1 Futhi kwenzeka emuva kokuba mina, iNkosi uNkulunkulu, sengibaxoshile, u-Adamu waqala walima umhlabathi, futhi wabusa phezu kwazo zonke izilwane zasendle, futhi wadla isinkwa sakhe ngesithukuthuku sesiphongo sakhe, njengoba mina iNkosi ngangimyalile. Futhi u-Eva, naye, umfazi wakhe, wasebenza naye.

2 Futhi u-Adamu wamazi umfazi wakhe, futhi wamzalela amadodana namadodakazi, futhi baqala banda futhi bagcwalisa umhlaba.

3 Futhi kusuka ngaleso sikhathi, amadodana namadodakazi ka-Adamu aqala ukuhlukana ngababili ezweni, futhi balima izwe, futhi bafuya imihlambi, nabo bazala amadodana namadodakazi.

4 Futhi u-Adamu no-Eva, umfazi wakhe, babiza igama leNkosi, futhi bezwa izwi leNkosi liphuma endleleni eya ngaseNsimini yase-Edene, likhuluma nabo, futhi bangayibona; ngokuba base behlukanisiwe nayo.

5 Futhi wabanika imiyalelo, yokuthi kufanele bakhonze iNkosi uNkulunkulu wabo, futhi nokuthi kufanele banikele ngamazibulo emihlambi yabo, ukuze kube ngumnikelo kuNkulunkulu. Futhi u-Adamu wayi thobela imiyalelo yeNkosi.

6 Futhi emuva kwezinsuku eziningi ingelosi yeNkosi yavela ku-Adamu, ithi: Unikelelani iminikelo eNkosini na? Futhi u-Adamu wathi kuye: Angazi, ngaphandle kokuthi iNkosi ingiyalile.

7 Futhi ingelosi yakhuluma, ithi: Lokhu kufana no mnikelo woZelwe Yedwa kaBaba, ogcwele umusa neqiniso.

8 Ngalokho-ke, wokwenza konke okwenzayo egameni leNdodana, futhi wo phenduka ubize uNkulunkulu egameni leNdodana ingunaphakade.

9 Futhi ngalolosuku uMoya oNgcwele wehlela phezu kuka-Adamu, owafakaza ngoBaba neNdodana, uthi: Ngingo Zelwe Yedwa kaBaba kusuka ekuqaleni, kusuka namanje futhi naphakade, ukuthi njengoba niwile ninga hlengwa, futhi wonke umuntu, ngisho abaningi abayothanda.

10 Futhi ngalolo suku u-Adamu wambonga uNkulunkulu futhi wa gcwaliswa, futhi waqala ukuphrofetha ngokuphathelene nayo yonke imindeni yasemhlabeni, ethi: Libusisiwe igama likaNkulunkulu, ngokuba ngenxa yesiphambeko sami amehlo ami avulekile, futhi kulempilo ngiyoba nokujabula, futhi ngizophinda enyameni ngimbone uNkulunkulu.

11 Futhi u-Eva, umfazi wakhe, wazizwa zonke lezi zinto futhi wajabula, ethi: Ukuba kwakungave kungenxa yesiphambeko sethu sasingeke siyithole inzalo, futhi sasingeke sazi okuhle nokubi, nenjabulo yokuhlengwa kwethu, nokuphila okuphakade uNkulunkulu akunika bonke abalalelayo.

12 Futhi u-Adamu no-Eva balibusisa igama likaNkulunkulu, futhi bazembula zonke izinto kumadodana abo nakumadodakazi abo.

13 Futhi uSathane weza phakathi kwabo, ethi: Nami futhi ngiyindodana kaNkulunkulu; futhi wabayala, ethi: Ningakukholwa; futhi bangakukholwa, futhi bamthanda uSathane ngaphezu kukaNkulunkulu. Futhi abantu baqala kusuka ngaleso sikhathi ukunaka inyama, ukuthokozisa imizwa, nokuba nobudeveli.

14 Futhi iNkosi uNkulunkulu yababiza abantu ngo Moya oNgcwele yonke indawo futhi yabayala ukuthi baphenduke;

15 Futhi ngobuningi kwabakholwa yiNdodana, futhi bephenduka ezonweni zabo, kufanele basindiswe; futhi ngobuningi kwabangakholwa futhi bengaphenduki, kufanele babe ngaphansi kwamandla kaSathane; futhi lamazwi aphuma emlonyeni kaNkulunkulu ngesimemezelo esiqinile; ngalokho-ke kufanele agcwaliseke.

16 Futhi u-Adamu no-Eva, umkakhe, abayekanga ukubiza uNkulunkulu. Futhi u-Adamu wamazi u-Eva umfazi wakhe, wakhulelwa wazala uKayini, futhi wathi: Ngifumene indoda eNkosini; ngalokho-ke akufanele iwenqabe amazwi ayo. Kodwa bheka, uKayini akalalelanga, ethi: Ingubani iNkosi ukuthi kufanele ngiyazi na?

17 Futhi waphinde wakhulelwa wazala umfowabo u-Abela. U-Abela walilalela izwi leNkosi. Futhi u-Abela wayengumalusi wezimvu, kodwa uKayini wayengumlimi womhlabathi.

18 Futhi uKayini wathanda kakhulu uSathane kuno Nkulunkulu. USathane wamyala, ethi: Letha umnikelo eNkosini.

19 Ngokuhamba kwesikhathi kwenzeka ukuthi uKayini waletha isithelo zomhlabathi zaba umnikelo eNkosini.

20 Futhi u-Abela, naye waletha amazibulo emfuyo yakhe, futhi ezinonileyo zazo. Futhi iNkosi yanaka u-Abela, nomnikelo wakhe;

21 Kodwa kuKayini, nomnikelo wakhe, akawunakanga. Manje uSathane wayekwazi lokhu, futhi kwamthokozisa. Futhi uKayini wathukuthela kakhulu, nobuso bakhe banyukubala.

22 Futhi iNkosi yathi kuKayini: Uthukutheleleni na? Ubuso bakho bunyukubeleleni na?

23 Uma wenza kahle, uyo kwemukeleka. Futhi uma ungenzi kahle, isono silinde emnyango, futhi uSathane ufuna ukukuzuza; ngaphandle kokuba ulalele imiyalelo yami, ngizokunikela, futhi kuyoba kuwe njengokwezifiso zakhe. Futhi wena uzobusa phezu kwakhe;

24 Ngokuba kusuka ngalesi sikhathi uyoba ngubaba wamanga akhe; uyobizwa ngo kuLahlwa; ngokuba nawe wawukhona umhlaba ungakabi bikho.

25 Futhi kuyothiwa esikhathini esizayo—lezi zinengiso zatholwa kuKayini; ngokuba wasenqaba iseluleko esikhulu esasiphuma kuNkulunkulu; futhi lesi yisiqalekiso engiyosibeka phezu kwakho, ngaphandle uma uphenduka.

26 Futhi uKayini wathukuthela, futhi wangaphinde walilalela izwi leNkosi, noma lika-Abela, umfowabo, owayehamba ngokungcwele phambi kweNkosi.

27 Futhi u-Adamu nomfazi wakhe balila phambi kweNkosi, ngenxa kaKayini nabafowabo.

28 Futhi kwenzeka ukuthi uKayini wathatha enye yamadodakazi amfowabo wayenza umfazi wakhe, futhi bathanda uSathane kakhulu kuno Nkulunkulu.

29 Futhi uSathane wathi kuKayini: Funga kimi ngomqala wakho, uma ukuveza lokhu uyokufa; futhi fungisa abafowenu ngamakhanda abo, nangoNkulunkulu ophilayo, ukuthi ngeke bakuveze lokhu, ngokuba uma bekuveza, bayokufa nokufa; futhi lokhu ukuze uyihlo angakwazi; futhi ngalolusuku ngizomletha umfowenu u-Abela ezandleni zakho.

30 Futhi uSathane wafunga kuKayini ukuthi uyokwenza ngokwemiyalelo yakhe. Zonke lezi zinto zenziwa ngasese.

31 Futhi uKayini wathi: Ngempela nginguMahani, ingcweti yalemfihlo enkulu, yokuthi nginga bulala futhi ngizuze. Ngalokho-ke uKayini wabizwa nge Ngcweti uMahani, futhi waziqhayisa ngobubi bakhe.

32 Futhi uKayini waya yehlane, wakhuluma no-Abela, umfowabo. Futhi kwenzeka ukuthi ngesikhathi besehlane, uKayini wamhlasela u-Abela, umfowabo, futhi wambulala.

33 Futhi uKayini waziqhayisa ngalokho ayekwenzile, ethi: Sengikhululekile; impela imihlambi yomfowethu iwela ezandleni zami.

34 Futhi iNkosi yathi kuKayini: Uphi u-Abela, umfowenu na? Futhi wathi: Angazi. Ngabe ngingumvikeli womfowethu na?

35 Futhi iNkosi yathi: Wenzeni na? Izwi legazi lomfowenu liyakala kimi lisemhlabathini.

36 Manje uyoqalekiswa ngokuphathelene nomhlabathi ovule umlomo wawo ukwamukela igazi lomfowenu elivela esandleni sakho.

37 Uma ulima umhlabathi kusuka manje awusayikukunika ngamandla awo. Uyoba ngumhambuma nozulane emhlabeni.

38 Futhi uKayini wathi eNkosini: USathane ungilingile ngenxa yemihlambi kamfowethu. Futhi ngaphinda ngathukuthela; ngokuba wawemukela umnikelo wakhe hhayi owami; isijeziso sami sikhulu kunokuba ngikwazi ukusithwala.

39 Bheka namuhla ungixoshile ebusweni beNkosi, futhi ebusweni bakho ngiyocashiswa; futhi ngiyoba ngumhambuma nozulane emhlabeni; futhi kuyokwenzeka, ukuthi ongitholayo uyongibulala, ngenxa yobubi bami obukhulu, ngokuba lezi zinto azifihliwe eNkosini.

40 Futhi mina iNkosi ngathi kuye: Noma ngubani okubulalayo, kuyophindiselwa kuye kasikhombisa. Futhi mina iNkosi ngabeka uphawu kuKayini, funa omtholayo ambulale.

41 Futhi uKayini wabe esesuswa eduze neNkosi, futhi umfazi wakhe nabafowabo abaningi bahlala ezweni laseNodi, ngasempumalanga yase-Edene.

42 Futhi uKayini wamazi umfazi wakhe, futhi wakhulelwa wazala u-Enoke, futhi naye wazala amadodana namadodakazi amaningi. Futhi wakha idolobha, futhi waliqamba lelo dolobha ngegama lendodana yakhe u-Enoke.

43 Futhi ku-Enoke kwazalwa u-Irade, namanye amadodana namadodakazi. Futhi u-Irade wazala uMahujayele, namanye amadodana namadodakazi. Futhi uMahujayele wazala uMetushayele, namanye amadodana namadodakazi. Futhi uMetushayele wazala uLameka.

44 Futhi uLameka wazithathela abafazi ababili; igama lomunye lalingu-Ada, igama lomunye lalinguSila.

45 Futhi u-Ada wazala uJabale; waba nguyise walabo ababehlala ematendeni, futhi babefuya imfuyo; futhi igama lomfowabo lalinguJubale, yena waba nguyise wabo bonke ababephatha ihabhu nogubhu.

46 Futhi uSila, naye wazala uThubali-Kayini, owayengumfundisi wazo zonke izinto zethusi nezensimbi. Futhi udade wabo kaThubali-Kayini wayebizwa ngoNahama.

47 Futhi uLameka wathi kubafazi bakhe, u-Ada noSila: Yizwani izwi lami, nina bafazi baLameka, lalelani inkulumo yami; ngokuba ngibulale umuntu futhi kuyisilonda kimi.

48 Uma uKayini eyophindiselelwa kasikhombisa, impela uLameka kuyoba ngamashumi ayisikhombisa nesikhombisa;

49 Ngokuba uLameka esengenile kuso isivumelwano noSathane, ngendlela kaKayini, ngaso aba yiNgcweti uMahana, ingcweti yaleyo mfihlo enkulu eyanikwa uKayini nguSathane; futhi u-Irade, indodana ka-Enoke, eseyazile imfihlo yabo, waqala ukuyembula emadodaneni ka-Adamu;

50 Ngalokho-ke uLameka, ethukuthele, wambulala, hhayi njengoKayini, umfowabo u-Abela, ukuze azuze, kodwa wambulala ngenxa yesifungo.

51 Ngokuba, kusuka ngezinsuku zikaKayini, kwakuno zungu, futhi imisebenzi yabo yayingeyobumnyama, futhi wonke umuntu wayemazi umuntu wakubo.

52 Ngalokho-ke iNkosi yamqalekisa uLameka, nendlu yakhe, nabo bonke ababevumelene noSathane; ngokuba abayigcinanga imiyalelo kaNkulunkulu, futhi akumthokozisanga uNkulunkulu, futhi akabasebenzelanga, nemisebenzi yabo yayiyizinengiso, futhi yaqala yanda phakathi kwawo wonke amadodana abantu. Futhi lolu zungu lwaba phakathi kwamadodana abantu.

53 Futhi phakathi kwamadodakazi abantu lezi zinto zazingakhulunywa, ngokuba uLameka wayekhulume ngale mfihlo kubafazi bakhe, futhi bamvukela, futhi bazimemezela kude lezi zinto, futhi babengenalo uzwelo.

54 Ngalokho-ke uLameka wadeleleka, futhi walahlwa, futhi wangeza phakathi kwamadodana abantu, funa afe.

55 Futhi ngalendlela imisebenzi yo bumnyama yaqala ukubusa phakathi kwawo wonke amadodana abantu.

56 Futhi uNkulunkulu wawuqalekisa umhlaba ngesiqalekiso esibuhlungu, futhi wayebathukuthelele ababi, wonke amadodana abantu ayewenzileyo;

57 Ngokuba babengafuni ukulilalela izwi lakhe, noma bakholwe yi Ndodana eZelwe Yodwa yakhe, ngisho lowo amemezela ukuthi kufanele eze maphakathi nesikhathi, owayelungiswe ngaphambi kokusekelwa komhlaba.

58 Futhi ngenxa yalokhu iVangeli laqala ukushunyayelwa, kusuka ekuqaleni, limenyezelwa yizingelosi ezingcwele ezazithunywe zisuka phambi kukaNkulunkulu, nangezwi lakhe uqobo, nangesipho sika Moya oNgcwele.

59 Futhi ngalendlela zonke izinto zaqiniswa ku-Adamu, ngesimiso esingcwele, neVangeli lashunyayelwa, nomyalelo wathunyelwa, ukuthi iVangeli kufanele libe semhlabeni, kuze kube sekupheleni kwawo; futhi kwaba njalo. Amen.