Kaumeʻa ki he Kaumeʻa
Ko e Fehu‘i Tefito ‘i he Va‘inga Teka Pulú (Bowling)
Mei ha ‘initaviu mo Sitinī Sikuaea.
Naʻe hiki hoku fāmilí ʻi he taimi naʻá ku kalasi ono aí. Naʻe ʻikai ke Siasi ha toko taha ʻo hoku ngaahi kaungāmeʻa foʻoú.
ʻI he ʻaho Sāpate ʻe taha, naʻe tā mai hoku kaungāmeʻá. Naʻá ne fie maʻu ke u ʻalu ange ʻo vaʻinga teka pulu mo ia mo ʻene ongomātuʻá ʻi he efiafi ko iá. Naʻe tuʻo taha pē ʻeku vaʻinga teka pulu kimuʻa, pea ne u saiʻia ai. ʻE fakafiefia ke u toe vaʻinga teka pulu, tautefito mo hoku kaungāmeʻa foʻoú. Naʻá ku ʻalu leva ʻo kole ki heʻeku faʻeé.
Naʻá ne pehē mai, “Ko e ʻaho Sāpate ʻeni, ko ia ai ʻoku ʻikai ke u tui ʻoku totonu ke ke ʻalu. Ka te ke lava ʻo fakahoko haʻo fili pē ʻaʻau.”
Naʻá ku ʻohovale! Naʻá ku fakakaukau te ne tali ʻikai mai. Ka naʻá ne tuku mai ke u fai pē ʻe au ʻa e filí. Ko ia ne u fili ke u ʻalu ʻo vaʻinga teka pulu mo hoku kaungāmeʻá.
Naʻe taimi siʻi pē kuó u aʻu atu mo hoku kaungāmeʻá, mo ʻene ongomātuʻá ki he faiʻanga teka pulú. Naʻe lelei ʻaupito ʻeku vaʻingá! Naʻá ku fiefia mo hoku kaungāmeʻá. Ka ʻi he kotoa ʻo e taimi naʻá ma vaʻinga aí, naʻá ku ongoʻi halaia pē. Naʻá ku ʻiloʻi ʻi hoku lotó naʻe tonu ʻeku fineʻeikí. Naʻá ku ako ʻi he lotú mo ʻapi, ʻoku mahuʻinga hono tauhi ʻo e ʻaho Sāpaté ke māʻoniʻoní. Naʻe ʻikai ko e ʻekitivitī lelei taha ki he ʻaho Sāpaté ʻa e ʻalu mo hoku kaungāmeʻá ʻo vaʻinga teka pulú.
Naʻá ku ako ʻi he ʻaho ko iá, ha lēsoni mahuʻinga. ʻOku lelei ke fiefia mo hotau ngaahi kaungāmeʻá! Ka ʻoku mahuʻinga ange ʻa e fili ke tauhi ʻa e ʻaho Sāpaté ke makehé.
Tā fakatātā ʻa Jim Madsen