1 Kag karon natabo ini nga ang mga paghingabot nga ginhimo sa simbahan sang mga indi tumuluo nangin tuman kalubha sa bagay nga ang simbahan nagsugod sa pagkumod, kag pagreklamo sa ila mga lider parte sa amo nga bagay; kag nagreklamo sila kay Alma. Kag gindala ni Alma ang kaso sa atubang sang ila hari, kay Mosias. Kag si Mosias nagpalaygay sa iya mga pari.

2 Kag natabo ini nga si haring Mosias nagpadala sing isa ka pabantala sa bug-os nga kadutaan sa palibot nga dapat wala sing mga indi tumuluo nga maghingabot sang bisan sin-o nga mga miyembro sang simbahan sang Dios.

3 Kag may istrikto nga sugo sa tanan nga simbahan nga wala dapat sing mga paghingabot sa tunga nila, nga dapat may pagkapalareho sa tanan nga tawo;

4 Nga indi nila dapat tugotan ang bugal kag pagkahambog nga magtublag sang ila paghidaet; nga ang tagsa ka tawo dapat magkabig sang iya isigkatawo pareho sang iya kaugalingon, nga nagapangabudlay paagi sa ila kaugalingon nga mga kamot para sa ila palangabuhian.

5 Huo, kag ang tanan nila nga pari kag manunudlo dapat magpangabudlay sa ila kaugalingon nga mga kamot para sa ila palangabuhian, sa tanan nga sirkumstansya luwas sa pagmasakit, ukon sa dako nga kakulang; kag sa paghimo sining mga butang, nagbugana sila sa grasya sang Dios.

6 Kag nagsugod nga may dako nga paghidaet liwat sa duta; kag ang katawhan nagsugod nga mangin tuman kadamo, kag nagsugod sa paglapta sa iban nga lugar sa ibabaw sang duta, huo, sa norte kag sa sur, sa este kag sa weste, nga nagatukod sang dalagko nga mga siyudad kag mga baryo sa tanan nga pamusod sang duta.

7 Kag ang Ginuo nagbisita sa ila kag nagpauswag sa ila, kag nangin madamo kag manggaranon sila nga katawhan.

8 Karon ang mga anak nga lalaki ni Mosias naisip upod sa mga indi tumuluo; kag ang isa man sang mga anak nga lalaki ni Alma naisip upod sa ila, sia nga ginatawag nga Alma sunod sa iya amay; apang, nangin isa sia ka tuman ka malain kag idolatroso nga tawo. Kag isa sia ka tawo nga sagad sa paghambal, kag naghambal sing madamo nga mga pagpang-into sa katawhan; gani nadala niya ang madamo sang katawhan sa paghimo suno sa sari sang iya mga kalainan.

9 Kag nangin isa sia ka dako nga sablag sa kauswagan sang simbahan sang Dios; nga nagabihag palayo sang mga tagipusuon sang katawhan; nga nagatuga sing tuman nga pagbinais sa tunga sang katawhan; nga nagahatag sing kahigayunan sa kaaway sang Dios nga maggamit sang iya gahum sa ila.

10 Kag karon natabo ini nga samtang nagalibot sia sa pagguba sang simbahan sang Dios, kay nagalibot sia sing sekreto upod sa mga anak nga lalaki ni Mosias nga nagatinguha sa pagguba sang simbahan, kag sa pagpatalang sang katawhan sang Ginuo, nga batok sa mga kasugoan sang Dios, ukon bisan sang hari—

11 Kag sa nasiling ko na sa inyo, samtang nagalibot sila nga nagarebelde batok sa Dios, tan-awa, ang anghel sang Ginuo nagpakita sa ila; kag nagpanaog sia nga daw yara sa panganod; kag naghambal sia nga daw tingug sang daguob nga nangin rason nga mag-uyog ang duta nga ila ginatindogan;

12 Kag sa pagkadako sang ila kakibot, nga nagkalatumba sila sa duta, kag wala makahangop sang mga pulong nga iya ginhambal sa ila.

13 Apang nagsinggit sia liwat nga nagasiling: Alma, magbangon ka kag magtindog, kay ngaa ginahingabot mo ang simbahan sang Dios? Kay ang Ginuo nagsiling: Ini ang akon simbahan, kag ipahamtang ko ini; kag wala sing kon ano nga magguba sini luwas sa kalapasan sang akon katawhan.

14 Kag sa liwat, ang anghel nagsiling: Tan-awa, nabatian sang Ginuo ang mga pangamuyo sang iya katawhan, kag amo man ang mga pangamuyo sang iya alagad nga si Alma, nga imo amay; kay nagpangamuyo sia nga may dako nga pagtuo parte sa imo nga kabay nga madala ka sa ihibalo sang kamatuoran; gani, para sa amo nga katuyoan nagkari ako agud papatihon ka sang gahum kag awtoridad sang Dios, nga ang mga pangamuyo sang iya mga alagad mahimo nga masabat suno sa ila pagtuo.

15 Kag karon tan-awa, maduhaduhaan bala ninyo ang gahum sang Dios? Kay tan-awa, wala bala ginauyog sang akon tingug ang duta? Kag indi man bala ninyo ako makita sa inyo atubang? Kag ginpadala ako halin sa Dios.

16 Karon ginasiling ko sa imo: Maglakat ka, kag dumduma ang pagkabihag sang imo mga amay sa duta sang Helam, kag sa duta sang Nefi; kag dumduma kon daw ano kadalagko nga mga butang ang iya ginhimo para sa ila; kay yara sila sa pagkaulipon, kag ginhilway niya sila. Kag karon ginasiling ko sa imo, Alma, maglakat ka sa imo dalanon, kag indi na pagtinguhaa nga gub-on ang simbahan, agud nga ang ila mga pangamuyo masabat, kag ini bisan pa kon ikaw sa imo kaugalingon isikway.

17 Kag karon natabo ini nga amo ini ang katapusan nga mga pulong nga ginhambal sang anghel kay Alma, kag nagbiya sia.

18 Kag karon si Alma kag mga kaupod niya nagkalatumba liwat sa duta kay sa pagkadako sang ila kakibot; kay sa ila kaugalingon nga mga mata nakita nila ang isa ka anghel sang Ginuo; kag ang iya tingug pareho sang daguob nga nag-uyog sa duta; kag nahibal-an nila nga wala sing bisan ano luwas sa gahum sang Dios nga makapauyog sa duta kag makapakurog sini nga daw magkalapihak ini.

19 Kag karon ang kakibot ni Alma tuman kadako sa bagay nga nag-apa sia, nga indi na niya mabuksan ang iya baba; huo, kag nagluya sia, bisan nga indi na niya mahulag ang iya mga kamot; gani ginkuha sia sang mga kaupod niya, kag gindala sia nga tuman kaluya, bisan tubtob nga ginbutang sia sa atubang sang iya amay.

20 Kag ginsaysay nila sa iya amay ang tanan nga natabo sa ila; kag nagkasadya ang iya amay kay nahibal-an niya nga gahum yadto sang Dios.

21 Kag nagpasugo sia nga magtililipon ang kadam-an agud masaksihan nila kon ano ang ginhimo sang Ginuo sa iya anak, kag sa mga kaupod man niya.

22 Kag nagpasugo sia nga ang mga pari magtililipon sang ila mga kaugalingon; kag nagsugod sila sa pagpuasa, kag sa pagpangamuyo sa Ginuo nga ila Dios nga buksan niya ang baba ni Alma, nga makahambal sia, kag amo man nga ang iya mga butkon kag mga batiis makabaton sang ila sini kusog—agud mabuksan ang mga mata sang katawhan nga makita kag mahibal-an ang kaayo kag himaya sang Dios.

23 Kag natabo ini, pagkatapos nga nagpuasa sila kag nagpangamuyo sa sulod sang duha ka adlaw kag duha ka gab-i, ang mga butkon kag mga batiis ni Alma nakabaton sang ila sini kusog, kag nagtindog sia kag nagsugod sa paghambal sa ila, nga nagasiling sa ila nga mangin malipayon:

24 Kay, siling niya, naghinulsol ako sang akon mga sala, kag natubos sang Ginuo; tan-awa nabun-ag ako sa Espiritu.

25 Kag ang Ginuo nagsiling sa akon: Indi matingala nga ang tanan nga tawo, huo, mga lalaki kag mga babayi, tanan nga nasyon, kaliwat, lengguahe kag katawhan, kinahanglan gid nga mabun-ag liwat; huo, mabun-ag sa Dios, nga nabag-o halin sa ila dutan-on kag nalaglag nga kahimtangan, sa isa ka kahimtangan sang pagkamatarong, nga natubos sang Dios, nga mangin iya mga anak nga lalaki kag mga anak nga babayi;

26 Kag gani mangin bag-o sila nga mga tinuga; kag luwas lang kon himuon nila ini, indi gid sila makapanubli sang ginharian sang Dios.

27 Ginasiling ko sa imo, luwas lang nga amo sini ang matabo, pat-od gid nga isikway sila; kag ini nahibal-an ko bangod halos masikway ako.

28 Apang, pagkatapos nga nag-ubog sa madamo nga pag-antos, nga nagahinulsol sing halos tubtob sa kamatayon, ang Ginuo sa kaluoy nakakita nga nagakaangay ang pagsabnit sa akon halin sa pagkasunog nga wala’y katubtuban, kag ginbun-ag ako sa Dios.

29 Ang akon kalag natubos halin sa apdo sang kapaitan kag mga gapos sang kalainan. Yara ako sa pinakamadulom nga kadadalman; apang subong ginatamdan ko ang dalayawon nga kasanag sang Dios. Ang akon kalag ginsakit sang wala’y katapusan nga pagpaantos; apang nasabnit ako, kag ang akon kalag wala na sing kasakit.

30 Ginsikway ko ang akon Manunubos, kag ginpanghiwala inang ginpanghambal sang aton mga amay; apang subong agud nga makita na nila nga magakari sia, kag nga ginadumdum niya ang tagsa ka tinuga nga iya gintuga, ipakita niya ang iya kaugalingon sa tanan.

31 Huo, ang tagsa ka tuhod magaluhod, kag ang tagsa ka dila magadayaw sa iya atubang. Huo, bisan sa katapusan nga adlaw, kon ang tanan nga tawo magatindog agud hukman niya, dayon kilalahon nila nga sia ang Dios; dayon kilalahon nila, nga mga nagakabuhi sa kalibutan nga wala nagapati sa Dios, nga ang sentensya sing wala’y katubtuban nga silot matarong para sa ila; kag magauyog sila, kag magapalangurog, kag magapalangupos sa idalom sang pagpasiplat sang iya mapangusisa nga mata.

32 Kag karon natabo ini nga si Alma nagsugod halin sa sini nga tion sa pagtudlo sang katawhan, kag yadtong mga kaupod ni Alma sa tion nga ang anghel nagpakita sa ila, nga nagapanglakaton sa palibot sang bug-os nga kadutaan, nga nagabantala sa tanan nga katawhan sang mga butang nga ila nabatian kag nakit-an, kag nagawali sang pulong sang Dios sa dako nga pag-antos, nga ginhingabot sing tuman sinang mga indi tumuluo, nga ginsakit sang madamo sa ila.

33 Apang sa pihak sini tanan, nagpaambit sila sang dako nga kaumpawan sa simbahan, nga nagapamatuod sang ila pagtuo, kag nagalaygay sa ila sing may pagkamainantuson kag dako nga pagpangabudlay sa pagtuman sang mga kasugoan sang Dios.

34 Kag apat sa ila ang mga anak nga lalaki ni Mosias; kag ang ila mga ngalan amo sanday Amon, kag Aaron, kag Omner, kag Himni; amo ini ang mga ngalan sang mga anak nga lalaki ni Mosias.

35 Kag nagpanglakaton sila sa bug-os nga duta sang Zarahemla, kag sa tanan nga katawhan nga yara sa idalom sang pagginahum ni haring Mosias, nga matutum nga nagatinguha sa pagkaayo sang tanan nga kahalitan nga ila nahimo sa simbahan, nga nagakumpisar sang tanan nila nga sala, kag nagabantala sang tanan nga butang nga ila nakit-an, kag nagapaathag sang mga propesiya kag sang balaan nga mga kasulatan sa tanan nga maluyag nga magpamati sa mga ini.

36 Kag gani nangin mga instrumento sila sa mga kamot sang Dios sa pagdala sang madamo sa ihibalo sang kamatuoran, huo, sa ihibalo parte sa ila Manunubos.

37 Kag daw ano kabulahan sa ila! Kay nagbantala sila sang paghidaet; nagbantala sila sang maayong balita sang kaayohan; kag nagpahayag sila sa katawhan nga ang Ginuo nagahari.