ʻOku Taki ʻe Palaiteni ʻa e Halá
ʻOku nofo ʻa e taha naʻá ne faʻú ʻi Kalefōnia, USA.
Naʻe hoko ʻa e talanoá ni ʻi Luisiana, USA.
Naʻe fakafiefia ʻa e moʻui ʻi he faama kalokatailé. Ka naʻe ʻi ai ha meʻa ne ʻikai ʻi ai.
“Ka ke ʻi he kakai tuí ko e fakaʻilonga” (1 Tīmote 4:12).
Naʻe taki atu ʻe Palaiteni mo e Tangataʻeikí ha ʻū kane meʻakai mamafa maʻá e fanga kalokatailé ki he feituʻu faiʻanga fafangá. Naʻe ʻasi hake ki ʻolunga e tumuʻaki ʻo e ʻulu ʻo e fanga kalokatailé pea tētē atu kiate kinaua. ʻI he aʻu ʻa Palaiteni mo e Tangataʻeikí ki he feituʻu fafangaʻangá, ne ʻosi fakamanga mai pē e ngutu ʻo e niʻihi ʻo e fanga kalokatailé.
Ka naʻe ʻikai ilifia ʻa Palaiteni ia. Ko e ngāue mo e Tangataʻeikí ʻi he faama kalokatailé ʻa e lelei tahá.
“Ko e taimi fafangá ʻeni!” Ko Palaiteni ange ia. Naʻá ne tata hake ha meʻakai ʻo laku ki he loto vaí.
Tumu. Tumu. Pālutu.
Naʻe ʻi ai ha niʻihi ʻo e fanga kalokatailé, naʻa nau maʻu pē ʻa e meʻakaí ʻi he ʻataá. Naʻe ʻi ai ha niʻihi naʻa nau ʻoho ki ai ʻi heʻene patō ki he vaí. Naʻe laku pē ʻe Palaiteni mo e Tangataʻeikí ʻa e meʻakaí kae ʻoua kuo ʻosi loua ʻena kané.
“Mālō hoʻo tokoni maí,” ko e tangataʻeikí ange ia. “Ta ʻalu ā. ʻE vave pē e omi ʻa e ongo faifekaú.”
Naʻe kamata ʻa e talanoa ʻa Palaiteni mo hono fāmilí mo e ongo faifekaú ʻi ha ngaahi māhina siʻi kuohilí. Naʻá ne saiʻia ʻi he ongo faifekaú! Pea naʻá ne saiʻia ʻi he ako fekauʻaki mo e Siasí. Ko e tangataʻeikí ko e mēmipa ia ʻo e Siasí, ka naʻe ʻikai ke faʻa ʻalu ia ki he lotú. Naʻe teʻeki pē ke papitaiso ʻa e Fineʻeikí mo Palaiteni.
Naʻe pehē ange ʻe Sisitā Koki ʻi he efiafi ko iá, “Naʻá ke fokotuʻu ha taumuʻa ʻi he uike kuo ʻosí ke lau ʻa e Mōsaia 18.” “Naʻe fēfē ia?”
Naʻe fesiofaki ʻa e Fineʻeikí mo e Tangataʻeikí peá na kiʻi fakalongolongo ʻi ha kiʻi taimi siʻi. “Naʻa mau moʻua ʻi he uiké ni,” ko e Fineʻeikí ange ia.
“Naʻá ku lau ia!” Ko Palaiteni ange ia.
“Fakaʻofoʻofa ʻaupito!” Ko Sisitā Palati ange ia, mo kakapa atu ke tā nima. “Ko e hā hoʻo ongo ʻi he hili hoʻo lau iá?”
Naʻe malimali ʻa Palaiteni. “Sai ʻaupito. Pea naʻá ku lotua fekauʻaki mo e papitaisó. ʻOku ou fuʻu fie papi au ia.”
“ʻOku lelei ia! ʻOku ou ʻiloʻi ʻoku fiefia ai ʻa e Tamai Hevaní,” ko Sisitā Koki ange ia. Naʻá ne tafoki ki he fineʻeiki ʻa Palaitení. “Ko e hā hoʻo ongoʻi fekauʻaki mo iá?”
“ʻOku teʻeki ke u fakapapauʻi. Mahalo ʻoku ou kei fie maʻu pē ha taimi lahi ange,” ko e Fineʻeikí ange ia.
Naʻe ongoʻi lotomamahi ʻa Palaiteni ʻi he toenga ʻo e lēsoní. Naʻá ne fakaʻamu ko ha mēmipa loua ʻene ongo mātuʻá ʻi he Siasí. Pea naʻá ne fie hoko foki ko ha mēmipa ʻo e Siasí!
ʻI he taimi naʻe ʻalu ai ʻa e ongo faifekaú, naʻá ne fakahā ange ki heʻene ongomātuʻá naʻá ne fakamātoato ʻi heʻene lea kimuʻá. “ʻOku ou fuʻu fie papitaiso. Pea … ,“ Naʻe fakamānava loloa ʻa Palaiteni. “ʻOku ou fie maʻu lahi ʻa e Tangataʻeikí ke ne papitaiso au.”
Hili ha kiʻi momeniti siʻi, ne lea hake ʻa e Tangataʻeikí. “ʻOku ou fie maʻu lahi pē mo ia.”
Naʻe fakalongolongo pē ʻa e Fineʻeikí. “Tau lotua ia.”
Ne tūʻulutui hifo ʻa Palaiteni mo hono fāmilí ʻo fehuʻi ki he Tamai Hēvaní pe ʻoku totonu ke ne papitaiso mo e Fineʻeikí. Naʻá ne ongoʻi māfana mo ʻofeina.
ʻI he ngaahi uike siʻi hono hokó, naʻe lau ʻe Palaiteni e ngaahi folofolá mo lotua ʻi he ʻaho kotoa pē. ʻI he kamataʻangá, ko ia pē naʻá ne kole ki heʻene ongomātuʻá ke nau lotu mo laukonga fakatahá. Ka naʻe vave pē ʻa ʻena kamata ke kole kiate iá. ʻI he taimi naʻá ne fafanga ai mo ʻene Tangataʻeikí ʻa e fanga kalokatailé, naʻá na talanoa ai fekauʻaki mo e ngaahi folofolá pe ko e meʻa naʻá na ako ʻi he lotú. Naʻá na faʻa talanoa mo e Fineʻeikí fekauʻaki mo e ngaahi lēsoni ʻa e faifekaú. Naʻe hā ngali fiefia ange ʻa e Fineʻeikí mo e Tangataʻeikí ʻi he ʻaho kotoa pē.
ʻI ha ʻaho ʻe taha lolotonga ʻa e lēsoni mo e ongo faifekaú, ne lea ʻaki ʻe he Fineʻeikí ʻa e kupuʻi lea ne fiu tali ki ai ʻa Palaitení: “ʻOku ou fie papitaiso.”
ʻI he ngaahi uike ne hokó, ne ongoʻi ʻe Palaiteni hangē naʻá ne tētē pē he ʻaó.
Faifai, pea aʻu ki he ʻaho papitaiso ʻo e Fineʻeikí mo Palaitení. ʻI he taimi ne hake ai ʻa Palaiteni mei he vaí, naʻá ne ongoʻi ʻa e ʻofa ʻa e Tāmai Hēvaní ʻiate ia mo hono fāmilí. Naʻá ne fāʻofua ki heʻene Tangataʻeikí.
Naʻe puke mai ʻe he Tangataʻeikí ʻa Palaiteni pea fanafana ange, “Fakamālō atu ʻi hoʻo hoko ko ha faʻifaʻitakiʻanga leleí mo hoʻo tokoniʻi kimauá. ʻOku ou ʻofa atu.”
Tā fakatātā ʻa C.B. Canga