mga kasugoan.

32 Kag karon sugod sang pag-abot ni Amon, si haring Limhi nagsulod man sa isa ka kasugtanan upod sa Dios, kag amo man ang madamo sang iya katawhan nga magaalagad sa iya kag magtuman sang iya mga kasugoan.

33 Kag natabo ini nga si haring Limhi kag ang madamo sang iya katawhan nagahandum nga mabunyagan; apang wala sing bisan sin-o sa duta nga may awtoridad halin sa Dios. Kag si Amon nagbalibad sa paghimo sini nga butang nga nagakabig sang iya kaugalingon nga isa ka di-nagakaangay nga alagad.

34 Gani wala sila sa sina nga tion nagtingob sang ila mga kaugalingon sa isa ka simbahan, kundi nga nagahulat sang Espiritu sang Ginuo. Karon nagahandum sila nga mangin bisan pareho kay Alma kag sa iya mga kauturan nga nagpalagyo padulong sa kamingawan.

35 Nagahandum sila nga mabunyagan bilang saksi kag pagpamatuod nga sugot sila nga mag-alagad sa Dios sa ila bug-os nga mga tagipusuon; apang ginpalawig nila ang tion; kag ang kasaysayan sang ila pagbunyag igahatag pagkatapos sini.

36 Kag karon ang tanan nga pagtuon ni Amon kag sang iya katawhan, kag ni haring Limhi kag sang iya katawhan, amo ang pagluwas sang ila mga kaugalingon halin sa mga kamot sang mga Lamanhon kag halin sa pagkaulipon.