1 Kag sa liwat mga kauturan ko, luyag ko nga tawagon ang inyo igtalupangod kay may dugang pa ako nga inughambal sa inyo; kay tan-awa, may mga butang ako nga isugid sa inyo parte sinang magaabot.

2 Kag ang mga butang nga akon isugid sa inyo ginpahibalo sa akon sing isa ka anghel halin sa Dios. Kag nagsiling sia sa akon: Bugtaw; kag nagbugtaw ako, kag tan-awa nagtindog sia sa akon atubang.

3 Kag nagsiling sia sa akon: Bugtaw, kag pamatii ang mga pulong nga isugid ko sa imo; kay tan-awa, nagkari ako sa pagpahayag sa imo sang maayong balita sang dako nga kalipay.

4 Kay nabatian sang Ginuo ang imo mga pangamuyo, kag napat-od ang imo pagkamatarong, kag ginpadala ako sa pagpahayag sa imo agud mahimo ka magkasadya; kag mahimo ka nga magpahayag sa imo katawhan agud mapuno man sila sang kalipay.

5 Kay tan-awa, ang tion magaabot, kag indi na malayo, nga upod ang gahum, ang Ginuo nga Makagagahum nga nagahari, nga amo sadto, kag amo subong halin sa bug-os nga wala’y katapusan tubtob sa bug-os nga wala’y katapusan, magapanaog halin sa langit sa tunga sang mga anak sang katawhan, kag magapuyo sa isa ka lawas nga dutan-on, kag magalakat sa tunga sang mga tawo, nga nagahimo sang dalagko nga mga milagro, pareho sang pagpaayo sang mga masakiton, pagbuhi sang mga patay, pagpalakat sang mga lupog, paghatag sa mga bulag sang ila panulok, kag paghatag sa mga bungol sang palamatin-an, kag pagpaayo sang tanan nga sari sang balatian.

6 Kag pagatabugon niya ang mga yawa, ukon ang malain nga mga espiritu nga nagapuyo sa mga tagipusuon sang mga anak sang katawhan.

7 Kag yari karon, magaantos sia sang mga pagsulay, kag kasakit sang lawas, gutom, uhaw, kag kakapoy, bisan labaw pa sangsa maantos sang tawo, luwas lang nga ini mangin sa kamatayon; kay tan-awa, ang dugo magagwa halin sa tagsa ka buho-buho sang panit, sa pagkadako sang iya kasakit tungod sang kalainan kag mga kangil-aran sang iya katawhan.

8 Kag pagatawgon sia nga si Jesucristo, ang Anak sang Dios, ang Amay sang langit kag sang duta, ang Tagtuga sang tanan nga butang halin sa ginsuguran; kag ang iya iloy pagatawgon nga si Maria.

9 Kag yari karon, magakari sia sa iya kaugalingon nga katawhan agud nga ang kaluwasan mahimo man nga mag-abot sa mga anak sang katawhan bisan paagi sa pagtuo sa iya ngalan; kag bisan pagkatapos sini tanan pagakabigon nila sia nga isa ka tawo, kag magasiling nga may yawa sia, kag paantuson sia, kag ilansang sia sa krus.

10 Kag magabangon sia sa ika-tatlo nga adlaw halin sa mga minatay; kag tan-awa, magatindog sia sa paghukom sang kalibutan; kag tan-awa, ining tanan nga butang pagahimuon agud ang matarong nga paghukom magaabot sa mga anak sang katawhan.

11 Kay tan-awa, kag ang iya man dugo ang magabayad-sala para sa mga kasal-anan sinang mga nahulog tungod sang paglapas ni Adan, nga nagkalamatay nga wala nakahibalo sang kabubut-on sang Dios parte sa ila, ukon nga wala’y hinalung-ong nga nakasala.

12 Apang kalisud, kalisud sa iya nga nakahibalo nga nagarebelde sia batok sa Dios! Kay ang kaluwasan wala nagaabot bisan kay sin-o luwas lang nga ini paagi sa paghinulsol kag pagtuo sa Ginuong Jesucristo.

13 Kag ang Ginuong Dios nagpadala sang iya balaan nga mga propeta sa tanan nga anak sang katawhan sa pagpahayag sining mga butang sa tagsa ka kaliwat, nasyon, kag lengguahe, nga paagi sa sini ang bisan sin-o nga magpati nga si Cristo magaabot, ang amo man mahimo nga makabaton sang kapatawaran sang ila mga sala, kag magkasadya sa tuman kadako nga kalipay, nga daw pareho nga nag-abot na sia sa ila.

14 Apang ang Ginuong Dios nakakita nga ang iya katawhan isa ka batinggilan nga katawhan, kag naghatag sia sa ila sing isa ka layi, bisan ang layi ni Moises.

15 Kag madamo nga mga tanda, kag mga katilingalahan, kag mga simbolo, kag mga kaanggid ang ginpakita niya sa ila parte sang iya pagkari; kag ang balaan nga mga propeta naghambal man sa ila parte sang iya pagkari; apang ginpatig-a nila ang ila mga tagipusuon, kag wala makahangop nga ang layi ni Moises wala sing kapuslanan luwas lang nga ini paagi sa pagbayad-sala sang iya dugo.

16 Kag bisan pa kon posible nga ang magagmay nga kabataan makasala indi sila maluwas; apang ginasiling ko sa inyo bulahan sila; kay tan-awa, pareho kay Adan, ukon sa kinaugali, mahulog sila, sa amo man ang dugo ni Cristo nagabayad-sala para sa ila mga kasal-anan.

17 Kag dugang pa sina, ginasiling ko sa inyo, nga wala na sing iban pa nga ngalan nga ginhatag ukon bisan ano nga iban pa nga dalan ukon paagi nga sa diin ang kaluwasan mahimo nga makaabot sa mga anak sang katawhan, kundi sa kag paagi lamang sa ngalan ni Cristo, ang Ginuo nga Makagagahum.

18 Kay tan-awa magahukom sia, kag ang iya paghukom matarong; kag ang lapsag nga mapatay sa iya pagkalapsag indi madula; apang ang mga tawo magainom sang silot sa ila kaugalingon nga mga kalag luwas lang nga ipaubos nila ang ila mga kaugalingon kag mangin pareho sang magagmay nga kabataan, kag magpati nga ang kaluwasan amo sadto, kag amo subong, kag magaabot, paagi sa nagabayad-sala nga dugo ni Cristo, ang Ginuo nga Makagagahum.

19 Kay ang kinaandan nga tawo kaaway sang Dios, kag nangin amo na halin sa pagkahulog ni Adan, kag mangin amo sini, sa wala’y katapusan, luwas lang nga magsunod sia sa mga pagpangganyat sang Balaan nga Espiritu, kag ihal-id ang kinaandan nga pagkatawo kag mangin isa ka santos paagi sa pagbayad-sala ni Cristo nga Ginuo, kag mangin pareho sing isa ka bata, nga masinulundon, malulo, mapainubuson, mapainumuron, puno sang gugma, handa sa pagsunod sa tanan nga butang nga ginatan-aw sang Ginuo nga nagakabagay nga ipatuman sa iya, bisan pareho sing isa ka bata nga nagasunod sa iya amay.

20 Kag dugang pa sina, ginasiling ko sa inyo, nga ang tion magaabot nga ang ihibalo parte sa isa ka Manluluwas magalapnag sa tanan nga bahin sang tagsa ka nasyon, kaliwat, lengguahe, kag katawhan.

21 Kag tan-awa, kon mag-abot ina nga tion, wala sing isa nga makita nga wala’y kabasulanan sa atubang sang Dios, luwas sa magagmay nga kabataan, kundi paagi lamang sa paghinulsol kag pagtuo sa ngalan sang Ginuong Dios nga Makagagahum.

22 Kag bisan sa sini nga tion, kon natudloan mo na ang imo katawhan sang mga butang nga ginsugo sa imo sang Ginuo nga imo Dios, bisan pa sa sina nga tion indi sila makit-an nga wala’y kabasulanan sa panulok sang Dios, luwas lamang suno sa mga pulong nga akon ginhambal sa imo.

23 Kag karon nahambal ko na ang mga pulong nga ginsugo sang Ginuong Dios sa akon.

24 Kag amo ini ang ginasiling sang Ginuo: Magatindog ang mga ini bilang isa ka maathag nga testimonya batok sa sini nga katawhan, sa adlaw sang paghukom; nga sa sini sila pagahukman, ang tagsa ka tawo suno sa iya mga binuhatan, kon ang mga ini maayo, ukon ang mga ini malain.

25 Kag kon ang mga ini malain ginatugyan sila sa isa ka makahaladlok nga talan-awon sang ila kaugalingon nga kabasulanan kag mga kangil-aran, nga tunaan sang ila pagpalangupos halin sa presensya sang Ginuo pasulod sa isa ka kahimtangan sang kalisud kag nagapadayon nga pagpaantos, nga halin didto indi na sila makabalik; gani nag-inom sila sang silot sa ila kaugalingon nga mga kalag.

26 Gani, nakainom sila halin sa ilimnan sang kaakig sang Dios, nga ang amo nga hustisya indi makahimutig sa ila pareho nga indi sini mahimutig nga si Adan dapat nga mahulog tungod sang iya pag-ambit sang ginadilian nga bunga; gani, ang kaluoy indi na makaangkon sa ila sa wala’y katapusan.

27 Kag ang pagpaantos sa ila pareho sa isa ka linaw nga kalayo kag asupre, nga ang mga dabadaba sini indi mapalong, kag ang aso sini nagapasaka sa gihapon kag sa gihapon. Amo ini ang ginsugo sa akon sang Ginuo. Amen.